Mga Buhat 3

Sa Pagbulung Hu Pigket Ha Etaw

1Amin panahun ha su agkabalalay en sa aldaw si Pedro daw si Juan duminiyà ta Timplu ta iyan haena panahun hu pag-ampù. 2Duun taena ha pultahan hu Timplu ha tagngaranan hu Madagway ha Pultahan amin etaw ha daan en pigket su ibatà. Kada aldaw ag-uwiten diyà ta daw magpakilimus duun hu mga etaw ha agseled ta Timplu. 3Su maahà din si Pedro daw si Juan sa agseled en diyà ta Timplu pinanayuan din sidan hu limus. 4Uminahà si Pedro daw si Juan diyà ta kandin daw inikagiyan hi Pedro, “Ahà ka dini ta kanay.” 5Aman uminahà haena diyà ta kandan ta tagsalap ku ilahan.

6Ba inikagiyan haena hi Pedro, “Hurà day salapì ba ku inu sa dini ta kanay iila day ikaw. Aman pinaagi hu ngaran hi Cristo Jesus ha taga-Nazareth hipanaw ka.” 7Dayun inibitan hi Pedro sa kawanan ha alima taena daw ipahitindeg. Sagunà naulian sa paa din 8daw huminitindeg dayun hipanaw. Sumineled diyà ta Timplu duma kandan ha taghiphipanaw daw taglaksu-laksu ha tagdayè hu Dios. 9Su maahà hu mga etaw haena sa taghiphipanaw ha tagdayè hu Dios 10nakilala dan ha iyan en haena su tagpinuuwà daw tagpakilimus duun ku Madagway ha Pultahan ta Timplu, aman nangabeleng gayed sidan hu nahitabù taena.

Sa Pag-ikagi Hi Pedro Diyà Ta Timplu

11Su diyà en si Pedro daw si Juan ta sihungà ha tagngaranan hu Sihungà hi Solomon daw tagpangibità pa diyà ta kandan su naulian ha pigket, inamul-amulan sidan hu mga etaw ha agkangabeleng gayed. 12Su maahà hi Pedro su mga etaw inikagiyan din, “Sinyu sa mga duma ku ha kaliwat hi Israel, imbà nuy haini agkabelengi daw imbà kaw tag-ahaay dini ta kanay? Abi nuy gid ha pinaagi hu kanay ha pagkamatareng daw gahem sa impakahipanaw taini. 13Sa Dios ha iyan tagsimbahen hi Abraham, hi Isaac daw hi Jacob sa mga gin-apuan taw migdayè ki Jesus ha sinugù din. Intugyan nuy si Jesus duun hu mga agalen daw pigtameyes nuy daan duun hu atubangan hi Pilato bisan su igpaawà en ngaay haena hi Pilato. 14Hurà nuy kabayai ha libriyen haena sa balaan daw matareng ba iyan nuy pinanayù ha ipaawà sa sabuwa ha talamunù. 15Pinahimatayan nuy sa tag-ila hu kinabuhì ba binanhaw dà haena hu Dios daw naahà day. 16Pinaagi hu ngaran hi Jesus daw hu pagsalig kandin iyan impakahipanaw taini ha etaw ha nakilala nuy en daw naahà nuy iman.

17“Iman mga suled, natun-an ku ha saena binuhat nuy duma hu mga agalen ta hurà nuy kakilala ku sin-u si Jesus. 18Ba pinaagi taena tinuman hu Dios sa inikagi hu mga prupita din ha su Misiyas ha sinugù din kinahanglan gayed ha mag-antus. 19Aman maghinulsul kaw gayed daw likù kaw duun hu Dios ta daw mapasaylu sa mga salà nuy daw sa kalinaw ha napuun duun hu Dios makadiyan ta inyu. 20Amin asem panahun ha ipalikù din si Jesus ha iyan su Misiyas sa pinilì din ha magharì kanuy. 21Ba saena diyà pa iman ta langit taman ha bag-uwen hu Dios sa alan sumalà hu inikagi hu mga prupita. 22Ta inikagi hi Moises, ‘Sa Dios ha Magbabayà hu alan magsugù diyan ta inyu hu prupita ha duma nuy dà daan ha Judio iling hu pagsugua din kanak diyan ta inyu. Kinahanglan ha magpaliliman kaw gayed hu alan ha ag-ikagiyen din inyu. 23Sa harì magpaliliman kandin hurà makalagkes duun hu mga etaw hu Dios.’

24“Sa alan ha mga prupita sugud dà ki Samuel migtagnà daan hu naul-ulahan en iman. 25Iyan kuy sa nakaangken hu insaad hu mga prupita daw hu kasabutan hu Dios daw hu mga gin-apuan taw ta inikagi din diyà ki Abraham ha tagyanaen, ‘Pinaagi hu mga kaliwatan nuy mapanalanginan sa alan ha kaet-etawan dini ta kalibutan.’ 26Aman iyan kuy nauna ha pinaelegan hu Dios ki Jesus ta daw mapanalanginan kuy pinaagi hu pag-endà taw hu madaet ha mga buhat.”

Currently Selected:

Mga Buhat 3: bkd

Highlight

Copy