Luka 8
8
Nɛ́b bəraa bə̀ ɛ̀m kə̀ Yéésù tə́ roó
1Bòórú zɔ̀gɔ̀ gə́, Yéésù zá' ɛ̀m bìl gbàád bərú, kə̀ bìl bɛ̀ŋ́sə̀ yɛbú. Wə́ə́ wərə̀ gə́, ùd bít bàà nɛ́b bəd Vɛnɛ́b Gààd Nwɔŋ Puu Sɔ̀ɔ̀nkèá. Nɛ́b sáànmbə̀ bəd kób zè iira ìì ɛ̀m kə̀ oò tá. 2Nɛ́b kɛ́ɛ̀m kam bəraa nìŋ vúŋ bə̀ nwul vaksə́ sisə́ roó, aa bəraa gáŋ bə̀ marú roó, Mariyama aa bə̀ dɛ̀rə̀ Mariyama Magdala bìlə́ bə̀ roó; nɛ́ŋə̀ aa Yéésù nìŋ vúŋ nwul vaksə́ bəd nə́ŋsínà oò sisú roó, 3Yowana Huza kéèná, Huza rə, gààd gbà'á Hirudus gààd gbaaná, Suzana ra, kə̀ nɛ́b kɛ́ɛ̀m kam bəraa bàg Yéésù rə tə́ kóólé, bə̀ pú' gbaŋə̀ boò bərá, bə̀ láŋ Yéésù kə̀ nɛ́b sáànmbə̀ oò bəd tá.
Nɛ́d inluùm bə̀ wuùn zagəmá
(Mata 13.1-9; Markus 4.1-9)
4Nɛ́b bəd bə̀ vúgə́là bìl gə́ kóólé, bə̀ yaà Yéésù sunú. Zɔ̀ŋ aa nɛ́b zùúm bəd yaà ìì wál Yéésù səǹ yée gə́, nàà ì' bə̀ zagəm nwɔŋ aa yóo:
5«Nɛ́ŋ váàndo nə́ŋ̀ vúg tə́ ɛ̀m inluùm wuùnmbìá. Zɔ̀ŋ aa tə́ inluùm lɛ́'ǹ lɛsə́ kàangə́, inluùm kambəd píl kpaŋ̀ gú' ba. Nɛ́b bəd ɛ̀m bə̀ nád dunú, bít núú lɛgə́ paà bə̀ bəd yaà bə̀ líí kúnú. 6Inluùm ɔ̀d kambəd píl bəŋ yílú. Zɔ̀ŋ aa inluùm bəd lad vúg gə́, ìì wàd kúnú, kàandə, ìì bɔ̀b zɔ̀ŋ tɛbkè sé. 7Inluùm ɔ̀d kambəd píl ku' bəd tə́ŋú, wál ìì kàŋ bəd sɛŋ nə́ŋ̀ní kə̀ inluùm sɔ̀ɔ̀n bəd tá, bít dàŋ bə̀ kíìn kaŋ̀mbìá. 8Zá inluùm ɔ̀d kambəd píl yɛ́b sɔ̀ɔ̀n lìmkè ba. Inluùm bəd vúgə́l bə̀ kàŋ yàá, bít bə̀ lɛ̀b yɛb yàá. Inluùm bèl nə́ŋ̀ gə́ kóólé, lɛ̀b yɛb laa núnà.»
Bít Yéésù bàà zəg nwɔŋ aa sɔ̀ŋ: «Íí tə́ kə̀ túŋ naà kiìnmbə̀ gə́, ìì kìì kíìn sɔ̀ɔ̀nkè!»
Kə̀ níìbə̀ Yéésù gám taà nwɔŋ kə̀ zagəmə́ gú?
(Mata 13.10-17; Markus 4.10-12)
9Bòórú gə́, nɛ́b sáànmbə̀ bəd bə̀ dɛ̀rə̀: «Zagəm aa ń nàà yérə, í' tə́ baànmbə̀ leè gú? 10Kè' í' bə̀, bàà: ‹Aí gə́, Vɛnɛ́b pii iiyà kpaŋ̀ gabm̀bə̀ inmə́'ke bəraa oò gààrə́ rə yàá. Zá nɛ́b kam gə́, ìì dá bə̀ naàn kə̀ zagəmú, bɔ̀b boò
ɛ̀g kúnú, zá boò bé' sí.
