Mata 22
22
Kéèn wèéd gbèd gbà'á zagəmá
(Luka 14.15-24)
1Yéésù nàà zagəm ɔ̀d kambəd sɔ̀ŋ, bɔ̀b nɛ́b aa tə́ù zɛŋ̀ də nwɔŋ gáàmbìá. Bàà bə̀: 2«Ìì ɛ̀g in aa Vɛnɛ́b Gààd lúŋ doó' Vɛnɛ́b Gààd lúŋ tə́ Gààd gbà'á nə́ŋ̀á. Gààd gbà'á aarə, wúú wàà váàndo oò wèéd gbèrá. 3Tùm nɛ́b tù' bə̀ ma'ǹ oò bəd, ɛ̀m dá boò dɛ̀rà nɛ́b aa tùm bə̀ nwɔŋ, yaà boò líí wə̀ə́d gbèd doó. Zá bə̀ məəà kíìn yaànmbìá. 4Kàanyée gə́, bít tùm nɛ́b tù' bə̀ ma'ǹ ɔ̀d kambəd kə̀ nwɔŋ aa yóo: ‹Ìì bàà nɛ́b aa bə̀ dɛ̀d bə̀ rə' Gbèd mə́ wúúmíìnì bə́ŋyóo; nàà vɔ̀ɔ̀m mə́ bəd kə̀ nàà yɛb núúd bə̀ mə́ bəd tá, wélmíìn yàá. In gə́ kóólé wálmíìn yàá. Ìì yaà kíìn kéèn wèéd gbèd ba! 5Zá nɛ́b bəraa bə̀ dɛ̀d bə̀ rə, bə̀ sèl aarə sé. Bít zá' bə̀ ɛ̀m kíìn tù' boò bərú. Nə́ŋ̀ ɛ̀m oò lɛsú, ɔ̀d kɔ̀ ɛ̀m dùm oò bəd gə́ə̀lǹmbìá.› 6Nɛ́b kambəd sə̀d bə̀ kò' nɛ́b tù' bə̀ ma'ǹ bəd kúnú, bə̀ í' bə̀ búúrá, bít zìb bə̀ lòd bə̀ kúnú. 7Gààd gbà'á zá' mà' nɔ̀má, tùm sóózè oò bəd, dá boò lòd nɛ́b yíl bə̀ lodǹ bəraa rə kúnú. Bít sàb bə̀ dú' bìl boò rə kə̀ laá; 8bít bàà nɛ́b tù' bə̀ ma'ǹ oò bəd: ‹Kéèn wèéd gbèd wúmíìn yàá, zá nɛ́b aa mə́ dɛ̀d bà rə, bə̀ də́ŋ gbèd aarə yaàn líìnmbə̀ sé. 9Ìì ɛ̀m kpaŋ̀ gbà'á bìlə́ bə̀ rú, bít ìì dɛ̀rà nɛ́b bəraa íí dá bɔbm̀ kpaŋə́ rə gə́ kóólé.› 10Nɛ́b tù' bə̀ ma'ǹ bəd zá' ìì ɛ̀m kpaŋ̀ tɛ́mú, dɛ̀rì wál nɛ́b bəraa ìì sáŋ də kóólé, nɛ́b sɔ̀ɔ̀n bəd kə̀ nɛ́b in vaksə́ bə̀ ma'ǹ bəd tá. Bít kə̀ aakíin, wúl bàgə̀l yaà nyìì taà kə̀ nɛ́b bərá.
