ᒉᓂᓯᔅ 12

ᑭᔐᒪᓂᑑ ᑮᑲᓅᓈᒡ ᐁᐸᕒᐊᒪᓐ

1 # Act 7.2,3; Heb 11.8. ᑳᑎᐯᒋᑫᒡ ᑕᔥ ᐅᑮᐃᓈᓐ ᐁᐸᕒᐊᒪᓐ Abram, ᓇᑲᑕᓐ ᐃᐃ ᑭᑕᑮᒻ, ᓇᑲᔥ ᑲᔦ ᑭᑎᓇᐌᒫᑲᓇᒃ᙮ ᓇᑲᑕᒧᐤ ᑲᔦ ᑭᑌᑌ ᐅᑖᐎᓐ, ᒌᔖᔭᓐ ᐌᑎ ᐊᑮᕽ ᑳᐐ ᐙᐸᑕᐃᓈᓐ᙮ 2ᑭᑲ ᐃᔑᐃᓐ ᑲᔦ ᑭᐲᐌᓰᒪᒃ ᒋᐹᑏᓄᐙᒡ, ᑭᑲ ᔕᐌᓂᒥᓐ ᑲᔦ᙮ ᓂᑲ ᐃᔑᒋᑫ ᑭᐐᓱᐎᓐ ᒋᑭᒋ ᐃᓀᑖᑾᒃ, ᐊᐎᔭᒃ ᑲᔦ ᑕᐅᒋ ᔕᐌᑖᑯᓯᐗᒃ ᑮᓐ ᐅᒋ᙮

3 # Gal 3.8. ᓂᑲ ᒥᓄᓭᐋᒃ ᓴ ᐃᑭ ᑫᑴᒋᒥᐙᒡ ᑮᓐ ᒋᒥᓄᓭᔭᓐ, ᐊᐎᔭ ᑕᔥ ᐐᓐ ᑫᒪᒉᓂᒥᒃ, ᓃᓐ ᓂᑲ ᒪᒐᑭᒫ᙮ ᑲᑭᓇ ᓴ ᐯᒫᑎᓯᐙᒡ ᑳᑕᓱ ᐊᔨᑖᐙᒡ ᑕᔕᐌᑖᑯᓯᐗᒃ ᑮᓐ ᐅᒋ, ᐅᑮᐃᓈᓐ᙮

4ᐁᐸᕒᐊᒻ ᑕᔥ ᑮᒫᒑ ᐁᑮ ᐃᔑᒋᑫᒡ ᑳᑎᐯᒋᑫᓂᒡ ᑳᑮᐃᑯᒡ᙮ ᓃᔣᓱᒥᑕᓇᔑᓈᓇᓐ 75 ᓴ ᑮᑕᓱ ᐱᐴᓉ ᐃᐃ ᐊᐲ ᑮᓇᑲᑕᕽ ᐃᐃ ᐆᑌᓇ ᐁᕒᐊᓐ Haran ᑳᑮ ᐃᔑᓂᑳᑌᓂᒃ᙮ ᐅᑑᔑᒪᓐ ᓬᐋᑦ Lot ᑳᑮ ᐃᔑᓂᑳᓱᓂᒡ ᓴ ᐅᑮ ᐐᒌᐙᓐ᙮ 5ᐁᐸᕒᐊᒻ ᓴ ᐅᑮ ᒫᒌᓈᓐ ᐐᐗᓐ ᓭᕒᐊᐄ Sarai ᑳᑮ ᐃᔑᓂᑳᓱᓂᒡ, ᐃᓂ ᑲᔦ ᐅᑑᔑᒪᓐ ᓬᐋᑕᓐ᙮ ᐅᑮ ᒫᒌᑑᓈᐙᓐ ᑲᔦ ᑲᑭᓇ ᐅᑕᔭᐄᒥᐙᓐ, ᐅᑮ ᑕᑯ ᒫᒌᓈᐙᐞ ᑲᔦ ᐅᐸᒦᑖᑫᐞ ᑳᑮ ᐊᔮᐙᐙᒡ ᐃᐃᒫ ᐁᕒᐊᓐ ᐆᑌᓈᕽ᙮ ᑮᐃᔖᐗᒃ ᑕᔥ ᐃᓇᑫ ᑳᐃᔑᐊᔮᓂᒃ ᐃᐃ ᑫᓇᓐ Canaan ᐊᑭ᙮

