Lucas 18

Sa Hangyù Hu Bahi Ha Balu

1Inikagiyan hi Jesus sa mga tinun-an din taini ha pananglitan ta daw matun-an dan ha kinahanglan gayed ha harì sidan magluya hu pag-ampù. 2“Duun hu sabuwa ha banuwa amin maghuhukum ha hurà din kahaldek hu Dios daw hurà din daan agtahuran ha etaw. 3Amin daan diyà balu ha bahi ha taglikù-likù diyà ta kandin hu paghangyù, ‘Buligi a ikaw ta amin agsabà kanak.’

4“Su anay saena ha maghuhukum hurà gayed magpaliliman. Ba su malugay en nakahenà-henà, ‘Bisan pa ku harì a agkahaldek hu Dios daw hurà ku daan agtahuran ha etaw 5ba tumenged ta saini ha balu ha bahi sigi dà tagsamuk-samuk kanak buligan kud en ta daw harì makaglikù-likù dini.’”

6Dayun uminikagi si Jesus, “Henhenaa nuy sa inikagi taena ha maghuhukum bisan ku kenà haena matareng ha etaw. 7Harì ba buligan gayed hu Dios sa mga pinilì din ha sigi dà tag-ampù aldaw daw ku daleman? Magyawatà ba haena hu pagbulig din? 8Ikagiyen ku inyu ha sagunà din dà gayed sidan buligan. Ba asem ku lumikù a dini ta kalibutan siak sa Batà hu Etaw amin pa ba gid sumalig kanak?”

Sa Pag-ampù Hu Parisiyu Daw Hu Manunukut Hu Buhis

9Inikagi pa hi Jesus haini ha pananglitan taena ha mga etaw ha tagsalig hu pagkamatareng dan ba agpakaminus hu duma ha mga etaw. 10“Amin daruwa ha etaw ha duminuun ku Timplu hu pag-ampù, sa sabuwa Parisiyu daw sa sabuwa manunukut hu buhis. 11Saena ha Parisiyu mig-ampù ha tagyanaen, ‘Dios ha Magbabayà hu alan, tagpasalamatan ku ikaw ta harì a agkailing hu duma ha mga etaw ha agpanlimbung daw kenà matareng daw mananapaw, daw kenà a daan iling taini ha manunukut hu buhis. 12Kadaruwa a salang hu pagkaen duun hu nangkasimana daw ig-ila ku daan sa ikasampulù hu alan ha agkatimù ku.’

13“Ba su manunukut hu buhis diyà dà tuminiyadeg ta suyuk. Duminunghuy ta agkaguul gayed hu mga salà din daw mig-ampù ha tagyanaen, ‘Dios ha Magbabayà hu alan, kahid-uwi a ikaw sa makasasalà.’

14“Ikagiyen ku inyu ha saini uminulì ha napasaylu en sa mga salà din dì taena ha Parisiyu. Ta bisan sin-u sa tagpalabaw-labaw igpaubus ba saena ha tagpaubus igpatangkaw.”

Si Jesus Daw Sa Atiyuay Ha Mga Batà

(Lucas 18:15-17; Mateo 19:13-15; Marcos 10:13-16)

15Amin mga etaw diyà ha mig-uwit hu tungkay pa atiyuay ha mga batà ta daw madampà hi Jesus. Su maahà haena hu mga tinun-an din binaldeng dan sidan. 16Ba si Jesus minikagi, “Ipaubay dini ta kanak sa mga batà daw harì nuy sidan agbaldenga, ta sa mga etaw ha iling taini ha mga batà iyan tagharian hu Dios. 17Laus gayed sa ag-ikagiyen ku inyu ha sa harì agkabayà ha pagharian hu Dios iling hu pagtuu taini ha batà saena harì pagharian hu Dios.”

Sa Sapian Ha Agalen

(Lucas 18:18-30; Mateo 19:16-30; Marcos 10:17-31)

18Amin agalen hu mga Judio ha nanginginsà ki Jesus, “Maayad ha Manunudlù, inu man sa kinahanglan ha buhaten ku ta daw mailahan a hu kinabuhì ha hurà din katapusan?”

19Tuminubag si Jesus, “Imbà a ikaw umawa ha maayad? Hurà gayed maayad ba iyan dà sa Dios. 20Natun-an nud sa Kasuguan hu Dios ha tagyanaen, ‘Harì ka manapaw daw harì ka mangimatay, harì ka daan manakaw daw harì ka magbutang-butang daw tahura daan sa mga laas nu.’”

