Yohana 7
7
Yéésù kudvɛɛ̀l bəd ìì bàgə̀ sé
1In aa taà gə́, Yéésù zá' ɛ̀m dáá gəə̀l Galili yɛ́b ba. Í' dáànmbə̀ Yahudiya yɛ́b bə sé. Kàandə, Yahudu bəd nɛ́b yíl bə̀ bəd bə̀ í'ù tə́ lo'ǹmbìá. 2Yahudu bəd wálke aa bə̀ dɛ̀d wálke dìí gɔ̀' bə̀ bərə, sɛŋ oò gbad wə́ə́ yàá. 3Kàanyée gə́, Yéésù kudvɛɛ̀l bəd bə̀ bààù: «Ǹ záá kíìn zɔ̀ŋə, bít ǹ ɛ̀m Yahudiya yɛ́b bə wərà, bɔ̀b nɛ́b sáànmbə̀ ń bəd kɔ̀ boò bé' tù' gbàád bəraa ń tə́ ma' ǹ doó. 4Nɛ́ŋə̀ nə́ŋ̀má mə́' tù' oò aa tə́ ma'ǹ də gá, dáà ɔ̀d tə́ nɛ́b bəd boò gàb bəǹ kíìn gə́ roó. Nɛ́ɛ̀m ń tə́ tù' luùm bəraa ma'ǹ yée gə́, m̀ mà' bɔ̀b nɛ́b bəd kóólé, boò bé' n kúnú.»
5Kə̀ aakíin də, kudvɛɛ̀l oò bəd má, bə̀ bàgə̀ sé. 6Yéésù bàà bə̀: «Sɛŋ sɔ̀ɔ̀n mə́ wə́ə́ bə́ŋ̀ sé. Aí gə́, sɛŋ gə́ kóólé tə́ sɔ̀ɔ̀nkèá. 7Nɛ́b bəraa zɔ̀ŋə yɛ́b bərə, bə̀ báni zeènmbə̀ gá. Zá máá gə́, bə̀ zèè mə́ kúnú. Kàandə, mə́ mà' sedako tə́ kíìn in vaksə́ boò bəraa bə̀ tə́ ma'ǹ də yílú. 8Aí gə́, ìì ɛ̀m wálke rú. Máá gə́, bə́ŋyée mə́ dáá wálke aarə rú gá. Sɛŋ sɔ̀ɔ̀n mə́ wə́ə́ bə́ŋ̀ sé.»
9Zɔ̀ŋ aa bàà bə̀ nwɔŋ bəraa yée gə́, bít kùm wərə̀ Galili yɛ́b bə ní.
Yéésù tə́ wálke dìí gɔ̀' bə̀ bəd bə̀ rú
10Nɛ́ɛ̀m zɔ̀ŋ aa kudvɛɛ̀l oò bəd bə̀ ɛ̀m wálke rú yée gə́, Yéésù zá' ɛ̀m kɔ̀. Zá dáá ì' yíl oò nɛ́b bəd núùrú sé. 11Yahudu bəd nɛ́b yíl bə̀ bəd, bə̀ sààù wálke aarə rú, bít bə̀ dɛ̀d: «Oò tə́ bínì gú?»
12Nɛ́b kam nɛ́b zùúm bəd tə́ŋú, bə̀ tɔ̀b laàm oò yílú, bə̀ bàà: «Nɛ́ŋə̀ aa yée, nɛ́d sɔ̀ɔ̀nkè bə̀ ma'ǹná.» Nɛ́b ɔ̀d kam kɔ̀ bə̀ bàà: «Ə́ùwə́, záá tə́ nɛ́b bəd lɛ́làá.» 13Zá kóó nɛ́ŋə̀ nə́ŋ̀má gám nwɔŋ lɛgə́ oò yílə́ sé. Kàandə, bə̀ nùù Yahudu bəd nɛ́b yíl bə̀ bərá.
14Wálke tə́ŋtəŋ taà yàá. Sɛŋ aarə ba, Yéésù zá' ɛ̀m taà láŋsə́ wúu, bít dáá sɔ̀d taà nɛ́b bəd in sáànmbìá. 15Nwɔŋ də, kò' Yahudu bəd yíl yàá. Bít ìì bàà: «Ééleè Nɛ́ŋ Váàndo aa yée gàb taà in kàan də́d gú, oò kɔ̀, sán in gbàákù kə̀ nɛ́b kam bəraa yée kíin sín yéroó?»
