ᒉᓂᓯᔅ 31

ᒉᑲᑉ ᑮᒫᒌᐸᐃᐙᓈᒡ ᓬᐁᐸᓅᓐ

1ᒉᑲᑉ Jacob ᓴ ᑮᓅᑕᒻ ᓬᐁᐸᓅᓐ Laban ᐅᑯᓯᓯᓂ ᐁᑮ ᐃᑭᑐᓂᒡ, ᒉᑲᑉ ᐄᑐᒃ ᐃᓈ ᐅᒪᑲᒫᓐ ᑭᑌᑌᓈᓂᓐ ᑲᑭᓇ ᑫᑰᓐ ᑌᐯᑕᒥᓂᒡ᙮ ᒦᑕᔥ ᐃᐃ ᑳᐅᒋ ᐌᓅᑎᓯᒡ ᑭᑌᑌᓈᓃᓐ ᐁᔑ ᑎᐯᑕᒥᓂᒡ ᑲᑭᓇ ᑫᑰᓐ, ᑮᐃᑭᑐᐗᐞ᙮ 2ᑲᔦ ᑕᔥ ᒉᑲᑉ ᐅᑮ ᑭᑫᑖᓐ ᐄᓴᓐ ᐌᐌᓂ ᐁᐃᓀᓂᒥᑯᓯᒃ ᐅᔑᔐᔕᓐ ᐁᓵᑭ ᐐᒌᐎᑯᓯᒃ ᓬᐁᐸᓅᓐ ᑖᐱᔥᑰ ᑳᑮ ᐃᔑ ᓵᑭ ᐐᒌᐎᑯᐸᓐ ᐅᑖᓈᕽ᙮ 3ᑳᑎᐯᒋᑫᒡ ᐃᓴ ᐅᑮ ᓈᑯᓰᑕᐙᓐ ᒉᑲᐴᓐ ᐁᑮᐃᓈᒡ, ᐌᑎ ᓴ ᑭᑌᑌ ᐅᑕᑮᕽ, ᐃᑭ ᑲᔦ ᑭᑎᓇᐌᒫᑲᓇᒃ ᐁᔑᐊᔮᐙᒡ ᐃᔑ ᑮᐌᓐ, ᑫᓃᓐ ᐃᑕᔥ ᑭᑲ ᐐᒌᐎᓐ, ᐁᑮᐃᑯᒡ᙮

4ᒉᑲᑉ ᓴ ᐅᑮ ᐊᑐᒫᓐ ᐅᕒᐁᒐᓬᐗᓐ Rachel, ᐃᓂ ᑲᔦ ᓬᐄᔭᐗᓐ Leah ᒋᔑ ᓇᑭᔥᑳᑯᒡ ᐌᑎ ᒥᔕᐗᑲᒥᒃ ᐁᔑᐊᔮᓂᒡ ᐅᑕᐗᑳᓂᒪᐞ᙮ 5ᒦᔥ ᑳᐃᓈᒡ, ᓂᐙᐸᑖᓐ ᐃᓴ ᐌᐌᓂ ᐁᐃᓀᑕᓯᒃ ᑭᑌᑌᐙ ᒋᓵᑭ ᐐᒌᐎᒡ, ᑖᐱᔥᑰ ᑳᑮ ᐃᔑ ᓵᑭ ᐐᒌᐎᐸᓐ ᐅᑖᓈᕽ᙮ ᐊᐊ ᓴ ᓂᑌᑌ ᐅᑭᔐᒪᓂᑑᒪᓐ ᓂᐱ ᐐᒌᐎᒃ᙮ 6ᑭᑭᑫᓂᒥᒻ ᐄᑐᒃ ᑮᓇᐙ ᒥᒋᓃᔥ ᐁᐱ ᐊᓄᑮᑕᐗᒃ ᑭᑌᑌᐙ ᒥᓂᒃ ᐃᑯ ᐁᑯ ᑲᔥᑭᑑᔮᓐ᙮ 7ᔖᑰᒡ ᐃᑕᔥ ᑭᑌᑌᐙ ᓂᐗᔦᔑᒥᒃ ᐁᑮ ᐋᒋᑑᒡ ᒥᑖᒌᕽ ᒥᓂᒃ ᑫᑮ ᐃᔑ ᑎᐸᐊᒪᐎᐸᓐ᙮ ᑳᐐᓐ ᐃᑕᔥ ᑭᔐᒪᓂᑑᓐ ᐅᐸᑭᑎᓂᑯᓰᓐ ᒋᒫᔑᐱᓂᒡ᙮ 8ᐅᐅ ᐄᑐᒃ ᓂᑮᐃᑯᐸᓐ, ᐃᑭ ᓴ ᒫᓇᑎᑾᒃ ᑳᐹᐹᑌᐎᓯᐙᒡ ᒦ ᐃᐌ ᑫᔑ ᑎᐸᐊᒪᐎᓈᓐ, ᑳᑮ ᐊᓂ ᓂᑖᐎᑭᐙᒡ ᐃᑕᔥ ᒦ ᐯᔑᑾᓐ ᑳᐃᔑᓈᑯᓯᐙᒡ᙮ ᐅᐅᔥ ᑲᔦ ᐁᑮᐃᔑᐸᓐ, ᐃᑭ ᓴ ᒫᓇᑎᑾᒃ ᑳᐯᐯᔑᓯᐙᒡ ᒦ ᐃᐌ ᑫᔑ ᑎᐸᐊᒪᐎᓈᓐ, ᑳᑮ ᐊᓂ ᓂᑖᐎᑭᐙᒡ ᐃᑕᔥ ᒦ ᐯᔑᑾᓐ ᑳᐃᔑᓈᑯᓯᐙᒡ᙮ 9ᑭᔐᒪᓂᑑᓐ ᐃᑕᔥ ᑲᑭᓇ ᑭᑌᑌᐙ ᐅᑕᐗᑳᓂᒪᐞ ᐅᑮ ᐅᑖᐱᓇᒫᑰᓐ, ᓃᓐ ᐃᑕᔥ ᐁᑮ ᒦᔑᒡ ᐃᐃ ᐊᐗᑳᓇᐞ᙮

