ᒉᓂᓯᔅ 8
8
ᑮᐃᔥᒀ ᒨᔥᑲᐊᕽ ᐅᐅ ᐊᑭ
1ᑭᔐᒪᓂᑑ ᐅᑮ ᒫᒥᑲᐎᓄᑕᐙᓐ ᓅᐗᐗᓐ Noah ᐃᐃ ᑲᔦ ᑲᑭᓇ ᐊᔭᐋᐎᔕᐞ ᑳᑮ ᐐᒋ ᐴᓰᒥᑯᓂᒡ ᐃᐃᒫ ᑭᒋ ᒌᒫᓂᕽ᙮ ᑭᔐᒪᓂᑑ ᑕᔥ ᑮᐃᔑᒋᑫ ᒋᑭᒋ ᓅᑎᓂᓂᒃ ᐅᐅᒫ ᐊᑮᕽ, ᒦᑕᔥ ᑳᐃᔑ ᒫᒌ ᐃᔅᑲᑌᓂᒃ᙮ 2ᐊᓈᒪᑲᒥᒃ ᐃᑕᔥ ᑳᑮ ᐅᒋ ᒨᔥᑲᐊᑭᐸᓐ, ᐃᔥᐱᒥᕽ ᑲᔦ ᑳᑮ ᐹᑭᔥᑳᑭᐸᓐ ᑮᑭᐸᐃᑳᑌᐗᓐ᙮ ᑳᐐᓐ ᐊᐗᔑᒣ ᒦᓇᐙ ᑮᑭᒥᐗᓯᓅᓐ ᐁᑮ ᑭᐱᑎᓂᑳᑌᒃ᙮ 3ᓂᑯᑣᒃ ᓈᓂᒥᑕᓇ 150 ᑕᓱ ᑮᔑᒃ ᐃᑕᔥ ᒦ ᓴ ᐃ ᓂᐱ ᑳᐃᔑ ᐱᒥ ᐃᔅᑲᑌᒃ ᐅᐅᒫ ᐊᑮᕽ᙮ 4ᓃᔣᓱᑮᓯᓲᓐ 7 ᑕᔥ ᐁᐱᒪᑭᓱᓂᒡ, ᒥᑖᔑᓃᔣᓱᑮᔑᒃ 17 ᐁᐃᔑᓭᓂᒃ ᐃᐃ ᑭᒋ ᒌᒫᓐ ᑮᒥᔕᑮᓯᓐ ᐃᐃᒫ ᑭᒋ ᐗᒌᕽ ᐁᕒᐊᕒᐊᑦ Ararat ᑳᑮ ᐃᔑᓂᑳᑌᓂᑭᓐ᙮ 5ᓂᐱ ᑕᔥ ᑳᐐᓐ ᑮᐅᒋ ᑭᐱᒋᓭᓯᓅᓐ ᐁᑮ ᐊᓂ ᐃᔅᑲᑌᒃ ᐲᓂᔥ ᐁᑮ ᐊᓂ ᐅᒋᒋᓭᒃ ᒥᑖᓱ ᑮᓯᔅ᙮ ᒥᑖᓱ ᑮᓯᔅ ᑕᔥ ᐁᐱᒪᑭᓱᒡ, ᐁᐊᓂ ᐯᔑᑯᑯᓇᑳᒃ, ᒦ ᓴ ᐃ ᑮᐊᓂ ᓵᑭᐲᑭᓐ ᐃᓂ ᑭᒋ ᐗᒌᓐ ᑳᑮ ᐃᔑ ᒐᒌᑄᑎᓈᑭᓐ᙮
6ᓃᒥᑕᓇ ᑕᓱ ᑮᔑᒃ ᑕᔥ ᐁᑮ ᐃᔥᒀ ᐃᔑᓭᓂᒃ, ᓅᐗ ᐅᑮ ᐹᑭᓈᓐ ᐙᓭᒋᑲᓐ ᑳᑮ ᐅᔑᑑᑯᐸᓀᓐ ᐃᐃᒫ ᑭᒋ ᒌᒫᓂᕽ᙮ 7ᑳᑳᑭᐗᓐ ᑕᔥ ᐅᑮ ᓵᑭᒋᓂᔕᐙᓐ ᒋᐸᐹᒥᓭᓂᒡ ᒥᓯᐌ᙮ ᑳᐐᓐ ᑕᔥ ᑮᐱᑮᐌᓭᓰᐗᓐ ᐲᓂᔥ ᐐᑫ ᐁᑮ ᐹᑾᑲᒥᑳᓂᒃ ᑳᐊᐲᒋᒪᑲᓂᓂᒃ ᐁᐃᔅᑲᑌᓂᒃ᙮ 8ᓅᐗ ᓴ ᐅᑮ ᓵᑭᒋᓂᔕᐙᓐ ᐅᒦᒦᓐ, ᐁᐋᐸᒋᐋᒡ ᐁᐐ ᐅᒋ ᑭᑫᑕᕽ ᐋᓃᓐ ᑳᐊᐲᒋ ᐃᔅᑲᑌᓂᒃ ᐅᐅᒫ ᐊᑮᕽ᙮ 9ᐊᐊ ᑕᔥ ᐅᒦᒦ ᑳᐐᓐ ᐃᑯᒋ ᐅᑮ ᒥᑲᓰᓐ ᐋᑎ ᑫᔑ ᐴᓃᒡ᙮ ᒦᑕᔥ ᑳᐃᔑ ᑮᐌᓭᒡ ᑭᒋ ᒌᒫᓂᕽ ᓅᐗᐗᓐ ᑳᑮ ᐃᔑᐊᔮᓂᒡ, ᐋᓃᔥ ᑫᔮᐱ ᒥᓯᐌ ᑮᓂᐲᑳᓂ᙮ ᓅᐗ ᑕᔥ ᑮᓃᒥᓂᑫᑖ ᐁᑮ ᑌᐱᓈᒡ ᐅᒦᒦᓐ ᐁᑮ ᐲᑎᑲᓈᒡ ᑭᒋ ᒌᒫᓂᕽ᙮ 10ᐱᓇᒫ ᑕᔥ ᓃᔣᓱᑮᔑᒃ 7 ᑮᐲᐅ, ᒦᑕᔥ ᒦᓇᐙ ᑳᐃᔑ ᓵᑭᒋᓂᔕᐙᒡ ᐅᒦᒦᓐ ᐃᐃᒫ ᐅᒋ ᑭᒋ ᒌᒫᓂᕽ᙮ 11ᐁᐊᓂ ᐅᓈᑯᔑᓂᓂᒃ ᑕᔥ ᐅᑮ ᐱᑮᐌ ᓈᓯᑳᑰᓐ ᐅᒦᒦᓐ ᐁᑮ ᑕᑾᑕᒥᓂᒡ ᐅᔥᑭ ᐋᓬᐃᑉ ᑎᓄᐎᐸᒃ ᐸᔦᔥ ᐃᑯ ᐁᑮ ᒪᓂᐱᑑᓂᒡ᙮ ᒦᑕᔥ ᓅᐗ ᑳᑮ ᐅᒋ ᑭᑫᑕᕽ ᐋᔕ ᓂᐱ ᐁᑮ ᐊᓂ ᐃᔅᑲᑌᓂᕽ᙮ 12ᒦᓇᐙ ᑕᔥ ᓃᔣᓱᑮᔑᒃ 7 ᑮᐲᐅ, ᒦᑕᔥ ᑳᐃᔑ ᒫᒋᓂᔕᐙᒡ ᐅᒦᒦᓐ᙮ ᑳᐐᓐ ᑕᔥ ᒦᓇᐙ ᐅᑮ ᐱᑮᐌ ᓈᓯᑳᑯᓰᓐ᙮
13ᐊᐲ ᑕᔥ ᓅᐗ Noah ᓂᑯᑣᔂᒃ ᐯᔑᒃ 601 ᑮᑕᓱ ᐱᐴᓉᒡ, ᐯᔑᑯ ᑮᓯᓲᓐ ᑮᐱᒪᑭᓱᓂᒡ, ᐯᔑᑯ ᑮᔑᒃ ᐁᐃᔑᓭᓂᒃ, ᐋᔕ ᐐᑫ ᑮᐹᑾᑲᒥᑳᓂ ᐅᐅ ᐊᑭ᙮ ᒦᑕᔥ ᑳᑮ ᐅᑖᐱᓇᕽ ᑭᐸᐃᑲᓐ ᐃᐃᒫ ᑭᒋ ᒌᒫᓂᕽ᙮ ᑮᐊᔨᓈᐱ ᑕᔥ, ᑌᐺ ᐄᑐᒃ ᐅᑮ ᐙᐸᑖᓐ ᒥᓯᐌ ᐁᑮ ᐹᑾᑲᒥᑳᓂᒃ ᐅᐅ ᐊᑭ᙮ 14ᓃᔓᑮᓯᓲᓐ 2 ᑕᔥ ᐁᐱᒪᑭᓱᓂᒡ, ᐁᓃᔥᑕᓇᔑᓃᔣᓱᑯᓇᑳᓂᒃ 27, ᒦ ᓴ ᐃ ᐊᐲ ᐐᑫ ᑳᑮ ᐹᑾᒃ ᐅᐅ ᐊᑭ᙮
15ᑭᔐᒪᓂᑑ ᑕᔥ ᐅᑮᐃᓈᓐ ᓅᐗᐗᓐ, 16ᓵᑲᐊᓐ ᐃᐃᒫ ᑭᒋ ᒌᒫᓂᕽ, ᑭᐐᐤ ᑲᔦ ᑕᓵᑲᐊᒻ᙮ ᑭᑯᓯᓴᒃ, ᐐᐎᐗᐞ ᑲᔦ ᑕᑲ ᑭᑲ ᓵᑭᒋ ᐐᒌᐎᑰᒃ᙮ 17ᓵᑭᓯᐞ ᑲᔦ ᑲᑭᓇ ᐃᑭ ᑳᐴᓯᐙᒡ ᐃᐃᒫ ᑭᒋ ᒌᒫᓂᕽ᙮ ᐱᓀᔒᔕᒃ, ᐊᔭᐋᐎᔕᒃ, ᐃᑭ ᑲᔦ ᑲᑭᓇ ᑳᐸᐹᒨᑌᐙᒡ ᐅᐅᒫ ᐊᑮᕽ, ᒋᓂ ᓂᑖᐎᑭᐋᐙᒡ ᐊᔭᐋᐎᔐᓴᐞ, ᐲᓂᔥ ᒥᓯᐌ ᒋᓂ ᐹᑏᓄᐙᒡ ᐅᐅᒫ ᐊᑮᕽ᙮ 18ᓅᐗ ᑕᔥ, ᐐᐗᓐ ᑲᔦ, ᐅᑯᓯᓴᐞ ᑲᔦ, ᐐᐎᓂ ᑲᔦ ᑲᑭᓇ ᑮᓵᑲᐊᒨᒃ ᐃᐃᒫ ᑭᒋ ᒌᒫᓂᕽ᙮ 19ᐃᐃ ᑕᔥ ᑲᔦ ᑲᑭᓇ ᐊᔭᐋᐎᔕᐞ, ᑲᑭᓇ ᑲᔦ ᑳᐸᐹᒨᑌᓂᒡ ᐅᐅᒫ ᐊᑮᕽ, ᑲᑭᓇ ᑲᔦ ᐱᓀᔒᔕᐞ, ᑲᑭᓇ ᑲᔦ ᑳᐗᑲᐐᓂᒡ ᐅᐅᒫ ᐊᑮᕽ, ᑮᐅᒋ ᓵᑲᐊᒨᐞ ᐁᑕᓶᐙᓇᑭᓯᓂᒡ ᐃᐃᒫ ᑭᒋ ᒌᒫᓂᕽ᙮
ᓅᐗ ᑮᐸᑭᑎᓈᓱᒡ
20ᓅᐗ Noah ᑕᔥ ᐅᑮ ᐅᓈᐱᑭᓈᓐ ᐙᑕᔑ ᐸᑭᑎᓈᓲᑕᒪᐙᒡ ᑳᑎᐯᒋᑫᓂᒡ᙮ ᐅᑮ ᑲᑮᑭᓈᐞ ᑲᑭᓇ ᐯᔦᑭᓯᓂᒡ ᐊᔭᐋᐎᔕᐞ, ᐱᓀᔒᔕᐞ ᑲᔦ, ᐁᑮ ᒑᑭᓴᒪᐙᒡ ᑳᑎᐯᒋᑫᓂᒡ ᑭᑭ ᒥᓯᐌ ᐊᔭᐋᐎᔕᐞ ᐁᑮ ᐃᔑ ᐸᑭᑎᓈᓲᑕᒪᐙᒡ ᐃᐃᒫ ᑳᑮ ᐃᔑ ᐅᓈᐱᑭᓂᑫᒡ᙮ 21ᑳᑎᐯᒋᑫᒡ ᑕᔥ ᐁᑮ ᒥᓈᑕᕽ ᐃᐃ ᐸᑭᑎᓈᓱᐎᓐ, ᐐᑫ ᑮᒥᓉᑕᒻ᙮ ᒦᑕᔥ ᑳᐃᑎᓱᒡ, ᑳᐐᓐ ᒦᓇᐙ ᐐᑳ ᓂᑲ ᒪᒐᑭᑕᓰᓐ ᐅᐅ ᐊᑭ, ᐋᓇᐐᓐ ᐃᓂᓂ ᐊᐸᓂᑯ ᐁᐱ ᐅᔥᑳᑎᓯᒡ ᐁᐅᒋ ᒪᒋᐃᓀᑕᕽ ᐅᑌᐃᕽ᙮ ᑳᐐᓐ ᐐᑳ ᒦᓇᐙ ᓂᑲ ᓂᔑᐗᓈᒋᑑᓰᓐ ᐱᒫᑎᓯᐎᓐ ᐅᐅ ᑳᑮ ᐃᔑᒋᑫᔮᓐ᙮ 22ᒥᓂᒃ ᐃᑕᔥ ᑫᐊᑮᐗᕽ, ᑕᑭᑎᑫᓈᓂᐗᓐ, ᑕᒨᓇᐃᑫᓈᓂᐗᓐ ᑲᔦ᙮ ᑕᑭᓯᓈ, ᑕᑭᔑᑌ, ᑕᐱᐴᓐ, ᑕᓃᐱᓐ ᑲᔦ, ᑳᑮᔑᑲᒃ, ᑳᑎᐱᑲᒃ ᑲᔦ ᑳᐐᓐ ᐐᑳ ᑕᐴᓂᓭᓯᓅᓇᓐ᙮
Currently Selected:
ᒉᓂᓯᔅ 8: OJBS
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Syllabic Script) © 2008 Canadian Bible Society