16Yéésù kè' í' bə̀ gə́, bàà: «Insánke aa mə́ tə́ ii i'ǹ yérə, vúgà máá naà gá. Zá aarə, vúgà nɛ́ŋə̀ aa tùm máà rə naú. 17Màn aa í' in aa Vɛnɛ́b í' rəì ma'ǹmbə̀ rə, dákíìn gabàá, insánke mə́ vúgà tə́ Vɛnɛ́b naú, sínkɔ̀ mə́ gám nwɔŋ tə́ kə̀ inselké máá bə̀ ní gə́ roó. 18Màn aa gám nwɔŋ tə́ kə̀ kpɛŋsɛ́l oò bə̀ ní rə gə́, sàà yíl oò bə̀ káŋ̀mbìá. Zá nɛ́ŋə̀ aa mà' tù', sàà màn aa tùmə̀wà rə kaŋsɛ́l laa nyɛdkè rə gə́, bàà sə̀n nwɔŋ sɔ̀ɔ̀ná. Oò gə́, nɛ́ŋə̀ wɔ̀ɔ̀làá. 19Máàn Musa pii iiyà indaŋ̀mbə̀ yèè? Zá kóó nɛ́ŋə̀ nə́ŋ̀má aí tə́ŋú, kò' kùd indaŋ̀mbə̀ nwɔŋ sé. Kə̀ níìbə̀ íí sàà mə́ taà lo'ǹmbə̀ gú?»
20Nɛ́b zùúm bəd kè' bə̀ í'ù, bə̀ bàà: «Ń tə́ kə̀ nwul vaksə́ naú! Nɛ́ɛ̀réè sàà n sə̀n lo'ǹmbə̀ gú?»
21Yéésù kè' í' bə̀ gə́, bàà: «Mə́ mà' tù' nə́ŋ̀ní tə́ŋtə́ŋ, bít íí kóólé, kò' íí yíl yàá! 22Ìì zɛ̀ŋa, Musa pii iiyà sə̀n kpaŋ̀á, bàà ii gə́, ìì ná' yɛb vɔ̀ɔ̀m bəd gàbá (Zá nwɔŋ aarə, vúgà Musa naà gá; vúgà doo íí bəd naú.) Kə̀ taàbìá, íí kè' taà nɛ́ŋə̀ gàb ná'ǹmbə̀ nyàm nyi'ǹmbə̀ ba. 23Dáà íí dákíìn báàn wàà váàndo nə́ŋ̀ gàb ná'ǹmbə̀ nyàm nyi'ǹmbə̀ sɛŋú, íí kɛ̀d Musa indaŋ̀mbə̀ gá gə́, kə̀ níìbə̀ íí mà' taà nɔ̀m kə̀ máá, mə́ nɛ́ŋə̀ aa mə́ gáŋ nɛ́ŋə̀ si' marú, nyàm nyi'ǹmbə̀ sɛŋə́ rə gú? 24Ìì dàà kíìn nɛ́ŋə̀ fágǹmbə̀, kə̀ in aa íí bé' kə̀ núù gbaarú kàaní roó. Zá ìì mà' fágə́n aa dá kuùm wɔ̀ɔ̀lə̀, Vɛnɛ́b númú roó.»
Yéésù kùmsə̀n Nɛ́ŋə̀ aa Vɛnɛ́b tɔ̀bə̀ gààd kílə́m yílə́ reè?
25Yahudu kam bəraa Urusalima bìlə́ rə, bə̀ bàà: «Máàn Nɛ́ŋ Váàndo aa kùmsə̀n màn aa bə̀ tə́ saàn lo'ǹmbə̀ reè? 26Ìì ɛ̀g núùá' tə́ nwɔŋ gáàm nɛ́b zùúm tə́ŋú, bít kóó nwɔŋ nə́ŋ̀má bə̀ gámə̀ bə sé! Nɛ́b yíl bə̀ bə́n bəd bə̀ gàbì vɛ́nà, oòra kùmsə̀n Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə wa? 27Zá Nɛ́ŋə̀ aa Vɛnɛ́b tɔ̀bə̀ gààd kílə́ rə, dáà yaànnà gə́, kóó nɛ́ŋə̀ nə́ŋ̀má gàb zɔ̀ŋ aa dáà vúgǹnà bərə gá. Nɛ́ɛ̀m nɛ́ŋə̀ aa yée gə́, bə́n gabm̀ zɔ̀ŋ aa vúgà bərə yàá.»