10ᐊᐲ ᓴ ᑮᐋᒧᓅᓱᐙᒡ ᐊᐗᑳᓇᒃ ᓂᑮ ᐃᓈᐸᑕᒻ ᐄᓴᓐ ᐊᔮᐯ ᒫᓇᑎᑾᒃ ᐁᑮ ᐯᐯᔑᓯᐙᒡ, ᐁᐹᐹᑌᐎᓯᐙᒡ ᑲᔦ, ᑲᔦ ᑕᔥ ᐁᐹᐸᑳᓂ ᓈᑯᓯᐙᒡ ᐁᔑᒋᑫᐙᒡ ᒋᓂᑖᐎᑭᓂᒡ ᐊᐗᑳᓀᓴᐞ ᐁᐊᐱᓅᒌᔑᑫᐙᒡ᙮ 11ᒦᑕᔥ ᑳᑮ ᐙᐸᒥᒪᒃ ᑭᔐᒪᓂᑑ ᐅᑌᒐᓬᐃᒪᓐ ᐅᐅ ᐁᐃᔑᒡ, ᒉᑲᑉ᙮ ᒦᔥ ᑳᐃᑭᑐᔮᓐ, ᐅᐅᒫ ᓂᑕᔮ᙮ 12ᒦᔥ ᑳᐃᔑᒡ, ᐃᓇᔥᑫ ᐃᓈᐱᓐ᙮ ᐃᑭ ᓴ ᐊᔮᐯ ᒫᓇᑎᑾᒃ ᐁᐊᐗᑳᓀᓯᑫᐙᒡ ᐯᐯᔑᓯᐗᒃ, ᐹᐹᑌᐎᓯᐗᒃ ᑲᔦ, ᐋᓂᑕ ᑕᔥ ᑲᔦ ᐯᐸᑳᓂ ᓈᑯᓯᐗᒃ ᐁᐃᔑᒋᑫᐙᒡ ᒋᐊᔮᐙᐙᒡ ᐊᐗᑳᓀᓴᐞ᙮ ᓂᐙᐸᑕᒧᐙᓐ ᐅᔕ ᓬᐁᐸᓐ ᑲᑭᓇ ᐯᒥᑑᑕᐎᒃ᙮ 13#Gen 28.18-22. ᓃᓐ ᐄᑐᒃ ᑭᔐᒪᓂᑑ ᑳᑮ ᓈᑯᓰᑕᐎᒃ ᐌᑎ ᐯᑕᓬ Bethel ᐆᑌᓈᕽ ᑮᓰᑭᓇᒪᓐ ᐋᓬᐃᑉ Olive ᑎᓄ ᐱᒥᑌ ᑳᑮ ᐃᔑ ᐅᓈᐱᑭᓂᑫᔭᓐ ᐊᐲ ᑮᐊᐱᒧᔭᐸᓐ᙮ ᔐᒫᒃ ᐃᑕᔥ ᐃᑯ ᓅᑯᒻ ᐅᔒᑖᓐ ᑭᑕᑮᒥᕽ ᑳᑮ ᑕᔑ ᓂᑖᐎᑭᔭᓐ ᒋᔑ ᑮᐌᔭᓐ᙮