11«Zɔ̀ŋ aa gààd gbà'á pìì wúuú, nɛ́b aa dɛ̀rà rə yaàn ɛgǹmbə̀ gə́, bé' nɛ́ŋ váàndo nə́ŋ̀á, páá wèéd gɔ̀' sisə́ sé, 12bààù: ‹Ɔ̀dzéd mə́ra, ééleè ḿ pììà taà zɔ̀ŋə, ḿ páá taà wèéd gɔ̀' sisə́ sín gú?› Zá nɛ́ŋ váàndo aarə, kè' í'ù nwɔŋ nə́ŋ̀má naà sé. 13Kàanyée gə́, gààd gbà'á bàà nɛ́b tù' bə̀ ma'ǹ oò bəd: ‹Kò' ìì tabə̀ dun kə̀ nɛɛ̀n tá, bít pà' làà ìì lɛ́'ù tígə́lú, gbaarú wərà, zɔ̀ŋ aa dá kuùm nwuukè rú, kpə̀ə́ǹ kpəə̀nmbə̀ kə̀ nə́gə́l fu'ǹmbə̀ tə́ roó.› 14Kə̀ aakíin də, Yéésù bàà zəg sɔ̀ŋ: ‹Nɛ́b aa bə̀ dɛ̀d bàà rə, bə̀ tə́ ká'ke, zá nɛ́b aa sàà bə̀ vúŋ bə̀ rə gə́, ìì tə́ zɔ̀gɔ̀ní.› »
Káànmbə̀ Gɔ̀mnà ba'káámá
(Markus 12.13-17; Luka 20.20-26)
15Kàanyée gə́, Farisa bəd gə̀b wál gám dá bə̀ dúg gúsá, bɔbm̀ páànmbə̀ pìrə̀, nɛɛ̀n aa bə̀ dá kə̀ Yéésù gúdǹ ko'ǹ kə̀ nwɔŋ dɛdké nə́ŋ̀ doó. 16Bòórú rə, wál bə̀ tùm nɛ́b sáànmbə̀ boò kamá, kə̀ Hirudus nɛ́b kamá. Yaà bə̀ dɛ̀rə̀: «Nɛ̀ná, bə́ gàb yàá, ám gə́, ń nɛ́ŋə̀ wɔ̀ɔ̀làá, bít ń sán nɛ́b bəd nwɔŋ sɔ̀ɔ̀n tə́ nɛɛ̀n aa Vɛnɛ́b bàà boò kum dú rə yíílú. Ń nùù in aa nɛ́b bəd tə́ seèl lə gá. Kàandə, ám gə́, ɛ̀g ḿ bé' nɛ́b bəd kə̀ si' kúrə́ gbaarú bə̀ ní gá. Ɛ̀g ń də́' nɛ́b bəd kóólé tə́ nə́ŋ̀ní. 17M̀ bàà bə́ bə́ŋ̀ in aa ń sèl yée ge. Vɛnɛ́b indaŋ̀mbə̀ dàà bə́n tə́ béení, sínkɔ̀ dàŋ tə́ kíìn gààd gbà'á Roma bə̀ ba'káám piìnmbèì?»
18Zá nɛ́ɛ̀m Yéésù gàb inselké vaksə́ aa boò tɛ́mə́ rə gə́, bít bàà: «Íí nɛ́b gú' bàrə̀b bə̀ bəraa yóo, kə̀ níìbə̀ íí tə́ mə́ taà gúdǹ ko'ǹ kə̀ gɔ̀'wà gú? 19Ìì ì' máà bə́ŋ̀ ba' lɛ̀ɛ́ŋə̀ aa káá bə̀ sáá kə̀ ba'káám də ge.»
Bít bə̀ ààùwà ba'yáàm galə̀wà nə́ŋ̀. 20Bít Yéésù dɛ̀d bə̀: «Nyìsə̀ aa bə wərə̀ kə̀ nə́gə́l aa ìì bád bə yérə tá, nɛ́ɛ̀réè bə̀ gú?» 21Kè' bə̀ í', bə̀ bàà: «Gààd gbà'á Roma bìá.»
Kàanyée gə́, Yéésù bàà: «Ogə́ tə́ kàangə́, ìì káá gààd gbà'á Roma bə̀ in aa tə́ oò bə̀ roó, bít in aa tə́ Vɛnɛ́b bərə kɔ̀, ìì káá Vɛnɛ́bá.»
