Matiyu 12

Sapati afina kavafeʼmo huʼniya gemae

(Mk 2:23-28; Lu 6:1-5)

1 # Loa 23:25 Mago Sapati afinaʼmo Yesuʼe geʼamo neʼafiya vayaʼeʼmo viti hoyafiʼmo umenitata huʼnae. Geʼamo neʼafiya vayaʼmo apaka teʼnigeʼapaeʼmo viti alagamo lagiʼa neme neme uʼnae. 2#Hat 20:10Falasi mono vayaʼmogimo apaketeʼapaeʼmo Yesufeʼmo huʼapaeʼmo, Apako, huʼa, gekamo neʼafiya vayaʼmogimo Sapati afina keʼaepa gemo ago amagiʼa neʼatalae, huʼa ha paiʼnagenoʼaeʼmo, 3#1 Sam 21:1-6Neviniʼmo avagi huʼa uʼnaya vayaʼmo apaka teʼnigeʼapaeʼmo huʼnaya kavafeʼmo ava gemo lekana paita oʼafiʼnafiye. 4#Mon 24:5-9Agaemo Goti mono nopiʼmo uno haiʼnigeʼapaeʼmo agaeʼe vayaʼaʼeʼmo Gotiʼmo ofalinimo amiʼnaya peleti mayamo aliʼa neʼnae. Muki vayaʼmogimo noʼnaya peleti mayamo haneʼniyana mono huʼa neʼapataya vayaʼamogigeʼmo neʼnaya peleti mayamo neʼnayaʼmonanafa hosu kavaʼmo osuʼnae. 5#Nap 28:9-10Keʼaepa gemoʼa hunoʼaeʼmo, mono huʼa neʼapataya vayaʼmogimo Sapati afinaʼmo alopa mono nopiʼmo aliʼyaʼmo aliʼnayana keʼaepa gemoʼa hunoʼaeʼmo, Sapati afinaʼmo aliʼyaʼmo oʼaliyo, huno huʼniya gemo amagiʼa neʼatalayaʼmonanafa vaiʼmo noʼaliye, huno avoʼmo kae maleʼniya gemo lekana paita oʼafiʼnafiye. 6#Mt 12:41-42; Lu 11:31-32Lapa paiʼnaeʼmo, mago vekamo agiʼamoʼmo alopa mono noʼmo agiʼamo ago aeno aga seʼniya vekamo manifiʼmo maiʼniye. 7#Hos 6:6; Mt 9:13Gotiʼa hunoʼaeʼmo,

Afumo heʼa ofalinimo namisayafeʼmo oʼnahauʼniyaʼmonanafa hapau huʼa apatesayafekeʼmo nahauʼniye,

huno avoʼmo kae maleʼniya gemo aepaʼamo lapakaemo afiʼnaesinana hosu kavaʼmo osuʼnaya vayaʼaifeʼmo hosu kavaʼmo huʼnae, hutapa osuʼnaesine. 8#Mt 8:20Vemo mafaʼnemoʼmo Sapati afinateʼmo yagaino neʼateyaʼmofeʼmae, huno hapa paiʼniye.

Kalaisiʼa ayaʼmo aeno ape leʼniya vekamo alino api aino ateʼniya gemae

(Mk 3:1-6; Lu 6:6-11)

