Mako 9

1Elyo nakabili alabeba ati, “Ndemweba icine cine, bamo pali imwe, mwe beminine pano tabakafwe, mpaka bakasuke bakamone Ubufumu bwakwa Lesa uko buleisa na maka.”

Yesu alanga abasole ubucindami bwakwe

(Mateo 17:1-13; Luka 9:28-36)

2 # 2 Pet 1:17-18 Ilyo papitile inshiku mutanda, Yesu asendele Petelo na Yakobo na Yoani, baya nina ulupili ulutali ukwakuti babefye beka. Elyo ayaluka pa menso yabo. 3Ifyakufwala fyakwe fyabuuta tuutu, fyalabengeshimafye, fyabuutisha ukucila na pafyo umuntu pano calo engafibuutisha. 4Elyo bamona Eliya na Mose balelanda na Yesu. 5Elyo Petelo aeba Yesu ati, “Kafundisha, kuti cawama twaikala pano pene. Lekafye tupangepo insakwe shitatu, imo yobe, imbi yakwa Mose, elyo na imbi iyakwa Eliya.” 6Taishibe ifyo alesosa, pantu baliketwe no mwenso ukalamba. 7Elyo paisa ikumbi lyabakupa na mu cinshingwa, na mwikumbi mwafuma ishiwi aliti, “Uyu e Mwana wandi, uo natemwa, mulemumfwa.” 8Awe apopene bati bacebacebe, tabamwene nelyo umo, kanofye Yesu eka eo bashele nankwe.

Baipusha pali Eliya

9Ilyo balatentemuka ulupili, Yesu alabakonkomesha ati, “Tecakwesha ukwebako umuntu nelyo umo pafyo mwacimona, kanofye ilyo Umwana wa muntu akabuuka ku bafwa.” 10Abasambi balisungile bwino uyu mulandu, lelo uko bali beka baleipushanya umulolele amashiwi ya “kubuuka ku bafwa.” 11#Mala 4:5Elyo baipusha Yesu abati, “Ngeco bakafundisha bamafunde basosela abati, ‘Eliya euli nokubalilapo ukwisa’ cinshi?” 12Nao abasuka ati, “Kwena nifyo fine, Eliya ali nokubalilapo ukwisa nokwisa mona ukuti fyonse fili umo fifwile ukubeela. Nga nomba calembelwa nshi ukuti, Umwana wa muntu ali nokuculisha nganshi, kabili no kusuulwa? 13Lelo ndemweba nati, Eliya alisa kale, na bantu bamucitile ngomo balefwaila, nga filya fine calembwa pa mulandu wakwe.”

Yesu aposha akalumendo akali no mupashi wakowela

(Mateo 17:14-21; Luka 9:37-43)

14Ilyo babwelela ku basambi bambi abashele, bamona ibumba ilikalamba nalibashinguluka, na bakafundisha bamafunde bamo balebikana nabo ifikansa. 15Cilya abantu bamona Yesu, bonse basunguka nganshi, elyo babutuka ulubilo kukuya muposha. 16Elyo aipusha abasambi bakwe ati, “Finshi ifyo mulebikaninapo nabo ifikansa?” 17Elyo umuntu umo mwibumba ayasuka ati, “Kafundisha, ndetele kuli iwe umwana wandi umwaume, uwaba no mupashi wakowela uwamupoka no kulanda. 18Kabili lyonse ilyo umwikata, ulamupama panshi ne fulo lyalafuma ku kanwa, alasenganya na meno, elyo no kumina aumina. Nacilomba abasambi bobe ukuti baufumyemo, nomba nabafilwa.” 19Elyo Yesu nao ayasuka ati, “Mwe nkulo yabula icisumino mwe! Bushe tukaba na imwe mpaka lilali? Bushe ndi nokuba na imwe mpaka lilali? Leteni akalumendo kuno.” 20Awe bakaleta kuli Yesu. Nomba umupashi wakowela ushimonafye Yesu, apopene walafulumfunsha akalumendo, wakaposa na panshi, kalafulukuta, ne fulo lyalafuma ku kanwa. 21Elyo Yesu aipusha wishi ati, “Bushe apo camutampila, papita inshita shani?” Nao ayasuka ati, “Ukufumafye ku bwaice. 22Kanshi ilingifye ulamuposa mu mulilo na mu menshi pakuti umwipaye. Lelo nga kuti wacitapo cimo, tulangulukileko, utwafweko!” 23Elyo Yesu amwankula ati, “Auti, ‘nga kuti wacita?’ Ala umuntu wa cisumino kuti acita fyonse.” 24Apopene wishi wa kalumendo apunda ati, “Nalisumina, shingafwakofye nkwatishe icisumino.”

