Maki 5

Hosu apaune vayaʼmo mago vekamo aipafiʼmo maiʼnaya vekaeʼmo huʼniya gemae

(Mt 8:28-34; Lu 8:26-39)

1Apakaemo ani kotuʼmo lakaeʼa Gatalini vayaʼmo maiʼnaya haopalegamo uʼa avaʼyi huʼnae. 2#Mk 1:23Yesuʼa sipifatiʼmo emine neʼegenoʼaeʼmo hosu apaune vayaʼmo aipafiʼmo maiʼnaya vekamo kanolufilagatiʼmo neʼegeʼa fotu huʼnae. 3Ani vekamo vaya kiʼa neʼapataya yafaka kanolufilaga maiʼnigeʼapaeʼmo mago vayaʼmogimo uʼa atafaugefe huʼnayana afaʼa oʼatafauge seli nofitetiʼmo kiʼa ategefe huʼnayana afaʼa kiʼa oʼatege huʼnaya vekamae. 4Mago vayaʼmogimo muki afinaʼae afinaʼaeʼmo aiyalateʼmo hanikapu aiʼa atege ayatalateʼmo seli nofitetiʼmo kiʼa atege huʼnayaʼmonanafa seli nofiʼmo alino kapalu aege hanikapumo aino lo aege huʼnigeʼapaeʼmo afaʼa yagaiʼa oʼateʼnae. 5Muki afinaʼmo felugaʼe haniʼilagaʼeʼmo kanolufilagaʼe avelegaʼeʼmo umenitata nehunoʼaeʼmo lusi kava huno kage gage nehunoʼaeʼmo yafatetiʼmo agufamo heno hatagauno maiʼniye.

6-7 # Mk 1:24 Agaemo afagitegatiʼmo Yesuna agetenoʼaeʼmo nagu nagu huno eno aiyafiʼmo aleʼya faiʼnenoʼaeʼmo alopa gefatiʼmo mono hunoʼaeʼmo, Yesuo, huno, Hogote vekamo anaga vekamo Goti mafaʼneʼamogae, huno, nagaetegamo na agufa kavaʼmo huka hisanafeʼmo neʼane. Goti agiʼaletiʼmo kagoʼyamo ataleteka hukaeʼmo, kagafu kisiya yaʼmo aliʼna okamiguve, huka naha paiyo, huno ha paiʼniye. 8Hogoteno Yesuʼa hunoʼaeʼmo, hosu aune vekae, huno, aipafatiʼmo emikeno, huno huʼniyaʼmofeʼmo ani gemo huʼniye. 9Yesuʼa hunoʼaeʼmo, kagikamo ina lagae, huno afi geʼnigenoʼaeʼmo lagaemo asole vayaʼmo maiʼnonaʼmofeʼmo nagiʼnimo asole vayaʼnae, huno hutenoʼaeʼmo, 10kahao ke hovanagi alika laha faika afagitega olatalo, huno huge huge huno maiʼniye. 11Inagi asole afumo aveleʼmo neʼa maiʼnae. 12Hosu apaune vayaʼmogi huʼapaeʼmo, alika laha faitalegeta uta haita afu anagaʼai apaipafiʼmo maino, huʼa afigeʼnae. 13Yesuʼa hunoʼaeʼmo, kanalenagi afaʼa viyo, huno huʼnigeʼa hosu apaune vayaʼmo aipafatiʼmo emi eʼa tu tauseniʼa agufa afu anagaʼai apaipafiʼmo faleʼuʼa haiʼnageʼapaeʼmo aulafifatiʼmo nagu nagu huʼa uʼa lamiʼa ani kotupiʼmo asagauʼa aiteʼa aniʼmo neteʼa faliʼnae.