9Yesuʼa ani kotegatiʼmo atalenuno Yu vayaʼai mono nopiʼmo uno haiʼniye. 10#Lu 14:3Mago vekamo ayaʼmo aeno ape leʼniya vekamo ani nopiʼmo maiʼniye. Mago vayaʼamogimo agoti huʼa atesayafeʼmo, mago vekamoʼa Sapati afinaʼmo kaita hauʼnisiya vekamo alino hageno atesiyaʼmoʼmo keʼaepa gemo amagino ataleʼnifiye, huʼa ge huʼa afi geʼnae. 11#Lu 14:5Afi geʼnagenoʼaeʼmo, lapakaepatiʼmo mago vekamoʼmo sipisipiʼamo Sapati afinaʼmo kelifiʼmo asagauno aiʼnisiyana uno lamino asagaulino hai negaifi hai noʼmegaiye. 12Ma mopafi vayaʼmogimo sipisipi anagaʼmo ago aeʼa apaka seʼa maiʼnayaʼmofeʼmo Sapati afinaʼmo vayaʼmo hapa neʼmaeya kavaʼmoʼa keʼaepa gemo amagino noʼataleya kavaʼmo haneʼniye, huno hapa paiteno 13ani vekaeʼmohunoʼaeʼmo, kayaʼmo aeka hayo huvo, huno huʼnigeno aeno hayo nehigenoʼaeʼmo ayaʼmo alino api aino ateʼnigeno afaʼa alagepa huno haneʼniya ayakana huno haneʼniye. 14#Yo 5:16Falasi mono vayaʼmo ataleʼuʼa Yesuʼmo atafauʼa amagisayafeʼmo aliʼa anupa huʼa maiʼneʼa ge huge afige huʼa maiʼnae.

Gotiʼa aliʼyaʼamo alisiyafeʼmo lekana paino ateʼniya vekaeʼmo huʼniya gemae

15 # Mk 3:7-10 Yesufeʼmo ani ava gemo huʼnaya gemo ago afitenoʼaeʼmo ani kotetiʼmo ataleno uʼnigeʼa asole vayaʼmo akame huʼa uʼnagenoʼaeʼmo alu kaita alu kaitaʼmo hapauʼniya vayaʼmo alino hapageno apateʼniye. 16-17#Aiy 42:1-4; Mt 8:4; Mk 3:12Gotitegati gemo alinineno aeno hakalo huno hapa nepaiya vekamo agiʼamo Aiyeyaʼa huʼniya gemo afole aisiyafeʼmo Yesuʼa hunoʼaeʼmo, Nava gemo hutapa hapa opaiyo, huno hapa paiʼniye. 18#Mt 3:17Aiyeyaʼa hunoʼaeʼmo, Ageyo, huno, ago lekana paiʼna ateʼnova vekamo aliʼyaʼnimo alisiya vekaʼnimo manileʼmo maiʼniye. Nahau nayamopafiʼmo nahauʼniya vekamogeʼna amuse huʼna neʼatove. Nauneʼnameʼmo amisugeno muki alu nofi vaya alu nofi vayaʼaifeʼmo fatago kavafeʼmo ava gemo aeno hakalo huno hapa paigiye. 19Ge ohapauge alopa gefatiʼmo osuge taoni kateʼmo vayaʼai apaulagaleʼmo he tino maiʼneno aeno hakalo huno hapa opaige hugiye. 20-21Hopamo aiseʼamo aino lo aeʼniya hopa kayoʼmo alino lo oʼaegaiye. Lamufi vikimoʼmo hokanufaʼageʼmo haneʼnigeno halinamo neʼaiya vikimo alino yu osegaiye. Ani kava osugiyaʼmonanafa aliʼyaʼmo alime alime neʼvisigeno fatago kavaʼaeʼmo ava gemo alino atesigeno visigenoʼaeʼmo aliʼyaʼaletiʼmo neʼyaʼamo alagi afole aigiye. Afole aisigeʼa alu kotega alu kotegamo maiʼnaya vayaʼmogimo agaefeʼmo aliʼa amufa amigae, huno avoʼmo kae maleʼniye.

