Yoni 4

Yesuʼa Sameliya kotega a kanomo ha paiʼniya gemae

1 # Yo 3:22,26 Falasi mono vayaʼmogi afiʼnayana Yesuʼa asole vayaʼmo apavalelineno geʼamo neʼafiya vayaʼmo alino hamaleno apateteno aniʼmo faleno apateʼniye. Ani kava huʼniya kavatetiʼmo Yoniʼa ago aeno agaseʼniye, huʼa hapa paiʼnageʼa afiʼnae. 2Afiʼnayaʼmonanafa Yesuʼa agaiʼamo aniʼmo faleno oʼapateʼnifa geʼamo neʼafiya vayaʼmogigeʼmo aniʼmo faleʼa apateʼnae. 3-4Yesuʼa Falasi vayaʼmogi afiʼnaya apaipa apakesamo apaketenoʼaeʼmo Yutiya kotegatiʼmo ataleno Galeliya kotegamo halate aino atagi neno ugefeʼmo huʼniye. Gotiʼa Sameliya kotega folagapiʼmo ka valino ateʼnigeno uʼniye. 5#Lu 9:52; Aep 33:19; Yas 24:32Sameliya kotega mago taonimo agiʼamo Saika kotegamo uno avaʼyi huʼniye. Ani haopalega Yekopuʼa mago mopamo alino mafaʼneʼamo Yosefeʼmo amiʼniya mopamo haneʼniye. 6Ani haopalega Yekopuʼa keli kafi maleʼniya ani kotuʼmo haneʼnigeno Yesuʼa yatala kateʼmo eʼniyaʼmofeʼmo agufafilagati alaga haeʼnigeno eno ani ani kotu haopaleʼmo itopaleʼmo maiʼniye. Yegemo uno lamino falesiyafeʼmo hogo huʼniya afinaʼmo maiʼniye. 7Fai maiʼnigenoʼaeʼmo mago Sameliya a kanomoʼmo aniʼmo he fisiyafeʼmo eʼnigenoʼaeʼmo, aniʼmo he fika namiyo, huno ha paiʼniye. 8Geʼamo neʼafiya vayaʼmo neʼyaʼmo miya faisayafeʼmo taonifilagamo ago utageno agaiʼageʼmo maiʼniye. 9#Esa 4:1-5; 9:1–10:44; Lu 9:52-53Yu vayaʼe Sameliya kotega maiʼnaya vayaʼeʼmo magokepiʼmo lokaeʼa oʼmaiʼnafa apaote apaote huʼa maiʼnayaʼmofeʼmo ani a kanomoʼa geʼaleʼmo aeno atagaina hunoʼaeʼmo, kagaemo Yu nofi vekamo maiʼnanageʼna nagaemo Sameliya a kanomo maiʼnovana na kava higekaeʼmo aniʼmo he fika namiyo, huka nehane, huno ha paiʼniye. 10#Yo 4:26Ha paiʼnigenoʼaeʼmo, kagaemo Gotiʼa fiku hapa maeno neʼapamiya yaʼmo ageteka aniʼmo he fika namiyo, huno ge huʼniya vekamo ageka aeto huʼnanesinana agaefeʼmo namiyo, huka afi gesanageno kanage kanage huno haineno uno nelamiya aniʼmo kamiʼniyesine, huno ha paiʼnigenoʼaeʼmo 11#Yo 7:37-38; Le 21:6Ala vekae, huno, paketi oʼaliʼnanaʼmofeʼmo yatala kelimo haneʼnigi haiyatetiʼmo ani kanage kanage huno eno haineno uno nelamiya aniʼmo he figane. 12#Yo 8:53Laginago vekamo Yekopuʼa mani keli kotuʼmo lamiʼniye. Agaemo aniʼmo he fino nege mafaʼne anagaʼamogi aniʼmo he fiʼa nege yuna afu anagaʼamogi nege huʼnae. Kagaemo Yekopuʼa aeʼna agaseʼnove, huka nehapiye, huno afi geʼnigenoʼaeʼmo, 13ina lagimo mani aniʼmo neʼnesafigeno halate anifeʼmo hapaugiyaʼmonanafa 14#Yo 6:35ina lagimo nagaemo apamisuva aniʼmo nesafigeno halate magoʼe huno anifeʼmo alagi ohapaugiye. Nagaemo aniʼmo apamisugeno apaipafatiʼmo meti anikana huno eno haineno afaʼa maisaya yaʼmo apamisigeʼa alagepa huʼa maige maige huʼa maigae, huno ha paiʼnigenoʼaeʼmo, 15Ala vekae, huno, nagaemo ani anifeʼmo oʼnahausiyafeʼmo eʼna maniletiʼmo aniʼmo he ofisuvafeʼmo huʼnana aniʼmo he fika namiyo, huno ha paiʼnigenoʼaeʼmo, 16uka anaukamoʼmo avalelika eno, huno ha paiʼnigenoʼaeʼmo, 17Anauʼnimoʼmo oʼmaiʼniye, huno ha paiʼnigeno Yesuʼa hunoʼaeʼmo, anauʼnimoʼmo oʼmaiʼniye, huka nehana gemo lama gemo nehane. 18Faefuʼa veleʼmo maiʼnanageno hemenimo kagaeʼeʼmo lokaetana maiʼnaʼa vekamo anaukamoʼmo oʼmaiʼniye. Lama gemo naha paiʼnane, huno ha paiʼnigenoʼaeʼmo, 19#Yo 7:40; 9:17; 1 Ko 14:24-25Ala vekae, huno, ago kageʼnovana kagaemo kaune vekamo maiʼnanageʼna kageʼnove. 20#Loa 12:5-14; Sam 122:1-5Muki laginago vayaʼmogi mani aveleʼmo Gotifeʼmo mono huʼnayaʼmonanafa lapakaemo Yu vayaʼmogitapa hutapaeʼmo, Yulusalemu taonifikeʼmo Gotifeʼmo mono hiyo, hutapa nehae, huno ha paiʼnigenoʼaeʼmo 21Yesuʼa hunoʼaeʼmo, Ane, huno, geʼnimo alagepa huka afiyo. Mago afinaʼmo afole aisigeʼapaeʼmo mani aveleʼmo muki yaʼmo Afoʼamofeʼmo mono osuge Yulusalemu taonifiʼmo mono osuge hugae. 22#2 Kin 17:29-41; Aiy 2:3; Lo 9:4-5Lapakaemo Sameliya vayaʼmogitapamo ina lafeʼmo mono nehupi huta alagepa hutapa oʼageʼnae. Lagaemo Yu vayaʼmogita ina lafeʼmo mono nehupi huta ago ageʼnone. Yu vayaʼaitegatiʼmo alagepa gemo aino atagu faesigeno Gotiʼa apakufamo alino katino apateteno hapau vaigiye. 23Goti Aunemeʼamoʼmo lama ge mono nehaya vayaʼai apaipafiʼmo aliʼyaʼmo alisigeʼapaeʼmo muki yaʼmo Afoʼamofeʼmo apaipa apakesafatiʼmo mono huteʼa Goti geʼamo lama gelefeʼmo mono hisaya afinaʼmo afole aisiyafeʼmo nehiyaʼmonanafa hemenimo ago afole aiʼniye. Muki yaʼmo Afoʼamoʼmo ani agufa vayaʼmogi agaefeʼmo mono hisaya agufa vayaʼmo kahauya huno apakesiyafeʼmo nehiye. 24#2 Ko 3:17; Lo 12:1; Fl 3:3Gotiʼa aunemeʼe vekamo maiʼniyaʼmofeʼmo agaefeʼmo mono nehaya vayaʼmogi apaipa apakesafatiʼmo mono huteʼa lama gelefeʼmo mono hugae, huno ha paiʼniye. 25#Yo 1:41Ani a kanomoʼa hunoʼaeʼmo, ago afiʼnovana Mesaiya vekamo agiʼamo Kalaisiʼa eminenoʼaeʼmo muki ani agufa gemo laha paigiye, huno ha paiʼnigenoʼaeʼmo, 26#Mk 14:61-62; Yo 9:37Kaha nepaiya vekamo agaemae, huno ha paiʼniye.

