Icitendekelo 28
28
1Kanshi Isaki aitile Yakobo no kumupaala, amukonkomesha ati, “Iwe wikopa umwanakashi umwina Kenani. 2Ima akuya ku calo ca Padani Aramu#28:2 Padani Aramu: Moneni Icite 25:20. kwa Betueli, sokulu uwafyala banoko. Uli nokuupa umo pa bakashana bamwana Labani ndume ya banoko. 3Lesa Umwine wa maka yonse#28:3 Lesa Umwine wa maka yonse: Mu Cihibulu mwaba ukutila, “El Shaddai.” engakupaala, akakupeele ubufyashi, akakusandulule, mpaka ukabe ibumba lya mishobo ya bantu. 4#Icite 17:4-8Lesa engakupeela iwe pamo na ba mu lupwa lobe ipaalo apeele Abrahamu, pakuti cino calo umo nomba wikala ngo mweni, ukacipoke cikabe calo cobe.” 5Elyo Isaki aleka Yakobo ukuya, nao aya ku calo ca Padani Aramu, kuli Labani mwana Betueli umwina Aramu, ndume yakwa Rebeka, nyina wakwa Yakobo na Esau.
Esau aupilapo umwanakashi na umbi
6Nomba Esau aumfwile ukuti Isaki alipaala Yakobo kabili alimutuma ku Padani Aramu pakuti eko akaye upila. Kabili aumfwile nokuti, ilyo amupaalile, alimukonkomeshe ati, “Wikopa umwanakashi umwina Kenani” 7elyo nokuti Yakobo nao alibeela wishi na nyina aliya na ku Padani Aramu. 8Esau epakushininkisha ukuti wishi Isaki tatemwa abanakashi abena Kenani. 9Kanshi Esau ekuya kuli Ishimaeli mwana Abrahamu, aupa na Mahalati mwana Ishimaeli, nkashimbiye kwa Nebaiyoti, ukulunda pa bakashi akwete kale.
Iciloto cakwa Yakobo ku Betele
10Yakobo afumine ku Beresheba, alungama ku Harani. 11Ilyo afikile pa ncende imo, ico akasuba kawa, epo asendama ubo bushiku. Abuulapo ilibwe limo epo asaila, alala nokulala. 12#Yoani 1:51Alota iciloto umo amwene umutanto ushimpile panshi, kabili ufikile na mu mulu. Elyo bamalaika bakwa Lesa balenina no kwika pa mutanto. 13#Icite 13:14-15Pa mulu wauko, amona Yawe naiminina.#28:13 Amona Yawe naiminina: Ba Baibele bamo batila, “eminine apo ali.” Elyo amweba ati, “Nine Yawe, Lesa wakwa wiso Abrahamu kabili Lesa wakwa Isaki. Ici calo ulelepo niwe nkapeela pamo na ba mu lupwa lobe. 14#Icite 12:3; 22:18Aba mu lupwa lobe bakafula kwati lukungu lwa pano isonde. Mukasalangana ukufika na ku masamba, ku kabanga, ku kapinda ka kuso na ku kapinda ka kulyo. Kabili imishobo yonse iya pano isonde ikapaalilwa muli iwe no lupwa lobe. 15Mona, ine naba nobe lyonse, nakulakusunga konse uko wakulaya. Kabili nkakubwesesha kuli cino cine calo. Nshakakulekeleshe mpaka nkacite fyonse ifyo nakulaya.” 16Cilya Yakobo abuuka mu tulo, asosa ati, “Cine cine pano pantu Yawe epo ali, na ine nshacishiba.” 17Yakobo epakumfwa umwenso, asosa nokuti, “We ncende nobe ulakatama! Iyi ncende teyafye, ni ŋanda yakwa Lesa! Iyi e mpongolo ya ku mulu.”
18Ubushiku bwakonkelepo lucelocelo, Yakobo abuula ilibwe asailepo, alimika pakuti libe icakwibukishishako. Elyo aitila amafuta#28:18 Aitila amafuta: Yakobo aitila amafuta ya miolifa pakutuula ilibwe kuli Lesa. pa mulu we libwe. 19Yakobo ainika iyo ncende ishina lya Betele,#28:19 Betele: Ili ishina lya Cihibulu, kabili calola mukuti “iŋanda yakwa Lesa.” nangu uyu musumba kale waleitwa Lusi. 20Elyo Yakobo alaya icilayo ati, “Nga cakuti Lesa akulaba na ine, no kunsunga pali ulu lwendo ndipo, no kulampeela ifyakulya ne fyakufwala, 21pakuti nkabwelele na ku ŋanda ya batata umutende, ninshi Yawe ewakulaba Lesa wandi. 22Kabili ilibwe njiminike lyakulaba e ŋanda yakupepelapo Lesa. Kabili pali fyonse ifyo ukampeela, nkalabuulapo cimo pekumi no kukupeela.”
Currently Selected:
Icitendekelo 28: ILL15
Highlight
Share
Copy
Want to have your highlights saved across all your devices? Sign up or sign in
Bible Society of Zambia