Mga Buhat 13

Sa Kapilia Ki Bernabe Daw Ki Saulo

1Duun hu tagkaamul-amul ha mga tumutuu diyà ta Antiokia amin mga etaw ha pakasaysay hu igpaikagi hu Dios daw saena manunudlù daan ha iyan si Bernabe, si Saulo daw si Simeon ha tagngaranan daan ki Niger, si Lucio ha taga-Cirene daw si Manaen sa duun en mig-adagi hu pamilya hu amay hi Harì Herodes. 2Amin aldaw ha suminalang sidan hu pagkaen ta daw harì maelangan sa pagsimba dan hu Dios. Inikagiyan sidan hu Balaan ha Ispiritu, “Pilia nuy si Bernabe daw si Saulo ta amin buluhaten ha intagana ku kandan.” 3Su maiwas en sa pag-ampù dan daw sa pagsalang dan hu pagkaen pinagaheman si Bernabe daw si Saulo pinaagi hu pagdampà dan kandan dayun impahipanaw sidan.

Si Bernabe Daw Si Saulo Diyà Ta Cipro

4-5Impahipanaw hu Balaan ha Ispiritu si Bernabe daw si Saulo daw dinuma dan si Juan ha tagngaranan daan ki Marcos ta daw makabulig kandan. Aman duminiyà sidan ta Seleucia daw lulan hu barku payanaen ta pulù ta Cipro. Su makauma sidan diyà ta Salamina intultul dan sa lalang hu Dios duun hu mga simbahan hu mga Judio.

6Su diyà en sidan ta Papos ha dibaluy taena ha pulù natalagbù dan sa salamangkiru ha Judio ha tagngaranan ki Bar-Jesus ha tagpasibù-sibù ha pakasaysay hu igpaikagi hu Dios, 7saena sinaligan daan ku matatau ha gubirnadur diyà ha iyan si Sergio Paulo. Pinaelegan ku gubirnadur si Bernabe daw si Saulo ta agkabayà agpaliliman hu lalang hu Dios. 8Ba si Bar-Jesus ha tagngaranan daan ki Elimas ha tagkahulugan hu Salamangkiru suminupak kandan daw nan-ahà hu paagi ha harì makatuu su gubirnadur. 9Ba si Saulo ha pigngaranan daan ki Pablo ha tinaguan hu Balaan ha Ispiritu migtengteng diyà ta kandin 10daw ikagi, “Sikaw sa agkailing ki Satanas, agsupak ka gayed hu alan ha matareng daw mangingilad ka gayed ta agbuhaten nu ha bidù sa lalang hu Dios. 11Iman silutan ka hu Dios daw mabuta ka hu malugayad ha panahun.”

Sagunà nabuta si Elimas aman nakadugung-dugung hu pagpan-ahà hu makakipit kandin. 12Su maahà ku gubirnadur sa nahitabù nakatuu haena ta nabeleng gayed hu katudluanan mahitenged hu Ginuu.

Si Pablo Diyà Ta Antiokia Ha Sakup Ta Pisidia

13Si Pablo daw sa mga duma din uminawà diyà ta Papos daw lulan hu barku payanaen ta Perga ha sakup ta Pamfilia. Su makauma sidan diyà inawaan sidan hi Juan Marcos ta uminulì en haena diyà ta Jerusalem. 14Ba say Pablo duminayun diyà ta Antiokia ha sakup ta Pisidia. Su aldaw hu Sabadu sumineled sidan duun hu simbahan hu mga Judio daw pinuu. 15Su mapengahan sa pagbasa hu Kasuguan daw hu mga insulat hu prupita huminangyù sa mga agalen taena ha simbahan diyà kay Pablo. Kagi dan, “Mga suled, amin nuy ba maikagi ha salambagan duun hu mga etaw?”

