EPHESIANS 4
4
Oodlání Níłch'i Diyinii bee łá'í danilį́
1Éí bąągo shí, Bóhólníihii baa hashne'go biniinaa awáalyaaí nishłíinii nánihooshkąąh, Diyin God yiniyé nihíká ádííniidii bą́ą́h da'nohłį́įgo dayínóhkááh. 2T'áá ałtsojį' a'ohgo ádanoht'ée le', niha'át'e' ádaadin le', áádóó nízaadgóó hada'íínółní. Ałch'į' hada'íínółníigo ayóó'áda'ahíínóh'ní.#Col. 3:12,13. 3Níłch'i Diyinii bee łá'í nohłį́įgo k'é bee da'ahíínóhtą'go áda'díínółzin. 4Ił chohoo'į́ t'ááłá'íígíí biniyé Diyin God nihíká ádííniidígi át'éego da'oodlání t'áá ła' bizhi'ee ats'íís nilį́, índa Níłch'i Diyinii t'ááłá'í, 5áádóó Bóhólníihii t'ááłá'í, áádóó oodlą́ t'ááłá'í, áádóó bee alzį́įhii t'ááłá'í, 6índa Diyin God t'ááłá'í, éí diné t'áá ałtso yiTaa' nilį́, ts'ídá t'áá ałtso bee bóhólnííh, t'áá ałtso yił hólǫ́, índa t'áá ałtso yii' hólǫ́. 7T'ááłá'í niitínígo ajooba' nihaa dadeest'ánígíí éí Christ nihaidiní'ánígi áníłtsogo bee há nideiil'a', 8Diyin God bizaad bee ak'e'ashchíinii ánínígi át'éego:
Aghánáhóó'áajį' hahodzizle'go yisnááh t'áadoo bee néelą́'ígóó ajíí'eezh,
áádóó aa deet'áanii diné bitaazdeez'ą́.#Ps. 68:18.
9Aghánáhóó'áajį' hahodzizle' ha'nínígíishą', ha'át'íí ááhyiłní? Jó, nahasdzáán biyi'góó áłtsé nahodzizle'. 10Díí yaago nahodzizle'ígíí t'áá éí dego yádiłhił t'áá ałtso bilááhgóó hahodzizle', ts'ídá t'áá ałtsogóó hojílǫ́ǫ doo biniyé. 11Áko ła' daal'aadii dadooleeł, ła' Diyin God yá dahalne' doo, ła' hane' yá'át'éehii yaa dahalne' doo, ła' da'oodlání yá naazį́ dadooleeł, áádóó ła' na'nitiní danilį́į doogo Christ hataideez'ą́. 12Diyin God bidiyį́į́' ts'ídá yá'át'éehgo hasht'edahodoolíiłgo, éí da'oodlání Christ bá dajílníish dooleeł, áko Diyin God bidiyį́į́' t'áá ła' bizhi'ee Christ yits'íís nilíinii bidziil dooleeł biniyé hataideez'ą́. 13Áko t'áá áníiltso nihe'oodlą' bee łá'í dadiidleełgo, índa Diyin God biYe' bééhoniilzin bee łá'í dadiidleełgo diné nininísáanii dadiidleeł, Christ nininísą́ yę́ęgi át'éego nidadíníilzééł. 14Áko kodóó áłchíní nahalingo na'nitin ałtah áát'eełii t'áadoo bee nídahííníilghaałí, diné bina'adlo'ii áádóó bindahagiz dayiichįįhii t'áadoo t'áá ádzaagóó nihíni' ádahale'í. 15Nidi ayóó'í'ííníi'níigo t'áá aaníígóó yéiilti'go t'áá ałtsojį' Christ éí nihá atsii' jílíinii hwii'jį' niilzéeł dooleeł. 16Jó, ajoodlánígíí Christ bits'íís jílį́. Ats'íís t'áá át'é ahadadit'ą́ą́góó da'ahótą'ígi át'éego Christ bee ahídajóltą', áko t'áá ádzíłtso yá'át'éehgo ahinidajilnishgo Christ bits'íís dajílį́įgo índa ayóó'áda'ahijó'níigo ahinidajilnishgo Christ bits'íís bidziil jooleeł.#Col. 2:19.