22Zɔ̀ŋ aa ìì kìì nwɔŋ aa yée gə́, kò' bə̀ yíl yàá. Zá' bə̀ dààù, bít bə̀ ɛ̀m bəd taá.
Yéésù kè' í' nwɔŋ nə́ŋ̀, díímke val bəd bə̀ yílú
(Markus 12.18-27; Luka 20.27-40)
23Nyàm aarə bəní, Saduki bəd gə̀b yaà Yéésù sunú. Saduki bəd gə̀b də, nɛ́b bəraa bə̀ bàà val bəd díím kɔ̀ gá roó. Yaà bə̀ wə́ə́ gə́, bə̀ dɛ̀d Yéésù nwɔŋ aa yóo: 24«Nɛ̀ná, Musa bàà: ‹Nɛ́ŋ váàndo val kò'ù yàá, dàà yɛb bəd sín gə́, kudvɛɛ̀l oò, oò pà' val kéèn də kúnú, bít lɛ̀b oò pii níí oò wàá.› 25Kə̀ aakíin də, nɛ́b vɔ̀ɔ̀m bəd boò nə́ŋsínà, báá nə́ŋ̀ní, nà'á nə́ŋ̀ní. Wàà éèn də̀gə̀ də̀gə̀ bə̀ pà' kéèná, bít val kò'ù kúnú, lɛ̀b dàà yɛb bəd sé. Bít kudvɛɛ̀l oò nə́ŋ̀ pà' sə̀n val kéèn doó. 26Ma'míìn nɛɛ̀n aarə rú, kə̀ nɛ́d iirúb aa zəg doó, bít kə̀ nɛ́d toorúb doó, yaà wə́ə́ nɛ́d nə́ŋsínà bə zé, lɛ̀b bə̀ dàà wàà sé. 27Yaà dá bɛ́dǹ kə̀ naà gə́, nɛ́ŋ kéèndo rə kɔ̀ val yaà kò'ù yàá. 28Sɛŋ aa díímke val bəd bə̀ bərə gə́, nɛ́ɛ̀réè nɛ́b aa nə́ŋsínà yée tə́ŋú, nɛ́ŋ kéèndo aa dá taà kuùm kéèn oò gú? Kàandə, boò kóólé, bə̀ pà'ùwì yiìl yéroó!»
29Yéésù kè' í' bə̀, bàà: «Íí bɔ̀' kpaŋ̀ yàá. Kə̀ taàbìá, íí gàb taà Núúboòd Gìdń bəd nwɔŋ sé, sínkɔ̀ íí gàb taà kpɛŋsɛ́l Vɛnɛ́b bə̀ sé. 30Kə̀ aakíin də, sɛŋ aa díímke valə́ bə̀ bərə, nɛ́b vɔ̀ɔ̀m bərì pà'àl kɛ́ɛ̀m gá, bít kɛ́ɛ̀m bəd kɔ̀, ìì pà'àl vɔ̀ɔ̀m gá. Zá ìì dá kuùm kìínmbə̀ malaika bəd kíin, lɛgə́ poú. 31Díímke val bəd bə̀ nwɔŋ bòórú gə́, íí gád nwɔŋ aa Vɛnɛ́b bàà rə sínì? Vɛnɛ́b bàà: 32‹Máára mə́ kùmsə̀n Abraham Vɛnɛ́bá, Isiyaku Vɛnɛ́bá, kə̀ Yakubu Vɛnɛ́bá.› Vɛnɛ́b də, val bəd Vɛnɛ́b gá, zá nɛ́b galə̀ bəd bìá.»
33Nɛ́b zùúm bəraa bə̀ kìì nwɔŋ aa Yéésù sán bə̀ yée gə́, kò' bə̀ yíl yàá.
