Mateo 27

Batwala Yesu kuli Pilato

(Mako 15:1; Luka 23:1-2; Yoani 18:28-32)

1Ilyo bwaca, bashimapepo bacindami bonse na bakalamba ba bantu batekele icilye, bapingushenye ukuti Yesu ali nokufwa. 2Awe bamukaka, bamusenda, bamutwala na ku mulashi Pilato.

Yuda aikulika

(Imilimo 1:18-19)

3Elyo Yuda uwaposele Yesu, ati amone ukuti bamupingwila ukufwa, alalanguluka. Abwesesha bashimapepo bacindami na bakalamba indalama sha silifa amakumi yatatu (30). 4Abeba ati, “Nimbifya pakulenga ukuti bepaye umuntu uwakaele!” Nabo bayasuka abati, “Bushe ifwe uyo mulandu wesu? Uyo mulandu obe we mwine!” 5Yuda epakuya posa indalama mwi Tempele. Elyo afumako, ayaikulika. 6Bashimapepo bacindami batola indalama abati, “Ishi ni ndalama shamisoka, amafunde yesu yalilesha ukushibika mu cipao ce Tempele.” 7Kanshi bati bapingushanye, babuula indalama, bashitamo ibala lya muntu uwalebumba inongo, umwakuti baleshiika abeni. 8Eico ukufika na lelo ili bala balita, “Ibala lyamisoka.” 9#Yere 32:6-15Kanshi epakufikilishiwa ifyo kasesema Yeremia asosele ati, “Babuulile indalama sha silifa amakumi yatatu (30) e mutengo abena Israeli bamo bamushitishishepo. 10Elyo bashitamo ibala lyakwa kabumba wa nongo, ngomo Imfumu yanjebele.”

Yesu na Pilato

(Mako 15:2-5; Luka 23:3-5; Yoani 18:33-38)

11Elyo baletele Yesu ku mulashi. Umulashi amwipusha ati, “Bushe iwe niwe mfumu ya Bayuda?” Yesu amwasuka ati, “Nausosa.” 12Nomba ilyo bashimapepo bacindami na bakalamba balamwebelela ifintu, awe Yesu wena tewakwasukapo kantu. 13Elyo Pilato aipusha Yesu ati, “Bushe tauleumfwa ifintu bwingi balekwebelela?” Lelo Yesu wena no kwasuka nakalya. 14Awe umulashi asunguka nganshi, pakumona ukuti Yesu taswikepo nelyo cimo pa fintu balemwebelela.

Pilato apingwila Yesu ukufwa

(Mako 15:6-15; Luka 23:13-25; Yoani 18:29—19:16)

15Nomba cila nshikunkulu ya Cakucilila iye Pasaka, lyonse umulashi abelele ukubakakwilapo umufungwa umo, uo abantu balefwaya. 16Kanshi pali iyo nshita kwaliko umufungwa umo ishina lyakwe Balaba#27:16 Balaba: Ba Baibele bamo balundapo ishina limbi lyakwa Balaba, ni Yesu Balaba. uwaishibikwe nganshi kuli buntalamisoka. 17Ilyo abantu balongana, Pilato alabepusha ati, “Bushe nani uo mulefwaya ukuti mukakwile, Balaba nangu Yesu uo batila Kristu?” 18Pantu Pilato alishibe ukuti, ni ku mufimbilafye bamuletele Yesu. 19Nomba ilyo Pilato ekele pa cipuna cakupingwilapo imilandu, umukashi amutumina amashiwi yakumweba ati, “Wiibika mu mulandu wa uyo muntu wakaele. Pantu lelo ubushiku mu ciloto nacicula nganshi pa mulandu wakwe.” 20Lelo bashimapepo bacindami na bakalamba bena balasokawila ibumba lya bantu ukuti babakakwile Balaba, Yesu ena bamwipaye. 21Umulashi abepusha ati, “Pali aba babili, bushe nani mulefwaya ukuti mukakwilepo?” Bayasuka abati, “Ni Balaba!” 22Pilato abepusha ati, “Nga kanshi ndecita shani Yesu uo batila Kristu?” Bonse bayasuka abati, “Mutanikenifye!” 23Pilato nao ati, “Nga kanshi cinshi ico abifya?” Nabo elyo bacishamo ukupunda abati, “Mutanikenifye!” 24#Amaf 21:6-9Pilato ashimona ukuti aleicushafye, kabili limbi palabuuka impasase, abuula amenshi, alasamba iminwe pa cinso ce bumba. Asosa ati, “Ine nshilimo mu mfwa ya uyu muntu! Mulandu wenu mwe bene!” 25Elyo abantu bonse bayasuka abati, “Ee, umulandu wa mfwa yakwe ube pali ifwe na pa bana besu!” 26Elyo Pilato abakakwila Balaba. Abeba no kuma Yesu ifikoti, elyo abalubwila ukuti baye mutanika.

