Sefanaiya 3
3
Yulusalemu vayaʼmogimo hosu kavaʼmo huʼnaya kavafeʼmo huʼniya gemae
1 #
Yel 22:17; Emo 4:1 Yulusalemu vayaʼmogimo osisaya agufa kavaʼmo huʼa Goti geʼamo amagiʼa ataleteʼapaeʼmo hosu kavaʼapiletiʼmo apakaiʼapimo aliʼa hosu huʼa apateʼnae. Apakaemo kana yaʼmo aliʼa apamiʼnayaʼmofeʼmo kana yaʼmo aliteʼa kage kage huʼa yulagefaʼmo aigae. 2#Niy 9:26; Sam 50:17; Sam 78:22; Aiy 29:13Apakaemo Goti gemo oʼafiʼnae. Ala kava neʼmoʼa alino api aino apatesiyafeʼmo nohapaiye. Apakaemo Ala kava neʼmo aliʼa amufa noʼamiye. Apakaemo Gotiʼapimo haopaleʼmo noʼvae. 3#Iyi 22:27; Mka 3:11Yulusalemu koteʼmo yagaiʼnaya vayaʼmogi kaekae nehaya laiyonigana huʼa maiʼnae. Agoti gemo neʼafiya vayaʼmo afela kala anagaʼmogimo lusi kava huno apaka teʼnigeʼa neʼyaʼmo neʼa hano nehaya agufa kavaʼmo nehae. 4#Yel 27:15; Iyi 13:3-6; Iyi 22:26; Hos 4:6Yulusalemu kotegamo Gotitegati gemo aliniʼeʼa aeʼa hakalo huʼa hapa nepaiya vayaʼmogimo apaipa apakesaleʼmo alagepa huʼa yagaiʼa noʼatageʼapaeʼmo vayaʼmogimo geʼapieʼmo aliʼa amufa noʼapamiye. Mono huʼa neʼapataya vayaʼmogi aote yaʼmo aliʼa hosu huʼa neʼatae. Apakaemo Goti keʼaepa geʼamo aliʼa afeleʼa alu gemo aliʼa apaya neʼmalae. 5#Sam 145:17; Loa 23:14; Yop 34:10; Avi 3:22-23; Mka 7:9; Yel 3:3; 8:12Nehayaʼmonanafa Ala kava neʼmo fatago vekamo Yulusalemu taonimo folagapiʼmo maiʼneno hosu kavaʼmo alagi nosiye. Muki neteʼae neteʼaeʼmo vayaʼmogi kavaʼapimo alagepa huno alino fako huno neʼapate. Muki afinaʼaeʼmo fatago kavaʼageʼmo huno alino fako huno apatesiyafeʼmo haino me notaleyaʼmonanafa fatago kavaʼmo nosaya vayaʼmogimo hosu kavatapieʼmo apavagage nosiye.
6 #
Yel 25:10-11
Ala kava neʼmoʼa hunoʼaeʼmo, Nagaemo alu vaya alu vayaʼmo aliʼna hano huʼna apataleʼnove. Muki taoniʼapimo aliʼna hano huʼna atalesugeno no atufaʼageʼmo hanege yafa kegiʼyamo amagiʼa naku paege kateʼmo umenitata hisaya vayaʼmo oʼmaige hugae. 7#Yel 8:6; 36:3; Aep 6:12Nagaemo nagesa afiʼnaeʼmo, Lapakaemo nagaefeʼmo koli hugae. Kayoʼmo olapamisugeʼa notapimo heʼa halagape oʼvaisayafeʼmo aliʼna lapaya malesuva gemo afigae, huʼna nagesamo afiʼnovaʼmonanafa haʼao, huʼna, geʼnimo oʼafitapa malage hutapa lapaya mukiki hutapa lapakaitapimo magoʼe hutapa alita hosu hutapa lapateʼnae.
Logufa vayaʼaeʼmo apava gemo huʼniya gemae
8 #
Sam 62:5; Yol 3:2; Mka 4:11-13 Ala kava neʼmoʼa hunoʼaeʼmo, Agoti huʼna apatesuvafeʼmo nagava maiʼnigeʼnao. Nagaemo naipamo leʼnisigeʼna kayoʼmo apamisuvafeʼmo muki nofi vayaʼmo apavaleʼna aliʼna anupa huʼna apategauve, huʼna hu maleʼnove. Lusi kava huno naipamo leʼniyanageʼna kaino nefauva kavaʼniletiʼmo muki ma mopafi vayaʼmo aliʼna hano huʼna apatalegauve. 9#Aiy 19:18; Sam 22:27; 86:9-10; Sak 14:9Ani kava huteʼna mukiʼamogimo Ala kava neʼmoʼna nagiʼnilefeʼmo keya aeʼa ge hisayafeʼmo oʼaniʼya apavenafuʼnamo sese huʼna apatesugeʼa apaote apakemo aigae. Magoke apaipa apakesamo aliʼneʼa aliʼyaʼnimo aligae. 10#Sam 68:31; Aiy 49:21-23Nagaefeʼmo mono hisaya vayaʼmo maiʼa aiʼa atagu faeʼnaya vayaʼnimogimo Itiyopiya aniʼmo mugagayaga faliga kotegatiʼmo ofalinimo alini eʼa namigae. 11#Aiy 45:17; 11:9Ani afinaʼmo nagaemo lapakaepatiʼmo apakaiʼapieʼmo apamogaga aiteʼa himuʼnamu nehaya vayaʼmo aliʼna hapa faiʼna apatalesugetapaeʼmo geʼnimo amagitapa ataleʼnaya kavatapieʼmo magoʼe huno lapavagage osugiye. Lapakaemo naote avefiʼmo magoʼe hutapa himuʼnamu kavaʼmo osugayaʼmofeʼmae. 12#Aiy 14:32; 61:1-3; Sak 13:8-9Nagaemo lapakae folagapatiʼmo yuna apaipa vayaʼmogimo yagu yaga kavaʼmo nehaya vayaʼmo afaʼa apakeʼna apatalesugeʼa Ala kava neʼmoʼna nagiʼnilefeʼmo aliʼa amufa namigae. 13#Aiy 10:20-22; 60:21; Sak 8:3,16; Iyi 34:13-15Isaleli vayapatiʼmo logufaʼamogimo hosu kavaʼmo osuge aigofe gemo osuge hugae. Apakaemo humi oʼapateʼa sipisipiʼnimo maiʼneʼa kahaumo neteʼa havaesageʼa muki vayaʼmogimo koli yaʼmo aliʼa oʼapamigae.
