متّی ۲۵
۲۵
مثَلٚ ده‌تأ باکره دُختر
۱ «او روز آسمانٚ پادشایی ده‌تأ باکره دُخترٚ مأنستن به، کی خوشأنٚ چراغأنَ اوسأدیدی و دامادٚ پیشوازٚ وأسی بیرون بوشوییدی. ۲ پنج‌تأ جٚه اوشأن دانا و پنج‌تأ دیگر نادان بید. ۳ باکره‌یأنٚ نادان خوشأنٚ چراغأنَ اوسأدیدی، ولی روغنٚ ایضافه خوشأنٚ اَمرأ نبردیدی. ۴ ولی دانایأن، خوشأنٚ چراغأنٚ اَمرأ ظرفأنی پور جٚه روغنم ببردیدی. ۵ چون دامادٚ اَمون طول بکشه، همه‌تأنٚ چومأن سنگینَ بوسته و بوخوفتیدی. ۶ نیصفٚ شب اینفر فریاد بزه و بوگفته: ‹داماد اَمون دره! بیشید اونٚ پیشواز!› ۷ بأزین همه‌یٚ باکره‌یأن ویریشتیدی و خوشأنٚ چراغأنَ آمادَه کودید. ۸ نادانأن، دانایأنَ بوگفتیدی: ‹ایپچه شیمی روغنَ اَمرَ فدید، چره کی اَمی چراغأن خاموشَ بوستن دره.› ۹ ولی دانایأن جواب بدَه‌ییدی: ‹فَندیم، چونکی روغن اَمی همه‌تأنٚ‌ره کفاف نده، بیشید فوروشنده‌یأنٚ جأ شِمره بیهینید.› ۱۰ امّا وختی کی اوشأن بوشوییدی بیرون روغن بیهینید، داماد فأرسه و باکره‌یأنی کی آماده بید، اونٚ اَمرأ بوشوییدی جشنٚ عروسی دورون و در دٚوٚسته بوبوسته. ۱۱ بأزین باکره‌یأنٚ دیگرم فأرسه‌ییدی و بوگفتیدی: ‹آقا جان، آقا جان، درَ اَمِره وازَ کون!› ۱۲ ولی داماد اوشأنَ بوگفته: ‹آمین شمرَ گم کی من شمرَ نشنأسم.› ۱۳ پس بیدار بِیسید، چونکی او روز و ساعتٚ جأ خبر نأریدی.
مثَلٚ سه‌تأ غولام
۱۴ «هَطویم آسمانٚ پادشایی ایتأ مردأکٚ مأنه کی تصمیمٚ سفر دأشتی. اون خو غولامأنَ دوخوأده و خو مال و منالَ اوشأنٚ دس بیسپرده؛ ۱۵ هر غولامی‌یَ به اندازه‌یٚ اونٚ توانایی، اوّلی‌یَ پنج هیزارتأ، دوّمی‌یَ دو هیزارتأ و سومی‌یَ هیزارتأ سکه‌یٚ طلا فدَه. بأزین بوشو سفر. ۱۶ او غولامی کی پنج هیزارتأ سکه فیگیفته‌بو، بی‌معطلی شروع بوکوده او پولٚ اَمرأ کار کودن و پنج هیزارتأ سکه‌یٚ دیگر سود بوکوده. ۱۷ هَطو اونی کی دو هیزارتأ سکه دأشتی، دو هیزارتأ دیگر سود بوکوده. ۱۸ ولی اونی کی هیزارتأ فیگیفته‌بو، بوشو زیمینَ بکنده و خو اربابٚ پولَ جیگا بدَه.