Boò zɛ̀ŋ kúnú, zá boò kìì sí.› »
Yéésù bàà ì' zagəm nwɔŋ, nɛ́b inluùm bə̀ wuùn yílú
(Mata 13.18-23; Markus 4.13-20)
11«Aa yée kùmsə̀n nwɔŋ wàà aa zagəm aa í' baànmbə̀ roó' Inluùm kùmsə̀n Vɛnɛ́b insánkeá. 12Níì kùmsə̀n inluùm aa pí' kpaŋ̀ gú' bərə gú? Tə́ kìínmbə̀ nɛ́b aa bə̀ kìì Vɛnɛ́b insánkeá, zá Sámbàŋyɛ́rə̀ yaà wə́ə́ì gə́, nyá'kè' insánke aa boò tɛ́mú rə kíìn də kíin. Kə̀ aakíin də, bə̀ bán insánke aarə bagǹmbə̀ gá, bít bə̀ bɔ̀b súùnmbə̀ gá. 13Níì kùmsə̀n inluùm aa pí' bəŋə́ rə gú? Tə́ kìínmbə̀ nɛ́b aa bə̀ kìì Vɛnɛ́b insánkeá, bít bə̀ kè'ù kə̀ tɛ́m làmkè rə kíin. Zá bə̀ dàà páá lígə́d sé. Bə̀ bàg sɛŋ wàà zɔ̀gɔ̀ní bìá. Zá sɛŋ aa in nə́ŋ̀ də́' yaà ɛ̀g bə̀ì rə gə́, nùù bə̀ dàà tɛ́mbagké boò kúnú. 14Níì kùmsə̀n inluùm aa pí' ku' bəd tə́ŋə́ rə gú? Tə́ kìínmbə̀ nɛ́b aa bə̀ kìì Vɛnɛ́b insánkeá, zá bə̀ dàà inselké zɔ̀ŋə yɛ́b bə bìá, gbaŋàá, kə̀ in bəraa bə̀ tə́ í'ǹ zɔ̀ŋə yɛ́b bərə nìb lò' bə̀ kpaŋə́ ní rə kíin. Kə̀ taàbìá, bə̀ bán taà wàà sɔ̀ɔ̀n lɛbm̀bə̀ sé. 15Níì kùmsə̀n inluùm aa pí' yɛ́b sɔ̀ɔ̀n lììmkè bərə gú? Tə́ kìínmbə̀ nɛ́b aa bə̀ kìì Vɛnɛ́b insánke rə kíin. Boò gə́, bə̀ kò' kíìn kə̀ tɛ́m sɔ̀ɔ̀nkèá, bít kə̀ tɛ́m wɔ̀ɔ̀làá. Bə̀ ləə Vɛnɛ́b insánkeá, bít bə̀ lɛ̀b yɛb sɔ̀ɔ̀nkè bəd kə̀ sidkéá.»
Lampə̀ zagəmá
(Markus 4.21-25)
16«Nɛ́ŋə̀ nə́ŋ̀ máá kó' lampə̀ì gə́, wúbə̀ kɛ̀l dùù gá, sínkɔ̀ pááù kilə̀ dùù gá. Zá bə̀ zígə̀ téé dàndunwà yílú, bɔ̀b nɛ́b aa pìì wúu wərə̀ rə kóólé, boò bé' zɔ̀ŋ nyɛdkèá. 17Kə̀ aakíin də, in aa tə́ mə́'ke Vɛnɛ́b gààrə́ rə, nɛ́b bəd dákíìn bé'nàá. Bít in aa nɛ́b bəd gàb bə́ŋyée Vɛnɛ́b gààrə́ síndə, bə̀ dákíìn gabàá, bít bə̀ dákíìn kiinàá.
18«Ìì gú' yíl íí kə̀ nɛɛ̀n aa íí tə́ nwɔŋ kiìn dú roó! Kə̀ aakíin də, màn aa tə́ kə̀ naà rə, pii bə̀ dáù ɔ̀d zəgàá; zá màn aa kə̀ naà síndə, aa sèl bəǹ tə́ kə̀ naà zɔ̀gɔ̀ rə máá, nyá' bə̀ dákíìn ke'nàá.»
Yéésù nuù kə̀ Yéésù kudvɛɛ̀l bəd tá
(Mata 12.46-50; Markus 3.31-35)
19Yéésù nuù kə̀ Yéésù kudvɛɛ̀l bəd tá, yaà ìì bɔ̀bə̀ yàá. Zá nɛ́b zùúm kùm wərà, ìì bán taà wə́ə̀nmbə̀ oò səǹ sé. 20Nɛ́b bəd bàà Yéésù: «Nà'ám kə̀ kudvɛɛ̀l ḿ bəd tá, bə̀ dìì tə́ gbaarú, bít bə̀ í'ǹ tə́ bé'ǹmbìá.»