Christ bee iiná ániidíii
17Éí bąą Bóhólníihii bá haasdziihgo nihiyahoniishłįįhgo ánihidishní, Kodóó doo oodlání danilíinii t'áá ádzaagóó nitsídaakeesgo dahinánígi át'éego t'áadoo dahinohnání. 18Éí bił daatł'éé' bąą doo ak'ida'diitįįh da. Dabijéí doo nabída'didzilgóó bąą doo bił éédahózin dago biniinaa Diyin God bee iiná yits'ą́ądi naaldeeh. 19Éí bąąhági ádaaníił nidi doo yaa yádanízin da, áádóó badaa'ihii t'áá ałtso bíchą́hwíídéeni'go bee tsi'nida'aldeehii yaa ádadeest'ą́. 20Nidi nihí doo éigi át'éego Christ bits'ą́ą́dóó bídahooł'ą́ą' da! 21T'áá shį́į́ aaníí haa dahosidoots'ą́ą'go Jesus binahjį' na'nitin t'áá aaníinii bíndanihidi'neestą́ą́'. 22Áko átséédą́ą́' ádanoht'éé nít'éé' yę́ę bits'ą́ąjį' hahohkááh.#Col. 3:9. Jó, éí átséédą́ą́' ádanoht'éé nít'éé' yę́ę badaa'ihii bił nidaat'i'ii át'é, áko éí adáhonooní na'adlo' nilíinii yee nidanihiiłchxǫǫh. 23Áko nihintsíkees ániidígo nihá ánídaolne', 24áádóó iiná ániidíii biih hohkááh.#Col. 3:10. Éí Diyin God t'áá bináłt'éego ályaa,#Gen. 1:26. ts'ídá t'áá ákogi át'é índa t'áá aaníí dílyinii át'é.
25Ákót'é bąą wooch'ííd yóó'adahidoh'aahgo, t'ááłá'í nootínígo bił kéédahoht'íinii saad t'áá aaníinii bee bił ałch'į' yádaałti',#Zech. 8:16. háálá ahidiníłnáago Christ bił t'ááłá'í niidlį́. 26Nihádahachįįhgo ts'ídá bąąhági ádaohnééh lágo;#Ps. 4:4. t'áá nihádahachį'go o'ó'ááł lágo. 27T'ááká níłch'i bida'iiníziinii binanit'a'í bá ashja'oohłééh yíila'. 28Azhni'įįhii ts'ídá doo náázhdí'nóo'į́įł da, nidi hanaanish ílį́įgo joołt'ihgo éí bee badahojoobá'íígíí baa jijooba' doo. 29Saad nichǫ́'í t'áadoo bee yádaałti'í, nidi ashja'oolíiłgi saad bidahónéedzáanii bee yádaałti', áko éí deidiits'a'ii bee bik'idahojidlíigo dadínóosééł. 30Áádóó Diyin God biNíłch'i Diyinii t'áadoo bíni' nídaoł'aahí, háálá nihéédadidoochił beiníłką́ąjį' Diyin God bíí' danohłį́įgo Níłch'i Diyinii bee nihéédahózin. 31Anáháshch'íí', hashkéhwiindzin, áháchį', azahóchį', t'áá ádzaagóó aa hane' índa áká naat'á t'áá ałtso áts'á dahidoht'aah. 32Áádóó ahidiníłnáago ahaa dajiinohba', índa Diyin God éí Christ yee nihibąąhági át'éii nihá yóó'iidíí'ánígi át'éego nihí ałdó' ahaa a'ááh danohsingo ałch'į' bąąhági ádaahníiłii ahá yóó'anídahidoh'aah.#Col. 3:13.
Currently Selected:
EPHESIANS 4: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