Indaŋ̀mbə̀ aa kàŋ kàn nɛɛ̀n doó
(Markus 12.28-34; Luka 10.25-28)
34Zɔ̀ŋ aa Farisa bəd gə̀b kìì gə́, Yéésù ke' Saduki bəd gə̀b gú' kə̀ nwɔŋ sáànmbə̀ gə́, yaà bə̀ wál oò sunú. 35Bít nɛ́ŋə̀ nə́ŋ̀ boò tə́ŋú, nɛ́ŋə̀ aarə, nɛ̀n indaŋ̀mbìá, í' Yéésù gɔ̀'wà gúdǹmbìá, bít dɛ̀rə̀: 36«Nɛ̀ná, indaŋ̀mbə̀ bəraa yée tə́ŋú, indaŋ̀mbə̀ déè kàŋ kànsə̀n kə̀ gbà'á gú?» 37Yéésù kè' í'ù bàà: « ‹Ǹ í' Báátììkpɛ̀ŋ Vɛnɛ́b ḿ da, kə̀ tɛ́m ḿ tə́ kóólé, kə̀ nyì' ń tə́ kóólé, bít kə̀ inselké ń tə́ kóólé.› 38Aa yérə kùmsə̀n indaŋ̀mbə̀ gbà'á, bít kùmsə̀n indaŋ̀mbə̀ aa kàn kə̀ pɛ̀sə́ roó. 39Bít ǹ ɛ̀ga, ɔ̀ɔ̀raa yée kùmsə̀n indaŋ̀mbə̀ iirúb aa kàŋ lúŋ̀ kə̀ pɛ̀sə́ roó: ‹Ǹ í' ɔ̀dnə́ŋ̀ ń, kìínmbə̀ nɛɛ̀n aa ń í' yíl ń də kíin.› 40Musa indaŋ̀mbìá, kə̀ Vɛnɛ́b gbantumsə̀ bəd insánke tə́ kóólé, bə̀ vúgə́là tə́ indaŋ̀mbə̀ bəraa iirə yée rú.»
Dauda wàà kə̀ Báátììkpɛ̀ŋ oò ra
(Markus 12.35-37; Luka 20.41-44)
41Zɔ̀ŋ aa Farisa bəd gə̀b wál yée gə́, Yéésù dɛ̀d bə̀ nwɔŋá, 42bàà: «Íí sèl tə́ leè Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə yílə́ gú? Oòrə nɛ́ɛ̀réè wàà gú?» Kè' bə̀ í', bə̀ bààù: «Oòrə, Dauda kuná.»
43Bít Yéésù kè' í', bàà bə̀: «Ééleè Dauda gám taà nwɔŋ Krístù yílə́ gú? Máàn sɛŋ aa Nwul Gìdń pìì oò tɛ́mə́ rə, dɛ̀rə̀ taà: ‹Báá mə́ Tììkpɛ̀ŋì?› Kàandə, Dauda bàà:
44‹Báátììkpɛ̀ŋ Vɛnɛ́b bàà Báá mə́ tììkpɛ̀ŋ gə́,
ǹ kùm zɔ̀ŋə má nɛɛ̀n váànú, yaà oò wə́ə́ sɛŋ aa má ɔ̀dmáàn ḿ bəd zígǹ ám
dun dùù rə zé.›
45Nɛ́ɛ̀m Dauda dɛ̀rə̀ tə́ ‹Báátììkpɛ̀ŋ› gə́, ééleè Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə, dá taà kuùm Dauda kun gú?»
46Kóó nɛ́ŋə̀ nə́ŋ̀má bánə̀ nwɔŋ nə́ŋ̀ní tə́ŋtə́ŋ ke'ǹ í'ǹmbə̀ sé. Bítsɔ̀ŋ, dùg nyàm aarə bəní, nɛ́ŋə̀ nə́ŋ̀má tò' gú', oò bə̀ nwɔŋ bəd dɛdǹmbə̀ sɔ̀ŋ sé.
Currently Selected:
Mata 22: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