14ᒦᔥ ᐅᐅ ᒉᑲᑉ ᑳᐃᑯᒡ ᐅᕒᐁᒐᓬᐗᓐ, ᐃᓂ ᑲᔦ ᓬᐄᔭᐗᓐ, ᑳᐐᓐ ᒫᐐᓐ ᑫᑰᓐ ᒥᓴᐙ ᓂᑖ ᐅᒋ ᒦᓂᑰᐎᓯᓰᒥᓐ ᓂᑌᑌᓈᓐ ᐁᔑ ᑎᐱᓇᐌᐎᓯᒡ᙮ 15ᐲᐎᑌᒃ ᑳᑑᑕᐎᑣ ᐄᑐᒃ ᓂᑑᑖᑯᓈᓐ᙮ ᓂᑮ ᐊᑖᐙᓂᑯᓈᓐ ᐃᑕᔥ ᑲᔦ᙮ ᐋᔕ ᑕᔥ ᑲᔦ ᐅᑮ ᒑᑭᓈᓐ ᐃᓂ ᔔᓂᔮᓐ ᒥᓂᒃ ᑳᑮ ᑎᐸᐅᑯᔮᕽ᙮ 16ᑫᒋᓈᒡ ᒫᐐᓐ ᑲᑭᓇ ᐅᐌᓅᑎᓯᐎᓐ ᑭᔐᒪᓂᑑᓐ ᑳᑮ ᒪᑲᒥᑯᒡ ᓃᓇᐎᓐᑦ ᓂᑲ ᐊᔮᒥᓐ, ᓂᓃᒑᓂᓯᓈᓂᒃ ᑲᔦ᙮ ᐋᓃᓐ ᓴ ᐱᑯ ᐁᓂᒃ ᑭᔐᒪᓂᑑ ᐱᓵᓐ ᐃᔑᒋᑫᐤ᙮

17ᒦᑕᔥ ᒉᑲᑉ ᑳᑮ ᐅᓇᐱᐋᒡ ᐐᐗᐞ, ᐅᓃᒑᓂᓴᐞ ᑲᔦ ᐱᒀᐎᑲᓀ ᒥᑕᑎᒨᕽ᙮ 18ᑲᑭᓇ ᓴ ᐅᑕᐗᑳᓂᒪᐞ ᐅᑮ ᓃᑳᓂᓂᔕᐙᐞ, ᑲᔦ ᑕᔥ ᐁᑮ ᒫᒌᑑᒡ ᑲᑭᓇ ᑫᑰᓇᓐ ᑳᑮ ᐅᑎᓇᕽ ᐃᐃᒫ ᒣᓱᐳᑌᒥᔭ Mesopotamia᙮ ᐌᑎ ᓴ ᑮᐃᔖ ᑫᓇᓐ Canaan ᐊᑮᕽ ᐁᔑᐊᔮᓂᒡ ᐅᑌᑌᓐ ᐋᐃᓯᑰᓐ᙮ 19ᐊᐊ ᐄᓴᓐ ᐅᕒᐁᒐᓬ ᑮᑮᒨᑎᒫᑯᐸᓐ ᐅᑌᑌᓐ ᐅᒪᓂᑑᑳᓂᓂ ᐲᑎᒃ ᑳᐊᐱᓂᒡ ᐁᐅᑕᒣᑎᓂᒡ ᐁᐸᔥᑯᔕᐌᔣᓂᒡ ᐅᒫᓇᒑᓂᔑᒥᓂ᙮ 20ᒉᑲᑉ ᐃᑕᔥ ᑲᔦ ᐅᑮ ᐃᔑ ᐗᔦᔑᐋᓐ ᐅᔑᔐᔕᓐ ᓬᐁᐸᓅᓐ ᐁᑮ ᐐᑕᒪᐙᓯᒃ ᐄᓴᓐ ᐁᐐ ᒫᒑᒡ᙮ 21ᑲᑭᓇ ᓴ ᑫᑰᓐ ᑌᐯᑕᕽ ᐅᑮ ᒫᒌᑑᓐ ᐁᑮ ᐌᔩᐱᓯᒡ᙮ ᐃᐃ ᓴ ᓰᐱ ᐃᔫᐸᕒᐁᑏᔅ Euphrates ᐁᔑᓂᑳᑌᓂᒃ ᑮᐋᔕᐎᔥᑳ ᐁᑮ ᐃᔑ ᒫᒑᒡ ᐃᓇᑫ ᑭᓬᐃᔭᑦ Gilead ᐊᑮᕽ ᐁᔑ ᐸᐲᑾᑎᓈᓂᒃ᙮

ᓬᐁᐸᓐ ᑮᐱᒥᓂᔕᐙᒡ ᒉᑲᐴᓐ

22ᓂᓱᑮᔑᒃ ᓴ ᐁᔑᓭᓂᒃ, ᓬᐁᐸᓐ Laban ᑮᐐᑕᒪᐙ ᒉᑲᐴᓐ Jacob ᐁᑮ ᑮᒨᒋ ᒫᒌᐸᐃᐌᓂᒡ᙮ 23ᒦᔥ ᓬᐁᐸᓐ ᑳᑮ ᒫᒌᓈᒡ ᐁᓇᐌᒫᒡ, ᓃᔣᓱᑮᔑᒃ ᐃᓴ ᑮᐱᒥᓂᔕᐙᐙᒡ ᒉᑲᐴᓐ᙮ ᐌᑎ ᑕᔥ ᑭᓬᐃᔭᑦ Gilead ᐊᑮᕽ ᐁᔑ ᐸᐲᑾᑎᓈᓂᒃ ᐅᑮ ᐃᔑ ᐊᑎᒫᐙᓐ᙮ 24ᐁᑎᐱᑲᓂᓂᒃ ᐃᑕᔥ ᓬᐁᐸᓐ ᐁᓂᐹᒡ ᐅᑮ ᐸᐙᓈᓐ ᑭᔐᒪᓂᑑᓐ ᐄᓴᓐ ᐁᐃᑯᒡ, ᐊᔮᒀᒥᓯᓐ ᒋᓂᔥᑭ ᑲᓅᓈᓯᐗᒡ ᒉᑲᑉ᙮ 25ᒉᑲᑉ ᓴ ᑮᐃᔑ ᑲᐯᔑ ᑭᒋ ᐗᒌᕽ᙮ ᐊᐊ ᑕᔥ ᐐᓐ ᓬᐁᐸᓐ ᑮᐃᔑ ᑲᐯᔑ ᐃᐃᒫ ᑭᓬᐃᔭᑦ ᐊᑮᕽ ᐁᔑ ᐸᐲᑾᑎᓈᓂᒃ᙮

