لوقا ۶
۶
اینسأنٚ پسر شَبّاتٚ روزٚ صاحاب ایسه
۱ شَبّاتٚ روزٚ رِه عیسی گندم زارأنٚ میأن شوئون دوبو کی اونٚ شاگردأن گندمأنٚ خوشه‌یَ چه‌ییدی، خوشأنٚ دسٚ اَمرأ سابانه‌ییدی و خوردیدی. ۲ بعضی جٚه فریسیأن، اوشأنٚ جأ وأورسه‌ییدی: «چره کاری‌یَ کودَن‌درید کی شَبّاتٚ روزٚ رِه جایز نی‌یه؟» ۳ عیسی اوشأنَ بوگفته: «مگه شومأن خودا کلامَ نخوأندید کی داوودٚ نبی چی بوکوده وختی خودش و اونٚ یارأنَ ویشتأ کوده؟ ۴ داوود بوشو خودا خانه دورون و نانی‌یَ کی تقدیس بوبوسته‌بو و فقط کاهنأن تأنستید اونَ بوخورید، هم خودش بوخورده و هم خو یارأنَ فدَه. ۵ اینسأنٚ پسر شَبّاتٚ صاحابم ایسه.»
ایتأ مردأکٚ دسٚ شفا گیفتن، شَبّاتٚ روزٚ رِه
۶ ایتأ شَبّاتٚ روزٚ دیگر، عیسی بوشو کنیسه دورون و مردومأنَ تعلیم دَئن دوبو. هویه ایتأ مردای ایسَه‌بو کی اونٚ راستٚ دس خوشکَ بوسته‌بو. ۷ دینٚ علما و فریسیأن منتظرْوخت بید، کی بیدینید عیسی او مردأکَ شبّات روزٚ رِه شفا دهه یا نده، چونکی بهانه دونبأل بید کی اونَ محکوم بوکونید. ۸ امّا عیسی کی اوشأنٚ فیکرٚ جأ وأخبر بو، او مردأکَ بوگفته: «ویریز، همه‌تأنٚ جُلُو بپا بِیس.» اونم ویریشته اویه بپا بِیسه. ۹ عیسی فریسیأن و دینٚ علمایَ بفرمأسته: «شمرَ ایچی وأورسم، مرَ جواب بدید. شَبّاتٚ روزٚ دورون خُبی کودن جایزه یا بدی کودن؟ اینسأنٚ جانَ نجات دَئن یا اونَ هلاکَ کودن؟» ۱۰ بأزین ایتأ ایتأ اوشأنَ فندرسته و او مردأکَ بوگفته: «تی دسَ درازَ کون.» اونم هَه کارَ بوکوده و اونٚ دس سالمَ بوسته. ۱۱ اوشأن همه‌تأنَ غیظَ گیفته و کس‌کسٚ اَمرأ مشورت بوکودید و بوگفتیدی: «هسأ عیسی اَمرأ چی وأ کودن؟»
دوازده‌تأ رسولٚ اینتخاب کودن
۱۲ ایروز عیسی دوعا کودنٚ وأسی بوشو کوه جور و شب تا صُب خودا اَمرأ راز و نیاز بوکوده. ۱۳ وختی کی صُبٚ دم بوبوسته، خو شاگردأنَ دوخوأده و دوازده‌تأ جٚه اوشأنَ اینتخاب بوکوده و اوشأنَ «رسول» دوخوأده:
۱۴ شمعون کی اونَ پطرس نام بنَه،
آندریاس پطرسٚ برأر،
یعقوب،
یوحنا،
فیلیپُس،
برتولما،
۱۵ متّی،
توما،
حلفی پسر، یعقوب،
شمعون کی معروف به غیور بو
۱۶ یعقوبٚ پسر، یهودا
و یهودا اسخریوطی کی عیسایَ خیانت بوکوده.
خوش بحالٚ شومأن
۱۷ بأزین عیسی و اونٚ شاگردأن، کوه جأ بیجیر بموییدی و صافٚ زیمینٚ سر بِیسَه‌یید. خیلی جٚه اوشأنی کی عیسایَ ایمأن بأورده‌بید و هَطو خیلی جٚه مردومأن یهودیه اوستان سراسرٚ جأ و اورشلیم و حتی صور و صیدونٚ دریا کنارٚ جأ بمو بید اویه ۱۸ کی عیسی گبأنَ گوش بدید و خوشأنٚ ناخوشی‌یأنٚ جأ ساق و سالم بیبید. اوشأنی‌یم کی پلیدٚ روحأن اوشأنَ گیرفتارَ کوده‌بو، آزادَ بوستید. ۱۹ مردومأن تلاش کودیدی کی خوشأنَ عیسایَ فأرسأنید و اونَ لمس بوکونید، چونکی قودرتی عیسی جأ بیرون اَمویی کی همه‌تأنَ شفا دَیی.