21Zá Yéésù bàà nɛ́b bəd kóólé: «Nɛ́b aa tə́ Vɛnɛ́b nwɔŋ kiìn, bít bə̀ tə́ kə̀ tù' ma'ǹ də, boò ra ìì kùmsə̀n nà' mə́ra, kə̀ kudvɛɛ̀l mə́ bərá.»
Yéésù tɛ́' zab nwulá
(Mata 8.23-27; Markus 4.35-41)
22Nyàm nə́ŋ̀ kàani, Yéésù pìì kə̀ə̀d nə́ŋ̀ú, kə̀ nɛ́b sáànmbə̀ oò bəd tá, bít bàà bə̀: «Báà taàn wəl nyìgə̀l naà gúuú.»
Bít bə̀ pìì taànmbìá. 23Zɔ̀ŋ aa ìì tə́ na'àn kə̀ kə̀ə̀d yée gə́, Yéésù ləə ləəmá. Kə̀ nwɔŋ aa nuù yée kíin, nwul nə́ŋ̀ kpɛŋké pìì pɛbm̀bə̀ wəl nyìgə̀l yílú. Wəl sɔ̀d piìnmbə̀ kə̀ə̀rú, bít boò kóólé ìì tə́ val nɛɛ̀n tɛ́mú. 24Kàanyée gə́, nɛ́b sáànmbə̀ bəd gbarà Yéésù sunú, dɛ̀d bə̀ lɛ́mə̀ kúnú, bít bə̀ bààù: «Nɛ̀ná, nɛ̀ná, báan kíìn vaàl wəlú.»
Yéésù lɛ́m gə́, bàà nwul kə̀ wəl bəd tá, boò tɛb kúnú, bít bə̀ tɛb yàá. Zɔ̀ŋ yaà dìì zé sə́ə́m. 25Yéésù bàà nɛ́b sáànmbə̀ bəd: «Tɛ́mbagké íí rə tóó?»
Nɛ́b sáànmbə̀ bəd də́dǹ mà' bə̀ yàá, in aarə kò' bə̀ yíl yàá; bít ìì bàà ɔ̀dnə́ŋ̀ bəd boò bòdba: «Nɛ́ŋ Váàndo aa gə́, nɛ́ɛ̀ré? Gám nwul bəd nwɔŋ kə̀ wəl bəd tá, bít bə̀ ləəù kíìn yéroó!»
Yéésù gáŋ nɛ́ŋ váàndo nə́ŋ̀ kə̀ nwul vaksə́ bəd sisú
(Mata 8.28-34; Markus 5.1-20)
26Kàanyée gə́, Yéésù kə̀ nɛ́b sáànmbə̀ oò bəd tá, yaà ìì wə́ə́ Gerasenia bəd yɛ́b ba, Galili naà gúuú. 27Zɔ̀ŋ aa Yéésù vúgà kə̀ə̀rú gə́, nɛ́ŋ váàndo nə́ŋ̀ kə̀ nwul vaksə́ naú, vúgà bìlú, ɛ̀m yaà sáŋ kə̀ oòra. Sɛŋ ká' yàá nɛ́ŋ váàndo aarə kùm záání, páá gɔ̀' sisə́ kɔ̀ gá. Bítsɔ̀ŋ kùm yiìl gá, ləə sáá sàà bəd tə́ŋú. 28Zɔ̀ŋ aa bé' Yéésù gə́, páá kpə̀ə́ǹ kə̀ kpɛŋsɛ́lá yaà pí' Yéésù númú, bàà: «Ń í' níì kə̀ mááì, Yéésù Vɛnɛ́b lɛgə́ paà bə̀ Wàá? Mə́ tə́ n kíìn nyɛmàá, ǹ í' mə́ búúd sí.» 29Nɛ́ŋ váàndo aa bàà kə̀ aa kíìn də, kàandə, Yéésù bàà nwul vaksə́ bəd nwɔŋ kə̀ kpɛŋsɛ́lá, boò vúg kíìn oò sisú. Nwul vaksə́ aarə kò'ùwì sɛŋ zùúm kàani. Tab bə̀ sááù dun bəd kə̀ nɛɛ̀n bəd tá, kə̀ sɛ̀gsɛ́gá, bít kə̀ kaasə́ ba' bìá, bɔ̀b oò bə̀ ko'ǹ dí'ǹmbìá. Zá lɔ̀b sáá in bəraa rə kíin kóólé. Kàanyée gə́, nwul vaksə́ pà' àà sááù fɔ̀gú.