26ᓬᐁᐸᓐ ᑕᔥ ᐅᑮᐃᓈᓐ ᒉᑲᐴᓐ, ᐋᓃᓐ ᐃᑕᔥ ᐃᓈ ᑳᐃᔑᒋᑫᔭᓐ, ᐁᑮ ᐗᔦᔑᒥᔭᓐ, ᐁᑮ ᒫᒌᐸᐊᑣ ᓂᑖᓂᓴᒃ ᐁᑮ ᑑᑕᐗᑣ ᑖᐱᔥᑰ ᐃᑴᐗᒃ ᑳᔑ ᒫᒌᐸᐃᑣ ᑮᒦᑳᑎᕽ? 27ᐌᑯᓀᓐ ᐃᑕᔥ ᑳᐅᒋ ᐗᔦᔑᐃᔭᓐ, ᐁᑮ ᑮᒨᒋ ᒫᒑᔭᓐ, ᐁᑮ ᐐᑕᒪᐎᓰᐗᓐ ᑲᔦ? ᑮᔥᐱᓐ ᓴ ᐐᑕᒪᐎᔭᐸᓐ ᐁᐐ ᒫᒑᔭᓐ, ᑫᒋᓈᒡ ᑭᑖᑮ ᒫᒋᓂᔕᐅᓐ ᒋᑮ ᒌᑫᑕᒫᐹᓐ᙮ ᑖᑮ ᓂᑲᒧᓈᓂᐗᓐ, ᑲᔦ ᑕᔥ ᑖᑮ ᑭᑐᒋᑫᓈᓂᐗᓐ ᒋᑮ ᐋᐸᑎᓯᐙᐸᓐ ᒪᑗᔮᐲᑭᐱᒋᑲᓇᒃ, ᒪᑗᓯᒋᑲᓇᒃ ᑲᔦ᙮ 28ᑳᐐᓐ ᑲᓇᑫ ᑭᑮ ᐸᑭᑎᓂᓰ ᒋᐅᒌᒪᒀ ᓂᑖᓂᓴᒃ, ᓅᔑᓴᒃ ᑲᔦ᙮ ᑳᐐᓐ ᑲᔦ ᒋᑮ ᐴᔔᐊᒀ᙮ ᐐᑫ ᑭᑌ ᑲᑮᐹᑎᔅ ᐃᐃ ᑳᑮ ᐃᔑᒋᑫᔭᓐ᙮ 29ᐃᓇᔥᑫ ᓂᑖ ᑲᔥᑭᑑᓐ ᒋᑑᑕᐎᓈᐹᓐ ᒋᐐᓴᑫᑕᒪᓐ᙮ ᑎᐱᑯᕽ ᐃᑕᔥ ᑭᑌᑌ ᐅᑭᔐᒪᓂᑑᒪᓐ ᓂᑮᐃᒃ, ᐊᔮᒀᒥᓯᓐ, ᑫᑯ ᐐᓐ ᑫᑰᓐ ᐃᔑ ᓂᔥᑭ ᑲᓅᓈᑫᓐ ᒉᑲᑉ᙮ 30ᒦᔥ ᑳᐅᒋ ᒫᒑᔭᓐ ᐁᑮ ᓅᑌ ᐐ ᑮᐌᓄᑕᒧᐗᒡ ᑭᑌᑌ ᐅᑖᐎᓐ᙮ ᐌᑯᓀᓐ ᐃᑕᔥ ᑳᐅᒋ ᑮᒨᑎᔭᓐ ᓂᒪᓂᑑᑳᓇᒃ᙮

