GENESIS 13
13
Éíbram éí Lat yił ałts'ázná
1Áko Éíbram áádóó hwe'asdzą́ą́ áádóó hwee hólóonii t'áá ałtso índa Lat ałdó' Ííjip kéyahdóó kéyah Shádi'ááh hoolyéejį' ch'ízhníná.
2Áko Éíbram éí béégashii áádóó béésh łigaii índa óola t'áá íiyisí bee ajit'į́. 3Áádóó kéyah Shádi'ááh hoolyéédóó Béthel áádóó Éí'ai bita'gi átsé honíbaal nizhnínilíjį' níjoo'nééł. 4Átsé bikáá' náá'iiniihí ájiilaa yę́ęjį' níjí'náago ákwii Éíbram éí Bóhólníihii bízhi' józhíigo bich'į' sozdoolzin. 5Lat ałdó' Éíbram bił tázhdínéehgo hadibé áádóó halį́į́' índa haníbaal hólǫ́. 6Áko t'áá ła' kééhojit'į́įgo éí kéyah doo hohóóghah da; t'áá íiyisí bidziilgo dah ajooléełgo biniinaa doo t'áá ła' kééhojit'į́į le' át'ée da. 7Áko Éíbram bá nida'niłkaadii áádóó Lat bá nida'niłkaadii ahináádiijah. Íídą́ą́' Kéínan dine'é índa Píírez dine'é éí kéyahgi kéédahat'į́į́ nít'éé'.
8Áko Éíbram éí Lat áyidííniid, Haa'íshą' t'áadoo ahináádiiltłi' í doo, áádóó nihá nida'niłkaadii ałdó' t'áadoo ahináádiijahí doo, háálá ałk'isóó daniidlį́. 9Níléígóó díní'į́į́', jó, kéyah adahwiis'á. T'áá shǫǫdí shits'ánínééh; nish'náajigo dah dinináago shí nishtł'ajigo dah dideesh'nééł; éí doodaléi' ni nishtł'ajigo dah dinináago shí nish'náajigo dah dideesh'nééł. 10Áko Lat nidzizghalgo Jórdan tooh binaagóó honíteelgi t'áá át'é tó bee áda'azįįdgo dziiłtsą́; Bóhólníihii t'ah doo Sádam índa Gomárah ííłdįįhdą́ą́' Bóhólníihii bidá'ák'eh#Gen. 2:10. honoolnin áádóó ałdó' Zó'er hoolyéii bich'ijígo kéyahígíí Ííjip kéyah honoolnin. 11Áko Lat éí Jórdan tooh bich'ijígo honíteelígíí ádeideet'ą́, áádóó Lat éí ha'a'aahjigo dashdiiná; kót'éego ałts'ázhníná. 12Éíbram éí kéyah Kéínan hoolyéhígi kééhojit'į́; Lat éí honíteelgi kin hadaas'áágóó tázhdínééh, áádóó Sádam kin haal'áagi haníbaal nizhní'ą́. 13Nidi Sádam dine'é t'áá íiyisí doo yá'ádaashxǫ́ǫ da; Bóhólníihii yich'į' t'áá íiyisí ádił da'ílzííh.
14Áko Éíbram éí Lat hats'ánínáádóó bik'ijį' Bóhólníihii áhodííniid, Náhookǫsjigo áádóó shádi'áahjigo áádóó ha'a'aahjigo índa e'e'aahjigo díní'į́į́'. 15Kéyah t'áá át'é yíní'ínígíí éí naa dideesh'ááł; na'áłchíní náás da'ahílchíihii ałdó' hool'áágóó daabíí' dooleeł.#Acts 7:5. 16Áko na'áłchíní náás da'ahílchíihii łeezhígi ánéelą́ą'go ádeeshłííł, áko diné ła'da łeezh yiyííłta'go na'áłchíní náás da'ahílchíihii ałdó' yízhdóołtah. 17Dah diinááh; kéyah náásee índa naaniigo hadiinááh, háálá díí kéyah naa dideesh'ááł. 18Áko Éíbram honíbaal nizh'diinilgo dashdiiná; Hííbran honíteel Mámre wolyéhígíí bichéch'il naazkaadígi nizhnínáago ákwii Bóhólníihii bich'į' náázhdi'yołnih biniyé bikáá' náá'iiniihí ánáájiidlaa.
Currently Selected:
GENESIS 13: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
