Yoni 3

Nikonimasiʼa Yesutegamo eʼniya gemae

1 # Yo 7:50; 19:39 Mago vekamo agiʼamo Nikonimasiʼa Yu vayaʼaiteʼmo yagaino neʼapateya vayatama vekamo Falasi mono vayapati vekamo maiʼniye. 2#Mt 22:16; Yo 9:16Agaemo mago haniʼilagamo Yesutegamo eno, Tisao, huno, lagaemo kageʼnonana Gotiʼa alino kateʼnigeka eka alika apaya neʼmalana vekamo maiʼnane. Gotiʼa kaha oʼmaeʼniyesinana noʼagona agufa kaune kavaʼmo afaʼa nosanesine, huno ha paiʼniye. 3#Mt 18:3; 1 Pi 1:23Yesuʼa hunoʼaeʼmo, alagi lama ge kaha nepauve, huno, Gotiʼa halate alino oʼapateʼnisiya vayaʼmogi Gotiʼa haiya kava huno yagaino neʼapatefi huʼa afaʼa ageʼa aeto osugae, huno ha paiʼnigenoʼaeʼmo, 4haiya kava huno alopa vekamo halate alino atesigeno saufa vekamo hamalegaiye. Mago vekamoʼmo itaʼamo aipafiʼmo halate uno haisigeno alino atesifiye, huno afi geʼnigenoʼaeʼmo, 5#Iyi 36:25-27; Ta 3:5alagi lama gemo kaha nepauve, huno, anitetiʼe Aunemeʼaletiʼeʼmo alino oʼapateʼnisiya vayaʼmo Gotiʼa yagaino neʼapateya kegiʼyafiʼmo afaʼa uʼa ohaigae. 6#Sam 51:5; Yo 1:13Atafa apaipamo haneʼniya vayaʼmogi atafa apaipaʼe vayaʼmo aliʼa neʼapatae. Goti Aunemeʼamoʼmo saufa apaipaʼe vayaʼmo alino neʼapate. 7Halate alino lapateno, huʼna kaha nepauva geeʼmo afika kahau oʼaiyo. 8#Afi 11:5Yasimoʼmo hauʼnisiya kotegamo alinino ugefeʼmo nehisiyana afaʼa alinino ugiye. Yasimoʼmo age aigekaeʼmo ageʼageʼmo neʼafinaʼmonanafa haiyategatiʼmo alinino neʼefi haiyategamo alinino neʼvifi hutapa noʼagae. Ina kava huno Goti Aunemeʼamoʼmo alino neʼapategeʼa neʼmaiye, huno ha paiʼniye. 9Nikonimasiʼa hunoʼaeʼmo, haiya kava huno afole neʼaiye, huno afi geʼnigenoʼaeʼmo, 10Ala vekamo maiʼneka Isaleli vayaʼmo alika apaya neʼmalana vekamo maiʼnanaʼmonanafa ani kavafeʼmo oʼafiʼnapiye. 11#Yo 3:32; 8:26Alagi lama gemo kaha nepauve, huno, afiʼnoʼa gemo lapa paitetaʼa ageʼnoʼa kavafeʼmo aetaʼa hakalo hutaʼa lapa nepauʼaʼmonanafa getiʼamo noʼafiye. 12#Lu 22:67Nagaemo ma mopafi kavafeʼmo kaha paiʼnogekaeʼmo kagesamo afika fatago osuʼnanaʼmonanafa kokuʼnapi kavafeʼmo ava gemo huʼna kaha paisuvana haiya kava huka kagesamo afika fatago hugane. 