۲۰ بأزین عیسی خو شاگردأنَ فندرسته، بوگفته:
«خوش بحالٚ شومأنی کی فقیریدی،
چونکی خودا پادشایی شیمی شینه.
۲۱ خوش بحالٚ شومأنی کی گوشنه ایسیدی،
بأزین سِرَ بیدی.
خوش بحالٚ شومأنی کی اَرسو فوکونید،
چونکی شیمی خنده زمأتم فأرسه.
۲۲ «خوش بحالٚ شومأنی کی می وأسی، مردوم خوشأنٚ دیمَ شیمی جأ وأگردأنیدی و شمرَ جٚه خوشأنٚ ورجأ دورَ کونیدی، شمرَ ناسزا گیدی و بدنامَ کونیدی. ۲۳ او وختأن شادی بوکونید و خوش بیبید، چونکی شیمی اجر آسمانٚ جور پیله‌دأنه‌یه. اَشأنٚ پئرأنم، پیغمبرأنٚ اَمرأ هَه کارَ بوکودید.
۲۴ «امّا وای بحالٚ شومأن پولدارأن،
چونکی شیمی خوشی فقط هَه دونیا شینه.
۲۵ وای بحالٚ شومأنی کی هسأ سِریدی،
بأزین شمرَ ویشتأ کونه.
وای بحال شومأنی کی هسأ خنده کونیدی،
شیمی گریه و زاری وختم فأرسه.
۲۶ «وای بحالٚ شومأن وختی کی همه‌تأن شیمی جأ تعریف بوکونید، چونکی اَشأنٚ پئرأنم هَه کارَ دورُغی پیغمبرأنٚ اَمرأ بوکودید.
دوشمنأنَ موحبت کودن
۲۷ «شومأن کی می گبأنَ گوش کودَن‌دریدی، شمرَ گم کی شیمی دوشمنأنَ موحبت بوکونید و اوشأنی‌یَ کی شیمی جأ نیفرت دأریدی خُبی بوکونید. ۲۸ اوشأنٚ رِه کی شمرَ نفرین کونیدی، خوداوندٚ جأ برکت بخوأیید. اوشأنم کی شیمی اَمرأ بد رفتاری کونیدی اوشأنٚ رِه‌یم دوعای خیر بوکونید. ۲۹ اگه اینفر شیمی دیمَ چک بزه، وئلید شیمی او طرفٚ دیمم بزنه. اگه کسی شیمی ردایَ فیگیفته، شیمی پیراهنم اونَ فدید خو اَمرأ ببره. ۳۰ هر کی چیزی شیمی جأ بخوأسته، اونَ فدید و اگه کسی چیزی‌یَ کی شیمی شینه شیمی جأ فیگیره، دِه اونٚ جأ نوأ خوأستنید شمرَ وأگردأنه. ۳۱ مردومٚ اَمرأ هوطو رفتار بوکونید کی خوأییدی اوشأن شیمی اَمرأ رفتار بوکونید. ۳۲ اگه فقط اوشأنی‌یَ موحبت بوکونید کی اوشأنم شمرَ موحبت کونیدی، چی افتخاری ایسه شِمرِه؟ چونکی گوناهکارأنم خوشأنٚ رِفِقأنَ موحبت کونیدی. ۳۳ اگه فقط کسأنی‌یَ خُبی کونیدی کی اوشأنم شمرَ خُبی کونیدی، چی افتخاری ایسه شِمرِه؟ گوناهکارأنم هَه کارَ کونیدی. ۳۴ اگه تنها کسأنی‌یَ قرض فدیدی کی فیکر کونیدی شمرَ وأگردأنید، اَ کارٚ اَمرأ چی افتخاری ایسه شِمرِه؟ چونکی خطاکارأنم اگه ایطمینان دأریدی کی اَشأنٚ پول وأگرده، همدیگرَ قرض فدیدی. ۳۵ شومأن وأ شیمی دوشمنأنَ دوس بدأرید و اوشأنَ خُبی بوکونید و پولی‌یَ کی قرضَ دیهیدی، اونٚ پسَ گیفتنٚ رافا نئیسید. بأزین ایتأ پیله پاداش آسمانٚ جور فیگیریدی. شیمی هَه کارأنٚ اَمرأ موتعالٚ خودا زأکأن بیدی، چونکی خودا خطاکارأن و ناسپاسانٚ اَمرأ مهربانی مره رفتار کونه. ۳۶ پس شیمی آسمانی پئرٚ مأنستن دیلسوج و مهربان بیبید.
