NUMBERS 21
21
Kéínan dine'é éí Ízrel dine'é yik'iijéé'
1Nít'éé' Kéínandóó aláahgo naat'áanii Éírad wolyéii Kéínan nahós'a'gi shádi'áahjigo kééhat'į́. Ízrel dine'é éí naalchi'í yíkai yę́ędę́ę́' yinéełgo yaa hodiizts'ą́ą́'.#Num. 33:40. Áko Ízrel dine'é yich'į' nídiibaa'go ła' deisná. 2Áko Ízrel dine'é ádee hadaasdzíi'go Bóhólníihii yich'į' ádee hadaasdzí'ígíí ádaaní, Díí dine'é t'áá aaníí nihílák'ee dííní'ą́ągo bikin hadaas'áii ts'ídá ałtso atídadiilnííł. 3Áádóó Bóhólníihii éí Ízrel dine'é yidiizts'ą́ą'go Kéínan dine'é hálák'ee yidíí'ą́ągo bikin hadaas'áii t'áá bił ts'ídá ałtso ádadzisdįįd, áko éí nahós'a'gi Hórmah hoolyée doo, jidííniid.#21:3 Hórmah jiníigo Hííbrew k'ehjígo ałtso íísdįįd jiníigo óolyé.
Tł'iish báádahadzidii
4Áko Dził Hordóó dah náázhdii'náago Íídam kéyah bik'ee'ąą ahéézhdoo'nééł biniyé#Deut. 2:1. Tónteel Łichíí' bíighahjígo ch'ízhníná, áko diné yinéłígíí doo asht'é'égóó bąąh nidahwiizkaad. 5Ákohgo diné éí Diyin God áádóó Mózes yik'ijį' hadahadziihgo ádaaní, Ha'át'éegoshą' honoojíigi danii'née dooleeł biniyé Ííjip kéyahdę́ę́' ch'ínihííní'eezh? Jó, kwe'é bááh ádin, tó nidi ádin áádóó díí mána yilzhólíii deidą́ągo doo binádadiidzįįd da. 6Nít'éé' Bóhólníihii éí tł'iish báádahadzidii diné yitahjį' yi'níłnii'go diné ahidayiishxazh, áko Ízrel dine'é t'óó ahayóí daneezná.#1Cor. 10:9. 7Áádóó diné éí Mózes yaa yíkaigo ádaaní, Ádił da'siilziihéi; Bóhólníihii bik'ijį' áádóó ni nik'ijį' hadahaadzíí' lá; Bóhólníihii nihá néinikąąh, áko díí tł'iish nihits'ą́ąjį' yéé'doołnih. Ákohgo Mózes éí diné yá sodoolzin. 8Áko Bóhólníihii éí Mózes ííłní, Tł'iish bááhádzidii béé'díídlíiłgo tsin adíítsihgo bąąh dah hididííłt'eeł, áko tł'iish ahidahwiishxazhígíí t'áá ádzíłtso éí tł'iish béé'ályaago dah hidiilt'e'ígíí bik'i dadzizghalii éí dajiináa doo. 9Áádóó Mózes éí béésh łitsoii bee tł' iish béé'jiidlaago tsin adzíítsigo bąąh dah dzistį́;#2Kgs. 18:4; Jn. 3:14. diné t'áá háiida tł'iish bishxashii éí tł'iish dah hidiilt'e'ígíí yik'i níghalii éí hináa doo.
Ízrel dine'é éí Mó'ab yik'ee'ąą ahéná'ná
10Ízrel dine'é dah náádii'náago Óbathgi ninááná'ná. 11Áádóó Óbathdóó náás náádeesnáago Áíjii-ábarim honoojíigi Mó'ab kéyah binaashiijí háá'át'ááhjígo ninááná'ná. 12Éí áádóó dah náádii'náago Zííred yíldzisgi níbaal nináádeisnil. 13Kodóó dah náádii'náago éí Árnan tooh nílínígíí wónaaníjígo éí Ámor dine'é bikéyah bibąąhdę́ę́' honoojíidi ninááná'ná, háálá Árnan tooh nílínígíí éí Mó'ab dine'é bikéyah áádóó Ámor dine'é bikéyah bita'dę́ę́' ch'ínílį́įgo bee hoodzo. 14Éí bąą Bóhólníihii ninábah yę́ę bee naaltsoos si'ánígíí biyi' góne' áhá'ní,
Tónteel Łichíi'gi áádóó Árnan tooh nílínígi naazbaa';
15éí Ar kin shijaa' bich'į'go taah daasdzisígóó, éí Mó'ab dine'é bikéyah hoodzo bibąąhgóó naazbaa', ha'ní.
16Kodóó Ízrel dine'é éí Bíyergóó dah náádii'ná; ákwe'é Bóhólníihii éí Mózes yich'į' tó hahadleeh dooleełígíí yaa yáłti'go ání, Diné áłah ánílééh, áko tó baa dideesh'ááł. 17Áko Ízrel dine'é díí sin yee dahóótáál,
Tó hahadleeh nílíinii, tó haninééh!
Tó bich'į' dahohtaał;
18naat'áanii danilíinii tó yíká ida'iizgeed; diné binanit'a'í danilíinii bigish yee tó yíká nida'azgeed.
Áko honoojíídóó Mátanah hoolyéégóó Ízrel dine'é dah náádii'ná; 19Mátanah hoolyéédóó Nahéíliyel hoolyéejį' nááná'ná, índa Nahéíliyel hoolyéédóó Béímath hoolyéejį' nááná'ná. 20Béímath hoolyéédóó Mó'ab kéyahgi Dził Pízgah bighą́ą'di yíldzisjį' nááná'ná, Dził Pízgah hoolyéédóó Jiisháíman honoojíí góyaa ayoot'į́į́'.