27Ani afinaʼmo Yesu geʼamo neʼafiya vayaʼmo aiʼa atagi neʼeʼa ageʼnayana a kanoʼeʼmo kege nehaʼageʼapaeʼmo eʼa anaketeʼapaeʼmo lusi kava huʼa hapau aiʼnae. Hapau aiʼnayaʼmonanafa na agufa yaʼmo alisanafeʼmo nehane, huʼa ge huʼa afi okege na kava higeka ani a kanoʼeʼmo kege nehane, huʼa afi okege huʼnae. 28Eʼa avaʼyi huʼnagenoʼaeʼmo ani a kanomo ani keʼamo ateno atagi nenuno taonifiʼmo maiʼnaya vayaʼaifeʼmo hunoʼaeʼmo, 29mago vekamoʼa muki akeyaʼvilaga huʼnova kavaʼnieʼmo ava gemo huno naha paiʼniyanagi utapa ageyo. Ani vekamo Kalaisi vekamo maiʼnisifi huʼna nagesamo afiʼnove, huno hapa paiʼniye. 30Apakaemo taonifatiʼmo ataleʼa Yesutegamo uʼnae. 31Neʼageʼapaeʼmo geʼamo neʼafiya vayaʼmogi, Tisao, huʼa, neʼyaʼmo alika no, huʼa ha paiʼnagenoʼaeʼmo, 32lapakaemo neʼyaʼnimo haneʼniyana ani neʼyaʼmo alagi oʼageʼnae, huno hapa paiʼniye. 33Apakaiʼapi apakaiʼapimo ge huge afige huʼapaeʼmo, mago vekamoʼmo neʼyaʼmo ago alinineno amiʼnigeno neʼnifi, huʼa huʼnae. 34#Yo 6:38; 17:4Yesuʼa hunoʼaeʼmo, alino nateʼnigeʼna eʼnova vekamoʼmo hauʼniya kavaʼmo huʼna namiʼniya aliʼyaʼnimo aliʼna hano huʼna atesuva aliʼyaʼmo nagaemo neʼyaʼnigana huno haneʼniyaʼmofeʼmae. 35#Lu 10:2Lapakaemo hutapaeʼmo, loleʼe loleʼe kaimo utesigeno neʼyaʼmo legeʼa neʼaliya afinaʼmo haneʼniye, hutapa nehafiye. Muki hoyaʼafiʼmo ageyo. Neʼyaʼmo ago leʼniyanageʼa alisaya afinaʼmo haneʼniye. 36Hoyafatiʼmo neʼyaʼmo neʼaliya vayaʼmogimo miyaʼapimo alige maige maige huʼa maisayafeʼmo neʼyaʼmo alige nehae. Neʼyaʼmo neʼaliyaʼmofeʼmo avina yaʼmo nehakalaya vayaʼe neʼyaʼmo neʼaliya vayaʼeʼmo magokepi apamogaga aigae. 37Vayaʼmogi huʼapaeʼmo, mago vekamoʼmo avina yaʼmo nehakalegeno alu vekamoʼa neʼyaʼmo neʼaliye, huʼa nehae. 38Ani gelefeʼmo nagaemo aliʼyaʼmo oʼaliʼnaya hoyafatiʼmo neʼyaʼmo alisayafeʼmo aliʼna lapateʼnove. Alu vayaʼmogi hoyafiʼmo aliʼyaʼmo aliʼnagetapaeʼmo lapakaemo ani hoyafatiʼmo neʼyaʼmo neʼaliye, huno hapa paiʼniye.

39Ani a kanomoʼa Sameliya taonifiʼmo maiʼnaya vayaʼaifeʼmo hunoʼaeʼmo, agaemo muki akeyaʼvilaga huʼnova kavaʼnieʼmo nava gemo huno naha paiʼniye, huno hapa paiʼniyaʼmofeʼmo asole Sameliya vayaʼmogi Yesufeʼmo apakesamo afiʼa fatago huʼnae. 40Huʼnayaʼmofeʼmo Sameliya vayaʼmogimo agaetegamo uʼa ha paiʼapaeʼmo, kahao ke honanagi eka lagaeʼeʼmo magokepi lokaeka maiyo, huʼa ha paiʼnageno Yesuʼa uno apakaeʼeʼmo lole afinaʼmo magokepi lokaeno maiʼniye. 41A kanomoʼmo hapa paiʼniya geletiʼmo mago vayaʼamo apakesamo afiʼa fatago huʼnayaʼmonanafa Yesuʼa uno hapa paiʼniya geletiʼmo magoʼe huʼa asole vayaʼmogi agaefeʼmo apakesamo afiʼa fatago huʼnae. 42#1 Yo 4:14Apakaemo a kanoeʼmo huʼapaeʼmo, kagaemo laha paiʼnana geletikeʼmo lagesa afita fatago osuʼnonaʼmonanafa agaiʼa avayafatiʼmo laha paiʼniya gemo afitetaeʼmo lagesamo afita fatago nehune. Ma mopafi vayaʼai apakufamo alino katino apateteno hapau neʼvaiya vekamae, huta lagesamo afita fatago nehune, huʼa ha paiʼnae.