25Yesu cilya amona ibumba lyalabutukilako, akalipila umupashi wakowela ati, “We mupashi wakowela we, cinkomamatwi, cicibulu, nakweba fuma muli uyu muntu, wikatala aumwingilamo nakabili.” 26Elyo umupashi wakowela walakafulumfunsha na maka, ulekuuta, epakufumamo. Akalumendo kashala nakalala kwati nakafwa, na bengi balasosa abati, “Afwa!” 27Yesu wena akekata mu minwe, akemya, awe nako kaiminina.

28Cilya Yesu aingila mu ŋanda, abasambi bakwe balamwipusha kumbali abati, “Bushe ifwe cinshi twacifililwa ukuutamfya?” 29Nao abasuka ati, “Umupashi wa musango uyu teti muutamfyemo kanofye ku mapepo [no kufunga ukulya].”#9:29 Ba Baibele bamo tabakwata: [no kufunga ukulya].

Yesu abwekeshapo ukusobela imfwa yakwe

(Mateo 17:22-23; Luka 9:43-45)

30Ilyo bafumine muli ilya ncende baya pita mu calo ca Galile. Yesu talefwaya ukuti abantu beshibe uko bali, 31pantu alefunda abasambi bakwe. Alebeba ati, “Umwana wa muntu akaposwa mu minwe ya bantu, nabo bakamwipaya. Lelo panuma ya nshiku shitatu akabuuka ku bafwa.” 32Nomba tabaumfwile umwalolele aya mashiwi. Kabili baletiina no kumwipusha.

Umukalamba pali bonse nani?

(Mateo 18:1-5; Luka 9:46-48)

33Awe bafikile ku Kapenamu. Ilyo bali mu ŋanda, Yesu abepusha ati, “Bushe cinshi mwacilabikaninapo ifikansa mu nshila?” 34Awe bena baikalafye tondolo, pantu mu nshila balebikana ifikansa abati, “Umukalamba pali ifwe bonse nani?” 35Elyo Yesu aikala, aita na basambi ikumi limo na babili, alabeba ati, “Onse uulefwaya ukuba uwantanshi, afwile aicita uwakulekelesha kabili uwakutumika bonse.” 36Elyo abuula akaice akeminika pa lwalala, 37akafukatila, alabeba ati, “Umuntu onse uwasekelela akaice akali nga aka pa mulandu wa ine, ninshi nine asekelela. Kabili onse uwansekelela, tene asekelela, lelo asekelela uwantuma.”

Uushili mulwani wesu ninshi munensu

(Luka 9:49-50)

38Yoani aeba Yesu ati, “Kafundisha, twamwene umuntu umo alebomfya ishina lyobe pakutamfya imipashi yakowela, lelo ifwe twalimulesha, pantu tatwaba nankwe pamo.” 39Lelo Yesu abeba ati, “Mwilamulesha, pantu takwaba nangu umo uucita icipeshamano mukubomfya ishina lyandi, kabili ese mukulalanda ifibi pali ine. 40Pantu uyo onse uushitulwisha, ninshi munensu. 41Uyo onse uwamupeela ulukombo lwa menshi, ico muli bena Kristu, ndemweba icine cine takabulwe icilambu cakwe.

Talukeni kukubifya

(Mateo 18:6-9; Luka 17:1-2)

42“Nomba uwalenga ukuti kamo pali utu twaice utwansumina ukubifya, kuti camuwaminapo ukumukakila mu mukoshi icilibwe icafina icakupelelako, no kumuposa muli bemba. 43Kabili icisansa cobe nga cakulengesha ukubifya, ciputuleko. Cawamishapo ukwingila mu mweo na makunkutu, ukucila ukuya ne fisansa fibili mu mulilo wape.#9:43 Ba Baibele bamo balundapo icikomo 44: “Umo imititi yabo ishifwa, no mulilo ushishima” (moneni icikomo 48). 45Kabili ulukasa lobe nga lwakulengesha ukubifya, uluputuleko. Cawamishapo ukwingila mu mweo icilema, ukucila ukuya na makasa yabili ku mulilo wape.#9:45 Bamo balundapo icikomo 46: “Umo imititi yabo ishifwa, no mulilo ushishima” (moneni icikomo 48). 47Kabili ilinso lyobe nga lyakulengesha ukubifya, litonkole. Cawamishapo ukwingila mu Bufumu bwakwa Lesa ne linso limo, ukucila ukuposwa na menso yabili mu mulilo wape, 48#Esaya 66:24umo ‘imititi yabo ishifwa, no mulilo ushishima.’ 49Nga filya balunga umucele mu fyakulya, efyo onse akalungwamo umulilo wa macushi. 50Umucele waliwama, nomba nga wafumuka, bushe kuti waloweshiwa nanshi? Na mu bumi bwenu bwine mulebamo umucele, kabili muleikala na banenu umutende.”

Currently Selected:

Mako 9: ILL15

Highlight

Copy