14Ani afuleʼmo yagaiʼnaya vayaʼmo apaune heʼuʼa taonifiʼmo maiʼnaya vayaʼaifeʼmo hapa paige alu haopalega uʼa hapa paige huʼnageʼa afiteʼapaeʼmo agesayafeʼmo eʼnae. 15Apakaemo Yesutega eʼa agayana hosu apaune vayaʼmo aipafatiʼmo alino hapafaitaleʼniya vekamoʼmo kukena yaʼmo vaiteno mopafiʼmo fai maiʼnigeno agesamo aino halo aiʼnigeno maiʼnigeʼa eʼa ageteʼapaeʼmo koli huʼnae. 16Ani kavaʼmo ageʼnaya vayaʼmogimo hosu apaune vayaʼmo aipafiʼmo maiʼnaya vekaeʼmo ava ge huge afu anagaʼaifeʼmo apava gemo huge huʼa hapa paiʼnae. 17Hapa paiʼnageʼa afiteʼapaeʼmo Yesufeʼmo huʼapaeʼmo, kahao ke honanagi mani koteʼmo ataleka uvo, huʼa ha paiʼnae. 18Yesuʼa sipifiʼmo uno haiʼnigenoʼaeʼmo hosu apaune vayaʼmo aipafatiʼmo alino hapafaitaleʼniya vekamoʼmo hunoʼaeʼmo, kahao ke hove, huno, kagaeʼeʼmo ugesugi navalelika ugapiye, huno afi geʼnigenoʼaeʼmo 19Yesuʼa hunoʼaeʼmo, haʼao, huno, vayakalegamo uka Ala kava neʼmoʼa lusi kava huno hau huno kateteno kaha maeʼniya kavafeʼmo ava gemo huka hapa paiyo, huno ha paiʼniye. 20#Mt 4:25; Mk 7:31Ha paiʼnigeno uno naya loleʼa taonimo agiʼamo Nekapolisi kotegamo umenitata huno Yesuʼa lusi kava huno ha maeʼniya kavafeʼmo ava gemo aeno hakalo huno hapa pai male hapa pai male hulino uʼnigeʼa ani gemo afiteʼapaeʼmo hapau aiʼnae.

Yailasi aʼmafaʼneʼe mago kaita hauʼniya akanoʼefeʼmo huʼniya gemae

(Mt 9:18-26; Lu 8:40-56)

21Yesuʼa halate aniʼmo lakaenuno mugagayaga faligamo kahaepaleʼmo maiʼnigeʼapaeʼmo asole vayaʼmo eʼa aliʼa anupa huʼa maiʼnae. 22-23#Mt 8:3; Mk 7:32Maiʼnageno Yailasiʼa Yu vayaʼai monoteʼmo neʼyagaiya vekamo eno Yesuʼa agetenoʼaeʼmo aiyafiʼmo agoʼya faino maiʼnenoʼaeʼmo, kahao ke hove, huno, aʼmafaʼneʼnimo aise afinaʼmo ago faligefe huʼnigeʼnaeʼmo huvanagi alagepa huno maisiyafeʼmo eka agufaleʼmo kayaʼmo maleka ato, huno lokiya gemo huno ge huno afigeʼnigenoʼaeʼmo 24Yesuʼa agaeʼeʼmo uʼniye. Neʼvigeʼapaeʼmo faiʼa ku aili ku aili huʼa maleʼa apaliniʼa uʼnae.

25Mago akanomo aiguyaʼmo tuolofuʼa kafugamo hauʼniya akanomo maiʼniye. 26Agaemo alu lota vaya alu lota vayaʼaitegamo uge uge huʼniyana ha oʼmaeʼnageno magoʼe huno hauge hauge huno maiʼnigeno agafu kiʼniye. 27-28#Mt 14:36Agaemo Yesufe ava gemo afitenoʼaeʼmo asole vayaʼeʼmo eno magokepi lokaelino neʼenoʼaeʼmo, kukenaʼaleʼmo ame alisuvana aiguʼyaʼnimo nahagegaiye, huno agesamo afitenoʼaeʼmo akamelegatiʼmo eno kukenaʼaleʼmo ame aliʼniye. 29Ame neʼaligenoʼaeʼmo aiguʼyaʼamo malage huno hageʼnigeno agufafilagamo alino amalagino ageʼniye. 30#Lu 6:19Ame neʼaligenoʼaeʼmo Yesuʼa ageyana agufafatiʼmo himamuʼamo ago uʼnigeno ageʼniye. Agetenoʼaeʼmo muki vayaʼeʼmo magokepi neʼenoʼaeʼmo aino afe leno, ina laʼmo kukenaʼnileʼmo ame aliʼniye, huno ge huno apafi geʼniye. 31Apafi geʼnigeʼapaeʼmo geʼamo neʼafiya vayaʼmogi huʼapaeʼmo, asole vayaʼmogimo maleʼa kapaliniʼa neʼvagi na kava higekaeʼmo ina laʼmo kukenaʼnileʼmo ame aliʼniye, huka nehane, huʼa afi geʼnae.