Hosu apaune vayaʼmo aliʼa hapa faiʼa neʼapatalaya kavafeʼmo huʼniya gemae

(Mk 3:20-30; Lu 11:14-23; 12:10)

22 # Mt 9:32-33 Ani afinaʼmo mago vayaʼmogi hosu aune vekamo aipafiʼmo maiʼniya vekamo aulagamo ali huʼnigeno agemo noʼaiya vekamo avaleliʼa Yesutegamo eʼnageno Yesuʼa aulagamo alino ayakeno ateʼnigeno ageno ayaketeno agemo aiʼniye. 23Muki vayaʼamogimo ageteʼapaeʼmo hapau aiteʼa, agava maiʼnona vekamo Nevini aginagomo maiʼnifi, huʼa huʼnae. 24#Mt 9:34; 10:25Huʼa huʼnageʼa Falasi mono vayaʼmogimo afiteʼapaeʼmo, hosu apaune vayaʼai ala kava neʼapimo Mielisemuliʼa himamuʼamo amiʼnigenoʼaeʼmo hosu apaune vayaʼmo alino hapa faino neʼapatale, huʼa huʼnae.

25Yesuʼa Falasi vayaʼmogi apaipafiʼmo apakesamo afiʼnaya kavaʼmo apaketenoʼaeʼmo, magoke koteʼmo neʼmaisaya vayaʼmogimo aliʼa fako huʼa apateteʼa kame hisayana apakaiʼapimo hapaeʼa hano huʼa apatalegae. Ani kava huʼa magoke afamo anagaʼmogimo aliʼa fako huʼa apateteʼa kame hisayana alagi alagepa huʼa oʼmaigae. 26Sataniʼa vayaʼamo alino hapa faino apatalesiyana agaetegatiʼmo alagi alino fako huno apatalegaiye. Alino fako huno apatesiyana haiya kava huʼa Sataniʼa yagaino neʼapateya vayaʼmo afaʼa maigae. 27Lapakaemo nagaefeʼmo hutapaeʼmo, Mielisemuli himamuʼaletiʼmo hosu apaune vayaʼmo alino hapa faino neʼapatale, hutapa nehayaʼmonanafa vayatapimogimo ina la himamuʼaletiʼmo aliʼa hapa faiʼa neʼapatalae. Vayatapimogimo hosu gemo nehae, huʼa huteʼa aliʼa fako huʼa lapategae. 28#Ap 10:38; 1 Yo 3:8-9; Aiy 49:24; 1 Yo 4:4Nagaemo Goti Aunemeʼaletiʼmo hosu apaune vayaʼmo aliʼna hapa faiʼna neʼapatalesuvana Gotiʼa yagaino neʼapateya kavaʼmo lapakaeteʼmo ago eno afole aiʼniye.

29Mago vekamoʼmo lokiya vekamo aiya ayateʼmo nofi kino oʼateʼnisiyana noʼafatiʼmo uno haino kagemi yaʼamo alinino oʼugiye. Hogoteno atafauno aiya ayateʼmo nofi kino ateʼnisiyana noʼafatiʼmo uno haino kagemi yaʼamo alinino ugiye.

30 # Mk 9:40; Lu 9:50 Mago vekamo nao vekamo oʼmaiʼnisiyana kameʼnimo maiʼniye. Mago vekamoʼmo aliʼna anupa huʼna apatesuvafeʼmo naha noʼmaesiyana alino atagu faeno alino hapa faino neʼapatale. 31#1 Ti 1:13; Hi 6:4-6; 10:26Ani kavatefeʼmo mani gemo lapa nepauve, huno, Gotiʼa muki alu hosu kava alu hosu kavaʼe huʼa faipa huʼa neʼapataya geʼeʼmo afaʼa alino atalegaiyaʼmonanafa Goti Aunemeʼaeʼmo huʼa faipa huʼa atesaya hosu geʼapimo alagi alino oʼatalegaiye. 32Mago vayaʼmogi Vemo mafaʼneeʼmo huʼa faipa huʼa atesaya hosu kavaʼapimo afaʼa alino atalegaiyaʼmonanafa aote Aunemeʼaeʼmo huʼa faipa huʼa atesaya hosu kavaʼapimo hemenimo alino oʼatalege afole aisiya afinaʼmo alagi alino oʼatalege hugiye.