Yesuʼa gamani vekamo mafaʼnemo kaita alino hageno ateʼniya gemae

43 # Yo 4:40 Yesuʼa ani koteʼmo lole afinaʼmo maiteno apataleno Galeliya kotegamo uʼniye. 44#Mt 13:57Agaemo hunoʼaeʼmo, Gotitegati gemo alini eʼa aeʼa hakalo huʼa hapa nepaiya vayaʼaifeʼmo koʼapileʼmo maiʼnaya vayaʼmogimo ala apakiʼapimo noʼapamiye, huno hapa paiʼniyaʼmofeʼmo apataleno Galeliya kotegamo uʼniye. 45#Yo 2:23Galeliya kotega maiʼnaya vayaʼmo uʼa Yulusalemu taonifiʼmo hopa afinaʼmo maiʼneʼapaeʼmo ageʼnageno Yesuʼa hopa afinaʼmo muki alu kava alu kavaʼmo huʼnigeʼa ageʼnae. Ageʼnayaʼmofeʼmo koʼaleʼmo uno avaʼyi huʼnigeʼapaeʼmo aliʼa falu fala huʼa ateʼnae. 46#Yo 2:1-11Yesuʼa Galeliya kotegamo uno avaʼyi huteno ani Kena taonifiʼmo mago afinaʼmo anilafatetiʼmo nofi alagafati aniʼmo alino hamaleno ateʼniya taonifiʼmo halate uʼniye. Mago gamani vekamo ani taonifi maiʼnigeno mafaʼneʼamo Kapeneyamu taonifiʼmo maiʼniyana kaita hauʼniye. 47#Mt 8:5-6Yesuʼa Yutiya kotegatiʼmo ago ataleno uno Galeliya kotegamo maiʼniye, huʼa ha paiʼnageno afitenoʼaeʼmo Yesufeʼmo hunoʼaeʼmo, mafaʼneʼnimo falisiyafeʼmo nehigi uka alika hageka ategapiye, huno afi geʼnigenoʼaeʼmo 48#Yo 2:18; 1 Ko 1:22Yesuʼa hunoʼaeʼmo, lapakaemo muki vayaʼmogitapamo noʼagaya naune kavaʼmo hisugetapa oʼagesayana nagaefeʼmo lapakesamo afita fatago osugae, huno ha paiʼnigeno 49gamani vekamoʼmo hunoʼaeʼmo, Ala vekae, huno, mafaʼneʼnimo ago falisiyafeʼmo nehigi nagaeʼeʼmo magokepi egetaʼao, huno ha paiʼnigenoʼaeʼmo, 50#Mt 8:13; Mk 7:29mafaʼnekamo kaita ohauʼnigeno afaʼa maiʼniyanagi uvo, huno ha paiʼnigeno Yesu ha paiʼniya geʼaeʼmo agesamo afino fatago huteno ataleno uʼniye. 51Egaʼamo katega neʼvigeʼapaeʼmo aliʼyaʼamo neʼaliya vayaʼmo neʼageno uno fotu huteʼapaeʼmo, mafaʼnekamo afa maiʼniye, huʼa ha paiʼnageno, 52haiya kanaleʼmo kaitaʼamo hageʼnigeno alagepa huno afaʼa maiʼniye, huno apafi geʼnigeʼapaeʼmo, yegemo uno lamino faleʼnigeno hani hugefeʼmo huʼnigenoʼaeʼmo amuko hauʼniya yaʼamo hageʼnigeno afaʼa alagepa huno maiʼniye, huʼa ha paiʼnae. 53#Ap 16:14-15,31Afoʼamoʼmo hunoʼaeʼmo, Yesuʼa ani kanaleʼmo mafaʼnekamo kaitaʼmo hageʼnigeno afaʼa maiʼniye, huno ha paiʼniya geeʼmo agesa afiteno agaeʼe muki afamo anagaʼamogiʼeʼmo Yesufeʼmo apakesamo afiʼa fatago huʼnae. 54#Yo 2:11,23Yesuʼa Yutiya kotegatiʼmo ataleno Galeliya kotegamo eʼniya afinaʼmo lole afinaʼmo noʼagaya agufa aune kavaʼmo huʼniye.

Currently Selected:

Yoni 4: kyg2013

Highlight

Copy