21Minikagi haena sa etaw, “Binuhat kud en hayana sugud dà su atiyuay a pa.”

22Su mapaliman haena hi Jesus inikagiyan din, “Amin pa gayed sabuwa ha hurà nu kabuhat. Ipamaligyà sa alan ha mga butang nu dayun sa halin taena ipan-ila duun hu mga makaluluuy ta daw magsapian ka diyà ta langit. Ku mapengahan nu haini lumikù ka dini daw sunud ka kanak.”

23Su mapaliman ku agalen su inikagi hi Jesus naguul gayed haena ta madakel tungkay sa mga katigayunan din.

24Uminahà si Jesus diyà ta kandin daw ikagi, “Malegen tungkay ha maharian hu Dios sa etaw ha sapian. 25Malumu pa hu kamilyu sa paglusut duun hu pusu hu dagum dì hu sapian ha maharian hu Dios.”

26Su mapaliman haena hu mga etaw nanginginsà sidan, “Sin-u dà diay sa mailahan hu kinabuhì ha hurà din katapusan?”

27Tuminubag si Jesus, “Sa harì agkabaluy hu etaw agkahimu hu Dios.”

28Minikagi si Pedro diyà ki Jesus, “Inawaan day sa alan ta daw makasunud kay ikaw.”

29Inikagiyan sidan hi Jesus, “Laus gayed sa ag-ikagiyen ku inyu ha bisan sin-u sa inawaan din sa balay din, sa asawa daw sa mga suled din, sa mga laas daw sa mga batà din tumenged ta tagharian hu Dios, 30bisan iman ha panahun makadawat en gayed hu madakel pa dì taena ha inawaan din daw amin din daan kinabuhì ha hurà din katapusan.”

Sa Ikatulu Ha Pag-ikagi Hi Jesus Mahitenged Hu Kamatayen Din

(Lucas 18:31-34; Mateo 20:17-19; Marcos 10:32-34)

31Tinabis hi Jesus sa mga tinun-an din daw ikagiyi, “Tagdiyà kuy en iman ta Jerusalem daw diyà matuman sa alan ha insulat hu mga prupita ha maul-ulahan ku siak sa Batà hu Etaw. 32Itugyan a duun hu kenà mga Judio ha magtameyes kanak. Pagagayhaan a daw ileban a daan kandan, 33lagkutan a dayun himatayan a kandan. Ba duun hu ikatulu ha aldaw mabanhaw a dà.”

34Hurà gayed kasabut hu mga tinun-an din haena sa inikagi hi Jesus ta sa kahulugan taena nakalilung diyà ta kandan aman hurà dan katun-i ku inu sa tagsubayen din.

Sa Pagbulunga Ku Buta

(Lucas 18:35-43; Mateo 20:29-34; Marcos 10:46-52)

35Su ubay en si Jesus diyà ta Jerico amin buta ha tagpinuu diyà ta kilid ta dalan ha tagpakilimus. 36Su mapaliman din sa madakel ha mga etaw ha aglabay diyà ta kandin nanginginsà haena ku inu sa magulub. 37Inikagiyan dan, “Ag-agi en dini si Jesus ha taga-Nazareth.”

38Aman nangulahì su buta, “Jesus ha Kaliwat hi David, kahid-uwi a ikaw.”

39Binaldeng taena ha tag-una ta igpahagteng dan ngaay, ba bà dà nasì kadaging sa pangulahì din ha tagyanaen, “Sikaw sa Kaliwat hi David, kahid-uwi a man ikaw.”

40Aman tuminaleen en si Jesus daw sugù ha uwiten su buta diyà ta kandin. Su makaubay en su buta diyà ki Jesus ininsaan din haena, 41“Inu man sa agkabayaan nu ha buhaten ku diyan ta ikaw?”

Tuminubag su buta, “Ginuu, makaindan a ngaay.”

42Minikagi si Jesus diyà ta kandin, “Makaindan kad ta sa ingkaulii nu iyan sa pagsalig nu kanak.” 43Aman sagunà nakaindan daw duma ki Jesus ha tagdayè hu Dios. Su maahà haena hu mga etaw dinayè dan daan sa Dios.

Currently Selected:

Lucas 18: bkd

Highlight

Copy