33 # Mt 7:16-20 Alagepa alagamo neʼae, hutapa lapakesamo afiʼnisayana alagepa yosamo haneʼniye, huta lapakesamo afiyo. Hosu alagamo neʼae, hutapa lapakesamo afiʼnisayana hosu yosamo haneʼniye, huta lapakesamo afiyo. Yosa alagaʼamo ageteʼapaekeʼmo na agufa yosamo haneʼnifi huʼa neʼagayaʼmofeʼmae. 34#Mt 3:7; 15:18; Mt 23:33; Lu 3:7Nagaloʼyave afamo anaga vayaʼmogitapae, huʼna, hosu vayaʼmo maiʼnayaʼmofeʼmo haiya kava huta alagepa gemo afaʼa hugae. Vayaʼai apaipafiʼmo na agufa yaʼmo havaiteʼnifi ani kava huno aino vali lamino asagauno neʼaigeʼapaeʼmo gemo nehae. 35Alagepa vekamoʼmo kesiʼafiʼmo alagepa yaʼageʼmo ageno maleʼniya yapatiʼmo alagepa yaʼageʼmo alino afole neʼaiye. Ani kava huno hosu vekamoʼmo kesiʼafiʼmo hosu yaʼageʼmo ageno maleʼniya yapatiʼmo hosu yaʼageʼmo alino afole neʼaiye. 36Lapa nepauve, huno, agoti huno apatesiya afinaʼmo Gotiʼa muki gemo fikumo nehaya gelefeʼmo apakenoka huno apafi gegaiye. 37Gotiʼa getapifikeʼmo alino fako hutenoʼaekeʼmo mago vayaʼaifeʼmo, fatago vayaʼmo maiʼnae, huno hapa paige mago vayaʼaifeʼmo hunoʼaeʼmo, hosu vayaʼmo maiʼnae, huno hapa paige hugiye, huno hapa paiʼniye.

Noʼagaya agufa lokiya kaune kavaʼmo huvo, huʼa ha paiʼnaya gemae

(Mk 8:11-12; Lu 11:29-32)

38 # Mt 16:1; Lu 11:16; Yo 6:30; 1 Ko 1:22 Mago Falasi mono vayaʼe keʼaepa gemo avoʼmo kaeʼa aliʼa apaya neʼmalaya vayaʼmogiʼeʼmo huʼapaeʼmo, Tisao, huʼa, noʼagona agufa lokiya kaune kavaʼmo huka lave lisanafeʼmo hugeta ageno, huʼa ha paiʼnagenoʼaeʼmo, 39#Mt 16:4hosu vayaʼmogi Gotiʼa anauʼapimokana vekamo ataleʼa kumai heʼa ugekana huʼa neʼmaiya vayaʼmogimo noʼagaya agufa lokiya aune kavaʼmo aliʼna apave lisugeʼa agesayafeʼmo nehayaʼmonanafa noʼagaya agufa lokiya aune kavaʼmo hisugeʼa oʼagegayaʼmonanafa Yonategamo afole aiʼniya agufa aune kavakeʼmo alino apave lisigeʼa agegae. 40#Yna 1:17Yonaʼa alopa noyamemo agupafiʼmo loleʼe magoʼe felugaʼe loleʼe magoʼe haniʼilagaʼeʼmo maiʼniya kava huno Vemo mafaʼnemoʼmo loleʼe magoʼe felugaʼe loleʼe magoʼe haniʼilagaʼeʼmo mopamo afepilagamo uno lamino maigiye. 41#Yna 3:5Akeyaʼvilagamo Niniva taonifiʼmo maiʼnaya vayaʼmogimo Gotiʼa muki vayaʼmo agoti huno apatesiya afinaʼmo he tiʼa hemenimo maiʼnaya vayaʼaifeʼmo, lapakaemo hosu kavaʼmo huʼnae, huʼa hapa paigae. Na kava hinageʼapaene. Yonaʼa Goti geʼamo aeno hakalo huno hapa paiʼnigeʼa afiteʼa apaipamo aliʼa afe leʼnayaʼmonanafa hemenimo manile maiʼniya vekamoʼmo Yonaʼmo ago aeno aga seno maiʼniya vekamoʼmo Goti geʼamo aeno hakalo huno hapa nepaigeʼapaeʼmo hemenimo maiʼnaya vayaʼmogimo apaipamo aliʼa afe nolayaʼmofeʼmae. 42#Mt 12:6; 1 Kin 10:1-10Akeyaʼvilaga hoga haopalega maiʼnaya vayaʼaiteʼmo yagaino neʼapateya kuvini a kanomoʼmo Salomoniʼmo ageteno afiʼniya gemo afisiyafeʼmo eʼniye. Manileʼmo maiʼniya vekamoʼmo Salomoniʼmo ago aeno aga seno maiʼniyaʼmonanafa geʼamo noʼafiyaʼmofeʼmo ani a kanomo Gotiʼa agoti huno apatesiya afinaʼmo he tino hemenimo maiʼnaya vayaʼaifeʼmo, lapakaemo hosu kavaʼmo huʼnae, huno hapa paigiye.

