Mata 6
6
Yéésù sán nɛ́b bəd in, in aa nɛ́ŋə̀ dá nɛ́b búúd bə̀ bəd piìn də yílú
1Yéésù tə́ diìn nɛ́b bəd in sáànmbə̀ ní, bàà bə̀: «Ìì gú' yíl íí kə̀ nɛɛ̀n aa íí tə́ sɔ̀ɔ̀nkè ma'ǹ dú roó; kàandə, íí Vɛnɛ́b yɛbá. Íí tə́ nɛ́b búúd bə̀ bəd in piìn gə́, ìì ì' nɛ́b kambəd boò bé' sí, bɔ̀b boò gàb sɔ̀ɔ̀nkè bəraa íí tə́ ma'ǹ də sí. Íí ì' nɛ́b kambəd bé'ì gə́, íí bɔ̀b mú'sɛ̀l dùm Báá íí aa lɛgə́ paà rə naà gá.
2«Màìgə́ ń tə́ nɛ́b búúd bə̀ in piìn gə́, ǹ íl yaa gà', bít dɛ̀d ǹ wál nɛ́b bəd boò gàb kə̀ kùrú, ń tə́ nɛ́ŋə̀ in piinàá, kìínmbə̀ nɛ́b gú' bàrə̀b bə̀ bəd mà' bə̀ tə́ sáàn Yahudu bəd wúlwáàlbə̀ bərú, bít kə̀ kpaŋ̀ gú' bərə kíin sí. Bə̀ mà' kàandə, bə̀ sàà nɛ́b bəd boò káŋ bənə́ kúnú. Zá máá gə́, mə́ tə́ ii kíìn baanàá, nwɔŋ sɔ̀ɔ̀ná, nɛ́b aarə, ìì bɔ̀b mú'sɛ̀l dùm boò yàá. 3Zá màìgə́ ń tə́ nɛ́b búúd bə̀ bəd in piìn gə́, nɛ́ŋə̀ nə́ŋ̀ ɔ̀d oò gàb in aa ń tə́ nɛ́d búúd bə̀ bəd piìn də sí, 4bɔ̀b in aa ń tə́ nɛ́b búúd bə̀ bəd piìn də, oò kùm mə́'keá. Bít Báá ḿ Vɛnɛ́b aa lɛgə́ paà, bé' sáá in gə́ kóólé, zɔ̀ŋ mə́'ke rú rə, dá n sə̀n mú'sɛ̀l dùm ḿ də káàn bí'nàá.»
Yéésù sán nɛ́b bəd in, Vɛnɛ́b nyɛɛ̀mbə̀ yílú
(Luka 11.2-4)
5«Màìgə́ íí tə́ Vɛnɛ́b nyɛɛ̀m gə́, ìì kùm kìínmbə̀ nɛ́b gú' bàrə̀b bə̀ bəd kíin sí. Boò gə́, í' bə̀ sáá diìnmbə̀ lɛgú, Vɛnɛ́b nyɛɛ̀mbə̀ taà Yahudu bəd wúlwáàlbə̀ bərú, bít kə̀ kpaŋ̀ gabsə́ ba, bɔ̀b nɛ́b bəd boò bé' bənə́ kúnú. Mə́ tə́ ii kíìn baanàá, aarə nwɔŋ sɔ̀ɔ̀ná, nɛ́b aarə, ìì bɔ̀b mú'sɛ̀l dùm boò yàá. 6Zá ń tə́ Vɛnɛ́b nyɛɛ̀m gə́, ǹ pìì ám wúu, ǹ ke' waàl lú, bít ǹ nyɛ̀m Báá ḿ Vɛnɛ́b aa kùm zɔ̀ŋ mə́'ke rú wərə̀ kə̀ ám tə́ roó. Bít Báá ḿ aa bé' sáá in gə́ kóólé, zɔ̀ŋ mə́'ke rú rə, dáá ǹ sə̀n mú'sɛ̀l dùm ámbə̀ rə ká'nàá.
7«Íí tə́ Vɛnɛ́b nyɛɛ̀m gə́, ìì gám nwɔŋ bəd zùúm, kìínmbə̀ nɛ́b aa bə̀ bàg Vɛnɛ́b síndə kíin sí. Boò gə́, bə̀ sèl gə́, bənə́ gáamnə́ nwɔŋì gbà'ákù yée gə́, Vɛnɛ́b dá bənə́ taà kiinàá. 8Aí gə́, ìì mà' kə̀ boò kíin sí; kàandə, Báá íí Vɛnɛ́b gàb in aa íí ɔ̀d də yàá, bɔ̀b bə́ŋ̀ íí nyɛ̀mə̀ sínmá. 9Ìì ɛ̀g nɛɛ̀n aa íí dáù nyɛɛ̀m dú roó:
‹Báá bə́ aa lɛgə́ paà roó,
nə́gə́l ámbə̀ oò kùm gìdńná.