31ᒦᔥ ᐅᐅ ᒉᑲᑉ ᑳᐃᔑ ᓇᑴᑕᕽ, ᑭᑮ ᑯᓯᓐ, ᐁᑮᓇᓃᓵᓀᓂᒥᓈᓐ ᒋᒪᑲᒥᔭᓐ ᐃᑭ ᑭᑖᓂᓴᒃ᙮ 32ᑮᔥᐱᓐ ᐃᑕᔥ ᒥᑲᐗᒡ ᐊᐎᔭ ᐊᔮᐙᒡ ᐃᐃ ᑭᒪᓂᑑᑳᓇᐞ, ᒦ ᓴ ᐃ ᑫᔑ ᓂᓯᓐᒡ᙮ ᐅᐅ ᓴ ᑭᑎᓇᐌᒫᑲᓂᓈᓂᒃ ᐁᑲᓇᐙᐱᐙᒡ ᐱᓵᓐ ᓇᓈᑐᓀᐊᓐ ᑌᐯᑕᒪᓐ᙮ ᑮᔥᐱᓐ ᐃᑕᔥ ᒥᑲᒪᓐ, ᐱᓵᓐ ᐃᑯ ᐅᑖᐱᓇᓐ᙮ ᑳᐐᓐ ᐄᑐᒃ ᒉᑲᑉ ᐅᑮ ᑭᑫᑕᓰᓐ ᐃᓇᑾᓇ ᐅᕒᐁᒐᓬᐗᓐ Rachel ᐁᑮ ᑮᒨᑎᓂᒡ ᓬᐁᐸᓅᓐ ᐅᒪᓂᑑᑳᓂᓂ᙮

33ᒦᑕᔥ ᓬᐁᐸᓐ ᑮᓇᓈᑐᓂᑫ ᒉᑲᐴᓐ ᐅᐸᒀᓀᑲᒥᑯᓃᕽ, ᓬᐄᔭᐗᓐ Leah ᑲᔦ ᐅᐸᒀᓀᑲᒥᑯᓃᕽ᙮ ᑮᓇᓈᑐᓂᑫ ᑕᔥ ᑲᔦ ᐅᑕᓄᑮᐋᑲᓂᓂ ᑳᐃᑴᐎᓂᒡ ᐅᐸᒀᓀᑲᒥᑯᓃᕽ᙮ ᑳᐐᓐ ᐃᑕᔥ ᑫᑰᓐ ᒋᑮ ᒥᑲᕽ᙮ ᐅᕒᐁᒐᓬᐗᓐ ᐃᑕᔥ ᐅᐸᒀᓀᑲᒥᑯᓃᕽ ᑮᐊᓂ ᐃᔑ ᐲᑎᑫ᙮ 34ᐊᐊ ᑕᔥ ᐅᕒᐁᒐᓬ ᐅᑮ ᐅᑖᐱᓈᐞ ᐄᓴᓐ ᐃᐃ ᒪᓂᑑᑳᓇᐞ ᐁᑮ ᐃᔑ ᐊᓵᒡ ᐱᒀᐎᑲᓀ ᒥᑕᑎᒧᐎ ᐊᐸᐱᐎᓂᕽ ᒦᔥ ᑕᑯ ᑳᐃᔑ ᐸᑕᑯᔥᑲᐙᒡ ᐁᔑ ᓇᒪᑕᐱᒡ᙮ ᓬᐁᐸᓐ ᓴ ᒥᓯᐌ ᑮᓇᓈᑐᓂᑫ ᐃᐃᒫ ᐸᒀᓀᑲᒥᑯᕽ, ᑳᐐᓐ ᐃᑕᔥ ᑫᑰᓐ ᐅᑮ ᒥᑲᓰᓐ᙮ 35ᐅᕒᐁᒐᓬ ᑕᔥ ᐅᑮᐃᓈᓐ ᓬᐁᐸᓅᓐ, ᓂᑌᑌ, ᑫᑯ ᓂᔥᑳᑎᓯᑫᓐ ᐁᑲᔥᑭᑑᓰᐙᓐ ᒋᓃᐸᐎᔮᓐ ᐁᓈᓴᒦᔭᓐ, ᓂᑎᑴᐙᐱᓀ ᒣᒀ᙮ ᒥᓯᐌ ᑕᔥ ᑮᓇᓈᑐᓂᑫᐗᓐ, ᑳᐐᓐ ᑫᑰᓐ ᒋᑮ ᒥᑲᒥᓂᒡ᙮

