مَرقُس ۱۶

۱۶

عیسی ویریشتن جٚه مورده‌یأن

۱ وختی شَبّاتٚ روز تومانَ بو، مریمٚ مجْدلیّه و مریم یعقوبٚ مار عطریات بیهه‌ییدی کی بیشید عیسی جسدَ تدهین بوکونید. ۲ پس اوّلی روزٚ هفته، صُبٚ دم کی تازه آفتاب بوجور اَمون‌دوبو، رأ دکفتید بوشویید قبرٚ طرف. ۳ اوشأن کس‌کسَ گفتید: «کی سنگَ اَمِره جٚه قبرٚ دَهأنه جُلُو گرَ دٚه؟» ۴ ولی وختی خوشأنٚ سرَ راستَ گیفتیدی، بیده‌یید او سنگ به او پیله‌کی، جٚه مقبره جُلُو گرَ خورده. ۵ وختی بوشویید قبرٚ دورون، ایتأ جوانَ بیده‌یید کی راسٚ طرف نیشته‌بو و ایتأ سیفیدٚ ابا دوکوده دأشتی. اونٚ دِئنٚ جأ اوشأنَ ترسَ گیفته. ۶ جوان اوشأنَ بوگفته: «نوأ ترسئنید! شومأن عیسای ناصری دونبأل گردیدی کی مصلوب بوبوسته. اون، مورده‌یأنٚ دونیا جأ ویریشته! اَیه نئسَه. جایی کی اونٚ جسدَ بنَه‌بید بیدینید. ۷ اَسأ بیشید و اونٚ شاگردأن و پطرسَ بیگید کی ‹اون، شیمی جأ جُلُوتر شه جلیل و اویه اونَ دینیدی، هوطو کی پیشترأن شمرَ بوگفته‌بو.›» ۸ پس زنأکأن بمویید بیرون و قبرٚ جأ فرار بوکودید، چره کی اوشأنٚ جانَ لرز دکفته‌بو و پریشأن بید. اوشأن هیکسَ هیچی نوگفتید، چره کی ترسه‌ییدی.

۹ وختی عیسی اوّلی روزٚ هفته صُبٚ دم مورده‌یأنٚ دونیا جأ ویریشته، اوّل مریمٚ مجْدلیّه‌یَ ظاهیرَ بوسته کی هفت‌تأ دیو اونٚ جأ بیرونَ کوده‌بو. ۱۰ مریمم بوشو و عیسی یارأنَ کی عزاداری کودَن‌دیبید وأخبرَ کوده. ۱۱ ولی اوشأن وختی بیشتأوستید کی عیسی زندَه بوسته و مریم اونَ بیده، باور نوکودید.

۱۲ بأزون عیسی عوضَ بوسته دیمٚ اَمرأ رأ دورون دو نفر جٚه اوشأنَ ظاهیرَ بوسته کی شوئون‌دیبید ایتأ دیهأت. ۱۳ او دو‌تأ وأگردستیدی و الباقی‌یَ وأخبرَ کودید، ولی اوشأنٚ گبم هیکس بأور نوکوده.

۱۴ بأزین هَطو کی غذا خوردنٚ رِه نیشته‌بید، عیسی او یازده نفرَ ظاهیرَ بوسته و اوشأنَ بی‌ایمانی و سخت‌دیلی وأسی توبیخ بوکوده، چره کی اوشأنٚ گبَ باور نوکودید کی گفتید عیسایَ بعدٚ اَنکی مورده‌یأنٚ دونیا جأ ویریشته، بیده بید. ۱۵ بأزون اوشأنَ بفرمأسته: «بیشید دونیا همه جا و خوروم خبرَ تومامٚ خلقٚ رِه موعظه بوکونید. ۱۶ هر کی ایمأن بأوره و تعمید بیگیره نجات یأفه. ولی هر کی ایمأن نأوره محکوم به. ۱۷ و اَ نیشأنه‌یأن ایماندارأنٚ اَمرأ مأنه: می نامٚ اَمرأ دیوأنَ بیرونَ کونید و تازه زوانأنٚ مره گب زنیدی ۱۸ و اگه لنتی‌یأنَ خوشأنٚ دسأنٚ اَمرأ بیگیرید و آدمکوشٚ زهر بوخورید، اوشأنَ هیچی نیبه، و مریضأنٚ سر دس نیهیدی و اوشأن شفا گیرید.»

۱۹ عیسی کی خوداوند ایسه بعدٚ اَنکی اَ گبأنَ اوشأنَ بفرمأسته، آسمان ببرده بوبوسته و خودا راسٚ دس بینیشته. ۲۰ اوشأنم بوشویید بیرون و همه جا موعظه بوکودید و خوداوند اوشأنٚ اَمرأ کار کودی و خو کلامَ، نیشأنه‌یأنی اَمرأ کی اوشأنٚ مره بو، ثابت کودی.#۱۶‏:۲۰ آیه ۹ تا ۲۰ دوتأ جٚه قدیمی طومارأنٚ دورون ننه، ولی الباقی طومارأنٚ دورون نهَه و ویشترٚ قدیمی پیله رهبرأن کی کلیسایأنَ رأ تاودَه‌‌ییدٚ نیویشته‌یأن دورون شأ دِئن.

Currently Selected:

مَرقُس ۱۶: گیلکی (رشتی)

Highlight

Copy