28Sɛŋ aarə ba, Yéésù tə́ nɛ́b bəd Vɛnɛ́b nwɔŋ sáàn láŋsə́ wúuú. Zá' gám nwɔŋ lɛgú, bàà: «Vɛ́nà bə̀ gə́, íí gàb də, máá rə mə́ nɛ́ɛ̀réè gú? Bít máá rə, mə́ vúgà bínì gú? Máá rə, mə́ yaà sìní kə̀ yíl máá bə̀ ní gá. Zá màn aa tùm máà rə, nɛ́ŋə̀ vɛ́nà bìá. Aí gə́, íí gàbə̀ sé. 29Máá gə́, mə́ gàbə̀ yàá. Kàandə, mə́ vúgà oò sunú, bít oòra tùm máà sùnú.»
30Kə̀ taàbìá, Yahudu bəd nɛ́b yíl bə̀ bəd, bə̀ sààù taà ko'ǹmbìá. Zá nɛ́ŋə̀ nə́ŋ̀má pigə̀ nɛɛ̀n bə sé. Kàandə, sɛŋ oò wə́ə́ bə́ŋ̀ sé. 31Zá nɛ́b zùúm bàgə̀ sə̀n nɛ́b bəraa wál lə tə́ŋú. Bə̀ bàà bəd: «Sɛŋ aa Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə yaaì rə, mà' dá bée Nɛ́ŋ Váàndo aa yée kaàn kə̀ inkɔrə bərì?»
Bə̀ tùmà nɛ́b Vɛnɛ́b wúl bə̀ nwáàn bərá, bɔ̀b yaà boò kò' Yéésù ra
32 Farisa bəd gə̀b kambəd kɔ̀, bə̀ kìì laàm bəraa bə̀ tə́ tɔbm̀ Yéésù yílə́ rə yàá. Kə̀ taàbìá, láŋsə́ gààd bəd kə̀ Farisa bəd tá, bə̀ tùmà taà nɛ́d Vɛnɛ́b wúl bə̀ nwáàn bərá, bɔ̀b yaà boò kò' Yéésù ra. 33Yéésù bàà: «Bə́ŋ̀ mə́ tə́ zɔ̀ŋə kə̀ aí tə́ sɛŋ wàà zɔ̀gɔ̀ sɔ̀ŋ, bít zá' kid má kíìn bídǹ nɛ́ŋə̀ aa tùm máà rə sunú. 34Íí dá mə́ kíìn saanàá, zá íí bɔ̀b mə́ gá. Kàandə, íí bán dáànmbə̀ zɔ̀ŋ aa má dáàn kuùm bərə gá.»
35Yahudu bəd nɛ́b yíl bə̀ bəd ìì dɛ̀d ɔ̀dnə́ŋ̀ bəd boò bòdba: «Dá ɛɛ̀m bínì, bə́n báàn taà oò bə̀ bɔbm̀bə̀ gá gú? Zá' dá ɛɛ̀m Yahudu kam bəraa sa' bə̀ ɛ̀m Grɛg bəd tə́ŋú rə sunú, bít dáráàn Grɛg bəd Vɛnɛ́b nwɔŋ dáàn sánì? 36Nwɔŋ aa bàà: ‹Íí dá mə́ kíìn saanàá, íí bɔ̀b mə́ gá. Kə̀ aakíin də, íí bán dáànmbə̀ zɔ̀ŋ aa má dáàn kuùm bərə gá› yérə, í' tə́ baànmbə̀ leè gú?»
Wəl aa tə́ gɔ̀ŋsə́ piìn doó
37Wálke nyàm aa lè' tɔ̀l lə, kùmsə̀n nyàm yíl bìá. Nyàm aarə, Yéésù dìì nɛ́b zùúm bəd númú, gám nwɔŋ lɛgú, bàà: «Nɛ́ŋə̀ nə́ŋ̀ wəlsúud nwu'ù tə́ kíìn gə́, oò yaà máá sunú, bít yaà oò nyəə kúnú. 38Nɛ́ŋə̀ aa bàg mə́ rə, nwuu gbà'á dá gɛɛ̀n oò tɛ́mú. Nwuu gbà'á aarə, pii sə̀n gɔ̀ŋsá, kìínmbə̀ Núúboòd Gìdń bàà rə kíin.»