36ᒉᑲᑉ ᓴ ᑕᔥ ᐐᑫ ᑮᓂᔥᑳᑎᓯ ᐁᑮᐃᓈᒡ ᓬᐁᐸᓅᓐ, ᐋᓃᓐ ᐃᑕᔥ ᑳᐃᔑ ᒪᒫᔒᔮᓐ? ᐋᓃᓐ ᐃᑕᔥ ᑲᔦ ᑳᐃᔑ ᒪᒫᔒᑲᑕᐎᓈᓐ ᐁᑮ ᑲᑴ ᒥᑲᐎᔭᓐ? 37ᐋᔕ ᑕᔥ ᒥᓯᐌ ᑭᑮ ᓇᓈᑐᓂᑫ ᓂᑕᔭᐄᒥᑳᕽ, ᑫᑰᓐ ᐃᓇ ᑕᔥ ᑭᒥᑳᓐ ᑌᐯᑕᒪᓐ? ᑕᑲ ᓴ ᑕᔥ ᐅᐅ ᐃᔑ ᐊᑑᓐ ᐁᔑᐊᔮᐙᒡ ᐅᑯ ᑭᑎᓇᐌᒫᑲᓇᒃ, ᓂᑎᓇᐌᒫᑲᓇᒃ ᑲᔦ, ᑕᑲ ᓴ ᐐᓇᐙ ᑭᑲ ᐅᓈᑯᓂᑯᓈᓂᒃ ᐅᐅ ᑳᔑ ᓃᔑᔭᕽ᙮ 38ᐋᔕ ᐄᑐᒃ ᓃᔥᑕᓇ 20 ᑕᓱ ᐱᐴᓐ ᑭᐱ ᐐᒌᐎᓐ᙮ ᑭᒫᓇᒑᓂᔑᒪᒃ, ᐃᑭ ᑲᔦ ᑭᒫᓇᑎᑯᒪᒃ ᒨᔕᒃ ᐃᑯ ᐊᐸᓐ ᐱᐅᓃᒑᓂᓯᐗᒃ᙮ ᑳᐐᓐ ᐃᑕᔥ ᑲᔦ ᒋᑮ ᐊᒶᒃ ᐋᐯ ᒫᓇᒑᓂᔥ ᒋᑮ ᐅᑎᓇᑭᐸᓐ ᐁᔑ ᐅᑸᓄᐙᒡ ᑭᑕᐗᑳᓂᒪᒃ᙮ 39ᐃᑭ ᑕᔥ ᑲᔦ ᐊᐗᑳᓇᒃ ᑮᓂᓯᑯᐙᒡ ᐱᑾᒋ ᐊᔭᐋᐎᔕᐞ, ᓃᓐ ᓴ ᐱᑯ ᐃᐃ ᓂᑮ ᐗᓂᒋᑫ᙮ ᒦᔥ ᑲᔦ ᑳᑑᑕᐎᔭᓐ ᐁᑮ ᑎᐸᐃᑫᐃᔭᓐ ᐌᑯᓀᓐ ᐃᑯ ᑳᑮ ᐗᓂᓭᒃ ᐁᑮᔑᑲᒃ, ᑯᒫ ᑲᔦ ᐁᑎᐱᑲᒃ᙮ 40ᒦ ᐅᐌ ᑳᐃᔑᓭᔮᓐ᙮ ᑮᑮᔑᑲᒃ ᐐᑫ ᓂᓀᑣᔅ ᐁᑭᔑᑌᒃ, ᐁᑎᐱᑲᒃ ᐃᑕᔥ ᒨᔕᒃ ᓂᑮ ᑮᑲᒡ᙮ ᒨᔕᒃ ᑳᐐᓐ ᓂᑮ ᓂᐹᓰ᙮ 41ᒦ ᐅᐌ ᑳᐃᔑᓭᔮᓐ ᓃᔥᑕᓇ 20 ᑕᓱ ᐱᐴᓐ ᑳᑮ ᐐᒋᑖᒥᓈᓐ᙮ ᒥᑖᔑᓃᐎᐱᐴᓐ 14 ᑭᑮ ᐊᓄᑮᑕᐎᓐ ᒋᑲᔥᑭᑕᒫᓱᔮᓐ ᐃᑭ ᓃᔑᓐ 2 ᑭᑖᓂᓴᒃ, ᓂᑯᑣᓱ 6 ᐱᐴᓐ ᑭᑮ ᐊᓄᑮᑕᐎᓐ ᒋᑲᔥᑭᑕᒫᓱᔮᓐ ᑭᑕᐗᑳᓂᒪᒃ᙮ ᔖᑰᒡ ᐃᑕᔥ ᒥᑖᒌᕽ ᑭᑮ ᐋᒋᑑᓐ ᑫᑮ ᐃᔑ ᑎᐸᐊᒪᐎᔭᐸᓐ᙮ 42ᑮᔥᐱᓐ ᐃᑕᔥ ᓈᑕᒪᐎᓯᓂᑭᐸᓐ, ᓂᑌᑌ ᐅᑭᔐᒪᓂᑑᒪᓐ, ᐊᐊ ᑲᔦ ᐁᐸᕒᐊᐋᒻ Abraham ᐅᑭᔐᒪᓂᑑᒪᓐ, ᐊᐊ ᐋᐃᓯᒃ ᑳᑮ ᑯᑖᓀᓂᒫᒡ, ᐋᔕ ᒫᐐᓐ ᑫᒋᓈᒡ ᓂᑯᒋ ᑭᑖᑮ ᐃᔑᓂᔕᐅᔥ ᒣᐎᔕ ᑫᑰᓐ ᒋᑮ ᐊᔮᓯᐙᐹᓐ᙮ ᑭᔐᒪᓂᑑ ᓴ ᓂᐱ ᐙᐸᒥᒃ ᐁᔑ ᑲᒀᑕᑭᓭᐗᒃ, ᐋᓃᓐ ᑲᔦ ᐯᒥ ᐃᓇᓄᑮᐗᒃ᙮ ᐐᓐ ᐃᑕᔥ ᑎᐱᑯᕽ ᑭᑮ ᑭᐱᑎᓂᒃ ᑳᐐ ᐃᔑᒋᑫᔭᐸᓐ᙮

