Mr 4
4
Õterikia õterimajire õteika ᵽuᵽajoatirã Jesúre nare bojawãrõeka
(Mt 13.1-23; Lc 8.4-15)
1Iꞌsia beꞌerõꞌõ Galilea ᵽaꞌwarijerã Jesúre wãrõeka ate. Torã rĩkimarãja ᵽoꞌimajare kiᵽõꞌirã etamaka ĩawaꞌri kũmuarã kijãiruᵽaeka. Ᵽoꞌimaja ᵽuri nimauᵽatiji ᵽaꞌwarije kaꞌiareka nimaeka. 2Suᵽa imarĩ ĩꞌrãbaꞌikakaᵽi marĩa bojawãrõbaraka, ikuᵽaka nare kẽrĩka:
3-8—Õterimaji, õterikiyaᵽea õterĩ keꞌrika. Sakiõteka rõꞌõrã eyatirã sakitaaeka ᵽoto ĩꞌrãriꞌo maꞌarã jũjika wĩꞌñaka baꞌaeka. Aᵽea ñaꞌrĩka ãta watoᵽekarã, kũᵽajĩ kaꞌia imarõꞌõrã. Torã ñaꞌrĩka wãrũaja ᵽuꞌrikoꞌomakaja aiyaᵽeka sajoemaka jia sarĩkoa yaibeᵽakãꞌã sajĩrĩka. Aᵽea ñaꞌrĩka wiꞌsiwatoᵽekarã. Iꞌsia ᵽuri ᵽuꞌrikoꞌomakaja jia jãjiberiwaꞌri saruiberika. Aᵽea jia imaekarõꞌõrã ñaꞌrĩka. Iꞌsia ᵽuri jia jãjitirã ᵽuꞌrika. Suᵽa imarĩ ĩꞌrãrijũki treinta rakariꞌo sarikarika, aᵽerijũki sesenta rakao, aᵽeribiaka ᵽuri cien rakao rikarika,== ãrĩwaꞌri nare kibojaeka.
9—Iꞌtojĩrãja sime sakaka majaroka. Samija ãꞌmitiriwãrũyeꞌe jia samija ᵽuᵽajoabe,== nare kẽrĩka.
¿Marãkãꞌã simamaka bojawãrõrikakakaᵽi ᵽoꞌimajare miwãrõyu? ãrĩwaꞌri Jesúre najẽrĩaeka
(Mt 13.10-17; Lc 8.9-10)
10-11Iꞌsia beꞌerõꞌõ ĩꞌrĩkaja kimaeka ᵽoto Jesúᵽõꞌirã imaekarã suᵽabaatirã kika wãrũrimajaᵽitiyika rẽrĩtirã ikuᵽaka kire narĩka:
—¿Marãkãꞌã ãrĩrika mibojawãrõyu?== naᵽakãꞌã, ikuᵽaka nare kiyiꞌrika:
—Bikija ᵽoꞌimajare sõrĩberika imakoꞌomakaja maekaka ᵽuri ritaja kirirãre jãꞌmebaraka jia mija imaerã Tuᵽarãre mijare sõrĩrũjerijayu. Aᵽerãre ᵽuri kire ãꞌmitiriᵽẽabeyurã nimamaka bojawãrõrikaᵽi takaja yibojarijayu. 12Bikija Tuᵽarã majaroᵽũñurã noꞌoeka ikuᵽaka ãñua: “Saniaika imakoꞌomakaja ĩabeyurã uᵽakaja nimarijayu. Iꞌsuᵽakajaoka yibojaika ãꞌmitiritiyakoꞌomakaja ãꞌmitiriᵽẽabeyurã uᵽaka nimarijayu. Suᵽa baabekaja, kire takaja ãꞌmitiriᵽẽairã imawaꞌri, ‘Baꞌiaja yibaaika miyeꞌkariabe’, ãrĩwaꞌri Tuᵽarãre jẽñeirã nimajããeka. Suᵽa imarĩ sareka nare kiwayuĩajããeka”,== Jesúre nare ãrĩka.