Gotiʼa apakaetegamo hisiya alagepa kavafeʼmo apamogaga aisaya kavafeʼmo huʼniya gemae
14 #
Sam 126:2-3; Aiy 12:5-6 Saiyoni aʼmafaʼne anagaʼamogitapae, huʼna, Yokemo hiyo. O Isaleli vayaʼmogitapae, huʼna, alopa gefatiʼmo hiyo. Yulusalemu aʼmafaʼne anagaʼamogitapae, huʼna, Muki lapaipafatiʼmo lapamogaga aiyo. 15#Yo 1:49; Aep 30:23; Mka 7:18-20; Sak 14:11Ala kava neʼmoʼa agoti huno lapateteno lapamagiʼniya kayoʼmo ago alino ataleʼniye. Agaemo muki kame vayatapimo alino hapafaino apataleʼniye. Isaleli vayaʼmogi kini vekamo Ala kava neʼmo lapakae folagapiʼmo maiʼniyanagetapa mago hanageke yafeʼmo koli osugae. He, henagaʼamo halate hanageke yafeʼmo alagi koli osutapa afaʼa maige maige hutapa maigae.
16 #
Aiy 35:3-4; Sak 8:15; Hi 12:12 Ani afinaʼmo afole aisigeʼapaeʼmo Yulusalemu vayaʼaifeʼmo huʼapaeʼmo, Saiyoni vayane, huʼa, koli osiyo. Lapayaʼmoʼmo alagaʼmo nehaesigetapaeʼmo alita lokiya vaitapa ateyo, huʼa hapa paigae. 17#Aep 17:1; Loa 30:9; Aiy 12:2; 18:4; 65:19Ala kava neʼmo Gotitapimoʼmo lapakae folagapiʼmo maiʼniya vekamo alopa lokiyaʼaʼe vekamoʼmo lapakufamo alino katino lapategaiye. Ala kava neʼmoʼa amuse huno lapateteno lapakaefeʼmo amogaga aino lapategaiye. Lapakaefeʼmo hau ayamopafiʼmo hauʼnisigenoʼaeʼmo ge osuno hauʼniya kavatefeʼmo maino haga lenoʼageʼmo maigiye. Agaemo lapakaefeʼmo amogaga neʼainoʼaeʼmo yokemo hugiye, huʼa hugae.
18 #
Yel 23:3; Hos 1:11; Avi 2:6-7 Ala kava neʼmoʼa hunoʼaeʼmo, Nagaemo lapakaemo nagaefeʼmo mono hisayafeʼmo alita anupa hutapa maiyo, huʼna hu maleʼnova kavatefeʼmo afagitega maiʼnaya vayaʼmogimo afaʼa aliʼa anupa huʼa mono nosaya kavatefeʼmo apaipamoʼmo kana nehiye. Nagaemo lapavaleliʼna uʼna aliʼna anupa huʼna lapategauve. Lapaipamoʼmo kana nehiya kavatapimo aliʼna hano huʼna atalegauve. 19#Aiy 49:25-26; 51:22-23; Yel 33:9Afiyo, huʼna, ani afinaʼmo kana yaʼmo aliʼa nelapamiya vayaʼaina kayoʼmo apamiguve. Nagaemo apaiyamo hosuʼnisiya vayaʼmo apakufamo aliʼna katiʼna apatege aliʼa hapafaiʼa apataleʼnageʼa maiʼa aiʼa atagu faeʼnaya vayaʼmo apavaleʼna aliʼna anupa huʼna apategauve. Apavagage yaʼmo aliʼa apamiʼnageʼa maiʼnaya vayaʼmogi kotetiʼmo apakiʼapileʼmo aliʼa asaga huʼa apateteʼa ala apakimo apamigae. 20#Aiy 56:8; Iyi 34:16; 39:28; Emo 9:14Ani afinaʼmo nagaemo lapavaleliʼna esugetapa halate kotapileʼmo etapa maigae. Lapavaleʼna aliʼna anupa huʼna lapatesugeʼapaeʼmo muki ma mopafi vayaʼmogimo ala lapakimo lapamiteʼapaeʼmo lapakitapileʼmo aliʼa asaga huʼa lapategae. Alu nofi vayaʼai kotegamo kalavusi aliʼyaʼmo neʼaliya vayatapimo halate apavaleliʼna lapakaetegamo esugetapa apakegae. Nagaemo Ala kava neʼmoʼnamo mani gemo ago hu maleʼnove.
Currently Selected:
Sefanaiya 3: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