ᑮᐅᔑᑑᐙᒡ ᑫᔑᒥᓄᐐᒌᑎᐙᒡ

43ᒦᑕᔥ ᐅᐅ ᓬᐁᐸᓐ Laban ᑳᐃᔑ ᓇᑴᑕᐙᒡ ᒉᑲᐴᓐ, ᐃᑭ ᓴ ᐃᑴᐗᒃ, ᓃᓐ ᐄᑐᒃ ᐃᑭ ᓂᑖᓂᓴᒃ, ᐃᑭ ᑲᔦ ᐊᐱᓅᒌᔕᒃ ᓃᓐ ᐄᑐᒃ ᐃᑭᐌᓂᐗᒃ᙮ ᓃᓐ ᑲᔦ ᓂᑎᐯᓂᒫᒃ ᐃᑭ ᐊᐗᑳᓇᒃ᙮ ᑲᑭᓇ ᓴ ᑫᑰᓐ ᐌᔮᐸᑕᒪᓐ ᓃᓐ ᓂᑎᐯᑖᓐ᙮ ᐋᓃᓐ ᐃᑕᔥ ᐃᓈ ᑫᐃᔑᒋᑫᔮᐹᓐ ᐅᒋ ᐃᑭ ᓂᑖᓂᓴᒃ ᐃᐃ ᑲᔦ ᐊᐱᓅᒌᔕᐞ ᓀᑖᐎᑭᐋᐙᒡ? 44ᑕᑲ ᓴ ᑮᓇᐎᓐᑦ ᐊᔓᑕᒫᑎᑖ ᑫᐃᔑ ᒥᓄ ᐐᒌᑎᔭᕽ ᑫᐅᒋ ᓂᓯᑕᐎᓈᑾᒃ ᐅᐅ ᑳᐐ ᐃᔑᒋᑫᔭᕽ᙮