13#Mai 30:4; Lo 10:6Mago vekamoʼmo kokuʼnapi kavaʼmo uno haino oʼageʼniyaʼmonanafa Vemo Mafaʼnemo kokuʼnapatiʼmo emineʼniya vekamogeno hemeniʼeʼmo kokuʼnapiʼmo maiʼniye. 14#Nap 21:9; Yo 8:28; 12:32Moseseʼa kaʼme kotegamo nagaloʼyavemo auneʼamo yosaleʼmo alino maleno nofi kiteno alino he tino ateʼniya agufa kavaʼmo huʼa Vemo Mafaʼnemo aliʼa he tiʼa ategae. 15#Yo 20:31Ina lagimo agaefeʼmo apakesamo afiʼa fatago nehisafigeʼa alagi ofaliʼa alagepa huʼa maige maige huʼa maisayafeʼmo aliʼa he tiʼa ategae. 16#Yo 3:36; 10:28; Lo 5:8; 8:32; 1 Yo 4:9-10Gotiʼa ma mopafi vayaʼaifeʼmo lusi kava huno hau ayamopafiʼmo hauʼniyaʼmofeʼmo ani aiya magoke mafaʼneʼamo avaleno apamiʼniye. Ina lagimo mafaʼneʼaeʼmo apakesamo afiʼa fatago nehisafigeʼa alagi ofaliʼa alagepa huʼa maige maige huʼa maisayafeʼmo avaleno apamiʼniye. 17#Lu 19:10; Yo 5:22; 12:47; Ap 17:31Gotiʼa ma mopafi vayaʼmo agoti huno apatetenoʼaeʼmo, hosu kavaʼmo huʼnae, huno hisiyafeʼmo mafaʼneʼamo alino ateʼnigeno emiʼnoʼmeʼnifa apakufamo alino katino apateteno hapau vaisiyafeʼmo alino ateʼnigeno emineʼniye. 18#Yo 3:36; 5:24Goti Mafaʼneʼaeʼmo apakesa afiʼa fatago nehaya vayaʼmo agoti huno apatetenoʼaeʼmo, hosu vayaʼmo maiʼnae, huno nosiyaʼmonanafa apakesamo afiʼa fatago nosaya vayaʼmo ago agoti huno apatetenoʼaeʼmo, hosu vayaʼmo maiʼnae, huno huʼniye. Apakesamo afiʼa fatago osuʼnayaʼmofeʼmae. 19#Yo 1:5,9; 8:12Gotiʼa agoti huno apatetenoʼaeʼmo, hosu vayaʼmo maiʼnae, huno huʼniya gemo aepaʼamo haneʼniyana ha le yaʼamo ma mopafiʼmo ago afole aiʼniyaʼmonanafa vayaʼmogi ha le yafeʼmo apaini huʼa hani yafekeʼmo hapauʼniye. Hosu kavakeʼmo nehayaʼmofeʼmae. 20#Ef 5:11-13Hosu kavaʼmo nehaya vayaʼmogimo ha le yafeʼmo alagi ohapauʼnigeʼapaeʼmo hosu kavaʼapimo afole oʼaisiyafeʼmo ha le yategamo alagi noʼmae. 21Noʼmayaʼmonanafa lama gemo akame nehaya vayaʼmogi Goti geʼamo neʼafiya kavaʼmo afole aisiyafeʼmo ha le yategamo neʼae.