39(Yéésù gám nwɔŋ aarə, Nwul Gìdń yílú. Nɛ́b aa ìì bagə̀ùwì rə, ìì dákíìn bɔbàá. Sɛŋ aarə bərə, bɔ̀b bə́ŋ̀ Vɛnɛ́b tùm piiùwà Nwul Gìdń sé. Sɛŋ də, bɔ̀b bə́ŋ̀ Yéésù na' oò yiìl, bít piiù kaŋsɛ́l sé.)
Nɛ́b zùúm tə́ pɛdǹ Yéésù bòórú
40Nɛ́b kam nɛ́b zùúm tə́ŋú, zɔ̀ŋ aa bə̀ kìì nwɔŋ aa gə́, bə̀ bàà: «Nɛ́ŋ Váàndo aa yée, kùmsə̀n Vɛnɛ́b gbantumsə̀ aa Musa gám nwɔŋ oò yílə́ rə vɛ́nà!»
41Nɛ́b kambəd bàà: «Aarə, Krístù ra.» Zá nɛ́b ɔ̀d kambəd bə̀ bàà: «Krístù dáà bée báàn vúgǹnà bə̀ Galili yɛ́b beì? 42Núúboòd Gìdń bàà gə́, Krístù dá kuùm Dauda kuná, bít dáà vúgǹnà Baitilama, bìl wàà aa bə̀ lɛ̀b Dauda rú roó.»
43Kàanyée gə́, nɛ́b zùúm bəd ìì pɛlì Yéésù bòórú. 44Nɛ́b kam boò tə́ŋú, ìì í'ù ko'ǹmbìá. Zá kóó nɛ́ŋə̀ nə́ŋ̀má pigə̀ nɛɛ̀n bə sé.
Yahudu bəd nɛ́b yíl bə̀ bəd, bə̀ bàg Yéésù sé
45Nɛ́b Vɛnɛ́b wúl bə̀ nwáàn bəd, kid ìì bíd láŋsə́ gààd bəd sunú, kə̀ Farisa bəd gə̀b sunú, bít bə̀ dɛ̀d bə̀: «Kə̀ níìbə̀ kò' íí àà taà Yéésù zɔ̀ŋə sín gú?»
46Nɛ́b Vɛnɛ́b wúl bə̀ nwáàn bəd, kè' bə̀ í' bə̀: «Nɛ́ŋə̀ nə́ŋ̀má gám bèd nwɔŋ sɔ̀ɔ̀nkè kə̀ Nɛ́ŋ Váàndo aa kíin sé!» 47Farisa bəd dɛ̀d bə̀: «Aí kɔ̀ lɛ́' íí dàà yílí, bít zá' íí kè' gúsuúm nwɔŋ oò bəd yèè? 48Íí bé' nɛ́ŋə̀ nə́ŋ̀ nɛ́b yíl bə̀ bə́n bəd tə́ŋú, sínkɔ̀ Farisa bəd gə̀b tə́ŋú, bə̀ bàgə̀ yèè? 49Zá nɛ́b zùúm aa yée, ìì gàb Núúboòd Gìdń nwɔŋ sé. Aarə, Vɛnɛ́b mà' bə̀ nwɔŋyɛɛ̀l yàá!»
50Zá nɛ́ŋ váàndo nə́ŋ̀ Farisa bəd gə̀b tə́ŋú, nə́gə́l oò Nikodemus' Nɛ́ŋ váàndo aarə, dáà sə̀n nyàam də Yéésù sunú. Bàà bə̀: 51«Kə̀ nɛɛ̀n aa indaŋ̀mbə̀ bə́n kùm dú rə kíin gə́, bə́n báàn nɛ́ŋə̀ fágǹ ko'ǹmbə̀ gá, éèn bə́n kiìn nwɔŋ oò, bít bə́n gabm̀ in aa mà' rə síngə́ roó.»
52Bít kè' bə̀ í'ù: «Ám kɔ̀ ń nɛ́ŋə̀ Galili yɛ́b bə bèì? Ǹ gád Núúboòd Gìdńná, bít ń dá bɔbm̀ gə́, Vɛnɛ́b gbantumsə̀ nə́ŋ̀má vúg bèd Galili yɛ́b bə sé.»
[ 53Bít bòórú gə́, nɛ́ɛ̀réè kóólé, zá' ɛ̀m kíìn oò yiilú.
Currently Selected:
Yohana 7: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