Bafwika Yesu iŋana ya myunga

(Mako 15:16-20; Yoani 19:2-3)

27Elyo ifita fya mulashi fyatwele Yesu mukati ka lubansa lwa kwisano. Fyalonganike ne mpuka yonse ya fita, fyamushinguluka. 28Fyamufula insalu shakwe, fyamufwika no mwingila uwakashika. 29Elyo fyalema iŋana ya myunga, fyamufwika ku mutwe. Kabili fyamufumbatika itete ku kulyo. Elyo fyalamufukamina, fyalamupumya, fileti, “Tupole mulopwe, we mfumu ya Bayuda!” 30Kabinge fyalamusaka amate, elyo fyabuula itete fyalamufupaula ku mutwe. 31Cilya fyaleka ukumupumya, fyamufula insalu yakashika, fyamufwika ne nsalu shakwe. Elyo fyamusenda, fyamutwala na kukumutanika.

Batanika Yesu

(Mako 15:21-32; Luka 23:26-43; Yoani 19:17-27)

32Ilyo baleya, mu nshila bakumenye umuntu umwina Kurene, ishina lyakwe ni Simoni, eo bapatikishe ukuti asendeleko Yesu umusalaba. 33Elyo basuka bafika na pa ncende iyo beta Gologota, emukutila, “Pa cipanga.” 34#Amalu 69:21Elyo bapeela Yesu umwangashi uo basanshishemo indusha#27:34 Umwangashi uo basanshishemo indusha: Balenwesha abantu batanika umwangashi umo babikile ifyalula pakuti beumfwisha ubukali. ukuti anwe, lelo ati amyangeko, akaana ukunwa.

35 # Amalu 22:18 Cilya bamutanika, elyo balapendula pakwakana ifyakufwala fyakwe. 36Elyo baikala panshi kulya kwine, balamulinda. 37Lwa pa mulu wa mutwe wakwe ku cimuti ca musalaba, babikapo icalembwapo umulandu balemwipailapo ukuti, “Uyu ni Yesu Imfumu ya Bayuda.” 38Elyo batanikapo ne fipondo fibili, cimo ku kulyo, cimbi naco ku kuso.

39 # Amalu 22:7 Kanshi abantu abalepitapo, balemutuka, balekunta ne mitwe baleti, 40“Eya! Teiwe waleti nkabongolola Itempele, elyo nkalikuula mu nshiku shitatu! Kanshi ipusushe we mwine, nga uli Mwana wakwa Lesa, ika pa musalaba!” 41Mu musango umo wine bashimapepo bacindami, bakafundisha bamafunde na bakalamba nabo balamuseka. 42Balesosa baleti, “Alepususha bambi, nomba afilwa ukuipususha umwine! Apo ni Mfumu ya bena Israeli, naike ukufuma pa musalaba, uleke tusumine! 43Atetekela muli Lesa, kanshi Lesa kamupusushe nga alimutemwa, kabili aleti ndi Mwana wakwa Lesa!” 44Ne fipondo filya ifyatanikwe nankwe, nafyo fyalamusaalula.

