پیدایش ۱۱

۱۱

برجٚ بابل

۱ تومامٚ زیمینٚ مردومأن ایتأ زبان دأشتیدی و ایجور گب زه‌ییدی. ۲ وختی کی مردوم کوچ کودن دیبید کی بیشید شرقٚ طرف، سرزیمینٚ شِنعارٚ میأن ایتأ هموارٚ دشت بیأفتید و اویه ساکنَ بوستید. ۳ اوشأن کس‌کسَ بوگفتید: «بأیید خشت چأکونیم و اوشأنَ خُب بپچیم.» اوشأن سنگٚ عوض، خشتٚ جَا و ملاتٚ عوض، قیرٚ جَا استفاده بوکودید. ۴ بَزین بوگفتید: «بأیید، ایتأ شهر اَمِره چأکونیم و هَطویم ایتأ برج کی سر به فلک اوسَنه و اَطویی نامدار بیبیم، کی تومامٚ زیمینٚ دورون ویلانَ نیبیم.» ۵ ولی خوداوند بیجیر بَمو کی او شهر و برجی کی مردومأن بنا کودَن دیبید، بیدینه. ۶ و خوداوند وأگردسته بوگفته: «هسه اوشأن ایتأ قوم ایسید و همه ایتأ زبان گب زنیدی و اَن تازه اوّلٚ اوشأنٚ کاره؛ دِ هیچ کاری نی‌یه کی بخوأیید انجام بدید و اوشأنٚ ره غیرٚ ممکن ببه. ۷ هسه بأییم بیجیر و اوشأنٚ زبانَ سیوا بوکونیم کی همدیگرٚ گبَ نفهمید.» ۸ پس خوداوند اوشأنَ جٚه اویه تومامٚ زیمینٚ دورون ویلانَ کوده و اوشأن شهر چأکودنٚ جَا دس بکشه‌یید. ۹ هَنٚ وسی او مکانَ «بابل#۱۱‏:۹ زبانٚ عبری دورون، واژه «بابل» و فعلٚ «قر و قاطی بوکوده» شباهتٚ آوایی دأریدی و اَ شباهتٚ جَا عمدا ایستفاده بوبوسته. » نام بنَه‌یید چونکی خوداوند دونیا تومامٚ مردومٚ زبانَ قر و قاطی بوکوده. خوداوند اویه جَا اوشأنَ، تومامٚ زیمینٚ دورون ویلانَ کوده.

سرگذشتٚ ابرام (ایبراهیم) #۱۱‏:۲۷ ابرام هو حضرتٚ ایبراهیمه کی خودا اَ ایسمَ اونٚ‌ره بنَه بو.

۲۷ هَنه سرگذشتٚ تارح. تارح، ابرام و ناحور و هارانٚ پئر بو، و هاران لوطٚ پئر. ۲۸ ولی هاران هویه کی به دونیا بَمو بو، شهرٚ اور، کلدانیأنٚ میأن، بمرده، وختی کی تارح اونٚ پئر هنوز زنده بو. ۲۹ ابرام و ناحور هر دو نفر عروسی کونیدی. ابرامٚ زنٚ نام سارای، ناحور زنٚ نام مِلْکَه بو. مِلْکَه و یِسکه همدیگرٚ اَمرأ خأخور و هاران دوخترأن بید. ۳۰ ولی سارای نازا بو و زأکی نأشتی.

۳۱ تارح خو پسر ابرام، خو نوه لوط کی هارانٚ پسر بو و خو عروس سارای‌یَ #۱۱‏:۳۱ سارای هو سارایه کی خودا اَ ایسمَ اونٚ‌ره بنَه بو. کی ابرامٚ زن بو اوسَده. اوشأن همدیگرٚ اَمرأ از شهرٚ اورٚ کلدانیأن بیرون بوشوییدی کی بیشید کنعان، ولی وختی فأرسه‌ییدی حَران، هویه بِیسَه‌ییدی. ۳۲ تارح ۲۰۵ سال زندگی بوکوده و شهرٚ حرانٚ دورون بمرده.

Currently Selected:

پیدایش ۱۱: گیلکی (رشتی)

Highlight

Copy