Jenesis 8

Kon Atuh Ano Ai

1Kindrei badeh balen bamani Nowa ma hawe iri katin haka nane an hawen an ndron bwe; eme iy bwidi jor atohou ma amwekes gwa i lok i andri. 2Eme gwa badu baha munyak badeh badek bwe ma mada san ta gwa badu kandrah ili. Ya ur amondrei. 3Eme udu bolo len rinek lomonoh (150) badeh gwa i lok ai. 4Eme na len ronoh ndro taloh (17) udu bolo bun ndro taloh badeh mwe-e ndron amar ta mandrei Ararat. 5Gwa badeh i lok kahis le eme na len ari asahan mwena ta bun ronoh badeh no-o mandrei asahan.

6Ano len hanoh ano badeh Nowa sihi kadam asak. 7Eme iy suni sirih ari ta aimon lakou abola nyara Raben badeh iu ili. Eme iy bame hamon bwe, iy atah atah le winiya gwa amar. 8Ano ja badeh iy suni ban ili ta anyolom gwa ndra andri de bwe. 9Arile gwa bala se andri bwe eme ban dah basilahei ndrahun ta manyah bwe, eme iy atah eme hamon eme ndron. Eme Nowa atehei minen i manan andrei iy eme bolon. 10Ano Nowa abe-en ben ndro taloh ja ano badeh iy suni ban ili ja. 11Eme ban nane eme hamon eme hawen na beyeh ma la-u kei aloh olip badeh udu bohon eme, ya eme Nowa ndratanan ai, gwa ndra andri ai. 12Ano iy bini-i ben ndro taloh iu ano iy suni ban ili ja; eme ban dah ili ma ili ya iy bame hamon bwe.

13Ano na len Nowa jaha tan asahan ndro hanek ari (601), na len ma mwena asahan ta bun ari badeh gwa amar. Eme Nowa abe-ei bwele-e ndron eme iy anyolom ili eme ma iy anyolom munyak anya kabosar ai. 14Eme na len lunoh ndro taloh (27) badeh munyak abosar mara-ei.

15-16Eme Kindrei tiye i ta Nowa, “Ou ma udum ma hawe nadum oro ma udu oro kame len ta ndron. 17Ou kuhi iri sirih ma iri katin haka kame len hawem, ma iri kadeu nah ma kaseker kaweleyani kon munyak mari.” 18Ya eme Nowa eme len ta ndron hawe udun, ma hawe nadun oro ma hawe udu nadun oro, 19ma hawe iri katin haka ma iri sirih arakou le adek ame len ta ndron, randrah doh randrah doh badeh adek ase.

Nowa Asun Salom

20Ano Nowa eme tukumwi bek; ano iy andrei ari ari badu tiri katin haka ma hawe iri sirih ari ari mwasin badeh iy asun iri ma buruwen in bada bek dah i nyara salom i ta Laban. 21Eme mahu bubure salom dah mwesekei Laban sekesek handru eme ma iy tiye udu ndrinen i buku doh, “Jo kameh winiya badeu maha bame ta munyak ja bwe ai, tasah tiri lau amwekes lakou; jo tanan na len iy ma loweu le badeh budon tan ma ndra-in le. Eme ya jo kameh winiyan badai iri lau mari ja bwe ai, i buku jo mene amwekes dah ja bwe ai.”

22“I dah mada an ta atah basoh

Ma i dah kameh mada an ta a-eh

Ma abwe-eh udu aliy,

I buku munyak udu le.

Ya i dah kameh kon anyala

Ma kon i nyarahan,

Kon an ma hawe kon ur

Udu bolo len ma ben.”

Currently Selected:

Jenesis 8: lidNTpo

Highlight

Copy