43Hosu aune vekamo mago vekamo aipafatiʼmo uno lamiteno maino haga lesiya yaʼmo agesiyafeʼmo aniʼmo ohaneʼniya kotegamo umenitata huno kahau ya hume hume uʼniyaʼmonanafa oʼageʼniye. 44Oʼagenoʼaeʼmo, halate aiʼna atagineʼna uʼna noʼnifiʼmo maiguve, huno huteno uno avaʼyi huteno ageyana noʼafiʼmo vayaʼmo oʼmaiʼnageno mumusopamo ohaneno alagepa huno haneʼnigeno ageʼniye. 45#2 Pi 2:20Ageteno ataleno uno seveniʼa hosu apaune vayaʼmogi magoʼe huʼa hosu kavaʼmo huʼa aeʼa aga seʼa maiʼnaya vayaʼmo apavalelinuno ani vekamo aipafiʼmo uʼa haiʼa magokepi lokaeʼa maiʼnae. Maiʼnagenoʼaeʼmo ani vekamo hogoteno hosu kavaʼmo huno maiʼniyana henagaʼamo magoʼe huno lusi hosu kavaʼmo huno maiʼniye. Ani agufa kavaʼmo hemenimo neʼmaiya vayaʼaiteʼmo afole aigiye, huno hapa paiʼniye.

Yesu itaʼamoʼe aganaʼamogiʼeʼmo Yesutegamo eʼnaya gemae

(Mk 3:31-35; Lu 8:19-21)

46 # Mt 13:55 Yesuʼa vayaʼaifeʼmo gemo hapa nepaigeʼapaeʼmo itaʼamoʼe aganaʼamogiʼeʼmo eʼa avaʼyi huteʼa gemo ha paisayafeʼmo kumatega agava maiʼnae. 47Mago vekamoʼmo hunoʼaeʼmo, itakamoʼe kaganakamogiʼeʼmo gemo kaha paisayafeʼmo eʼa kumateʼmo maiʼnae, huno ha paiʼnigenoʼaeʼmo Yesuʼa hunoʼaeʼmo, itaʼnimoʼmo haiyaʼaleʼmo maiʼniye. 48Konagaʼnimogimo haiyaʼaleʼmo maiʼnae, huno ha paiʼniye. 49Agaemo geʼamo neʼafiya vayaʼaifekeʼmo aya akoʼya nehunoʼaeʼmo, Apakeyo, huno, itaʼnimogi naganaʼnimogimo maiʼnae. 50#Yo 15:14; Lo 8:29Kokuʼnapi afoʼnimoʼmo hauʼniya kavaʼageʼmo nehaya vayaʼmo naganaʼnimogimo maige nasaʼnimogimo maige itaʼnimogimo maige huʼnae, huno hapa paiʼniye.

Currently Selected:

Matiyu 12: kyg2013

Highlight

Copy