6ᐊᐲ ᑕᔥ ᐁᐊᓂ ᑕᑯᔑᓄᐙᒡ ᐁᐸᕒᐊᒻ ᑮᐲᑎᑫᔥᑳ ᐃᐃᒫ ᐊᑮᕽ ᐲᓂᔥ ᐁᑮ ᐊᓂ ᑕᑯᔑᕽ ᐌᑎ ᑳᑮ ᐃᔑᐊᔮᓂᒡ ᑳᑭᑌᑖᑯᓯᓂᒡ ᐆᒃ ᑎᓄᐙᑎᑰᓐ ᒨᕒᐁ Moreh ᑳᑮ ᐃᔑᓂᑳᑌᓂᒃ, ᑳᑮ ᓂᑖ ᑕᔑ ᐊᓇᒥᐋᕽ᙮ ᔒᑲᒻ Shechem ᑕᔥ ᑮᐃᔑᓂᑳᑌᓂ ᑳᑮ ᐃᔑ ᐸᑕᑭᓱᒡ ᐊᐊ ᒥᑎᒃ᙮ ᐃᐃ ᑕᔥ ᐊᐲ ᑫᓇᓐ Canaanite ᑳᐅᒌᓂᒡ ᑮᐊᔮᐗᐞ ᐃᐃᒫ ᐊᑮᕽ᙮ 7#Act 7.5; Gal 3.16. ᑳᑎᐯᒋᑫᓂᒡ ᑕᔥ ᐁᐸᕒᐊᒻ ᐅᑮ ᓈᑯᓰᑖᑰᓐ ᐁᑮᐃᑯᒡ, ᒦ ᓴ ᐅᐅ ᐊᑭ ᑳᐐ ᒦᓇᒀ ᑭᐲᐌᓰᒪᒃ᙮ ᐁᐸᕒᐊᒻ ᑕᔥ ᐸᑭᑎᓈᓱᐎᓈᐱᑯᓂ ᐅᑮ ᐅᓈᐱᑭᓇᒪᐙᓐ ᑳᑎᐯᒋᑫᓂᒡ ᑳᑮ ᓈᑯᓰᑖᑯᒡ᙮ 8ᒦᑕᔥ ᐃᐃᒫ ᑳᐅᒋ ᒫᒑᒡ ᔖᐗᓄᕽ ᐃᓇᑫ ᐁᑮ ᐃᔖᒡ ᑳᑮ ᐃᔑ ᑭᒋ ᐱᑾᑎᓈᓂᒃ ᐙᐸᓄᕽ ᐃᓇᑫ ᐯᑕᓬ Bethel ᐆᑌᓈᕽ᙮ ᑮᑲᐯᔑ ᑕᔥ ᐃᐃᒫ ᓂᑳᐲᐊᓄᕽ ᐃᓇᑫ ᑳᑮ ᐃᔑᐊᔮᓂᒃ ᐯᑕᓬ ᐆᑌᓇ᙮ ᐙᐸᓄᕽ ᑕᔥ ᐃᓇᑫ ᑮᐊᔮᓂ ᐆᑌᓇ ᐁᐋᐃ Ai᙮ ᒦᓇᐙ ᑕᔥ ᐃᐃᒫ ᑮᐅᓈᐱᑭᓂᑫ ᐁᑮ ᐸᑭᑎᓈᓱᒡ ᐁᑮ ᐊᓇᒥᐁᑕᐙᒡ ᑳᑎᐯᒋᑫᓂᒡ᙮ 9ᑮᐸᐹᒥᑯᓯ ᑕᔥ ᐃᐃᒫ ᑫᓇᓐ Canaan ᐊᑮᕽ ᐲᓂᔥ ᔖᐗᓄᕽ ᐃᓇᑫ ᐁᑮ ᐊᓂ ᐃᔑ ᑯᓯᒡ᙮