“Ikuᵽaka ãrĩrika sime õterikia õterimajire sõteika majaroka”, ãrĩwaꞌri Jesúre nare sabojawaᵽuꞌataeka
(Mt 13.18-23; Lc 8.11-15)
13Suᵽabaatirã ikuᵽaka nare kẽrĩka ate:
—¿Õterikia õterimaji majaroka mija õrĩwãrũbeyu bai jeꞌe? Mijare yimajarobojakoꞌa mija õrĩᵽũabesarãkareka, aᵽea mijare yibojarãkaoka mija õrĩᵽũawãrũbesarãñu jeꞌe,== nare kẽrĩka.
14Iꞌsuᵽaka ãrĩtirã ikuᵽaka nare sakibojajiika ate:
—Õterikia õterimaji ãrĩwaꞌri mijare yibojakoꞌa Tuᵽarãrika bojataᵽarimaji uᵽaka sime. Suᵽa imarĩ Tuᵽarã majarouᵽaka sime õterikiyaᵽea. 15Imarã ĩꞌrãrimarã ᵽoꞌimaja maꞌarã õterikiyaᵽea ñaꞌrĩka uᵽaka imarã. Iꞌsuᵽaka nimamaka Tuᵽarãrika naꞌmitirikoᵽeika beꞌerõꞌõ Satanáre nareka sayeꞌkariayu, kũᵽajĩ norĩkoᵽeika. 16Aᵽerã ᵽoꞌimaja ᵽuri, ãta watoᵽekarã kũᵽajĩ kaꞌia imarõꞌõrã õterikiyaᵽea ñaꞌrĩka uᵽaka nime. Tuᵽarãrika ãꞌmitiritirã jĩjimaka nimakoᵽeyu. 17Suᵽa imarĩ Tuᵽarãrika jia nare ñaꞌrĩjãibeyurã nime, nayiꞌyuaᵽi ãrĩwaꞌri oka nare imamaka, saᵽareaja aᵽerãre nare ĩariᵽeꞌyomaka, ñojimarĩji Tuᵽarãrika naꞌmitirikoᵽeika najaꞌatayu. 18-19Aᵽerã ᵽoꞌimaja imarã wiꞌsiwatoᵽekarã õteriki yaᵽea ñaꞌrĩka uᵽaka imarã. Tuᵽarãrika ãꞌmitirikoꞌomakaja naᵽuᵽakarãja jia oyiaja imarika yaᵽairã nime. Iꞌsuᵽakajaoka, “Rĩkimakaja niñerũ yija rikarãkareka jia yija imarãñu”, ãᵽaraka waᵽuju naᵽuᵽaka nare ᵽakiyu. Sarã takaja ᵽuᵽaribaraka imarijayurã imarĩ, Tuᵽarãrika nayeꞌkariyu. Sayeꞌkariyurã imarĩ kiyaᵽaika uᵽakaja baabeyurã nime. 20Aᵽerã ᵽuri Tuᵽarãrika jĩjimakaᵽi ãꞌmitiririjayurã. Ikuᵽaka nime: Jia kaꞌikirõꞌõrã õterikiyaᵽea ñaꞌrĩka, jia jãjia ᵽuꞌriwaꞌri rĩkimakaja saruika. Ĩꞌrãrijũki treinta rakao sarikarika, aᵽerijũki sesenta rakao, aᵽerijũki ᵽuri cien rakao rikarika. Iꞌsia rikarika uᵽaka nime Tuᵽarãrika jia ãꞌmitiriᵽẽairã. Jia kire yiꞌyurã imarĩ, kiyaᵽaika uᵽaka oyiaja baairã nime,== nare kẽrĩka.
