JOHN 5
5
Tó siyį́įgi náá'diilzá
1Kódaadzaadóó bik'ijį' Jew dine'é hodílzingo áłah nída'ałeeh baa honíyá, áko Jerúsalem góde Jesus jiníyá.
2Nít'éé' Jerúsalemgi, dibé bá ąą ńdítį́hí bíighahgi, Hííbrew k'ehgo Bethésda wolyéego tó siyį́į́ lá, éí binaagóó ashdla'go chaha'oh. 3Ka nidajikaígíí ákwii t'óó ahojíyóí jizhjéé', éí doo da'joo'ínígíí, nidazh'niłhodígíí, hatah doo nidahwii'nánígíí jizhjéé' lá [éí tó hidoo'náłígíí biba' jizhjéé', 4háálá baa náhwiilzhíishgo Bóhólníihii bidiyingo naal'a'í ła' tó siyínígíí yiih nádáahgo tó néidiiłnááh, áko t'áá háiida t'áá ha'át'éegoda hąąh dah haz'áanii t'áá átsé tó hidees'náá'dóó bik'ijį' biishdiltałígíí bee yá'át'ééh níjídleeh]. 5Diné ła', t'áá ka naagháago tádiindóó ba'aan tseebíí nááhai léi' ákwe'é atah lá. 6Jesus éí yiyiiłtsą́ągo t'áá ákwe'é dziztį́įgo lą'í nááhaigo bił bééhózingo áháłní, Nááshidi'doodlááłísh nínízin? 7Áko diné daatsaahígíí áhodííniid, Kwá'ásiní, jó, tó náhidi'náahgo t'áadoo tó yiih shółtéłí da, áko t'ahdii t'áá ch'ééh ásht'į́įgo náánáła' t'áá shí áłtsé yiih nídadiltał. 8Áko Jesus áhodííniid, Nídiidááh, bik'i nítéhí nídiiłtsóosgo dah diinááh. 9T'áá áko diné éí hadaałt'é ánábi'diilyaa, áko bik'izhnitéhí nízdiiłtsoozgo dashdiiyá. Díí háá'áyį́į́h jį́ biyi' áhóót'įįd.
10Éí biniinaa Jew dine'é danilíinii diné náábi'diilzáhígíí ádeidííniid, K'adyee' háá'áyį́į́h jį́, áko bik'i nítéhí yíłtsosígíí doo bee haz'ą́ą da.#Neh. 13:19; Jer. 17:21. 11Áko ábizhdííniid, Nááshidiisáhígíí t'áá éí, Bik'i nítéhí nídiiłtsóosgo dah diinááh, shidííniid. 12Áko nidahódééłkid, Háishą' diné shį́į́, Bik'i nítéhí nídiiłtsóosgo dah diinááh, nidííniid? 13Nidi diné náábi'diilzáhígíí éí náábidiisáii doo bił bééhózin da, háálá ákwe'é áłah ílį́įgo biniinaa Jesus dah diiyá. 14Áádóó bik'ijį' kin bii' sohodizin bił haz'ą́ą́ góne' Jesus hak'íníyáago áhodííniid, Jó'akon, nááni'diilzá! T'áadoo bąąhági ánáánít'íní, áko ha'át'íida t'ah aláhígo doo yá'át'éehii doo bee nich'į' ánááhodoo'níił da. 15Áádóó éí diné dah diiyáago, Nááshidiisáhígíí éí Jesus át'į́, níigo Jew dine'é yił hoolne. 16Díí háá'áyį́į́h jį́į́ góne' Jesus baa nijiyáhígíí biniinaa Jew dine'é éí atídahoolaa [áádóó dahodiyiilyééł daniizį́į́']. 17Nidi Jesus ábidííniid, ShiTaa' t'áá áłahjį' díí jį́į́góó yilnish, shí ałdó' yishnish. 18Áko háá'áyį́į́h jį́į́ góne' Jew dine'é bibee haz'áanii k'ízhníti'ígíí biniinaa Jew dine'é dahodiyiilyééł daniizį́į́', nidi doo t'áá éí t'éiyá biniinaa da, nidi Diyin God shiTaa' bijiníigo Diyin God bił ahijíłt'éego ízh'dólzinígíí biniinaa t'ah aláhídi át'éego dahodiyiilyééł daniizį́į́'.
AYe' nilíinii bibee óhólnííh
19Áko Jesus áhodííniid, T'áá aaníí, t'áá aaníígóó ánihidishní, AYe' jílíinii t'áá hó hánii k'ehgo ha'át'íhída doo ázhdoolíił da, nidi aTaa' hanááł yaa naagháhígíí t'éiyá, háálá aTaa' ha'át'íhída yaa naagháhígíí, t'áá éí ałdó' aYe' yaa naaghá. 20Háálá aTaa' éí aYe' ayóó'áyó'ní, áko t'áá ałtso áyoolíłígíí aYe' yił ííshją́ą́ áyoolííł, áádóó díí naanishígíí biláahgo ádaat'éii yił ííshją́ą́ íidoolííł, áko bik'ee t'óó nihił adahayói dooleeł. 21Jó, aTaa' éí daneeznánígíí néidiyiiłjeehgo iiná yeidii'aah, ts'ídá t'áá éí bił ahináłt'éego aYe' t'áá hóznízinígíí iiná baa hizhdi'aah. 22ATaa' éí diné doo ła' yeinít'į́įgo yá nihwii'aah da, nidi aYe' t'éí ánihwiit'aah t'áá ałtso bee bóhólníih doo biniyé yeidiní'ą́, 23áko diné t'áá ałtso t'áá aTaa' hoł danilínígi át'éego aYe' hoł danilį́į doo. T'áá háiida aYe' doo hoł nilínígíí éí aTaa' nilíinii biníł'a'ígíí ałdó' doo hoł nilį́į da. 24T'áá aaníí, t'áá aaníígóó ánihidishní, T'áá háiida shizaad yidiits'a' áádóó shiníł'a'ii yoodlánígíí, éí iiná doo ninít'i'ii bee hólǫ́, áádóó doo baa náhódóot'įįł da, nidi aniné bits'ą́ą́dóó iináajį' ííyá.
25T'áá aaníí, t'áá aaníígóó ánihidishní, Bich'į' hoolzhish, k'ad nidi baa hoolzhiizh, daneeznánígíí Diyin God biYe' biinéé' deididoots'į́į́ł, áko t'áá ałtso deidiizts'ą́'ígíí dahináa dooleeł. 26Háálá aTaa' t'áá bí iiná bii' hólónígi át'éego aYe' ałdó' iiná bii' hólǫ́ǫgo áyósin, 27áádóó ánihwiit'aah bee bóhólníihgo yeidiní'ą́, háálá Diné Silį́į'ii jílį́. 28Díidí t'áadoo bik'ee t'óó nihił adahayóí, háálá bich'į' hoolzhish jishcháá' góne' naazhjé'ígíí t'áá ałtso hwiinéé' deididoots'į́į́ł, 29áko jishcháá'dę́ę́' háádahidookah, yá'át'éehgo ádaanííł nít'é'ígíí iiná biyi'jį' náádidoojah, áádóó doo yá'áshǫ́ǫ́góó ádaanííł nít'é'ígíí éí ti'hoo'nííh biyi'jį' bá nidahodiyoot'ááł biniyé náádidoojah.#Dan. 12:2.
Oo'íinii k'ehgo Jesus yá dahalne'ii
30Doo t'áá shí shóhólníihgo ha'át'íhída ádeeshłíił da, nidi diists'a'ii t'éí bik'ehgo ánihwiish'aah, áko ts'ídá t'áá ákogi át'éego ánihwiish'aah, háálá t'áá shí nisinígi át'éego doo ááshníił da, nidi aTaa' shiníł'a'ii íinízinii t'éiyá bik'ehgo ááshnííł. 31T'áá shí ádaa hashne'go éí shahane'ígíí doo t'áá aaníi da doo, 32nidi shá halne'ii ła' nááhódlǫ́, áko yee shaa halne'ii éí ts'ídá t'áá aaníí át'éego shił bééhózin. 33John bich'į' nida'sooł'a', áko t'áá aaníinii yaa hoolne'.#Jn. 1:19-27; 3:27-30. 34Bee shaa hane'ii nídiiláhígíí éí doo diné bits'ą́ą́dę́ę' da, nidi nihí yisdáhidoohkah biniyé díidí bee hahásdzíí'. 35John éí bee hool'iní diltłi'go bits'ádi'nídínígíí nahojílin nít'éé', áko hwee adinídínígíí t'óó kónígháníjį' nihił yá'ádaat'éehgo baa nihił dahóózhǫǫd. 36Nidi John yee shaa nahalne'ígíí biláahdi ayóó át'éego bee shaa nááháne'ii hólǫ́, háálá naanish ła' dadeeshłíiłgo biniyé aTaa' sheidiní'ánígíí, ts'ídá t'áá díí naanish baa naasháhígíí, t'áá éí aTaa' shiníł'a'go shaa dahalne'. 37ATaa' shiníł'a'ígíí t'áá bí ałdó' shaa hoolne'.#Mt. 3:17; Mk. 1:11; Lk. 3:22. Éí biinéé' nidi ts'ídá t'ah doo dadoohts'į́įh da, ázhnoolninígíí nidi ts'ídá doo daołtséeh da, 38áádóó bizaad doo nihiyi'di dahólǫ́ǫ da, háálá yiníł'a'ígíí doo deinohdlą́ą da. 39Jó, nihí Diyin God bizaad bee ak'eda'ashchínígíí nidaałkaah, háálá éí biyi' iiná doo ninít'i'ii nihee hólǫ́ danohsin, áko t'áá éí ałdó' shaa dahalne'ii ádaat'é, 40nidi iiná nihee dahodooleeł biniyé doo shaa danohkááh át'ée da. 41Diné bits'ą́ą́dę́ę́' ahił ídlį́ yee shaa haniihii doo nídiishłée da. 42Nidi Diyin God doo ayóó'ádeínóh'níi dago shił bééhózin. 43ShiTaa' shee ádíhólníihgo bízhi' bee níyá, ákondi doo dashinohsin da; ła'da t'áá bí ádee ádíhólníihgo t'áá bí bízhi' yee níyáago, áłt'ąą éí dadínóohsįįł. 44Nihí ahił ídlį́ ahádanohdzin, nidi Diyin God t'ááłá'í nilíinii bits'ą́ą́dę́ę́' ił ílíinii doo hádaaht'į́į́góó, haash yit'éego da'iidoohdląął? 45ATaa' binááł nihik'i hodideesh'áłígíí éí t'áadoo bee ách'į' nitsídaahkeesí; Mózes yee' nihik'i hodii'aah, azhą́ t'áá éí binahjį' nihił chodahoo'į́į nidi. 46Mózes deisoohdląądgo, shí ałdó' dashoohdlą́ą doo nít'éé', háálá éí shaa halne'go ak'e'ashchį́. 47Nidi yee ak'e'ashchínígíí doo deinohdlą́ą́góó, ákoshą' hait'éego shizaad deidoohdląął?
Currently Selected:
JOHN 5: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
