PHILIPPIANS 3
3
Ts'ídá t'áá ákwii é'ét'é t'áá aaníinii
1Shik'isóó, akée'di díí bee nihich'į' hadeesdzih, Bóhólníihii bee nihił dahózhǫ́ǫ le'. Díí bee nihich'į' ak'ená'áshchíihgo doo ádadeeshłxáa da, áádóó éí bee nihá hasih.
2Bąąhági át'éego nidaalnishígíí bits'ąą ádaa ádahołyą́, éí łééchąą'í báhádzidii nidahalin. Éí, Nihąąh nídahinólgish, daanínígíí t'áadoo bá bida'oł'íní. 3Háálá ąąh náhinilgish doo bee Diyin God bich'į' nidahwiidláa da, nidi Níłch'i Diyinii bee bich'į' nidahwiidlá, áádóó Christ Jesus baa nihił dahózhǫ́ǫgo baa dahwii'niih. Ts'ísee k'ehgo ádaat'éii doo baa dadzííníidlíi da, 4azhą́ shí ałdó' biniit'aa ats'íís baa jóshłíi dooleełii shee hólǫ́ǫ nidi. Diné t'áá háiida ts'ísee k'ehgo ádaat'éii bee ádaa jóshdlíii shee hólǫ́ jinízingo, shí haláahgo bee ádaa jííníshdlíii shee hólǫ́ǫgo át'é. 5Háálá shi'dizhchį́į́dóó tseebíí jį́į́ góne' shąąh náhineeshgizh, áádóó Ízrel dine'é ahoolchíiłii nishłį́, Bénjamin bidine'íígíí#Rom. 11:1. nishłį́, índa dashizhé'é yę́ę Hííbrew dine'é danilį́į́ nít'éé', áko shí ałdó' Hííbrew dine'é nishłį́. Jew dine'é bibee haz'áanii k'ehgo ts'ídá t'áá ákogi é'ét'é bił haz'ą́ą́jí éí Férisii#Acts 23:6; 26:5. nishłį́į́ nít'éé', 6díí t'áá íiyisí bíneeshdlį́įgo Jesus yoodlání áłah nídaadleehii atésh'į́į́ nít'éé'.#Acts 8:3; 22:4; 26:9-11. Bee haz'áanii k'ehgo ts'ídá t'áá ákogi é'ét'é bił haz'ą́ą́jí éí doo shik'i hodiit'ą́ą da. 7Nidi Christ yisisdląądgo éí t'áá ałtso yá'ádaat'ééh nisin nít'éé' yę́ę k'ad t'áadoo biniyéhígóó ádaat'éego baa nitséskees. 8Aoo', t'áá aaníí, áádóó Christ Jesus shiBóhólníihii bééhasinígíí ts'ídá agháago ílį́įgo bąą t'áá ałtsoní t'áadoo biniyéhígóó ádaat'éego baa nitséskees. Christ shí dooleeł biniyé t'áá ałtsoní nahjį' kóshłaago t'áá ałtsoní ts'iilzéigi át'éego baa nitséskees, 9áádóó Christ bił łá'í nishłį́įgo shééhodi'doolzįįł, bee haz'áanii ba'ahódlí bee t'áá shí ts'ídá t'áá ákogi ánísht'éé nít'éé' yę́ę éí doo bik'ehdii da, nidi Christ yinishdlánígíí t'éiyá bee ts'ídá t'áá ákogi ánísht'éego shééhodi'doolzįįł; éí Diyin God bits'ą́ą́dę́ę́' ts'ídá t'áá ákogi é'ét'é oodlą́ bee a'ódlí bee hólóonii ááhdishní. 10Christ íiyisí bééhasin doogi laanaa nisin, áádóó hadziil nilíinii bee dadziztsą́ą́dę́ę́' náázdiidzáhígíí t'áádóo nídí shił bééhózin doo, áádóó bik'ee ti'hodzooznii'ígíí hoł ałts'ą́ą́' anisk'iiz doo, dadziztsą́ągo ájít'é yę́ęgi át'éego ánísht'ée doo, 11ts'ídá shá bohónéedzą́ągo daneeznáanii bitahdę́ę́' náádideeshdáłígíí laanaa nisin.
Nihonít'i'jį' t'ááłáhígi át'éego hoodzo bich'į' yishwoł
12T'áá íídą́ą́' ákónísht'é, áádóó t'áá íídą́ą́' ts'ídá hadaałt'éii sélį́į́', doo dishníigo ádíshníi da. Nidi ákónísht'ée doo biniyé Christ bíí' áshiilaago t'ááłáhígi át'éego naasdzil. 13Shik'isóó, shí nidi éí díí ch'ídasé'ánígíí t'ah doo shee haleehgóó shił bééhózin, nidi shikéédę́ę́' danilíinii baa yisénah áádóó shilą́ąjį' hólónígíí t'éiyá t'áá íináwołí bee bíká yisdziłgo t'ááłáhígo haz'ánígíí t'éiyá baa naashá. 14Aghánáhóó'áádę́ę́' Diyin God éí Christ Jesus bee shíizhi'ígíí hodínéeshnééł biniyé t'áá shizááká nihoneel'ą́ąjį' yishwoł. 15Áko haa'íshą' Níłch'i Diyinii k'ehgo nidaniniilzánígíí t'áá áníiltso t'áá ákót'éego nitsídeiikees doo, nidi ha'át'íhígíida t'áá ał'ąą át'éego baa nitsídaahkeesgo, éí ałdó' Diyin God nihił ííshjání íidoolííł. 16Áyąądą́ą́' náás deekaígíí t'áá éí bik'ehgo náás yiikah doo.
17Shik'isóó, t'ááłá'í nootínígo shida'oł'į́,#1Cor. 4:16; 11:1. áádóó nihí bik'eh oodáałii nihá nihee hólónígíí éí yik'ehgo dayíkáhígíí hazhó'ó baa ákodanoosįįh. 18Háálá tsin ałnáoszid bąąhjį' Christ daaztsą́ągo baa hane'ígíí yi'ana'í danilíinii t'óó ahayóí deíkááh, éí t'áá ahą́ą́h bee nihił náháshnih nít'éé', áádóó k'ad nidi shinák'eeshto' náálį́įgo bee nihił nááháshne'. 19Éí há nidahwiizt'i'di ádahodi'dooldįįł, háálá ch'iyáán t'éí bíchą́deízhdéelni'go hodiyin ádadzósin, áádóó hoł baa yádahasin dooleeł yę́ę t'óó bee ádaa dahoji'niih, nahasdzáán bikáa'gi dahólóonii t'éiyá baa nitsídadzikees. 20Nidi nihí yá'ąąsh dine'é daniidlį́, áko áádę́ę́' Yisdá'iiníiłii, Bóhólníihii Jesus Christ, t'áá íiyisí nideíníidlíigo biba' ádaniit'é. 21Éí bibee adziilii bee t'áá ałtsoní nidi bídahółníihgo íidoolíiłgo yíneel'ą́, éí nihits'íís doo dahayóígíí t'áá bí bits'íís ayóó át'éhígi át'éego nihá ánéidoodlííł.
Currently Selected:
PHILIPPIANS 3: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