30Yéésù dɛ̀rə̀: «Nə́gə́l ámbə̀ leè gú?» Kè' í' bàà. «Nə́gə́l mə́ nwul zùúmá.»
Bàà kàandə, nwul vaksə́ zùúm wál sə̀n oò sisú. 31Nwul vaksə́ bəd nyɛ̀m Yéésù nìŋ oò àà bənə́ lɔ̀ŋ tígə́l bə̀ píke rú sí.
32Sɛŋ də sìírə̀ gə̀b gbà'á nə́ŋ̀ tə́ líìn kɔ̀lwà yílə́ wərà. Nwul vaksə́ bəd nyɛ̀m Yéésù oò dàà, dá bənə́ piinnə́ boò rú. Yéésù dàà bə̀ kpaŋ̀á. 33Kàanyée gə́, nwul vaksə́ bəd vúg taà nɛ́ŋ váàndo rə sisú, bít dá ìì pìì taà sìírə̀ bəd sisú. Sìírə̀ gə̀b kə̀ zɔ̀ŋ tá, símà kɔ̀l zɛɛ̀ bə kə̀ nɔgá, yaà bə̀ píl wəl nyìgə̀lú zé mɛ̀rr, bít bə̀ bɔ̀bə́l bəd kíìn wəl nyìgə̀lú.
34Zɔ̀ŋ aa sìírə̀ yibə̀ bəd bé' in aa taà yée gə́, nùù ɛ̀m dá bə̀ sà' nwɔŋ də bìlú, bít kə̀ bìl yɛb aa kàrə́ rə rú kóólé. 35Nɛ́b bəd vúgə̀l bə̀ yaà in aa taà rə bé'ǹmbìá. Bə̀ yaà Yéésù sunú, bə̀ bɔ̀b nɛ́ŋ váàndo aa nwul vaksə́ vúg oò sisə́ rə kùmì oò dun dùú. Páá gɔ̀sì sisú, kùmì kə̀ yíl oòra, bít də́dǹ mà' bə̀ yàá. 36Nɛ́b aa bé' in aa taà rə, bə̀ ùd nɛɛ̀n aa nɛ́ŋ váàndo aa kə̀ nwul vaksə́ naà rə súú rú roó. 37Kàanyée gə́, nɛ́b aa Gerasenia yɛ́b bə wərə̀ rə kóólé, ìì bàà Yéésù oò vúg kíìn obənə́ yɛ́b ba. Kàandə, də́dǹ mà' bə̀ì gbàákù. Yéésù zá' pìì kə̀ə̀rú, ɛ̀m kúnú.
38Nɛ́ŋ váàndo aa nwul vaksə́ vúg oò sisə́ rə, nyɛ̀m Yéésù oò dàà bəǹ dá ɛ̀m kə̀ oò tá. Zá Yéésù bààù: 39«Ǹ ɛ̀m kíìn ám yiilú, dá m̀ bàà in bəraa Vɛnɛ́b ma'ǹ də kíìn kóólé.»
Zá' ɛ̀m dá bàà in bəraa Yéésù mà'ù rə kóólé bìlú.
Zairus wàà kéèndo nwɔŋá, bít kə̀ nɛ́ŋ kéèndo aa pig Yéésù gɔ̀' bəroó
(Mata 9.18-26; Markus 5.21-43)
40Sɛŋ aa Yéésù bírà wəl nyìgə̀l gon naà gúu rə, nɛ́b zùúm bəraa kùm bə̀ nwánə̀ rə, yaà bə̀ kè'ù taà duná. 41Kàanyée gə́, nɛ́ŋ váàndo nə́ŋ̀ nə́gə́l oò Zairus, yaà wə́ə́ yàá. Oòra kùmsə̀n gààd Yahudu bəd wúlwáàlbə̀ aa bìlə́ wərə̀ rə bìá. Yaà pí' Yéésù númú, kə̀ dunlígə̀rá, bít nyɛ̀mə̀ oò yaà obəǹ kàrú. 42Sáaraa dɛ̀d kə̀ Yéésù rə, wàà kéèndo oò nə́ŋgùmá, kə̀ zèd kób zè iira, val tə́ù kíìn ko'nàá.