45ᒦᔥ ᒉᑲᑉ Jacob ᑳᑮ ᐅᑖᐱᓈᒡ ᐊᓯᓃᓐ ᐁᑮ ᐸᑕᑳᐱᑭᓈᒡ ᒋᐅᒋ ᒫᒥᑲᐎᐎᓐᒡ᙮ 46ᒦᔥ ᑲᔦ ᑳᐃᓈᒡ ᐅᑎᓇᐌᒫᑲᓇᐞ ᒋᒫᒨᔕᑭᓈᓂᒡ ᐊᓯᓃᐞ ᒋᐅᑯᔑᒫᓂᒡ᙮ ᒦᔥ ᑳᐃᔑ ᐅᑯᔑᒫᓂᒡ ᐃᐃ ᐊᓯᓃᐞ᙮ ᒦᔥ ᐃᐃᒫ ᑳᑮ ᑕᔑ ᐐᓯᓂᐙᒡ᙮ 47ᓬᐁᐸᓐ ᐃᑕᔥ ᒌᑲᕒ ᓭᐊᑑᑕ#31.47 ᒌᑲᕒ ᓭᐊᑑᑕ: ᐃᐃᐌ ᒌᑲᕒ ᓭᐊᑑᑕ ᑳᐃᒋᑳᑌᒃ, ᐱᒀᐱᑭᓯᒋᑲᓐ ᑫᐅᒋ ᒫᒥᑲᐎᕽ, ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ ᐁᕒᐊᒻ ᑳᐅᒌᐙᑦ᙮ Jegar Sahadutha ᐅᑮ ᐃᔑᓂᑳᑖᓐ᙮ ᒉᑲᑉ ᐃᑕᔥ ᐐᓐ ᑳᓬᐄᐊᑦ#31.47 ᑲᓬᐄᐊᑦ: ᐃᐃᐌ ᑲᓬᐄᐊᑦ ᑳᐃᒋᑳᑌᒃ, ᐱᒀᐱᑭᓯᒋᑲᓐ ᑫᐅᒋ ᒫᒥᑲᐎᕽ, ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ ᐄᐸᕒᐆᐗᒃ᙮ Galeed ᐅᑮ ᐃᔑᓂᑳᑖᓐ᙮ 48ᒦᔥ ᓬᐁᐸᓐ ᑳᑮᐃᓈᒡ ᒉᑲᐴᓐ, ᐃᑭ ᓴ ᐊᓯᓃᒃ ᑳᐅᑯᔑᓄᐙᒡ ᒦ ᓴ ᐃᐌ ᑫᐅᒋ ᒫᒥᑲᐎᔭᕽ ᐁᔑ ᐊᔓᑕᒫᑎᔭᕽ ᓅᑯᒻ ᑳᑮᔑᑲᒃ᙮ ᒦ ᓴ ᑳᑮ ᐅᒋ ᐃᔑᓂᑳᑌᒃ ᐃᐃᒫ ᑳᑮ ᐃᔑᐊᔮᐙᒡ ᑳᓬᐄᐊᑦ᙮ 49ᒦᔥ ᑲᔦ ᓬᐁᐸᓐ ᑳᑮ ᐃᑭᑐᒡ, ᑕᑲ ᑳᑎᐯᒋᑫᒡ ᑭᑲ ᓈᓈᑲᒋᐃᑯᓈᓐ ᐊᐲ ᑳᓇᑲᓂᑎᔭᕽ᙮ ᒥᔅᐸ#31.49 ᒥᔅᐸ: ᐃᐃᐌ ᒥᔅᐸ ᑳᐃᒋᑳᑌᒃ, ᑳᐅᓵᐱᕽ, ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ ᐄᐸᕒᐆᐗᒃ᙮ Mizpah ᐄᓴᓐ ᑲᔦ ᑳᑮ ᐅᒋ ᐃᔑᓂᑳᑌᒃ ᐃᐃᒫ ᑳᑮ ᐃᔑᐊᔮᐙᒡ᙮ 50ᒦᔥ ᑲᔦ ᑳᐊᓂ ᐃᑭᑐᒡ, ᑮᔥᐱᓐ ᓴ ᐌᐌᓂ ᑑᑕᐙᓯᐗᑣ ᓂᑖᓂᓴᒃ, ᐸᑳᓐ ᑲᔦ ᐃᑴᐗᒃ ᐊᓂ ᐐᑎᑫᒪᑣ, ᒥᓴᐙ ᑯ ᐋᓇ ᑭᑫᑕᓯᐙᓐ, ᐃᔑ ᒫᒥᑲᐎᓐ ᐃᑕᔥ ᑭᔐᒪᓂᑑ ᐁᑲᓇᐙᐸᒥᔭᕽ᙮ 51ᐃᓇᔥᑫ ᐙᐸᒻ ᐅᑯ ᐊᓯᓃᒃ ᑳᐅᑯᔑᓄᐙᒡ ᓇᓴᐗᔭᐄ ᐁᔑᐊᔮᔭᕽ, ᐃᐃ ᑲᔦ ᐸᑕᑳᐱᑭᓂᑲᓐ᙮ 52ᐃᑭ ᓴ ᐊᓯᓃᒃ ᑳᐅᑯᔑᓄᐙᒡ, ᐊᐊ ᑲᔦ ᐸᑕᑳᐱᑭᓂᑲᓐ ᒦ ᓴ ᐃᐌ ᑫᐅᒋ ᒫᒥᑲᐎᔭᕽ ᑭᑕᔓᑕᒫᑎᐎᓂᓈᓐ᙮ ᑳᐐᓐ ᓴ ᓂᑲ ᐹᔑᒋᔥᑲᐙᓰᒃ ᐅᑯ ᐊᓯᓃᒃ ᒋᐊᐎ ᒫᔑ ᑑᑕᐎᓈᓐ᙮ ᑳᐐᓐ ᐃᑕᔥ ᑫᑮᓐ ᑭᑲ ᐹᔑᒋᔥᑲᐙᓰᒃ ᐅᑯ ᐊᓯᓃᒃ ᐃᐃ ᑲᔦ ᐸᑕᑳᐱᑭᓂᑲᓐ ᒋᐱ ᒫᔑ ᑑᑕᐎᔭᓐ᙮ 53ᑕᑲ ᓴ ᐁᐸᕒᐊᐋᒻ, ᐊᐊ ᑲᔦ ᓀᐅᕒ Nahor ᐅᑭᔐᒪᓂᑑᒥᐙᓐ, ᐅᑌᑌᐙᓐ ᑲᔦ ᐅᒪᓂᑑᒥᓂ ᑭᑲ ᐅᓈᑯᓂᑯᓈᓐ᙮ ᒦᑕᔥ ᒉᐸᒃ ᑳᑮ ᐊᐱᒧᒡ ᐁᔑᓂᑳᓱᓂᒡ ᐅᑭᔐᒪᓂᑑᒥᓂ ᐅᑌᑌᓐ ᐋᐃᓯᑰᓐ ᑳᑮ ᑯᑖᓀᓂᒫᓂᒡ ᑫᐐᓐ ᒌᔑᒋᑫᒡ ᑳᑮ ᐃᔑ ᐊᔓᑕᒫᑫᐙᒡ᙮ 54ᒦᑕᔥ ᒉᑲᑉ ᑳᑮ ᐸᑭᑎᓈᓱᒡ ᐃᐃᒫ ᐗᒌᕽ ᐁᑮ ᐊᑐᒫᒡ ᐅᑎᓇᐌᒫᑲᓇᐞ᙮ ᒦᔥ ᐃᐃᒫ ᑳᑕᔑ ᐐᓯᓂᐙᒡ, ᒦᔥ ᐃᐃᒫ ᑲᔦ ᑳᐃᔑ ᓂᐹᐙᒡ᙮ 55ᐐᐸ ᑕᔥ ᐁᑭᔐᐹᐗᑲᓂᓂᒃ ᓬᐁᐸᓐ ᑮᐗᓂᔥᑳ ᐁᑮ ᐅᒌᒫᒡ ᐆᔑᓴᐞ, ᐅᑖᓂᓴᐞ ᑲᔦ ᐁᑮ ᐴᔔᐋᒡ, ᑲᔦ ᑕᔥ ᐁᑮ ᔕᐌᓂᒫᒡ᙮ ᒦᔥ ᑳᑮ ᐊᓂᔑ ᑮᐌᒡ ᐌᒌᒡ᙮

Currently Selected:

ᒉᓂᓯᔅ 31: OJBS

Highlight

Copy