Ízrel dine'é éí Sáíhan yik'eh dadeesdlį́į́'
(Deut. 2:26-37)
21Áko Ízrel dine'é éí Ámor dine'é aláahgo binanit'a'í Sáíhan wolyéii yich'į' ada'as'a'go ádaaní, 22Nihíni'dii nikéyah góne' ch'ídii'nééł; nidá'ák'eh, doodaii' nich'il na'atł'o'ii bitah góne' éí doo adii'néeł da, áádóó nitóhadahadleehgi nidi nito' doo nits'ą́ą́' dadiidlį́įł da; aláahgo naat'áanii be'atiingóó hadidii'néełgo nił hahoodzooígíí ałtso bii' hadidiikah. 23Áko Sáíhan bikéyah bił hahoodzo góne' Ízrel dine'é hadidoonéłígíí t'áadoo yadi'ní'ą́ą da, nidi Sáíhan bidine'é t'áá ałtso áłah áyiilaago honoojíígóó Ízrel dine'é yich'į' nídiibaa'; Jéíhazjį' aní'eezhgo Ízrel dine'é yił da'ahoogą́ą́'. 24Ákohgo Ízrel dine'é éí diltłish yee ałtso nidahastseed; Sáíhan bidine'é Árnan tooh nílínídóó Jábak tooh nílíníjį' t'áá Áman dine'é bihoodzooíjį' bikéyah yę́ę hóó' daazlį́į́', háálá Áman dine'é bikéyah bidziilgo bich'ą́ą́h hoodzo. 25Áko Ízrel dine'é díí kin hadaas'á t'áá át'é deisnáago Ámor dine'é bikin hadaas'áá nít'éé' yę́ęgóó t'áá át'é Ízrel dine'é kéédahat'į́; Héshban kin haal'áhígi áádóó binaagóó t'áá át'é kin dah naazhjaa'ígóó kéédahat'į́. 26Jó, Héshban kin haal'áii éí Ámor dine'é aláahgo binanit'a'í Sáíhan wolyéii bikin haal'áá nít' éé'; bí átséédą́ą́' Mó'ab dine'é aláahgo binanit'a'í yił ahóbáahgo hakéyah t'áá át'é Árnan tooh nílíníjį' ałtso haghaiideet'ą́. 27Éí bąą saad bee hódzą́ yee yádaałti'ígíí ádaaní,
Hágo Héshban kin haal'áajį' dadohkááh,
háni'dii Sáíhan bikin haal'á ánáhódle'go bidziil le';
28jó, Héshban kin haal'áádę́ę'go hodiiltłah;
Sáíhan bikin haal'áádę́ę́' kǫ' doonał;
éí Mó'ab kéyahgi Ar kin shijaa'ídi índa Árnan tooh nílínígi dah daask'id bighą́ą'di ádaalyaii bee hódahólníhígíí ahodiisk'ą́ą́'.
29Mó'ab dine'é noh łíinii, doo hojooba' ájíníi da!
Kíímash yich'į' nahałáhí nohłíinii, dooládó' hojooba' ánihi'diilyaa da;
biye'ké nidabidi'nilchée doogo ninéidiní'ą́ índa bitsi'ké yisnááh dadooleełgo Ámor dine'é aláahgo binanit'a'í Sáíhan wolyéii yich'į' ninéidiní'ą́.#Jer. 48:45,46.
30Naa'abídadziyeelt'ohgo bik'eh dadeedlį́į́'; Héshban kin haal'áádóó Dáíban kin haal'áajį' ałtso ádahosiildįįd, áádóó Nófah kin haal'áajį' éí Médiiba kin haal'áii bíighahjį' t'áá át'é doo siláhígóó ádeiilyaa.
Ízrel dine'é éí Béíshan kéyahdóó Ag wolyéii yik'eh dadeesdlį́į́'
(Deut. 3:1-11)
31Kót'éego Ámor dine'é bikéyahgi Ízrel dine'é kééhat'į́į́ nít'éé'. 32Áádóó Mózes éí Jéízer kin haal'áii hadoolziłgo ákǫ́ǫ́ i'jííł'a', áko kin dah naazhjaa'ígíí deisná; ákwii Ámor dine'é kéédahat'ínígíí ch' ídeineeskaad. 33Áádóó dah náádiikaigo Béíshan kéyah bich'į' atiingóó yíkai, áko Béíshan kéyahdóó aláahgo naat'áanii Ag wolyéii bidine'é t'áá ałtso yił hak'ijį' danilį́įgo Édriyai kin haal'áagi hach'į' anaa' daniidzį́į́'. 34Nidi Bóhólníihii éí Mózes ííłní, T'áadoo bik'ee nił yé'í; bidine'é t'áá ałtso índa bikéyah ałdó' t'áá bił nílák'ee hodíí'ą́, áko Ámor dine'é aláahgo binanit'a'í Sáíhan wolyéii Héshban kin haal'áagi kééhat'ínígíí íinilaaígi át'éego hó ałdó' ákóhodíílííł. 35Ízrel dine'é éí Ag wolyéii áádóó haye'ké índa hadine'é ałtso nideistseedgo doo ła' hináágóó ádayiilaa, áko hakéyah bíí' daazlį́į́'.
Currently Selected:
NUMBERS 21: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