دیگرأنَ قضاوت کودن
۳۷ «دیگرأنَ قضاوت نوکونید کی خودا شمرَ قضاوت نوکونه. هیکسَ محکوم نوکونید کی خودتأن محکوم نیبید. وأ ببخشید کی شومأنم ببخشه بیبید. ۳۸ فدید کی خودا شمرَ فَده. او چیزی‌یَ کی فدیدی دوواره شیمی دس وأگرده، اونم پیله پورٚ پیمانه اَمرأ. دسٚ پُرٚ اَمرأ فدید، دس پُرٚ اَمرأ فیگیرید. دسٚ خالی فدید، دسٚ خالی فیگیریدی.»
۳۹ عیسی ایتأ دِه مٚثٚل اوشأنٚ رِه بأورده و بوگفته: «ایتأ کور تأنه ایتأ کورٚ دیگرَ رأنمایی بوکونه؟ هو وخت هر دوتأ دئنکفیدی چاله دورون؟ ۴۰ هیچ شاگردی خو اوستادٚ پا فئنرسه، ولی هر کی خو تعلیم و تربیتَ خُب کامیلَ کونه خو اوستادٚ مأنستن به.
۴۱ «چره پرٚ کاهَ تی برأرٚ چومٚ دورون دینی ولی روبارخالَ تی چومٚ دورون نیدینی؟ ۴۲ چوطویی تأنی تی برأرَ بیگی: ‹اَی برأر جان، بِیس او پرٚ کاهَ تی چومٚ جأ بیرون بأورم› در صورتی کی ایتأ پیله‌دأنه چوبَ تی چومٚ دورون نیدینی؟ اَی ریاکار، اوّل او چوبَ تی چومٚ جأ بیرون بأور تا بتأنی بهتر بیدینی. بأزین پرٚ کاهَ تی برأرٚ چومٚ جأ بیرون بأور.
درخت و اونٚ میوه
۴۳ «هیوخت خوروم دار بدٚ میوه نأوره و بدٚ دارم خوروم میوه‌یَ فئنده. ۴۴ هر دارَ شأ اونٚ میوه جأ شنأختن. تمشٚ جأ انجیل نشأ چِئن و نه ولشٚ بوته جأ انگور. ۴۵ خوروم آدم، چون اَنٚ دیل پاکه، اونٚ کردکارأنم خُبه. بدٚ آدمم چونکی اونٚ باطن خرابه، اونٚ کردکارأنم خرابه، چونکی اونچی کی اینسأنٚ دیلٚ دورون نهَه‌بی، اونٚ گب زِئنٚ اَمرأ آشکارَ به.
عاقیلٚ معمار و بی‌عقلٚ معمار
۴۶ «چوطویی به کی مرَ ‹آقا، آقا› دوخوأنیدی ولی اونچی کی من گم عمل نوکونیدی؟ ۴۷ هر کی می ورجأ بأیه و می گبأنَ گوش بوکونه، بأزین اونَ عمل بوکونه، شمرَ گم کی مأنستن ایسه. ۴۸ اون، ایتأ مردأکَ مأنه کی خوأیه خو خانه‌یَ چأکونه. اوّل ایتأ چاله کأنه و خو خانه پاکارَ سفتٚ زیمینٚ سر چأکونه. وختی روخانٚ سیل بأیه و او خانه‌یَ زور بأوره، نتأنه او خانه پاکارَ جٚه بین ببره، چونکی سفتٚ جا سر چأکوده بوبوسته. ۴۹ ولی اونی کی می گبأنَ بیشنأوه و عمل نوکونه، او آدمی‌یَ مأنه کی خو خانه‌یَ فورشٚ سر چأکونه و سیلم اَیه، بأزین او خانه فوگُرده.»
Currently Selected:
لوقا ۶: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
