Hch 3

Bitamajite Ᵽedrote jieka

1Ĩꞌrãrĩmi uᵽakaja rãꞌirã Tuᵽarãka jairĩ judíorãkare eyajiᵽaka Tuᵽarãte jiyiᵽuᵽaka õrĩriwiꞌiarã. Torãjĩrã mae, ĩꞌrãrĩmi Ᵽedro, Juanᵽitiyika torã Tuᵽarãka jairĩ naꞌrika. 2Torã mae ĩꞌrĩka ᵽoꞌimaji bitamaji ᵽoꞌijirikakire koᵽerekarã ruᵽaeka. Ĩꞌrãrĩmi uᵽakaja kijeyomarãre kire kõkewaꞌrijiᵽaeka Jiyurika ãñu koᵽerekarõꞌõrã. Torã ruᵽatirã, “Wayuoka yibaayu”, ãrĩwaꞌri niñerũ kijẽñerã torã kire naruᵽatajiᵽaeka. 3-4Ᵽedrorãkare torã kãkaerã baaeka ĩatirã,

—Yire mija wayuĩabe kũᵽajĩ,== nare kẽrĩka, imarĩ,

—Õꞌõrã miabe== Ᵽedrore kire ãrĩka.

5Toᵽi mae, “Mae kũᵽajĩ yire nijirãñu jeꞌe”, ãrĩwaꞌri jiaᵽi nare kiyoirĩkaeka.

6—Niñerũ ᵽuri yire imabeyua. Aᵽeakaka imatiyaika mire yijeyobaarãñu. Jesucristo Nazaretkakire yire jãꞌmekaᵽi ãrĩwaꞌri, “Miꞌmirĩkatirã jia aꞌyuka mijaᵽe”, mire ñañu,== Ᵽedrore kire ãrĩka.

7Suᵽa kire ãrĩtirã kiᵽitaka ritaᵽẽꞌrõto ñiꞌatirã Ᵽedrore kire miꞌmarĩkaeka. Suᵽa imarĩ kiũꞌᵽua, kiãñarakaoka jiika mae. 8Suᵽa imarĩ kibuꞌrirĩkaeka. Suᵽabaatirã Ᵽedrorãkaᵽitiyika Tuᵽarãte jiyiᵽuᵽaka õrĩriwiꞌiarã buᵽurĩkewaꞌritirã kikãkawaꞌrika mae. “Jia Tuᵽarãte yire baayu, bitamaji uᵽaka ñimareka yire kijieyu”, ãrĩwaꞌri jĩjimaka kimaeka. 9Kituritaᵽamaka torã imaekarãre kire ĩaeka. Suᵽabaatirãoka, “¡Jiitaka Tuᵽarãte yire baayu!”, kẽᵽakãꞌã naꞌmitirika. 10Suᵽa imarĩ kire ĩatirã, “Niñerũ jẽñebaraka Jiyurika ãñua wãmeika koᵽereka rõꞌõrã ruᵽakoꞌokaja kimema. ¿Marãkãꞌã simamaka iꞌsuᵽaka kijayu jeꞌe?”, narĩka.

Tuᵽarãte jiyiᵽuᵽaka õrĩriwiꞌi ᵽẽte Salomón wãmeika imaekarõꞌõrã ᵽoꞌimajare kibojaeka Ᵽedro

11Bitamaji imakoᵽekaki, Ᵽedrorãkakaja kimajiᵽaeka. Tuᵽarã jiyiᵽuᵽaka õrĩriwiꞌi ᵽẽte Salomón wãmeika imaekarõꞌõrã iꞌsuᵽaka nimaeka. Iꞌsuᵽaka kima ĩatirã ᵽuᵽatawaꞌri, rĩrĩraꞌatirã rĩkimarãja ᵽoꞌimajare torã etaeka. 12Torã netamaka, ikuᵽaka Ᵽedrore nare ãrĩka:

—Mija ᵽuᵽataꞌsi yitãꞌomaja Israelkaꞌiakarã. Yijaᵽi ãrĩwaꞌrimarĩa suᵽa kijayu. Suᵽabaatirã, “Tẽrĩritarã imarĩ noñu uᵽakaja kire najiekoꞌo”, yijareka mija ãrĩᵽuᵽajoaꞌsi. Suᵽabaatirã, “Aᵽerã boꞌibajirã jia Tuᵽarãre yiꞌyurã imawaꞌri suᵽa kire nabaakoꞌo”, mija ãrĩaꞌsioka. 13Ikuᵽaka simatiyayu: Mañekiarã, Abraham, Isaac, suᵽabaatirã Jacobrãkare jiyiᵽuᵽaka õrĩkaki Tuᵽarãte yaᵽaeka uᵽakaja baaekaki kime Jesús. Iꞌsuᵽaka kimamaka ritaja ᵽoꞌimajare jiyiᵽuᵽaka õrĩrũkika Tuᵽarãte kire imarũjeka. Kire ĩariᵽeꞌyowaꞌri ĩᵽarimarãre kire mija okabaaeka, “Kire mija jããbe”, ãrĩwaꞌri. Iꞌsuᵽaka mija ãrĩkoꞌomakaja Ᵽilato ᵽuri baꞌiaja kire baarika yaᵽaberikoᵽekaki. 14Tuᵽarãre yaᵽaika uᵽakaja baaiki Jesúre ᵽoatarikoᵽakaja Barrabás, ᵽoꞌimajare jããrimajiratakire Ᵽilatore mija ᵽoatarũjeka. 15Iꞌsuᵽaka baawaꞌri ᵽoꞌimajare õñia imajiᵽarika jaꞌatarimajire mija jããrũjeka. Iꞌsuᵽaka kire mija baakoꞌomakaja, Tuᵽarã ᵽuri õñia kire jariᵽeꞌrirũjekaki. Kire ĩaekarã imarĩ, “Õñia kime mae”, yija ãrĩwãrũyu. 16Ĩꞌĩ bitamaji imakoᵽeroyiraᵽakite õñurã mija ime. Jesúre yiꞌyurã yija imamaka kiũꞌᵽua kire kijieyu. Kire ĩatirã, “Rita sime, Jesúre kire jieika”, mija ãrĩwãrũyu.

17Ñoñua sime yijeyomarã, mija ĩᵽarimarãᵽitiyika õrĩᵽũaberiwaꞌri Jesúre mija jããrũjeka. 18“Iꞌsuᵽaka simarãñu”, Tuᵽarãte ãrĩka simamaka suᵽa simaraᵽe. Mia jeꞌe, bikija ikuᵽaka Tuᵽarãroꞌsi bojaĩjirimajare ãrĩka: “Cristore baꞌiaja baawãꞌimarĩtirã kire najããrãñu”, narĩka. 19Sõñurã imarĩ, “Baꞌiaja kire yija baaraᵽaka yijareka samiyeꞌkariabe”, Tuᵽarãte mija ãᵽe mijare sakiyeꞌkariaokaroꞌsi. Iꞌsuᵽaka mija baarãkareka mijare kijeyobaaika jia õñurã mija imarãñu. 20Iꞌsuᵽaka mija imamaka Cristore mija ᵽõꞌirã Tuᵽarãte ᵽũatarãñu ate. Bikijarãja, “Ĩꞌĩ nare Jãꞌmerũkika”, Tuᵽarãte ãrĩtikaki kime Jesús. 21Maekaka maboꞌikakurirã Jesucristore ime ruᵽu. “Mae ritatojo wejea jierĩ meꞌᵽe”, Tuᵽarãte kire ãrĩrãñurĩmi õꞌõrã etarũkika kime. Ika yibojaika uᵽakaja Tuᵽarãroꞌsi bojaĩjirimaja bikija kirirã imaiꞌtaraꞌaekarãte ãrĩka. 22Mia jeꞌe, ikuᵽaka Moisés imaroyikakite bojaeka mañekiarãte: “Maĩᵽamaki Tuᵽarãroꞌsi bojarimaji ñima uᵽakaja aᵽika kirika bojarimajire kiᵽũatarãñu. Iꞌsuᵽaka baarãñuka matataki imarãki, suᵽabaatirã ritaja kẽrĩrãka uᵽakaja mija yiꞌᵽe. 23Kẽñu uᵽakaja yiꞌribeyurãte ᵽuri toᵽi nare ᵽoatatirã, nare kiriatarãñu”, ãrĩwaꞌri Moisés imaroyikakite bojaeka.==

24Ikuᵽaka aᵽea Ᵽedrore bojaeka:

—Samuel imaekaki, kibeꞌerõꞌõ Tuᵽarãroꞌsi bojaĩjikarãoka, simaja nabojaeka maekaka imarũkia. 25Bikija, mañekiarãre Tuᵽarãre bojatika nabojaeka kiroꞌsi bojaĩjirimaja. “Moisére imaeka uᵽaka aᵽika yirika bojaĩjirimajire yiᵽũatarãñu”, ãrĩwaꞌri mañekiarãre Tuᵽarãre bojatika simamaka, simauᵽakaja sime maroꞌsi. Ikuᵽaka Abraham imaekakire Tuᵽarãre bojaeka: “Jia ritaja ᵽoꞌimajare yibaarãñu, miriᵽarãmiᵽi ãrĩwaꞌri”, Tuᵽarãre kire ãrĩka. 26Mia yijeyomarã Israelkarã, Tuᵽarãte yaᵽaika uᵽakaja baarimaji kime Jesús. Õꞌõrã Tuᵽarãte kire ᵽũataeka ᵽoto mamarĩ maroꞌsi kire kiᵽũataeka jia mare kibaaokaroꞌsi. Baꞌiaja mabaaika majaꞌataokaroꞌsi iꞌsuᵽaka Israelkarãroꞌsi kibaaeka,== Ᵽedrote nare ãrĩka.

Currently Selected:

Hch 3: TNC

Highlight

Copy