GENESIS 9
9
Diyin God éí Nóah yił aha'deet'ą́
1Áko Diyin God éí Nóah áádóó biye'ké yik'ijisdli'go áyidííniid, Náásgóó niha'áłchíní náhoodleeł doo; k'ee'ąą dínóht'įįhgo nahasdzáán bikáá' nihináánółt'eeh.#Gen. 1:28. 2Nahasdzáán bikáa'gi naaldlooshii t'áá ałtso áádóó nidaat'a'ii t'áá ałtso áádóó nahasdzáán bikáá' naaldeehii t'áá ałtso índa táyi' naaldeehii t'áá ałtso ałdó' nihéédaaldzid doo, índa nihik'ee biyandahalyiz doo, áko bee nihídahólníih dooleeł. 3Naaldeehii nináneel'ą́ąjį' nihich'iyą' doo, nanise' daadáanii nihaa diní'ánígi át'éego nihaa dinish'aah. 4Nidi atsį' éí dił t'áá bii' hólǫ́ǫgo doo dadoohsį́įł da, ats'íís éí dił yee hiná.#Lev. 7:26,27; 17:10-14; 19:26; Deut. 12:16,23; 15:23. 5Nihidił bee dahinohnáanii nihits'ádaazlį́įgo ánihiilaii ts'ídá t'áá k'ééhodideeshdlíłí; naaldlooshii éí diné yiyiisxį́įgo éí diyoolyéełgo bee hwiideesh'aał, doodaii' diné dziisxį́įgo hodi'yoolyéełgo bee hwiideesh'aał; t'áá háiida hak'is dziisxį́įgo hodi'yoolyéełgo bee hwiideesh'aał. 6T'áá háiida diné bidił bits'ánílį́ ájiilaii#Ex. 20:13. daaztsą́ągo hó ałdó' hadił hats'ánílį́ áhodi'doolníiłgo dazdootsaał, háálá Diyin God éí diné t'áá bináłt'éego áyiilaa.#Gen. 1:26. 7Áádóó nihí niha'áłchíní nídahoodleełgo k'ee'ąą nooht'į́įł le',#Gen. 1:28. índa nahasdzáán bikáa'gi k'ee'ąą dínóht'įįhgo bilááh nááhdleeł le'.
8Áko Diyin God kóníigo Nóah áádóó biye'ké yich'į' haadzíi'go ání, 9Shoo, shí lą́ą t'áá shí, nihí áádóó nihada'áłchíní náás da'ahílchíihii t'áá bił bohoníłdzilgo nihił ałha'dinisht'aah. 10Áádóó hináanii nináneel'ą́ąjį' éí nidaat'a'ii áádóó alį́į́' índa nihokáá' naaldeehii t'áá ałtso éí tsinaa'eeł biyi'dę́ę́' bił ch'ííníkaígíí t'áá ałtso ałdó' bił ałha'dinisht'aah. 11Áko bohoníłdzilgo nihił ałha'dideesht'ááł; bits'íís dahólóonii t'áá ałtso éí doo tó bee ánáádooldįįł da; doo nidi nahasdzáán bikáa'gi tó ánáábidoołdįįł da. 12Áádóó Diyin God ádííniid, Ni áádóó dahináanii nináneel'ą́ąjį' índa náásgóó da'ahílchíihii t'áá ałtso nihił ałha'dinisht'aah; díí bee ééhózin doo; 13éí k'os biyi' shinááts'íílid ninílá, áko shí áádóó nahasdzáán bił nihita'gi aha'deet'ą́ągo bee bééhózin doo. 14Ííshją́ą́ kót'ée doo, nahasdzáán bikáa'gi k'os ánásh'įįhgo biyi' nááts'íílid néiltséeh dooleeł, 15áko shí lá índa ni lá áádóó bits'íís dahináanii nináneel'ą́ąjį' nihił ahada'di'nisht'áanii bénáshniih doo, áko tó nídaadląąhgo bits'íís dahólóonii t'áá ałtso doo tó áńdabiłdįįh da doo. 16K'os biyi' nááts'íílid ninádiłgo nánísh'įįh doo, áko Diyin God áádóó nahasdzáán bikáa'gi bits'íís dahináanii nináneel'ą́ąjį' hool'áágóó bił ahadi'nisht'ą́ągo bénáshniih doo. 17Áádóó Diyin God éí Nóah ánéídoo'niid, Díidí shí áádóó nahasdzáán bikáa'gi bits'íís dahináanii t'áá ałtso nihita'gi bił ahadi'nisht'ą́ągo bee bééhózinii át'é.
Nóah áádóó biye'ké
18Nóah biye'ké éí tsinaa'eeł biyi'dę́ę́' ch'ékaígíí éí Shem áádóó Ham índa Jéífeth ádaat'į́. Áko Ham éí Kéínan bizhé'é jílį́. 19Díí tált'éego Nóah biye'ké danilį́; éí bits'ą́ą́dóó nahasdzáán bikáá'góó t'áá át'éé nít'éé' diné k'ee'ąą náádínéest'ą́.
20Nóah éí k'éédídléehii dzizlį́į́', áko ch'il na'atł'o'ii k'izhdíílá. 21Áko wáin joodlą́ą'go hoł honiiłdoi, áko haníbaal góne' ha'éé' hazhdiiltsoozgo t'áá jilchí'ígo dziztį́. 22Nít'éé' Ham éí Kéínan bizhé'é jílíinii hazhé'é t'áá łichí'ígo sitį́įgo dziiłtsą́, áko tł'óo'di hak'isóó bił hojoolne'. 23Áko Shem índa Jéífeth beeldléí hata'gi hawosjį' naníbaalgo t'ą́ąjigo yah ajíí'áázh, áko hazhé'é t'áá łichí'ígo sitį́įgo bik'ídzísti', áko bits'ą́ąjį' hanii'go hazhé'é t'áá łichí'ígo sitínígíí t'áadoo jinééł'į́į' da. 24Áko Nóah bił énáhoosdzingo haye' akéédę́'ígíí áhóół'įįdígíí hoł bééhoozingo 25ázhdííniid,
Kéínan hóyée'go há ha'oodzíí';
hak'isóó binaalte' jílį́į doo.
26Áádóó ánáázhdoo'niid,
Shem biDiyin God Bóhólníihii baa ha'niih;
háni'dii Kéínan hanaalte' doo.
27Diyin God éí Jéífeth agháago ayóó át'é íidoolííł,
áko Shem dabiníbaal góne' kééhojit'į́į doo;
Kéínan éí hanaalte' doo.
28Tó nahwéskaidóó bik'ijį' Nóah táadi neeznádiindóó ba'aan ashdladiin binínáánááhai. 29Áko Nóah bíídíiską́ą́dóó náhást'éidi neeznádiindóó ba'aan ashdladiin binááhaigo daaztsą́.
Currently Selected:
GENESIS 9: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