Ᵽeria yaaboaika uᵽaka ᵽuᵽajoatirã, Jesúre nare bojawãrõeka
(Lc 8.16-18)
21Beꞌerõꞌõ ikuᵽaka nare kẽrĩka ate:
—Ᵽeria mawããyu, jia yaaboairõꞌõ imariyaᵽawaꞌri. Suᵽa imarĩ jotorokarã samamuꞌaᵽããberijĩñu. 22Iꞌsuᵽakajaoka sime ika mijare yibojaika jia ᵽoꞌimajare õrĩᵽũabeyua imakoꞌomakaja Tuᵽarãja, “Ikuᵽaka sime”, kẽrĩrãka ᵽoto sanorĩrãñu. 23Mijare yibojaika jia mija õrĩwãrũriyaᵽayeꞌe, jia samija ᵽuᵽajoabe,== nare kẽrĩka.
24Iꞌsuᵽakajaoka ate kibojaeka:
—Mijare ñañua mija ãꞌmitiriᵽẽabe. Samija ãꞌmitiriᵽẽarãka koꞌaᵽitorãja, “Ikuᵽaka simekãꞌã”, mija ãrĩwãrũokoroꞌsi Tuᵽarã mijare jeyobaarãñu. Iꞌsia ᵽemawaꞌribajirã kibaarãñu jiitakaja mijare jeyobaarũkika imarĩ. 25Jiibaji õrĩrika yaᵽawaꞌri sãꞌmitiyukare saᵽemawaꞌribaji sakiõrĩrũjeokoroꞌsi Tuᵽarãre kire jeyobaarãñu. Sãꞌmitiriᵽẽariyaᵽabeyukare ᵽuri kũᵽajĩ kiõrĩkoᵽeika, Tuᵽarãre kireka sayeꞌkariarãñu,== nare kẽrĩka.
26-27Iꞌsuᵽaka ᵽuᵽajoatirã ikuᵽaka ate Jesúre nare ãrĩka:
—Maĩᵽamaki Tuᵽarã kirirãre jia kijãꞌmerũkiakaka mijare yibojaerã baayu mae. Õterikiyaᵽea jia ᵽuꞌyu uᵽaka nime. Mia, õterimajire õterikia õteika beꞌerõꞌõ ñamiareka, ĩmiarekaoka, kikãñu ᵽoto, kikãrĩbeyu ᵽotooka sakiᵽuꞌrirũjemakamarĩa ᵽuꞌritirã, sabikiweiyu. “Sõñu uᵽakaja saᵽuꞌyu, ikuᵽaka sime jeꞌe”, kẽrĩberikoꞌomakaja. 28Jia kaꞌia imamaka, sõñu uᵽakaja jãjia sajayurõꞌõrã ᵽuꞌyua sime õterikia. Mamarĩ saᵽuꞌyu ᵽoto ritabika sime. Iꞌsuᵽaka sima beꞌerõꞌõ joꞌbabajijũki jariwaꞌri saᵽũñuayu. Torãjĩrã ᵽuri saruiyu mae. 29Õterikia boᵽakãꞌã ĩatirã, “Sayeꞌeyeꞌe jeꞌe”, ãrĩᵽuᵽajoawaꞌri sabaꞌiᵽire seꞌerĩ aꞌyu. Õterikia ᵽuꞌririjayu uᵽakajaoka sime Tuᵽarãrirãroꞌsi. “Iꞌsuᵽaka sime”, narĩwãrũberikoꞌomakaja, Tuᵽarãre yaᵽaika uᵽaka jia baairã nare kijarirũjerijayu,== nare kẽrĩka.
