NUMBERS 29
29
1Áádóó tsosts'id nídízídígíí binih ła'a jį́į́ góne' dahodíínóhsingo áłah náhdleeh doo, índa doo nidaołnish da doo. Éí bijį́ dilní bee na'a'né nihá néiit'aah doo. 2Áko nááda'ayołniihgo didlidgo nááhániihii Bóhólníihii bich'į' łikání halchingo náádahidoołnihígíí éí dóola yázhí t'ááłá'ígo, deenásts'aa' t'ááłá'ígo índa dibé yázhí dabiką'ii tsosts'idgo ła' béédááhaii hadaałt'éii, 3áádóó ak'áán nááhániihii át'éego ómer bee í'neel'ąąhí bee ak'áán táadi haaką́ągo ak'ah bił ałtahgo dóola yázhí bóóltą'go, ak'áán naakidi haaką́ągo deenásts'aa' bóóltą'go, 4índa ak'áán t'ááłáhídi hahakaahgo dibé yázhí tsosts'idígíí bik'eh nítį́įgo bił náádahołniih doo, 5áádóó tł'ízíchǫǫh t'ááłá'ígo éí ádił ni'iidzííhjí nááhániihii át'éego éí bee nihá k'ééhoodǫǫł doo. 6Díí éí dah néitį́įhgo didlidgo nááhániihii índa ak'áán nááhániihii bóóltą'go áádóó t'áá ákwíí jį́ didlidgo nááhániihii éí ak'áán nááhániihii áádóó yanáadzi'go nááhániihii bił ahóóltą'go áda'ał'ínígíí bik'ehgo Bóhólníihii bich'į' didlidgo łikání halchingo náádahołniih doo.
7Áádóó tsosts'id nídízídígíí binih neeznáá jį́į́ góne' dahodíínóhsingo áłah náhdleeh, áádóó doo adą́ą́góó nihii' naazíinii dahodísingo sohodizin áń'daał'įįh doo,#Lev. 16:29-34. índa ákóne' t'áá ha'át'éegoda doo nidoołnish da. 8Nidi nááda'ayołniihgo didlidgo nááhániihii Bóhólníihii bich'į' didlidgo łikání halchingo náádahidoołnihii éí náádahołniih dooígíí, éí dóola yázhí t'ááłá'ígo, deenásts'aa' t'ááłá'ígo índa dibé yázhí tsosts'idgo dabiką'ii ła' béédááhaii hadaałt'éii, 9áádóó ak'áán nááhániihii át'éego ómer bee í'neel'ąąhí bee ak'áán táadi haaką́ągo ak'ah bił ałtahgo dóola yázhí bóóltą'go, ak'áán naakidi haaką́ągo deenásts'aa' bóóltą'go, 10índa ak'áán t'ááłáhídi hahakaahgo dibé yázhí tsosts'idígíí bik'eh nítį́įgo bił náádahołniih doo, 11áko tł'ízíchǫǫh t'ááłá'ígo ádił ni'iidzííhjí nááhániihii át'éego áádóó ałdó' ádił ni'iidzííhjí nááhániihii#Num. 15:24,25. bee á k'ééhoodǫǫłii ła' ínáánáoltą'go áádóó náá'áłdó' áłahjį' didlidgo nááhániihii, éí ak'áán nááhániihii áádóó yanáadzi'go nááhániihii bił ahóóltą'go náádahołniih doo.
12Tsosts'id nídízídígíí binih ashdla'áadah jį́į́ góne' dahodíínóhsingo áłah náhdleehgo, ákóne' ts'ídá doo nidoołnish da, áko Bóhólníihii bich'į' tsosts'id jį́ dahodíínóhsingo áłah náhdleeh doo.#Ex. 23:16; 34:22; Deut. 16:13-15. 13Áko didlidgo nááhániihii át'éego éí dóola yázhí táá'ts'áadahgo, deenásts'aa' naakigo, dibé yázhí dį́į́'ts'áadahgo dabiką'ii ła' béédááhaii hadaałt'éii, díí Bóhólníihii bich'į' didlidgo łikání halchingo náádahołniih doo. 14Áádóó ak'áán nááhániihii át'éego ómer bee í'neel'ąąhí bee ak'áán táadi haaką́ągo ak'ah bił ałtahgo dóola yázhí táá'ts'áadahígíí bik'eh nítį́įgo áádóó naakidi haaką́ągo deenásts'aa' ła' bóóltą'go bił náádahołniih doo, 15índa ak'áán t'ááłáhídi hahakaahgo dibé yázhí dį́į́'ts'áadahígíí bik'eh nítį́įgo bił náádahołniih doo, 16áádóó tł'ízíchǫǫh t'ááłá'ígo ádił ni'iidzííhjí nááhániihii át'éego áłahjį' didlidgo nááhániihii éí ak'áán nááhániihii áádóó yanáadzi'go nááhániihii bił ahóóltą'go náádahołniih doo.
17Naaki yiłkaah bijį́ dóola yázhí naakits'áadahgo, deenásts'aa' naakigo índa dibé yázhí dį́į́'ts'áadahgo dabiką'ii ła' béédááhaii hadaałt'éii náádahołniih doo, 18áádóó ak'áán nááhániihii índa yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí índa áda'ał'ínígíí bik'ehgo bił náádahołniih doo, 19índa tł'ízíchǫǫh t'ááłá'ígo éí ádił ni'iidzííhjí nááhániihii át'éego, éí áłahjį' didlidgo nááhániihii áádóó ak'áán nááhániihii índa yanáadzi'go nááhániihii bił ahóóltą'go náádahołniih doo.
