Jenesis 47
47
1Ano Josep kuhi nadu tine oro ma limeh ala hawe kabin. Eme Josep tiye i ta kabin, “Tama ma nadu tine oro badeh ado Kenan ndrame. Oro badeh ame ma katin haka toro ta aimon bwidiu, hawe lakou toro mari. Oro badeh are loboho Gosen.” 2Ano iy leheya nadu tinen oro ala ta kabin. 3Eme kabin ndremenya oro, “Saba lahou tado?”
Eme oro anya, “Lahou taso badeh ta atondrok iri katin haka sipsip, i buku none tubu aso oro bwena mene. 4Aso ame manyah ado munyak tinan dah, tasah munyak Kenan badeh nyamon bwe, ma bwidiu tiri katin haka taso ndrano. Ya eme aso ndremenya ou, ou winiyan atehei aso manyah ado loboho Gosen de bwe?”
5Ano kabin tiye i ta Josep, “Na dah tamam hawe nadu tinem oro badeh ndrame, 6eme munyak mari badu Ijip dah badeh i toro ai. Oro badeh kamanyah kado loboho munyak mwasin handru, udu loboho Gosen. Ma i buku none oro lau rayah mwasin ta atondrok katin haka ado bolo oro badeh, jo aseken oro katondrok katin haka tek ale.”
7Ano ja Josep andrei taman ili leheya iy i ta kabin. Eme Jekop atehei nyosowan tan i la-u kabin. 8Ano kabin ndremenya Jekop anya, “Jaha tam sabe bah?”
9Eme Jekop tiye, “Jaha tek ta jo edek le badeh asahan rinek tonoh (130). Ya udu bolo oro jaha doh badeh sola bwe, arile jo akohok maha solo-an, bala buku none jaha ta tubu oro mene solo-an bwe.” 10Ano Jekop atehei nyosowan i ta kabin ma iy iu i len tan. 11Ano badeh Josep atehei taman hawe nadu tinen oro manyah ado Ijip. Atehei oro manyah ado munyak mwasin ma lakou mwasin udu bolo kon tinan aloh Ramisis i buku none le kabin ndratiye. 12Ano Josep edeu nyamon i na taman, i na nadu tinen oro ma hawe i na nadu tinen oro bahan hawe lowa taman oro mari ale ya iy anyohan oro badeh in hamon ta kane nadun oro.
Kon Nyamon Bwe
13Ano badeh nyamon bwe badeh akohok andra-i handru, ma kon mari badeh nyamon bwe. Kon Ijip hawe Kenan badeh akohok andra-i labai. 14Eme iri badeh asih kalom ano Josep andrei su-ubek doh ili ndrahu kabin. 15Ano na len su-ubek tiri Ijip hawe Kenan ano badeh, iri ame hawe Josep ndremenya, “Ou anyohan ahi nyamon! Bwe kameh ahi kamak ai! Su-ubek tahi badeh ndrasihinei ndrano.”
16Eme Josep anya, “I buku none su-ubek taha ndrano badeh, aha kadeu katin haka taha keme ta asih nyamon.” 17Eme badeh iri atiye katin haka tiri, iri katin haka aloh hos, iri sipsip, iri me, iri bulumakau hawe iri donki i mine Josep. Ano Josep edeu niri nyamon ili. Na jaha doh badeh Josep edeu nyamon i niri, tasah iri asih na katin haka tiri mari.
18Ano udu jaha ari ja asahan badeh iri ame hawe Josep tiye, “Josep ahi winiyan batonei ari lakou ta madam bwe. Su-ubek tahi ndrano hawe katin haka tahi mari mene ndrawek tam. Ahi ari lakou ja ta edeu ewek tam ja bwe ai, arile ahi ndramak salin hawe munyak tahi le. 19Ou samwekes ahi samak. Ou amwekes ari lakou! Ou samwekes bilin tahi sado leleyah. Ou asih munyak tahi na nyamon. Aso kameh a bonyo-ou ta kabin ya iy badeh kandrei munyak taso ki tan. Ou adeu naso kalom ma hawe ou adeu tahi badun ta atah ki bolo bilin tahi.”
20Eme Josep sihinei munyak mari udu Ijip i ta kabin. Eme andrei iri lau mari badu Ijip badeh adeu munyak tiri badeh i ta sisih; tasah nyamon bwe badeh akohok andra-i; eme munyak mari badeh asahan munyak ta kabin. 21Josep badeh mwesekei iri lau mari badu Ijip badeh asahan bonyo-ou. 22Munyak le iy basihinei bwe badeh, munyak tiri pris. Iri pris badeh badeu munyak tiri bala ta sisih bwe, tasah kabin badeh edeu niri nyamon mwasin udu le buku doh, ta iri badeh winiyan manyah ado aliy udu le buku doh. 23Eme Josep badeh tiye i tiri, “Aha ndratou, jo badeh ndrasihinei aha ma munyak taha ndra ta kabin. Ya buwa kalom ki taha ma aha atah ki bolo bilin taha. 24Ya i buku none len ta nyamon kuni badeh, udu bolo nyamon taha ronoh badeh aha kadeu la-uh badu bolo ronoh ki ta kabin. Ya iri buwa kalom mari erah badeh ki taha ta atah ma ki ta nyumon taha ma lowa aha oro mari.”
25Ano oro tiye, “Ou badeh amwekes kandriyen mwasin eme tahi; ma ahi bamak bwe. Ahi kameh a bonyo-ou ta kabin ai.” 26Eme Josep badeh mwesekei batanau boto-on i tiri lau mari badu Ijip ta kadeu la-uh badu bolo nyamon tiri ronoh ki ta kabin ki buku nyamon kuni. Eme kandriyen doh eme eme taku na len dah. Arile munyak tiri Pris le badeh bwe ai, bala ta kabin bwe.
Jekop Tiye Sahou
27Iri lau badu Isra-el badeh manyah ado loboho Gosen udu Ijip. Eme iri badeh tiri lakou solo-an labai ma nadu iri badeh ndrasola le. 28Jekop badeh manyah udu Ijip badeh winiya jaha ronoh ndro taloh, eme jaha tan mari ise badeh asahan rinek hanoh ndro taloh (147). 29Ano len mirihik ta Jekop anya kimek badeh, iy luhi nadun Josep eme ano iy tiye i tan, “Josep ou atehei minem ki ndrokowa bak ma ou amwekes tandrakan ta ou badeh sahi jo sado Ijip dah ndri-i. 30Jo badeh aseken ou badeh ahi jo, kili hawe tama oro mene ado aliy; ou badeh tuwi jo udu Ijip dah ki len ma ou ahi jo badeh kudu hawe tama oro.”
Eme Josep tiye, “Jo kameh amwekes i buku bohom badeh.”
31Ano badeh Jekop tiye, “Ou tandrakan ta i dah kameh ou mwesekei.” Eme Josep tandrakan ma Jekop udu bada sau tan badeh edeu wurah.
Currently Selected:
Jenesis 47: lidNTpo
Highlight
Share
Copy
Want to have your highlights saved across all your devices? Sign up or sign in
© 2001, Wycliffe Bible Translators, Inc. All rights reserved.
