Imilimo 1

Amashiwi yakutampilako

1Mukwai ba Teofili, mu citabo candi icakubalilapo nalilembamo fyonse ifyo Yesu acitile nefyo alefunda, 2ukufumafye apo atampile ukufikafye nelyo asendelwe ku mulu. Ilyo talati asendwe ku mulu, Yesu ku maka yakwa Mupashi Wamushilo akonkomeshe abasole bakwe abo aisalile umwine. 3Panuma ya macushi yakwe, Yesu aleilanga ku basole imikufye iyingi pa nshiku amakumi yane, pakuti bashininkishe ukuti ali umumi. Alebafunda pa mulandu wa Bufumu bwakwa Lesa. 4#Luka 24:49Kanshi bushiku bumo ilyo Yesu ali nabo pamo,#1:4 Yesu ali nabo pamo: Ba Baibele bamo batila, “Yesu alelya nabo pamo.” abakonkomeshe ati, “Tamuli nakufuma mu Yerusalemu, lelo mupembele ico Tata alaya. Eco namwebelapo nati, 5#Mateo 3:11; Mako 1:8; Yoani 1:33Yoani alebatisha ku menshi, lelo imwe mu nshikufye isha mpendwa mukabatishiwa kuli Mupashi Wamushilo.”

Yesu asendwa ku mulu

(Mako 16:19-20; Luka 24:50-53)

6Ilyo abasole balongene pamo, elyo baipwishe Yesu abati, “We Mfumu, bushe ni pali ino ine nshita elyo walabwesesha ubufumu ku bena Israeli?” 7Yesu abaswike ati, “Uyo te mulimo wenu ukwishiba inshiku ne nshita, Tata umwine apima ku maka yakwe. 8#Mako 16:15; Luka 24:47-48Lelo ilyo mukapoka amaka yakwa Mupashi Wamushilo, lyena mukaba bakambone bandi mu Yerusalemu, mu Yudeya monse, na mu Samaria, mpakafye no kwapelela icalo.” 9#Mateo 10:2; Mako 3:16-19Cilyafye alanda ifi, awe bamona uko alesendwa ku mulu, paisa ne kumbi baleka no kumumona.

10Kanshi ilyo bacili balelolekesha ku mulu, awe apopene bamona abantu babili, bafwele insalu ishabuuta. Baisa iminina na apo bali. 11Balabeba abati, “Mwe bena Galile, cinshi mwimininine apo mulelolesha na ku mulu? Uyu Yesu mwamona asendwa ku mulu ukufuma apo muli, efyo akabwela ngefi fine mwacimona aleya ku mulu.”

Impyani yakwa Yuda wa ku Kelyoti

12Elyo abasole babwelelemo ku Yerusalemu ukufuma ku lupili ulo batila, Ulupili lwa Miolifa. Ulu lupili lwaba mupepi no musumba, teti cifike na ku mulundu umo. 13Cilya baingila mu musumba wa Yerusalemu, baya mu ŋanda mu muputule wa pamulu umo baleikala. Abalimo ni Petelo, Yoani, Yakobo na Andele, Filipo na Toma, Batolomeo na Mateo, Yakobo mwana Alufeyo, Simoni uo baleti “Umuselote,”#1:13 Abaselote: Libumba lya bantu abalelwila ubuntungwa pantu icalo ca bena Israeli caleteekwa na bena Roma. elyo na Yuda mwana Yakobo. 14Aba bonse balelonganafye ilingi aba mutima umo, kukupepa pamo na banakashi, na Maria nyina wakwa Yesu na bamunyina bakwa Yesu.

15Mu nshiku shine isho abasambi baisa longana ku cilye. Ni cikanga bali bonse pamo umwanda umo na makumi yabili (120). Elyo Petelo aiminina alabeba ati, 16“Mwe bamunyinane, ifyalembwa mu Malembo Yamushilo, ifyo Mupashi Wamushilo alengele kale ukulanda Davidi pa mulandu wakwa Yuda, fyali nokufikilishiwa. Yuda ewatungulwile abakwikata Yesu. 17Yuda ali wa mwibumba lyesu, kabili twalebombafye nankwe uyu wine mulimo.”

18(Yuda, mu ndalama shamisoka apokele, ashitilemo ibala. Muli ili line ibala emo aponene kamfulimukonko, elyo alepuka, na mala yakwe yonse yapongoloka. 19Abantu bonse abekala mu Yerusalemu balyumfwileko ici cintu. Eico ili bala mu lulimi lwabo batila, Akeldama, calola mukutila, “Ibala lyamisoka.”)

20 # Amalu 69:25; 109:8 “Pantu calembwa mu citabo ca Malumbo ukuti,

“‘Lekeni iŋanda yakwe ishale icipompa,

pekaba nelyo umo uwakwikalamo.’

Elyo nakabili calembwa ukuti,

‘Lekeni papyane umbi pa mulimo wakwe.’

21“Kanshi tuli nokusala umuntu umo pali aba bantu abali na ifwe inshita yonse, ilyo twaleendauka ne Mfumu Yesu. 22Uwali na ifwe ukufumafye ilyo Yoani atampile ukubatisha, ukufikafye nelyo Yesu asendelwe ku mulu. Uyu muntu afwile ukuba kambone pamo na ifwe palwa kushukuka kwakwa Yesu.” 23Awe babuulapo abantu babili, Yosefu uo baleita Basaba, ishina lyakwe limbi ni Yusito, elyo na Matia. 24Elyo balapepa abati, “We Mfumu iwe walishiba imitima ya bantu bonse. Kanshi tulange uo wasalapo pali aba babili. 25Uwakuti abuule imilimo ya basole, iyo Yuda asha pakuya ku cifulo ico aifwaile umwine.” 26Elyo balapendula. Awe cawila Matia. Kanshi Matia epakumubika pa basole ikumi limo na umo.

Currently Selected:

Imilimo 1: ILL15

Highlight

Copy