20Áádóó táá' yiłkaah bijį́ dóola yázhí ła'ts'áadahgo, deenásts'aa' naakigo índa dibé yázhí dį́į́'ts'áadahgo dabiką'ii ła' béédááhaii hadaałt'éii náádahołniih doo, 21áádóó ak'áán nááhániihii índa yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí áádóó áda'ał'ínígíí bik'ehgo bił náádahołniih doo, 22áádóó tł'ízíchǫǫh t'ááłá'ígo éí ádił ni'iidzííhjí nááhániihii át'éego áłahjį' didlidgo nááhániihii áádóó ak'áán nááhániihii índa yanáadzi'go nááhániihii óóltą'go náádahołniih doo.
23Índa dį́į́' yiłkaah bijį́ dóola yázhí neeznáá, deenásts'aa' naaki índa dibé yázhí dį́į́'ts'áadahgo dabiką'ii ła' béédááhaii hadaałt'éii náádahołniih doo, 24áádóó ak'áán nááhániihii áádóó yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí áádóó áda'ał'ínígíí bik'ehgo bił náádahołniih doo, 25áádóó tł'ízíchǫǫh t'ááłá'ígo ádił ni'iidzííhjí nááhániihii át'éego áłahjį' didlidgo nááhániihii áádóó ak'áán nááhániihii índa yanáadzi'go nááhániihii óóltą'go náádahołniih doo.
26Índa ashdla' yiłkaah bijį́ dóola yázhí náhást'éigo, deenásts'aa' naakigo índa dibé yázhí dį́į́'ts'áadahgo dabiką'ii ła' béédááhaii hadaałt'éii náádahołniih doo, 27áádóó ak'áán nááhániihii áádóó yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí áádóó áda'ał'ínígíí bik'ehgo bił náádahołniih doo, 28áádóó tł'ízíchǫǫh t'ááłá'ígo ádił ni'iidzííhjí nááhániihii át'éego áłahjį' didlidgo nááhániihii áádóó ak'áán nááhániihii índa yanáadzi'go nááhániihii óóltą'go náádahołniih doo.
29Índa hastą́ą́h yiłkaah bijį́ dóola yázhí tseebíigo, deenásts'aa' naakigo índa dibé yázhí dį́į́'ts'áadahgo dabiką'ii ła' béédááhaii hadaałt'éii náádahołniih doo, 30áádóó ak'áán nááhániihii áádóó yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí áádóó áda'ał'ínígíí bik'ehgo bił náádahołniih doo, 31áádóó tł'ízíchǫǫh t'ááłá'ígo éí ádił ni'iidzííhjí nááhániihii át'éego áłahjį' didlidgo nááhániihii áádóó ak'áán nááhániihii índa yanáadzi'go nááhániihii óóltą'go náádahołniih doo.
32Tsosts'id yiłkaah bijį́ dóola yázhí tsosts'idgo, deenásts'aa' naakigo índa dibé yázhí dį́į́'ts'áadahgo dabiką'ii ła' béédááhaii hadaałt'éii náádahołniih doo, 33éí ak'áán nááhániihii áádóó yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí áádóó áda'ał'ínígíí bik'ehgo bił náádahołniih doo, 34áádóó tł'ízíchǫǫh t'ááłá'ígo ádił ni'iidzííhjí nááhániihii át'éego áłahjį' didlidgo nááhániihii áádóó ak'áán nááhániihii índa yanáadzi'go nááhániihii óóltą'go náádahołniih doo.
35Tseebíí yiłkaah bijį́į́ góne' dahodíínóhsingo áłah náhdleeh; ákóne' doo nidoołnish da, 36nidi nááda'ayołniihgo didlidgo nááhániihii, éí náádahidoonihii didlidgo łikání halchingo Bóhólníihii bich'į' náádahołniih dooígíí dóola yázhí t'ááłá'ígo, deenásts'aa' t'ááłá'ígo índa dibé yázhí tsosts'idgo dabiką'ii ła' béédááhaii hadaałt'éii, 37áádóó ak'áán nááhániihii áádóó yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí áádóó áda'ał'ínígíí bik'ehgo bił náádahołniih doo, 38áádóó tł'ízíchǫǫh t'ááłá'ígo ádił ni'iidzííhjí nááhániihii át'éego áłahjį' didlidgo nááhániihii áádóó ak'áán nááhániihii índa yanáadzi'go nááhániihii óóltą'go náádahołniih doo.
39Díí éí dahodíínóhsingo áłah náhdleeh bee nidahoot'aah góne' Bóhólníihii bich'į' náádahołniih dooleeł, éí ádee haohdzíi'go nááhidoołnihii áádóó t'áá nihí ádeinohsingo nááhidoołnihii áádóó didlidgo nááhidoołnihii áádóó ak'áán nááhidoołnihii áádóó yanáadzi'go nááhidoołnihii índa hózhǫ́ǫ́jí nááhidoołnihii óóltą'go náádahołniih doo.
40Áko Mózes éí Ízrel dine'é bił hojilne'go Bóhólníihii yee áhodííniidígíí t'áá át'é baa hojoolne'.
Currently Selected:
NUMBERS 29: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