Yesu afwa

(Mako 15:33-34; Luka 23:44-49; Yoani 19:28-30)

45Cilya akasuba kafika pakati ka mutwe pa nshita ya 12:00, imfifi yakupile icalo conse, ukufikafye na lilya kasendama pa nshita ya 15:00. 46#Amalu 22:1Elyo lilya akasuba kasendama pa nshita ya 15:00, Yesu apunda ne shiwi likalamba ati, “Eloi, Eloi lama sabakatani?” Ekutila, “Lesa wandi, Lesa wandi, cinshi wandekelesesha?” 47Elyo abantu bamo abaiminine mupepi baumfwa ifi, balasosa abati, “Uyu muntu aleita Eliya!” 48Elyo umo abutuka ayabuula umwepu. Autumpika mu mwangashi uwakantuka. Elyo autunga kwitete, amutambika ukuti anwe. 49Bambi bena balasosa abati, “Pembeleni, lekeni tumone nga Eliya alaisa mupususha!” 50Elyo Yesu apunda ne shiwi ilikalamba, aleka no mweo. 51#Ukuf 26:31-33Apopene icisalu balecinga mwi Tempele calepuka pakati ukufuma pamulu ukufika na panshi. Elyo icalo calatenta, na mabwe yalalepauka. 52Amabwe ya pa nindi yaisuka, na bamushilo abengi abafwile bashukuka. 53Bafuma na mu nindi. Nomba panuma ya kushukuka kwakwa Yesu, aba bantu baisa mu musumba wa Yerusalemu, bamonekela na ku bengi. 54Umukalamba wa fita umwanda umo, pamo pene ne fita ifyalelinda Yesu, bati bamone icinkukuma na fyonse ifyacitike, baikatwa no mwenso. Balasosa abati, “Cine cine uyu ni Mwana Lesa!” 55Palipo na banakashi abengi akatalamukila, baletamba. Bafumine ku Galile, balekonka Yesu no kumutangata. 56Pali aba palipo Maria Mandalena, Maria nyina kwa Yakobo na Yosefu, na nyina wa bamwana Sebede.

Bashika Yesu

(Mako 15:42-47; Luka 23:50-56; Yoani 19:38-42)

57Cilya caba ku cungulo, kwaishile umuntu umo umukankala umwina Alimateya, ishina lyakwe ni Yosefu. Uyu muntu nao ali musambi wakwa Yesu. 58Kanshi aya kuli Pilato, aya mulomba icitumbi cakwa Yesu. Pilato nao aeba ukuti bamupeele. 59Yosefu epakubuula icitumbi, acipomba na mu nsalu iyisuma. 60Acibika na mu nindi yakwe iyipya, iyo afukwile mu cilibwe. Elyo akunkulushishapo ilibwe likalamba pa mwinshi wa nindi, afumapo aya nokuya. 61Maria Mandalena, na Maria mubiye, bena epo bali, nabekala apalungatene ne nindi.

Balonda inindi

62Ilyo bwaisaca, ninshi ubushiku bwakupekanya ubushiku bwe Sabata nabupita, bashimapepo bacindami na Bafalise baya longana kwa Pilato. 63Balamweba abati, “Kanabesa, natwibukisha ukuti ulya muntu wabufi ilyo acili umumi alandile ati, ‘Nkashukuka panuma ya nshiku shitatu.’ 64Kanshi konkomesheni ukuti kube abakulonda inindi mpaka na pa bushiku bwalenga shitatu. Pantu limbi kuti abasambi bakwe baisa mwiba, elyo abati, nashukuka ku bafwa. Ninshi ubu bufi bwa pakulekelesha bukabipisha ukucila ubwantanshi.” 65Pilato abeba ati, “Kanshi sendeni abakulonda. Mumone ukuti balalinda bwino bwino ifyo mwishibe.” 66Awe baya bakomenena inamba pa cilibwe ca pa nindi, bashapo na bakulonda.

Currently Selected:

Mateo 27: ILL15

Highlight

Copy