“Õterikia mostaza wãmeijũki yaᵽe uᵽaka sime”, ãᵽaraka Tuᵽarãte jãꞌmerũkiakaka Jesúre wãrõeka
(Mt 13.31-32; Lc 13.18-19)
30Aᵽeroka ikuᵽaka nare kibojaeka ate:
—Tuᵽarã ritaja kirirãre jãꞌmerũkiakaka jiibaji mija õñaokaroꞌsi, ikuᵽaka majaroka mijare yiwãrõerã baayu ate. 31Õterikia mostaza yaᵽea moteika uᵽaka nime Tuᵽarãrirã. Ritaja aᵽea õteriki yaᵽea kũᵽajĩbajirĩjiaka sime mostaza yaᵽea. 32Iꞌsuᵽaka simakoꞌomakaja kũᵽajĩkaᵽi ᵽuꞌritirã aᵽea õteriki tẽrĩwaꞌribaji ñoaka saᵽuꞌriweiyu. Suᵽa imarĩ rĩkimakaja ñoaka sarĩᵽia imamaka ijia jãjia yaaika ᵽoto wĩꞌñaka sarã ruꞌyua. Iꞌsuᵽakajaoka nime Tuᵽarãrirã. Mamarĩ rĩkimamarĩrã kire ãꞌmitiriᵽẽairãre imakoꞌomakaja, sabeꞌerõꞌõbaji ᵽuri rĩkimarãja kire ãꞌmitiriᵽẽairãre imarijarirãñu,== nare kẽrĩka.
33Norĩwaᵽuꞌataekarõꞌõjĩrã, rĩkimaka majarorikaᵽi ᵽoꞌimajare kibojawãrõrijarika. 34Majarokaᵽi oyiaja ᵽoꞌimajare kiwãrõeka. Suᵽa simakoꞌomakaja kika wãrũrimajaᵽitiyika kimaeka rõꞌõjite ᵽuri, bojawãrõriroka jia nare kibojawaᵽuꞌataeka.
Werika wejea nare baaeka Jesúre oꞌataeka
(Mt 8.23-27; Lc 8.22-25)
35Iꞌsirĩmiji rãꞌirã ikuᵽaka kika wãrũrimajare kẽrĩka:
—Dajoa, ᵽaꞌwa mawaataꞌriwaꞌrirã.==
36Kẽᵽakãꞌã, ᵽoꞌimajare aꞌribojaweatirã, Jesúre jãmaeka kũmurã najãika. Suᵽa imarĩ saᵽi naka keꞌrika mae. Aᵽea kũmuareka imaekarãoka nabeꞌerõꞌõ tẽrĩwaꞌrikarã. 37Natẽrĩrijarika ᵽoto jãjia wĩrõa baeũꞌmueka. Jãjia sabaemaka ᵽakuwaꞌri kũmuarã jimarĩ okoa jãika. Suᵽa imarĩ kũmua ᵽurueka okoaᵽi mae. 38Iꞌsuᵽaka simakoꞌomakaja kiruᵽukoꞌa ñuꞌtakarã ᵽeatatirã kũmuiꞌtoᵽearã Jesúre kãrĩjãitaeka. Kire ĩatirã, kika wãrũrimajare kire tõrõeka. Suᵽabaatirã ikuᵽaka kire narĩka:
—Wãrõrimaji. Mañaꞌmirã baayu. ¿Jia bai miroꞌsi sime jeꞌe?== kire narĩka.
39Iꞌsuᵽaka naᵽakãꞌã ãꞌmitiriwaꞌri, miꞌmirĩkatirã ikuᵽaka kẽrĩka:
—Wĩrõ mibaeaꞌsi, ᵽakuri mijijibe,== kẽᵽakãꞌã wĩrõa baetiyika, ᵽakurikaoka jijika. 40Torãjĩrã mae,
—¿Dako baaerã mija kĩkikoꞌo? ¿Yire yiꞌriberiwaꞌri, “Yijare ĩarĩrĩwãrũiki kime”, yireka ãrĩbeyukajirã bai mija?== nare kẽrĩka.
41Iꞌsuᵽaka kẽrĩkoꞌomakaja jimarĩ ᵽuᵽatawaꞌri, “¿Maki kime ruku ĩꞌĩ? Wĩrõa, ᵽakurika ᵽariji kire yiꞌyua”, ãᵽaraka najẽrĩabuꞌaeka.
Currently Selected:
Mr 4: TNC
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.