16Aman si Pablo huminitindeg daw singyasi sa mga etaw ha maghagteng dayun minikagi, “Mga suled ku ha kaliwat hi Israel daw sinyu daan sa alan ha masinimbahen hu Dios, palilimani a inyu. 17Sa Dios taw sikuy sa mga Judio iyan migpilì hu mga gin-apuan taw su anay daw pigpanalanginan din sidan aman migdakel sidan su panahun ha langyaw sidan diyà ta Ehipto. Pinaagi hu pagkagamhanan hu Dios pigpangagalenan din sidan diyà 18daw duun hu kap-atan ha tuig inantus din sa pagkamasinupaken dan duun taena ha pinakabulung-bulung ha lugar. 19Pinaagi hu gahem hu Dios nadaeg dan su pitu ha ginharian diyà ta Canaan daw in-ila hu Dios kandan haena sa bugtà dan ha mahimu ha kabilin duun hu mga kaliwatan hi Israel. Nahitabù haena seled hu 450 ha tuig.

20“Su maiwas haena amin pinilì hu Dios ha mga agalen dan taman su mauma sa panahun ha iyan si Samuel prupita. 21Duun taena ha panahun sa kaet-etawan nanayù duun hu Dios hu harì dan aman in-ila kandan si Saulo sa batà hi Cis ha kaliwat hi Benjamin. Saena migharì hu kap-atan ha tuig. 22Su awaen en hu Dios si Saulo hu pagkaharì pinilì din si David ha iyan en paman magharì kandan. Sa Dios minikagi mahitenged kandin, ‘Si David sa batà hi Jesse nabayà-bayaan ku ta matinumanen gayed kanak.’ 23Si David iyan gin-apuan hi Jesus sa Manluluwas ha impadini hu Dios ta kanuy sikuy sa mga kaliwat hi Israel ta iyan haena insaad din kanuy. 24Su hurà pa si Jesus magsugud hu buluhaten din si Juan Ha Tagpamautismu migtudlù en ha kinahanglan ha maghinulsul kuy daw magpabautismu kuy sikuy sa mga kaliwat hi Israel. 25Su agkapengahan en sa buluhaten hi Juan inikagiyan din sa mga etaw, ‘Abi nuy gid ha iyan ad su tagsalapen nuy. Ba kenà a iyan ta amin pakadini ha labaw dì kanak ta bisan sa paghukad hu sapatus din kenà a gayed angayan duun.’

26“Mga suled ku ha kaliwat hi Abraham daw sinyu daan sa alan ha matinahuren hu Dios, iyan kuy pinauwitan hu Maayad ha Tultulanen mahitenged hu igkaluwas taw. 27Ba sa mga Judio diyà ta Jerusalem daw sa mga agalen hurà dan kakilala si Jesus ha iyan diay sinugù hu Dios, ba pinaagi hu kahukumi dan kandin hu kamatayen natuman dan sa insulat hu mga prupita ha tagbasahen kada Sabadu. 28Bisan pa ku hurà dan naahà ha salà taena ha angayan hu kamatayen ba hinangyù dan diyà ki Pilato ha pahimatayan din. 29Su matuman dan en sa alan ha inikagi hu prupita mahitenged kandin inawà dan haena duun hu krus daw ilebeng. 30Ba binanhaw haena hu Dios 31daw duun hu pila ha aldaw migpaahà taena ha namanduma kandin su anay ha napuun ta Galilea payanaen ta Jerusalem. Iyan daan sidan pakapanistigus iman mahitenged kandin duun hu kaet-etawan.

32“Aman nakadini kay iman hu pagsangyaw inyu hu Maayad ha Tultulanen ha sa insaad hu Dios duun hu mga gin-apuan taw su anay 33tinuman din en para kanuy sikuy sa mga kaliwat dan pinaagi hu pagkabanhaw hi Jesus. Insulat daan haini duun hu ikaduwa ha Salmo ha tagyanaen,

‘Batà ku ikaw na iman taini ha aldaw igpaahà ku ha iyan a Amay nu.’