32Yesuʼa ame aliʼniya vekamo agesiyafeʼmo aulaga halino apakelinuneno huʼniye. 33Aulaga halino neʼapakegenoʼaeʼmo ani akanomoʼa agufafilagamo afole aiʼniya kavaʼmo agetenoʼaeʼmo eno aiyafiʼmo agoʼya faiʼneno koli huteno atete hauʼnigenoʼaeʼmo Yesufeʼmo muki kavafeʼmo lama ge huno ava gemo huno ha paiʼniye. 34#Mk 10:52; Lu 7:50; 17:19Ani gemo ha paiʼnigenoʼaeʼmo, aʼmafaʼneo, huno, kagesamo afika fatago huʼnana kavakamoʼmo alino kahageno kateʼniyanagi uka alagepa huka maigenoʼao kaipamoʼmo falu hino, huno ha paiʼniye. 35Ha nepaigeʼapaeʼmo mago vayaʼmo Yailasiʼa Yu vayaʼai monoteʼmo yagaiʼniya notegatiʼmo eʼapaeʼmo, aʼmafaʼnekamo ago faliʼnigi na kava higeka tisa vekamo alaga haesiya yaʼmo alika neʼamine, huʼa ha paiʼnae. 36Yesuʼa ani gemo afitenoʼaeʼmo monote yagaiʼniya vekaeʼmo ha painoʼaeʼmo, koli osuka nagaefekeʼmo kagesamo afika fatago huvo, huno ha paitenoʼaeʼmo 37muki vayaʼaifeʼmo hunoʼaeʼmo, oʼmetapa afaʼa maiyo, huno huteno Pitaʼagi Yemisiʼagi Yemisi aganaʼamo Yoniʼagi huno apavalelino uʼniye. 38Monote yagaiʼniya vekamo noteʼmo uʼa avaʼyi huteʼapaeʼmo Yesuʼa apakeyana ani vayaʼmogimo apano aeteʼa faiyosago faiʼa aviʼyaʼmo nehageno apakeʼniye. 39Agaemo nopiʼmo uno nehainoʼaeʼmo, na kava higetapaeʼmo lapano aeteta aviʼya nehae. Ani aʼmafaʼnemo ofaliʼnifa afaʼa au kaleno maiʼniye, huno hapa paiʼniye. 40#Yo 11:11Hapa paiʼnigeʼapaeʼmo lusi kava huʼa kigi huʼa ateʼnagenoʼaeʼmo muki vayaʼamo alino hapa faitalegeʼa kumatega uʼa lamiʼnae. Agaemo ani aʼmafaʼnemo itaʼafoʼalaʼmoganimogi agaemo avagi huʼa eʼnaya vayanagi huno apavalelino ani aʼmafaʼnemo maleʼnaya nopiʼmo uʼa haiʼnae. 41#Lu 7:14Ayateʼmo neʼalinoʼaeʼmo, talita kumi, huno huʼniye. Ani gemo aepaʼamo haneʼniyana aise aʼmafaʼneo he tiyo, huʼna kaha nepauve, huno huʼniye. 42Huno nehigenoʼaeʼmo he tino umenitata huʼniye. Ani aʼmafaʼnemo tuolofuʼa kafugamo maiʼniya aʼmafaʼneʼmae. Umenitata huʼnigeʼapaeʼmo lusi kava huʼa hapau aiʼnae. 43#Mk 1:44; 7:36Yesuʼa lokiya ge huno hapa paitenoʼaeʼmo, mago vayaʼaifeʼmo uta hapa opaiyo, huteno, aʼmafaʼnemo mago neʼyaʼmo amiyo, huno hapa paiʼniye.

Currently Selected:

Maki 5: kyg2013

Highlight

Copy