Sɛŋ aa Yéésù tə́ ɛɛ̀m də, nɛ́b zùúm ɛ̀m pè'ù kàd gə́ kóólé. 43Nɛ́b zùúm tə́ŋə́ rə, nɛ́ŋ kéèndo nə́ŋ̀ wərà, kìì nwuukè sɔ̀ɔ̀n kə̀ za'ké nyɛ̀lə́m bìá, mà'ì zèd kób zè iira. Yɛ̀l bɛ́' in bəraa kə̀ naà rə kíìn kóólé, nɛ́b ganté bə̀ bəd naú. Zá kóó nɛ́ŋə̀ nə́ŋ̀má bánə̀ si' gáŋ̀mbə̀ sé. 44Ɛ̀m gbaarà Yéésù sunú, bòórú bərú, bít pigə̀ gɔ̀' gú' ba. Kə̀ nwɔŋ aa nuù yée kíinní, nyɛ̀lə́m oò vəd yàá. 45Yéésù dɛ̀d bə̀: «Nɛ́ɛ̀réè pig mə́ sə̀n gú?»
Sɛŋ aarə, nɛ́b bəd kóólé ìì bàà bənə́ pignə́ù sə̀n gá. Bít Piyɛr bàà: «Nɛ̀ná, nɛ́b zùúm páá n tə́ tə́ŋú, bít bə̀ tə́ən pe'ǹ kàd gə́ kóólé.»
46Zá Yéésù kè' í' bàà: «Èè, nɛ́ŋə̀ nə́ŋ̀ pig mə́ yàá. Kàandə, mə́ gàb yàá, kpɛŋsɛ́l nə́ŋ̀ vúgì máá sisú.»
47Zɔ̀ŋ aa nɛ́ŋ kéèndo rə bé' bəǹ bán yíl bəǹ mə́'ǹmbə̀ gá yéení, yaà Yéésù sunú, kə̀ niŋ̀mbə̀ kə̀ də́dǹná; yaà pí' Yéésù númú. Ùd nɛ́b zùúm númú, sáaraa pig kə̀ Yéésù roó, bít nɛɛ̀n aa kə̀ nwɔŋ aa nuù yée kíinní si' oò gág dú roó. 48Yéésù bààù: «Wàà kéèndo mə́ra, tɛ́mbagké ámbə̀ súùn yàá. Ǹ ɛ̀m sɔ̀ɔ̀ní kə̀ tɛbàá.»
49Sɛŋ də, bə́ŋ̀ Yéésù gám bɛ́' nwɔŋ sé, nɛ́ŋə̀ nə́ŋ̀ vúgà nɛ́ŋ gbàáro Yahudu bəd wúlwáàlbə̀ rú bə̀ yiilú, yaà bààù: «Wàà kéèndo ń də val kò'ù yàá. Ǹ vɔ̀gə̀l Nɛ̀n gbà'á sí.»
50Zá Yéésù kìì nwɔŋ aa kàangə́, bàà Zairus: «Ǹ lɔ̀b tɛ́m sí, ǹ kùm kə̀ tɛ́mbagkéá, wàà kéèndo ń dákíìn gágàá.»
51Ɛ̀m dá wə́ə́ yiìl gə́, bàà kóó nɛ́ŋə̀ nə́ŋ̀má oò pìì wúu kə̀ obəǹ tə́ sí. Piyɛr ra, Yohana ra, Yakuba ra, wàà bóò kə̀ wàà nuù tá, boò pìì sə̀n ní. 52Nɛ́b bəd kóólé, ìì tə́ kíìn kpəənàá, ìì tə́ nwɔŋ dalàá, wàà kéèndo aarə bòórú. Kàanyée gə́, Yéésù bàà: «Ìì kpə̀ə̀ sí, wàà aarə val kò'ù sé, tə́ ləəm ləənàá.»
53Bə̀ fɔ̀m Yéésù kúnú, kàandə, boò gə́, ìì gàb yàá wàà aarə val kò' dúgǹ yàá. 54Zá Yéésù kò'ù nɛɛ̀n ba, bít bàà kə̀ pə̀gə̀lib kpɛŋkéá: «Wàà mə́ra, ǹ zá' lɛgú!» 55Kə̀ nwɔŋ aa nuù yée kíinní, wàà gɔ̀ŋsə́ bírà yàá, bít zá'ì lɛgú. Yéésù bàà bə̀ boò piiù inlíìnmbìá. 56In aa taà yée kò' wàà bóò yílì kə̀ wàà nuù tá. Zá Yéésù bàà bə̀ boò ùd nwɔŋ aarə nɛ́ŋə̀ nə́ŋ̀má sí.
Currently Selected:
Luka 8: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