10Yaà ǹ ləə gààd nɛ́b bəd tɛ́mú, zɔ̀ŋə yɛ́b ba.
Í'sɛ̀l ámbə̀ oò ma'míìn zɔ̀ŋə yɛ́b ba,
kìínmbə̀ lɛgə́ paà kíni.
11Bə́ nyɛɛ̀m m̀ pii bə́ inlíìnmbə̀ nyà'aa yée bìá.
12Lɛ́' ǹ dàà bə́ invaksə́ bəraa bə́ mà' roó,
kìínmbə̀ obə́ kɔ̀ bə́ tə́ invaksə́ bəraa nɛ́b bəd bə̀ mà' bə́ rə
lɛ́'ǹ daàn də kíin.
13Bít ǹ dàà bə́ báà pìì inzááke rú sí,
zá ǹ vú' bə́ Nɛ́ŋə̀ Vaksə́ nɛɛ̀n tɛ́mú.›
14«Kə̀ aakíin də, dáà lɛ́' íí dàà nɛ́b bəd invaksə́ aa bə̀ mà' ii rəì gə́, Báá íí aa lɛgə́ paà rə kɔ̀, lɛ́' dá ii invaksə́ aa íí mà'ù rə kíìn daàn kɔ̀. 15Zá dáà lɛ́' íí dàà nɛ́b bəd invaksə́ aa ìì mà' ii rə síngə́, Báá íí lɛgə́ paà bə̀ kɔ̀, lɛ́' dàà ii invaksə́ bəraa íí mà' rə gá.»
Yéésù sán nɛ́b bəd in, in gídǹmbə̀ yílú
16«Màìgə́ íí tə́ in gídǹ gə́, ìì tab gbə̀' rú, kìínmbə̀ nɛ́b gú' bàrə̀b bə̀ bəd kíin sí. Boò gə́, kùl ìì bɛ́' gbə̀' naú, bə̀ ì' nɛ́b bəd bənə́ tə́ənnə́ in gíràá. Mə́ tə́ ii kíìn baanàá, aarə nwɔŋ sɔ̀ɔ̀ná, nɛ́b aarə, ìì bɔ̀b mú'sɛ̀l dùm boò yàá. 17Zá ám gə́, ń tə́ in gídǹ gə́, ǹ zà' urdi kílə́m ám yíləsú, bít ǹ sùg núù ń oò kùm nyɛdkèá, 18bɔ̀b nɛ́b bəd boò gàb, ń tə́ in gídǹ sí. Zá Báá ḿ Vɛnɛ́b aa kùm zɔ̀ŋ mə́'ke rú wərə̀ kə̀ ám tə́ rə, dá sə̀n gabàá, bít Báá ḿ Vɛnɛ́b aa bé' sáá in gə́ kóólé, zɔ̀ŋ mə́'ke rú rə, dá n sə̀n mú'sɛ̀l dùm ḿ də káàn bí'nàá.»
Gbaŋə̀ lɛgə́ paà bə̀ bərá
(Luka 12.33-34)
19«Sàà ìì wál gbaŋə̀ bəd zɔ̀ŋə yɛ́b aa, nyɛ̀ŋ kə̀ barə̀ bəd tá, líí bə̀ dá yɛɛ̀l ba, bít kə̀ zɔ̀ŋ aa lííro bəd sàb bə̀ dá wúl tu'ǹ, bít bə̀ dá bɔɔ̀n pú'ǹ bərə sí. 20Zá ìì dìì gbaŋə̀ bəraa Vɛnɛ́b yiìl lɛgə́ paà rə saàn wáàlǹmbìá, zɔ̀ŋ aa nyɛ̀ŋ kə̀ barə̀ bəd tá, líí bə̀ yɛ̀l bə gá, zɔ̀ŋ aa lííro bəd bə̀ kɛ̀d waàl bə, bít bɔ̀n bə̀ púú in bəd bə gá roó. 21Kàandə, zɔ̀ŋ aa gbaŋə̀ ń ləə bərə, tɛ́m ámbə̀ kɔ̀ ləə tə́ zɔ̀ŋ aarə ba.»
Laa nyɛdkè sisú bìá
(Luka 11.34-36)
22«Núù ḿ bəd tə́ kìínmbə̀ lampə̀ sisú bə̀ kíni' Sɛŋ aa núù ń tə́ gaŋsə́ ní rə, si' ń kə̀ zɔ̀ŋtá, tə́ zɔ̀ŋ nyɛdkè rú. 23Zá sɛŋ aa núù ń gaŋsə́ síndə, si' ń kə̀ zɔ̀ŋtá, tə́ tígə́lú. Bít dáà laa nyɛdkè aa ń naà rə, fə́' kùmì tígə́l gə́, tígə́l aarə, dá kuùm gbàákù!»
