Jenesis 46

Isra-el Hawe Nadun Oro Mari Ala Ijip

1Ano badeh Jekop lokowani lakou tan mari ma iy iu ili Bersiba, eme badeh iy amwekes Salom i ta Kindrei ta taman Aisik. 2Eme badeh, na ben udu bolo ameh Kindrei asehek sahou i tan anya, “Jekop ei!” Eme Jekop asumon anya, “Jo kada-ah!”

3Eme iy anya, “Jo dah jo Kindrei, Kindrei ta tamam. Ou sanoh ta ala Ijip; jo kameh amwekes lundriyem oro kameh asola ma asahan kon rakon buruwen udu doh. 4Jo kameh udu hawem ewek Ijip ano jo kameh tiyani lundriyem oro kameh ame hamon ja ame munyak dah ja. Ou amak kameh Josep kameh udu hawem.”

5Ano Jekop udu Bersiba eme len. Eme nadun oro badeh atehei tama oro Jekop, ma nadu oro bwisik ma hawe udu oro badeh, ado bolo asiu sau mene kabin atehei. 6Eme badeh oro andrei iri katin haka toro ma hawe lakou toro mari mene badu Kenan, eme oro adek ala Ijip. Jekop badeh kuhi nadun oro mari a hawen: 7nadun oro, nadu tubun oro, nadu oro badih ma hawe nadu tubun oro, oro mari ano.

8Ya kane lowa Isra-el oro ala Ijip hawen asa i doh: oro badeh kadok tan badeh Ruben, 9ma hawe nadun oro: oro badeh Hanok, Palu, Hesron ma hawe Karmi. 10Ano Simiyon ma nadun oro badeh: Jemu-el, Jamin, Ohat, Jakin, Sohar ma hawe Sa-ul. Oro doh badeh badu ndrine udun badu Kenan. 11Lebi ma nadun oro badeh: Gerson, Kohat ma hawe Merari. 12Juda ma nadun oro badeh: Er, Onan, Silah, Peres, ma Serah. (Ya nadu Juda uru ma la-uh badeh Er hawe Onan badeh amak ado ndra Kenan). Ya nadu Peres uru badeh Hesron hawe Hamul. 13Isakar ma nadun oro badeh: Tola, Pu-ah, Jasup hawe Simron. 14Ya Sebulun oro nadun badeh: Seret, Elon hawe Jalel. 15Oro doh badeh nah nadu udu Jekop aloh Liya badeh, adeu oro ame len badeh ado Padan Aram ma hawe nadun badih ari badeh nyaran Dinah. Eme ya kane nadu Isra-el oro mari iu ndrine Liya badeh asahan tonoh taloh.

16Ya i dah nadu Gat oro: oro badeh Sepon, Hagi, Suni, Esbon, Eri, Arot hawe Areli. 17Ya nadu Aser oro badeh Imnah, Isbah, Isbi, Beriya ma hawe nadu tine oro badih Serah. Ya nadu Beriya oro badeh Heber hawe Malkiyel. 18Oro doh badeh ma ronoh onoh nadu Isra-el iu ndrine Silpah. Silpah doh badeh badih ta lohowan ta Leban eme Leban badeh atehei i ta nadun badih Liya.

19Ano udu Isra-el Rejel badeh atehei nadu Isra-el la-uh le: badeh Josep uru Benjamin. 20Ano udu Ijip badeh Josep badeh nadun la-uh, uru badeh Manase hawe Ipra-im. Uru doh badeh au ndrine udu Josep nyaran Asenat. Ya Asenat badeh iy badih, nadu Podipera, pris badu kon On. 21Ya nadu Benjamin oro badeh: Bela, Beser, Asbel, Gera, Naman, Ehi, Ros, Mupim, Hupim hawe At. 22Oro ma ronoh hahuw doh au ndrine udu Isra-el aloh Rejel.

23Ano Dan badeh nadun badeh Husim. 24Ya nadu Naptali oro badeh: Jase-el, Guni, Jeser hawe Silem. 25Oro ma ndro taloh doh nadu Isra-el badu ndrine Bilhah. Bilhah badeh badih ta lohowan ta Leban atehei i ta nadun badih Rejel.

26Ya kane nadu Isra-el oro mari ma lundriye nadun oro ise ala Ijip badeh ma ndro hanoh onoh (66). I doh nadun oro le amwenen, bondrek udu nadun oro bwe. 27Ano ja badeh nadu Josep uru ma la-uh adeu uru ado Ijip, eme kane nadu Isra-el oro hawe tama oro i se badeh asahan ndro tonoh (70) ala doh.

Isra-el Hawe Nadun Oro Ado Ijip

28Ano badeh Jekop suni Juda ili badeh ta tiye ta Josep ma ta leheya san ki tan ta iy keme Gosen. 29Eme oro asahan badeh, Josep sandroh i bwele-e sau tan aliu na katin haka ma iy ili hawe taman ili Gosen. Eme iy isos hawe taman le badeh Josep akabah i la-u taman atehei minen i balen ma iy eden luluwen handru. 30Ano Jekop tiye i ta Josep, “Jo badeh anya kimek ai, arile na dah jo ndranyolom ou ma jo ndratanan ai, ou badeh bamak bwe.”

31Ano Josep tiye i ta nadu tinen ma hawe lowa taman oro mari, “Jo kameh ili hawe kabin asehek tan ta nadu tine oro ma hawe lowa tama oro mene manyah ado Kenan badeh ndrame hawek. 32Jo kameh tiye tan ta ado badeh lau ta atondrok iri katin haka ma ado badeh ndrandrei iri sipsip hawe iri bulumakau hawe lakou mari tado badeh ndrame. 33Ya i buku none kabin kaloh ado kala, ya iy kandremeya ado ta lahou tado sasah handru, 34badeh ado katiye tan, ‘Lahou taso handru badeh ta atondrok iri katin haka aso atondrok eme eme taku dah, i buku none tubu aso mene amwekes.’ I buku ado tiye i buku doh kameh, iy kameh atehei ado kameh manyah ado Gosen.” Josep asehek doh badeh, tasah iy badeh tanan iri Ijip badeh bwale iri ta atondrok iri katin haka ma sumukok iri lau atondrok.

Currently Selected:

Jenesis 46: lidNTpo

Highlight

Copy