Mga Buhat 8

1Si Saulo nabayà-bayà gayed hu kahimatayi ki Esteban.

Sa Kapasipalahi Daw Sa Pagsusuwayà Hu Mga Tumutuu

Duun taena ha aldaw migsugud sa kapasipalahi hu mga tumutuu diyà ta Jerusalem aman nakagsusuwayà sidan duun hu mga banuwa diyà ta Judea daw ta Samaria. Iyan dà hurà makapulaguy sa mga apustulis. 2Si Esteban inlebeng hu mga etaw ha masinimbahen hu Dios daw miglugul gayed sidan mahitenged kandin. 3Ba si Saulo pinasipalahan din gayed sa mga tumutuu. Pinanlatunan din sa kada balay daw pandakepa sa mga maama daw sa mga bahi dayun impaprisu din sidan.

Sa Pagtudlù Hu Maayad Ha Tultulanen Diyà Ta Samaria

4Su mga tumutuu ha nakagsusuwayà nanunultul hu lalang hu Dios bisan hindu duun ha napayanan-an dan. 5Si Felipe duminuun hu banuwa ha sakup ta Samaria daw migsangyaw ha si Jesus iyan su Misiyas. 6Migpaliliman gayed sa kaet-etawan ki Felipe ta naahà dan sa mga belenganen ha binuhat din. 7Madakel sa mga pigket daw sa mga minatay en sa dibaluy ha lawa dan ha nangaulian. Nakapangulahì daan sa mga busaw su bugawen din en duun hu mga etaw ha tinaguan dan. 8Tumenged taena malipayen gayed sa mga etaw diyà.

Si Simon Sa Salamangkiru

9Duun taena ha banuwa amin salamangkiru ha tagngaranan ki Simon ha nabelengan gayed hu mga taga-Samaria. Tagpagalbu haena ha bantugan kun ha etaw 10aman migpaliliman kandin sa alan ha mga etaw sa matangkaw daw sa ubus sa kahimtang din ha tagyanaen, “Sa gahem taini ha etaw duun gayed napuun hu gamhanan ha Dios.” 11Migsunud sidan kandin tumenged ta nalugay en sa kaahà dan hu mga belenganen ha binuhat din pinaagi hu salamangka. 12Ba su makatuu en sidan hu Maayad ha Tultulanen ha insangyaw kandan hi Felipe mahitenged hu pagharì hu Dios daw ki Cristo Jesus binautismuwan sidan, sa maama daw sa mga bahi. 13Bisan si Simon tuminuu aman binautismuwan daan. Migduma en ki Felipe bisan hindu duun daw nabeleng gayed hu mga timaan daw belenganen ha naahà din.

14Su mapaliman hu mga apustulis diyà ta Jerusalem ha tuminuu hu lalang hu Dios sa mga taga-Samaria impadiyà dan si Pedro daw si Juan. 15Su makauma sidan diyà in-ampù dan ha sa mga tumutuu diyà ta Samaria ulinan hu Balaan ha Ispiritu 16ta bà dà sidan nabautismuwi hu ngaran hi Jesus ha Ginuu. 17Aman dinampà hu mga apustulis su mga tumutuu dayun inulinan sidan hu Balaan ha Ispiritu.

18Su maahà hi Simon ha inulinan sidan hu Balaan ha Ispiritu pinaagi hu pagdampà kandan hu mga apustulis tag-ila ngaay haena hu salapì daw minikagi, 19“Ilahi a daan hu gahem nuy ta daw kada amin ku dampaen ulinan daan hu Balaan ha Ispiritu.”

20Ba inikagiyan hi Pedro, “Masilutan ka gayed daw sa salapì nu makalkalan ta abi nu gid ha agkapalit sa gahem ha ig-ila hu Dios. 21Hurà nu labet hu buluhaten day ta natun-an hu Dios ha kenà matareng sa henà-henà nu. 22Aman hinulsuli nu hayan daw mag-ampù ka duun hu Ginuu ha pasayluwen din sa madaet ha tuyù nu 23ta naahà ku ha agkasina ka daw naulipen ka gayed hu salà.”

24Dayun tuminubag si Simon, “Ampui a inyu duun hu Ginuu ta daw harì matuman sa inikagi nu mahitenged kanak.”

25Su makapenga sidan manunultul hu lalang hu Dios luminikù si Pedro daw si Juan diyà ta Jerusalem daw migsangyaw hu Maayad ha Tultulanen duun hu naagiyan dan ha mga banuwa diyà ta Samaria.

Si Felipe Daw Sa Upisyal

26Amin balinsuguen hu Dios ha minikagi diyà ki Felipe ha tagyanaen, “Dumuun ka taena ha dalan ta Jerusalem ha pakapayanaen ta Gaza, saini pinakabulung-bulung ha lugar.” 27Aman duminiyà si Felipe. Su diyà en haena ta dalan naahà din sa sabuwa ha upisyal ha taga-Etiopia ha iyan sinaligan hu alan ha mga butang hu rayna ha si Candace. Suminimba su upisyal diyà ta Jerusalem 28daw duun taena ha panahun tag-ulì en ha taglulan hu kalisa daw tagbasa hu insulat hi Isaias sa prupita. 29Dayun inikagiyan hu Balaan ha Ispiritu si Felipe, “Ubay ka diyà tayà ha kalisa.”

30Aman uminagpas uminubay si Felipe daw napaliman din ha tagbasa haena sa upisyal ku insulat hi Isaias sa prupita. Dayun ininsaan din haena, “Agkasabut nu ba hayana sa tagbasahen nu?”

31Tuminubag su upisyal, “Harì ta hurà man tagtudlù kanak.” Aman hinangyù din si Felipe ha lumulan daan duun ku kalisa.

32Sa lalang hu Dios ha tagbasahen ku upisyal iyan haini,

“Iling haena hu karniru ha harì ag-iyagak ku ag-iyawen daw iling daan hu nati hu karniru ha mahagteng ku agtabulugen. 33Pinagagayhaan haena daw sinilutan bisan ku hurà din salà. Hurà gayed masaysay ha kaliwat din daw laus dan dà haena inawà dini ta kalibutan.”

34Nanginginsà su upisyal diyà ki Felipe, “Sin-u man sa tagsubayen taini ha prupita? Iyan ba sa kaugalingen din daw ku lain en ba ha etaw?” 35Dayun insaysay kandin hi Felipe sa Maayad ha Tultulanen mahitenged ki Jesus sugud duun taena ha bahin hu lalang hu Dios.

36Hurà kalugay nakauma sidan duun hu wahig aman minikagi su upisyal, “Taini en sa wahig. Harì ba mabaluy ha bautismuwan ad iman ikaw?”

37Tuminubag si Felipe, “Ku laus gayed sa pagtuu nu mabaluy hayan.”

Minikagi su upisyal, “Tuminuu a gayed ha si Cristo Jesus Batà hu Dios.”

38Impataleen ku upisyal su kalisa dayun duminiyà sidan ta wahig daw bautismuwi haena hi Felipe. 39Su makagaun en sidan tinimù si Felipe hu Balaan ha Ispiritu aman hurà en kaahà ku upisyal. Ba duminayun su upisyal ha malipayen gayed. 40Si Felipe diyà en hu kandin naahà ta Asoto sa tagsangyaw hu Maayad ha Tultulanen duun hu alan ha mga banuwa taman ha nakauma haena diyà ta Cesarea.

Currently Selected:

Mga Buhat 8: bkd

Highlight

Copy