Bagǹmbə̀ Vɛnɛ́bá, sínkɔ̀ basá
(Luka 16.13)
24«Nɛ́ŋə̀ nə́ŋ̀má bán báátììkpɛ̀ŋ iirə tù' ma'ǹmbə̀ gá. Kə̀ aakíin də, dá nə́ŋ̀ zeenàá, bít dá ɔ̀d nə́ŋ̀ í'nàá, sínkɔ̀ dááráàn pe'ǹ kə̀ nə́ŋ̀ tá, bít dá nə́ŋ̀ ná'nàá. Íí bán Vɛnɛ́b tù' ma'ǹ wáàlǹmbə̀ sɛŋ nə́ŋ̀ní, kə̀ ba' tù' tə́ gá.»
Tɛ́m zígǹmbə̀ Vɛnɛ́b naú
(Luka 12.22-31)
25«Kə̀ taàbìá, mə́ tə́ ii taà baanàá' ìì lɔ̀b tɛ́m inlíìnmbə̀ bə, bít kə̀ in aa íí dá nyəə̀n, íí dá kə̀ gɔ̀ŋsə́ kò'ǹ də bə sí, sínkɔ̀ ìì lɔ̀b tɛ́m gɔ̀' bəraa íí dá páàn sisú rə bə sí. Gɔ̀ŋsə́ kànsə̀n inlíìnmbə̀ kə̀ pɛ̀sá, bít si' kɔ̀ kànsə̀n gɔ̀' bəd kə̀ pɛ̀sá. Íí gàb aarə sínì? 26Ìì ɛ̀g núú lɛgə́ paà bə̀ bərá. Bə̀ wùù inluùm gá, ìì kɛ̀d in nə́ŋ̀má gá, bít wál bə̀ zíg in nə́ŋ̀má bɔ̀ɔ̀nú gá kɔ̀. Zá Báá íí lɛgə́ paà bə̀ zàn bə̀ kíìn kóólé! Íí kàn núú lɛgə́ paà bə̀ kə̀ pɛ̀sə́ sínì? 27Bít nɛ́ɛ̀réè aí tə́ŋú, dá taà báàn gɔ̀ŋsə́ oò búúdǹmbə̀ zɔ̀gɔ̀, kə̀ tɛ́m lɔbké oò gú? Nɛ́ŋə̀ nə́ŋ̀má sé.
28«Bít kə̀ níìbə̀ íí tə́ taà tɛ́m lɔbm̀ gɔ̀' nwɔŋ bòórú gú? Ìì ɛ̀g bə́ŋ̀ téélaan bəraa lad lɛsú rə ge, bə̀ mà' tù' gá, bít bə̀ tèè gɔ̀' bəd kɔ̀ gá. 29Zá mə́ tə́ ii kíìn baanàá, kóó Salomon kə̀ kaŋsɛ́l oò gààrú bə̀ tə́ kóólé, páá gɔ̀' sɔ̀ɔ̀nkè nə́ŋ̀ də́ŋ kə̀ téélaan bəraa sé. 30Fɔ̀g bəraa nyà'aa ìì tə́ diìn lɛsú, nwúndù kɔ̀ bə̀ dá bə̀ lɛ́ɛ̀l laarú rə má, Vɛnɛ́b páá bə̀ gɔ̀' sɔ̀ɔ̀nkè bəd yàá. Ééleè aí gə́, páá ii taà gɔ̀' gá gú? Íí nɛ́b aa íí kə̀ tɛ́mbagké naà zɔ̀gɔ̀ní yóo! 31Kə̀ aakíin də, ìì lɔ̀b tɛ́m kə̀ baànmbə̀: ‹Bá níì líìn gú? Bá níì nyəə̀n gú? Bít bá níì páàn sisú gú?› sí. 32Kàandə, in bəraa yée kóólé, nɛ́b aa ìì bàg Vɛnɛ́b síndə, ìì sàà sùnú. Báá íí Vɛnɛ́b lɛgə́ paà bə̀ gàb yàá, íí í' in bəraa rə tə́ kúnú. 33Éèn Vɛnɛ́b oò ləə gààd sína aí yílú, kə̀ wɔ̀ɔ̀lə̀ oò tá, kìínmbə̀ nɛɛ̀n aa í' rú rə kíin, bít dá ii taà in kam bəraa nyɛ́d də piìn zəgǹ yílú wərà. 34Kàandə, ìì lɔ̀b tɛ́m nyàm nwúndù bə̀ bə sí' oòra dá iiyà sìní in bəraa íí dá tɛ́m lɔbm̀ bərə aanàá. Ingbò'kè aa vúg nyàm nə́ŋ̀ bə̀ rə, də́ŋ sìní nyàm də bìá.»
Currently Selected:
Mata 6: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