34Daw mahitenged hu pagkabanhaw din ha harì en isab matay tagyanaen daan,

‘Panalanginan ku gayed iman inyu sumalà hu insaad ku diyà ki David.’

35Duun daan hu lain ha Salmo tagyanaen si David,

‘Harì nu itugut ha maledak haini sa lawa ku siak sa sinugù nu.’

36“Natun-an taw ha si David sa migmatinumanen hu Dios minatay daw inlebeng duma hu mga gin-apuan din daw naledak sa lawa din. 37Ba si Jesus sa binanhaw hu Dios hurà kaledak. 38Aman mga suled, agkabayaan day ha matun-an nuy ha pinaagi ki Jesus igtultul iman inyu sa ikapasaylu hu mga salà nuy. 39Kenà pinaagi hu pagtuman hu Kasuguan hi Moises ha malibri kuy hu mga salà taw ba pinaagi dà hu pagtuu ki Jesus. 40Aman mag-andam kaw ha harì mahitabù diyan ta inyu sa lalang hu Dios ha insulat hu mga prupita ha tagyanaen,

41‘Sinyu sa tagpasipala, mabeleng kaw gayed hu tagbuhaten ku. Ba harì nuy haini agtuuwan bisan ku ag-ikagiyen en inyu aman mamamatay kaw.’”

42Su agguwà en si Pablo daw si Bernabe duun taena ha simbahan hinangyù sidan hu mga etaw ha lumikù dà sidan duun hu isab ha Sabadu ta daw isab dà sidan makapanudlù. 43Su mapengahan en sa pag-amul-amul dan diyà ta simbahan duminuma ki Pablo daw ki Bernabe sa madakel ha mga Judio daw sa kenà mga Judio ha masinimbahen hu Dios ha nakabig duun hu tinuuwan dan. Pigdasig hay Pablo ha harì sidan umendà hu pagsalig duun hu grasya hu Dios.

44Su maisab ha Sabadu madakel gayed tungkay sa nangaamul-amul duun taena ha simbahan hu pagpaliliman hu lalang hu Dios. 45Ba su maahà haena hu mga Judio nasina sidan aman sinupak dan sa inikagi hi Pablo daw pigtameyes dan daan.

46Ba si Pablo daw si Bernabe hurà gayed kahaldek aman minikagi sidan, “Kinahanglan gayed ha sinyu sa mga Judio iyan kaw unahan tultulan hu lalang hu Dios. Ba tumenged ta hurà nuy dawata inisip nuy ha kenà kaw angayan hu kinabuhì ha hurà din katapusan. Aman agduun kay iman hu mga etaw ha kenà Judio 47ta iyan haini inikagi kanay hu Dios,

‘Pinilì ku inyu ha sulù ha makailaw duun hu mga etaw ha kenà Judio ta daw pinaagi hu pagpanunultul nuy maluwas sa kaet-etawan dini ta tibuuk ha kalibutan.’”

48Su mapaliman haena hu kenà mga Judio nangalipay gayed sidan daw dinayè dan sa lalang hu Dios. Dayun tuminuu haena sa daan en pinilì ha mailahan hu kinabuhì ha hurà din katapusan.

49Sa lalang hu Dios nakalekep duun taena ha mga banuwa. 50Ba sa mga tinahud daw masinimbahen ha mga bahi daw sa mga tinahud ha mga maama duun taena ha banuwa pighulhugan hu mga Judio diyà ha pasipalahan dan si Pablo daw si Bernabe, aman binugaw dan say Pablo diyà. 51Su umawà en say Pablo pinugpug dan sa aliyabuk diyà ta paa dan ha iyan timaan ha silutan gayed haena hu Dios, dayun duminiyà sidan ta Iconio. 52Sa mga tumutuu diyà ta Antiokia nangabayà-bayà gayed daw inulinan daan sidan hu Balaan ha Ispiritu.

Currently Selected:

Mga Buhat 13: bkd

Highlight

Copy