GALATIANS 6
6
Nihide ádahoot'éego ahíłká anáhjah
1Shik'isóó, diné ła' bąąhági át'į́įgo bééhoozingo, Níłch'i Diyinii k'ehgo ádanoht'éii, a'ohgo áda'díínółzingo hasht'e'ninádadoohdlóós. Ádaa ádahołyą́, nihí ałdó' nihídahodínóotahgoda át'é. 2Nihide ádahoot'éego ahíłká anáhjah, ákódaaht'į́įgo Christ yee has'áanii bida'oł'į́įgo át'é. 3Háálá diné t'áadoo nilíní da nidi ayóó ánísht'é nízinii, éí ádina'adlo'go át'é. 4Nidi diné t'ááłá'í jinítínígo baa nijigháii ádá hadazdoolził, áko yá'át'éehgo baa nijigháá ládą́ą́' éí baa hoł hózhǫ́ǫ doo. Diné náánáła' yaa naagháii éí t'áá bí bíni'dii yaa naaghá. 5Háálá diné t'ááłá'í jinítínígo bá ho'diilzį'ii t'ááłahodit'éhee bá nidzizį́į doo.
6Diyin God bizaad bee nahodi'nitinii éí nahonitinii áádóó t'áá ałtso bee jiináanii bił ałts'ą́ą́' ajíłk'iiz doo.
7Nihida'dódleeh lágo; Diyin God doo bá nahat'i' da. Diné t'áá ha'át'íhída k'izhdííláhígíí t'áá éí ałdó' áłah ázhdoolííł. 8Háálá t'áá háiida t'áá hó hats'íís yidánoolníinii k'izhdííláhígíí t'áá éí áhodoołdįįłii ádá shóizhdoołt'eeł, nidi Níłch'i Diyinii bá k'izhdííláhígíí éí Níłch'i Diyinii bits'ą́ą́dóó iiná doo ninít'i'ii ádá shóizhdoołt'eeł. 9Áko haa'íshą' yá'ádaat'éehii baa nideiikaígíí t'áadoo ádadadiidláhí doo, háálá doo áá dahosiit'įįdgóó, baa hoolzhiizhgo da'diigish. 10Éí bąą ashja'ósingo haa'íshą' diné t'áá ałtso baa dajiiniiba'go nizhónígo bindeiilnish doo, Christ dayoodlání danilíinii íiyisí agháago bindeiilnish doo.
Na'nitinii áádóó saad bee k'é ha'níinii naaltsoos bee niilt'i'ii
11Jó, t'áá shí shíla' bee nitsaago nihich'į' ak'e'ashchíhígíí baa ákodanoohsįįh! 12T'áá ats'íís k'ehgo nitsídaakeesii t'óó bee ch'íshidit'áah dooleeł danízingo nihąąh nídahidínóolgishjį' yídanihiniłkad. Éíyee' Christ tsin ałnáoszid bąąhjį' ti'hooznii'ígíí biniinaa doo atíshidi'doolníił da danízingo ádaat'į́. 13Azhą́ bąąh nídahineeshgizhii nidi t'áá bí bee haz'áanii doo t'áá ałtso yik'ehgóó ádaat'ée da, nidi biyaa soonilii binahjį' ádaa daha'niih doo biniyé nihąąh nídahidínóolgishjį' nihídaalná. 14Nidi ts'ídá doo ádaa hósh'niih át'ée da, t'áá hazhó'ó nihiBóhólníihii Jesus Christ tsin ałnáoszid bąąhjį' nihá daaztsánígíí t'éiyá bee ádaa hodeesh'nih. Jó, éí bee nihokáá' bił nidahazt'i'ii shits'ą́ą́' tsin ałnáoszid bąąhjį' shich'į' bił o'oolkaal, áádóó shí ałdó' nihokáá' bił nidahazt'i'ii bits'ą́ą́' tsin ałnáoszid bąąhjį' shił o'oolkaal. 15Ąąh náhinilgish t'áadoo nilíní da índa doo ąąh náhinilgish ałdó' t'áadoo nilíní da, nidi Christ bee diné ániidí ánályaii t'éí ts'ídá ílį́. 16Kót'éego dajiináanii t'áá ádzíłtso Diyin God éí Ízrel dine'é náyiizlá'ígi át'éego náhwiizláa'ii hach'į' hózhǫ́ náhodoodleeł, áádóó Diyin God haa jooba' doo!
17Kodóó náásgóó t'ááká diné ła'da shich'į' ninááhoyółnáá' lágo, háálá shikáá'góó daasidgo naasháhígíí bee Bóhólníihii Jesus bíí' nishłį́įgo bééhózin.
18Shik'isóó, nihiBóhólníihii Jesus Christ bibee ajooba' nihii' naazíinii yił dahólǫ́ǫ doo. T'áá ákót'ée doo.
Currently Selected:
GALATIANS 6: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