Yoniʼa Yesu agiʼaleʼmo alino asaga huno ateʼniya gemae

22 # Yo 4:1-2 Ani gemo hutegeʼapaeʼmo Yesuʼe geʼamo neʼafiya vayaʼeʼmo Yutiya kotegamo uʼa maiʼneʼapaeʼmo Yesuʼa muki afinaʼaeʼmo apakaeʼeʼmo magokepi lokaeno maiʼneno mago vayaʼmo aniʼmo faleno apateʼniye. 23Inoni kotega Selemi koteʼmo asole aniʼmo haneʼniyaʼmofeʼmo Yoniʼa ani kotegamo aniʼmo faleno apateʼniye. Mago vayaʼmo agaetegamo eʼnageno aniʼmo faleno apateʼniye. 24#Mt 4:12Ani afinaʼmo Helotiʼa Yoniʼmo kalavusi huno oʼateʼnigeno afaʼa maiʼniya afinaʼmae. 25Yoni geʼamo neʼafiya vayaʼe Yu nofi vayaʼeʼmo aniʼmo faleʼa neʼapataya kavafeʼmo ge vaiʼnae. 26#Yo 1:26-34Ge vaiteʼa Yonitegamo uʼapaeʼmo, Tisao, huʼa mugagayaga faliga kagaeʼeʼmo lokaeno maiʼniya vekamo ava gemo huʼnana vekalegamo muki vayaʼmo uʼnageno aniʼmo faleno neʼapate, huʼa ha paiʼnageno 27#Yo 19:11; 1 Ko 4:7; Hi 5:4Yoniʼa hunoʼaeʼmo, Gotiʼa mago vekamo agiʼaleʼmo alino asaga huno oʼateʼnisiyana ala agiʼamo oʼaligiye. 28#Yo 1:20,23; Mt 11:10Hogoteʼna Mesaiya vekamo oʼmaiʼnovaʼmonanafa alino nateʼnigeʼna hogoteʼna eʼnove, huʼna lapa paiʼnova gemo ago afiʼnae. 29#Mt 9:15Aʼmo aligesuve, huno huʼniya vekamoʼmo alisiya a kanomo agaiʼa aʼmae. Aʼmo aliguve, huno huʼniya vekamo ao vekamo eno magokepi lokaeno he tino maiʼnigeno aʼmo aliguve, huno huʼniya vekamoʼa amogaga aino ge higeno afitenoʼaeʼmo amogaga neʼaiye. Ani kava huno aʼmo neʼaligeʼnaeʼmo namogaga neʼauva kavaʼmo alagi haeʼmae. 30Agiʼamoʼmo anagamo kosime kosime uno nehaisigeno nagiʼnimoʼmo aise aise hume hume afelaga uno lamigiye. 31#Yo 8:23; 1 Yo 4:5Anagatiʼmo emineʼniya vekamoʼa muki vayaʼamo ago aeno apakaseʼniye. Ma mopafatiʼmo afole neʼaiya vayaʼmo ma mopafi vayaʼmo maiʼneʼapaeʼmo ma mopafi kavafeʼmo ava gemo nehageno kokuʼnapatiʼmo emineʼniya vekamoʼa aeno apakaseʼniye. 32#Yo 3:11Agaemo afiteno ageʼniya kavafeʼmo hapa nepaigeʼapaeʼmo muki vayaʼmogi ani gemo noʼafiyaʼmonanafa 33geʼamo neʼafiya vayaʼamogigeʼmo huʼapaeʼmo, Gotiʼa lama gemo nehiye, huʼa huʼnae. 34#Yo 1:32Gotiʼa alino ateʼnigeno eʼniya vekamoʼa Goti geʼamo hapa nepaiye. Gotiʼa Aunemeʼamo alino fako huno magoʼamo maleteno oʼamiʼnifa mukiʼamo alagi amiʼniyaʼmofeʼmo Goti geʼamo aeno hakalo huno hapa nepaiye. 35#Mt 11:27; Yo 5:20; 10:17Muki yaʼmo Afoʼamoʼmo mafaʼneʼaeʼmo hau ayamopafiʼmo hauʼnigenoʼaeʼmo muki yateʼe vayaʼaiteʼeʼmo yagaino apatesiya himamuʼamo amiʼniye. 36#Yo 3:16-18; 1 Yo 5:12; Lu 3:7Muki vayaʼamogi Mafaʼneʼaeʼmo apakesamo afiʼa fatago nehisaya vayaʼmogimo alagepa huʼa maige maige huʼa maisaya yaʼmo ago aliʼnae. Muki vayaʼmogimo Mafaʼneʼamo geʼamo akame nosisaya vayaʼmo Gotiʼa aipamo leno neʼapateya kavaʼamo apakaeteʼmo alagi hanege hanege huno hanegaiyaʼmofeʼmo alagi alagepa huʼa maige maige huʼa oʼmaigae.

Currently Selected:

Yoni 3: kyg2013

Highlight

Copy