Mga Buhat 4

Sa Kabalaudi Ki Pedro Daw Ki Juan

1Su kamulu pa si Pedro daw si Juan tag-ikagi duun hu mga etaw nakauma diyà ta kandan sa mga sinaligan hu paghalad, sa kapitan hu mga bantay taena ha Timplu daw sa mga Saduceo. 2Nangapauk sidan tumenged hu pagtudlù taena ha mga apustulis duun hu kaet-etawan ha sa namamatay ha etaw mabanhaw dà ta nabanhaw daan si Jesus. 3Aman dinakep dan si Pedro daw si Juan daw prisuwa hu nangkadaleman ta agkahapun en haena. 4Ba sa madakel ha nakapaliman tuminuu, lalima ha libu sa kadakelen hu mga maama.

5Su maselem en mig-amul-amul diyà ta Jerusalem sa mga agalen, sa mga magulang daw sa mga manunudlù hu Kasuguan. 6Duun en daan si Anas sa tungkay labaw ha sinaligan hu paghalad, si Caifas daw si Juan, si Alejandro daw sa duma ha mga kadumahan hi Anas. 7Impaatubang dan si Pedro daw si Juan daw insai ku sin-u sa mig-ila kandan hu gahem hu pagbulung taena ha pigket.

8Dayun si Pedro sa inulinan hu Balaan ha Ispiritu uminikagi diyà ta kandan, “Sinyu sa mga agalen daw mga magulang, 9ku insaan kay iman inyu hu maayad ha binuhat day duun taini ha pigket daw ku inu ha gahem sa ingkaulii din, 10kinahanglan ha matun-an nuy daw hu alan ha kaliwat hi Israel ha pinaagi hu ngaran hi Cristo Jesus ha taga-Nazareth sa impalansang nuy duun hu krus ba pigbanhaw dà hu Dios iyan ingkaulii taini ha tag-ahaen nuy iman. 11Si Jesus iyan su batu ha bà dà inlambeg ta abi hu mga tagbalay ha hurà din pulus ba iyan man diay pakapalig-en hu balay. 12Iyan dà si Jesus makaluwas hu kaet-etawan ta hurà en gayed lain ha Manluluwas ha sinugù hu Dios dini ta kalibutan.”

13Su maahà hu mga agalen ha si Pedro daw si Juan harì gayed agkahaldek hu pag-ikagi nangabeleng sidan ta natun-an dan ha hurà haena makatunghà. Ba nahenhenaan dan ha nakagduma-duma haena ki Jesus. 14Tumenged ta naahà dan en su naulian ha taghitindeg daan duma ki Pedro daw ki Juan hurà dan en gayed agkaikagi. 15Aman impaguwà sidan, dayun su mga labaw ha agalen hu mga Judio miglalang-lalang. 16Kagi dan, “In-inuwen taw man iman haini ha mga etaw? Natun-an en hu alan ha tagtimà dini ta Jerusalem sa binuhat dan ha belenganen aman harì taw en haini makalimud. 17Ba sa buhaten taw iman balaudan taw sidan ha harì dan en itudlù sa mahitenged ki Jesus ta daw harì en makalekep duun hu kaet-etawan.”

18Aman impaumaw dan dà si Pedro daw si Juan daw balaudi ha harì en sidan magsangyaw daw magtudlù mahitenged ki Jesus. 19Ba si Pedro daw si Juan tuminubag, “Henhenaa nuy ku hindu sa maayad. Iyan day ba tumanen sa inyu ha sugù daw ku iyan day ba sa sugù hu Dios? 20Harì gayed mabaluy ha umendà kay hu pagpanunultul mahitenged hu naahà day daw hu napaliman day.”

21Pighulgà pa gayed si Pedro daw si Juan daw human ipaguwà. Hurà sidan kasiluti ku mga agalen ta sa mga etaw tagdayè hu Dios tumenged hu nahitabù. 22Ta su etaw ha naulian subra en ha kap-atan sa edad din.

Sa Pag-ampù Hu Mga Tumutuu

23Su ipaguwà en si Pedro daw si Juan duminuun sidan hu duma dan ha mga tumutuu daw intultul dan sa imbalaud kandan ku mga labaw ha sinaligan hu paghalad daw hu mga magulang. 24Su mapaliman hu mga tumutuu sa intultul dan alan sidan mig-ampù ha tagyanaen, “Dios ha Magbabayà hu alan, iyan ka migtanghagà ta langit daw ta kalibutan, ta dagat daw sa alan ha duun taena. 25Pinaagi hu Balaan ha Ispiritu impaikagi nu sa gin-apuan day ha si David sa suluguen nu ha tagyanaen,

‘Imbà agkangapauk sa kenà mga Judio daw imbà taghenhenaaya hu kaet-etawan sa hurà din pulus? 26Sa mga harì duun taini ha kalibutan tagpangandam en hu sabà daw sa mga agalen mig-amul-amul daan hu pagpakigsabà hu Dios daw taena ha pinilì din hu pagharì.’

27Saini natuman gayed ta dini ta Jerusalem si Herodes daw si Poncio Pilato daw sa duma ha mga Judio daw sa kenà mga Judio mig-uyun sidan hu paghimatay ki Jesus sa sinugù nu daw pinilì nu ha magharì. 28Binuhat dan sa daan nud en nahenà-henà ha mahitabù. 29Iman Dios ha Magbabayà hu alan, napaliman nu sa mga hulgà dan kanay ba himuwa kay ha makapanunultul gayed hu lalang nu ha hurà day kahaldek. 30Ipaahà sa gahem nu ta daw mangaulian sa agkangadaluwan daw pinaagi hu ngaran hi Jesus sa sinugù nu makapaahà kay daan hu mga timaan daw belenganen.”

31Su makapenga sidan mag-ampù nahuyung su balay ha pig-amul-amulan dan. Dayun inulinan sidan hu Balaan ha Ispiritu aman hurà dan en gayed kahaldek hu pagpanunultul hu lalang hu Dios.

Sa Pagsabuwa Hu Mga Butang Hu Mga Tumutuu

32Duun taena ha panahun sa alan ha mga tumutuu migsabuwa gayed. Hurà kandan mighenà-henà ha kandin dà sa mga butang din ta pigsabuwahan dan gayed sa alan ha mga katigayunan dan. 33Amin gayed gahem duun hu pagpanunultul hu mga apustulis mahitenged hu pagkabanhaw hi Jesus ha Ginuu aman adagi sa panalangin kandan. 34Hurà kandan miglised ta sa alan ha amin din bugtà daw mga balay imbaligyà dan sa duma taena daw sa halin din 35inamul dan duun hu mga apustulis. Dayun binahin-bahin sumalà hu kinahanglanen hu kada sabuwa kandan.

36Sa sabuwa kandan iyan sa kaliwat hi Levi ha taga-Cipro ha tagngaranan ki Jose ba pigdagnayan hu mga apustulis ki Bernabe ta sa kahulugan taena Tigdasig. 37Migbaligyà haena hu sabuwa ha bugtà din dayun inuwit din sa halin duun hu mga apustulis.

Currently Selected:

Mga Buhat 4: bkd

Highlight

Copy