ᐁᐸᕒᐊᒻ ᑮᐃᔖᒡ ᐄᒋᐸᑮᕽ

10ᐐᑫ ᑕᔥ ᑮᑲᒀᑕᑫᑖᑾᓐ ᐃᐃᒫ ᑫᓇᓐ Canaan ᐊᑮᕽ ᐋᓃᔥ ᑳᐐᓐ ᑮᐊᔮᓯᓅᓐ ᒦᒋᒻ᙮ ᒦᑕᔥ ᐁᐸᕒᐊᒻ Abram ᑳᑮ ᐅᒋ ᐃᔖᒡ ᐌᑎ ᐄᒋᐸᑮᕽ Egypt ᐊᒋᓇ ᐁᑮ ᐊᐎ ᐃᔑᑖᒡ᙮ 11ᐊᐲ ᑕᔥ ᑫᑳ ᐁᐊᓂ ᐲᑎᑫᔥᑳᒡ ᐄᒋᐸᑭ, ᐅᑮᐃᓈᓐ ᐐᐗᓐ ᓭᕒᐊᐄ Sarai, ᐃᓇᔥᑫ ᓴ ᓂᑭᑫᑖᓐ ᐐᑫ ᑳᒥᓄᓈᑯᓯᒡ ᐃᑴ ᐁᑎᓄᐎᔭᓐ᙮ 12ᐊᐲ ᑕᔥ ᐄᒋᑉ ᐁᔮᐙᒡ ᐙᐸᒥᒀ ᑕᐃᑭᑐᐗᒃ ᒫᐐᓐ, ᒦᐗᓂᓂ ᐐᐗᓐ᙮ ᓂᑲ ᓂᓯᑰᒃ ᑕᔥ, ᑭᑲ ᐸᑭᑎᓂᑰᒃ ᑕᔥ ᑮᓐ ᒋᐱᒫᑎᓯᔭᓐ᙮ 13#Gen 20.2; 26.7. ᐃᑭᑐᓐ ᑕᔥ ᐁᐅᑕᐌᒫᒥᓈᓐ, ᒦᑕᔥ ᐃᐃ ᒋᒥᓄᓭᔮᓐ ᑮᓐ ᐅᒋ, ᑫᓃᓐ ᑕᔥ ᐃᓈ ᓂᑲ ᐱᒫᑎᔅ, ᐅᑮᐃᓈᓐ᙮ 14ᐊᐲ ᑕᔥ ᐁᐸᕒᐊᒻ ᑳᐱ ᑕᑯᔑᕽ ᐄᒋᐸᑮᕽ, ᐄᒋᑉ ᐁᔮᓂᒡ ᐅᑮ ᐙᐸᒫᓂ ᐐᐗᓐ ᐁᒥᓄᓈᑯᓯᓂᒡ᙮ 15ᐊᐲ ᑕᔥ ᐯᕒᐆ Pharaoh ᐅᑖᓂᑫᐎᑭᒫᐞ ᑳᐙᐸᒫᐙᒡ ᐃᓂ ᐃᑴᐗᓐ ᐅᑮ ᐊᐎ ᐐᑕᒪᐙᐙᓐ ᑭᒋᐅᑭᒫᓐ ᐋᓃᓐ ᐁᐲᒋ ᐅᓂᔑᔑᓂᓂᒡ ᐃᓂ ᐃᑴᐗᓐ; ᑮᐃᔑᐎᒋᑲᓂᐎᐗᓐ ᑕᔥ ᐃᓂ ᐃᑴᐗᓐ ᑭᒋᐅᑭᒫᐎᑲᒥᑯᕽ᙮ 16ᑭᒋᐅᑭᒫ ᑕᔥ ᐌᐌᓂ ᐅᑮ ᑑᑕᐙᓐ ᐁᐸᕒᐊᒪᓐ ᓭᕒᐊᐄᐗᓐ ᐅᒋ᙮ ᐅᑮ ᒦᓈᓐ ᐁᐊᔮᐯᐎᓂᒡ, ᐁᓅᔐᔭᐋᐎᓂᒡ ᒫᓇᒑᓂᔕᐞ, ᐱᔑᑭᐗᐞ, ᐊᔮᐯ ᐱᔑᑭᐗᐞ, ᒫᔑᒥᑕᑎᒨᐞ, ᐱᒀᐎᑲᓀ ᒥᑕᑎᒨᐞ, ᐃᓂᓂᐗᓄᑮᐋᑲᓇᐞ, ᐃᑴᐗᓄᑮᐋᑲᓇᐞ ᑲᔦ᙮

17ᑳᑎᐯᒋᑫᒡ ᑕᔥ ᐅᑮ ᐃᔑᐋᓐ ᐯᕒᐆᓐ ᒋᐊᔮᓂᒡ ᑳᓴᓇᑲᓂᓂᒃ ᐋᑯᓯᐎᓐ, ᐃᐃ ᑲᔦ ᑲᑭᓇ ᐁᔮᓂᒡ ᐅᑖᐎᓂᓃᕽ ᐋᓃᔥ ᐅᑮ ᐅᑖᐱᓈᓂ ᓭᕒᐊᐄᐗᓐ ᐁᐸᕒᐊᒻ ᐐᐗᓐ᙮ 18ᑭᒋᐅᑭᒫᓐ ᑕᔥ ᐁᐸᕒᐊᒻ ᐅᑮ ᐊᑐᒥᑰᓐ ᐁᑮᐃᑯᒡ, ᐋᓃᓐ ᑕᔥ ᐅᐅ ᐌᒋ ᑑᑕᐎᔭᓐ? ᐌᑯᓀᓐ ᑕᔥ ᑳᐅᒋ ᐐᑕᒪᐎᓯᐗᓐ ᐁᐐᐎᔭᓐ ᐊᐊ ᐃᑴ? 19ᐌᑯᓀᓐ ᑕᔥ ᑳᐅᒋ ᐃᑭᑐᔭᓐ, ᓂᑕᐌᒫ ᐊᐌ, ᒦᑕᔥ ᑳᑮ ᐅᒋ ᐅᑖᐱᓇᒃ ᓃᓐ ᒋᐐᐎᔮᓐ? ᐃᓇ ᑕᔥ ᐗᐊ ᑭᐐᐤ, ᒫᒌᔥ, ᒦ ᐃ ᐊᓂᔑ ᒫᒑᓐ, ᐅᑮᐃᑰᓐ᙮ 20ᐯᕒᐆ ᑭᒋᐅᑭᒫ ᑕᔥ ᐅᑮ ᐊᓅᓈᐞ ᐅᑎᓂᓃᒪᐞ, ᒋᓵᑭᒋᐎᓈᓂᒡ ᐁᐸᕒᐊᒪᓐ ᐃᐃᒫ ᐊᑮᕽ, ᐐᐎᓂ ᑲᔦ, ᑲᑭᓇ ᑲᔦ ᑫᑰᓐ ᑳᑮ ᐊᔮᓂᒡ᙮

Currently Selected:

ᒉᓂᓯᔅ 12: OJBS

Highlight

Copy