۱۹ «ایتأ مدت زماتٚ طولانی بوگوذشته، او غولامأنٚ ارباب وأگردسته و اوشأنٚ جأ حیساب بخوأسته. ۲۰ غولامی کی پنج هیزارتأ سکه فیگیفته‌بو، پنج هیزارتأ دیگرم خو اَمرأ بأورده و بوگفته: ‹آقا جان، مرَ پنج هیزارتأ سکه فدَیی، بیدینید پنج هیزارتأ دیگرم سود بوکودم.› ۲۱ اونٚ ارباب بوگفته: ‹آفرین، اَی غولامٚ خُب و امین! چیزأنٚ کمٚ دورون امین بی، پس چیزأنٚ زیادی‌یَ ترَ ایسپأرم. بیأ و تی اربابٚ شادی میأن شریکَ بو!› ۲۲ غولامی کی دو هیزارتأ سکه فیگیفته‌بو هم بمو جُلُو و بوگفته: ‹آقا جان، مرَ دو هیزارتأ سکه بیسپردی، بیدینید، دو هیزارتأ دیگرم ایستفاده بوکودم.› ۲۳ اونٚ ارباب بوگفته: ‹آفرین، اَی غولامٚ خُب و امین! چیزأنٚ کمٚ دورون امین بی، پس چیزأنٚ زیادی‌یَ ترَ ایسپأرم. بیأ و تی اربابٚ شادی میأن شریکَ بو!› ۲۴ او وخت غولامی کی هیزارتأ سکه فیگیفته‌بو، بمو جُلُو و بوگفته: ‹چون دأنستیم کی مردٚ سختگیری ایسی، جایی کی نکاشتی، وَوینی و جایی کی نپاشأنه‌یی، جمَ کونی، ۲۵ پس بترسئم و بوشوم تی پولَ زیمینٚ میأن قأیمَ کودم. بفرما، تی پول!› ۲۶ ولی اونٚ ارباب بوگفته: ‹اَی غولامٚ شرور و تنبل! تو کی دأنستی جایی کی خودم نکاشتم، وَوینم و جایی کی نپاشأنئم، جمَ کونم، ۲۷ پس چره می پولَ صرافأنَ فنده‌یی تا وختی کی وأگردستم، اونَ بهره اَمرأ پس فیگیرم؟› ۲۸ بأزین بوگفته: ‹او سکه‌یأنَ اونٚ جأ فیگیرید و فدید او غولامی‌یَ کی ده هیزارتأ دأره. ۲۹ چونکی اونی کی دأره، اونَ ویشتر فدَه به تا زیادتر بدأره، ولی اونی کی ایپچه دأره، هونم اونٚ جأ فیگیفته‌به. ۳۰ اَ غولامٚ بی‌عرضه‌یَ بیرونٚ تاریکی میأن تأودید، جایی کی گریه کونیدی و دندانأنَ سر به سر سابیدی.›
داوری روز
۳۱ «وختی کی اینسأنٚ پسر خو جلال و شکوه و همه فرشته‌یأنٚ اَمرأ بأیه، خو تختٚ پورشکوه سر نیشینه ۳۲ و همه‌یٚ قومأن اونٚ جُلُو حاضرَ بیدی. او وخت اون ایتأ چوپأنٚ مأنستن کی گوسفندأنَ، بوزأنٚ جأ سیوأ کونه، مردومأنَ دو دسته کونه. ۳۳ گوسفندأنَ خو راستٚ دس و بوزأنَ خو چپٚ دس قرار دهه. ۳۴ بأزین اوشأنی‌یَ کی اونٚ راستٚ طرف ایسَه‌ییدی، گه: ‹بأیید، اَی شومأنی کی می پئرٚ جأ برکت فیگیفتیدی، پادشایی‌یَ ارث ببرید، کی جٚه اوّلٚ خلقتٚ دونیا شِمره آمادَه بوسته‌بو. ۳۵ چونکی مرَ ویشتأ بو، مرَ غذا فدَه‌ییدی؛ تشنه بوم، مِره آب بأوردیدی؛ غریب بوم، مرَ جا و مکان فدَه‌ییدی. ۳۶ لخت بوم، مرَ لیباس دوکودیدی؛ مریض بوم، می عیادت بموییدی؛ زندانی بوم، می مولاقات بموییدی.› ۳۷ او وخت دوروستکارأن جواب دیهیدی: ‹آقا جان، کِی ترَ گوشنه بیده‌ییم و ترَ غذا فدَییم، یا تشنه بیده‌ییم و تِره آب بأوردیم؟ ۳۸ کِی ترَ غریب بیده‌ییم و ترَ جا و مکان فدَییم و یا ترَ لخت بیده‌ییم و ترَ لیباس دوکودیم؟ ۳۹ کِی ترَ مریض یا زندانٚ میأن بیده‌ییم و تی عیادت بموییم؟› ۴۰ پادشا جواب دهه: ‹آمین شمرَ گم، اونچی کی ایتأ جٚه می کوجه‌ترین برأرأن و خأخورأنٚ رِه انجام بدَه‌ییدی، در واقع مِره انجام بدَه‌ییدی.› ۴۱ بأزین پادشا اوشأنی‌یَ کی اونٚ چپٚ طرف ایسَه‌ییدی، گه: ‹اَی ملعونأن، می جأ دورَ بید و بیشید آتشٚ جاودانی میأن کی شیطأن و اونٚ فرشته‌یأنٚ‌ره آمادَه بوسته. ۴۲ چونکی گوشنه بوم، مرَ غذا فندَ‌ه‌ییدی، تشنه بوم، مِره آب نأوردیدی. ۴۳ غریب بوم، مرَ جا فنده‌ییدی، لخت بوم، مرَ لیباس دونکودیدی، مریض و زندانی بوم، می مولاقات نَموییدی.› ۴۴ اوشأنم جواب ده‌ییدی: ‹آقا جان، کِی ترَ گوشنه، تشنه، غریب، لخت، مریض و زندانٚ میأن بیده‌ییم و ترَ خدمت نوکودیم؟› ۴۵ اون جواب دهه: ‹آمین شمرَ گم، اونچی کی ایتأ جٚه اَ کوجه‌ترینأنٚ‌ره انجام ندَییدی، ینی مِره انجام ندَییدی.› ۴۶ بأزین اوشأن موجازاتٚ اَبدی دورون شیدی، امّا دوروستکارأن حیاتٚ اَبدی دورون.»
Currently Selected:
متّی ۲۵: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
