خروج ۱۵
۱۵
موسی سرود
۱ بأزین موسی و بنی‌ایسرائیل خوداوندٚ رِه اَطویی سرود بخوأندیدی:
«خوداوندٚ رِه سرود خوأنم
کی جلالٚ اَمرأ پیروزَ بوسته،
اسبأنَ، اسب سوارأنٚ اَمرأ
دوکوده دریا دورون.
۲ خوداوند می قوّت و سرود ایسه،
اون می نجات بوبوسته.
اون می خودایه، پس اونَ پرستش کونم،
می آبااجدادٚ خودا ایسه، پس اونَ جلال دهم.
۳ خوداوند دلیره،
اونٚ نام یهوه ایسه.
۴ فرعونٚ لشکر و جنگی ارابه‌یأنَ
دوکوده دریا دورون.
فرعونٚ پیله سردارأن
دریایٚ سورخٚ میأن غرقَ بوستید.
۵ اوشأن بوشوییدی جولفٚ آبأنٚ جیر؛
سنگٚ مأنستن بوشوییدی دریا تأن.
۶ تی راستٚ دس، اَی خوداوند،
قوّتٚ وأسی پور جلال ایسه.
تی راستٚ دسَ، اَی خوداوند،
دوشمنأنَ دورسنه.
۷ تی جلالٚ عظمتٚ اَمرأ
اوشأنی‌یَ کی تی ضد بید، نابودَ کودی،
تی غضبٚ آتشَ اوسه کودی
کی اوشأنَ کولوشٚ مأنستن بوسوجأنه.
۸ تی نٚفٚسٚ اَمرأ
آبأن سربسر بوجور بمویید.
موج‌دارٚ آبأن دیوارٚ مأنستن راستَ بوستید؛
دریا وسط جولفٚ آبأن یخٚ مأنستن خوشأنٚ جا سر بِیسَه‌ییدی.
۹ دوشمن بوگفته:
‹اوشأنَ دونبألَ کونم و گیرم.
اوشأنٚ مال و منالَ تقسیم کونم،
و اوشأنٚ جأ سِئرَ بم.
می شمشیرَ فأکشم
و می دسٚ اَمرأ اوشأنَ هلاکَ کونم.›
۱۰ ولی تی نٚفٚسٚ اَمرأ
اوشأنَ دریا آبٚ جیر ببردی.
همه‌تأن سربٚ مأنستن
بوشوییدی موج‌دارٚ جولفٚ دریا دورون غرقَ بوستیدی.
۱۱ «اَی خوداوند، جٚه تومامٚ خودایأنی کی مردوم قوبیل دأریدی، کویتأ تی مأنستن ایسه؟
کویتأ ترَ مأنه،
تو کی تی قدوسیت، عظیم ایسه،
تی جلال مهیب ایسه
و پیله عجیبٚ کارأن کونی؟
۱۲ تی راستٚ دسَ درازَ کودی
و زیمین اَمی دوشمنأنَ فٚوٚرسته.
۱۳ «قومی‌یَ کی آزادَ کودی،
تی موحبتٚ همیشگی اَمرأ هیدایت بوکودی
و اوشأنَ تی قودرتٚ اَمرأ به تی موقدّسٚ جایگاه رأنمایی بوکودی.
۱۴ دیگر قومأن بیشتأوستیدی و اوشأنٚ جان پرکستی؛
و فلسطینیأنٚ دیلَ ترس دکفته.
۱۵ ادومٚ رهبرأن وحشت بوکودیدی،
موآبٚ پیله کسأن بپرکستیدی،
و کنعانیأنٚ دیل فووُسته.
۱۶ اوشأنٚ وجودٚ دورون ترس و وحشت دکفته
تی دسٚ قوّتٚ وأسی سنگٚ مأنستن خوشأنٚ جا سر بِیسَه‌ییدی
تا کی تی قوم، اَی خوداوند،
قومی کی تو آزادَ کودی کی تی‌شین ببه، دوأرستید.
۱۷ تو اوشأنَ بودورون اَوری
کی تی کوهٚ سر نیشأنی، هو کوهی کی تی میراث ایسه،
جایی کی تو، اَی خوداوند، تی جایگاه چأکودی
ینی هو موقدّسٚ جایگایَ کی تی دسأنٚ اَمرأ بر پا کودی.
۱۸ خوداوند، پادشایی کونه تا اَبدالاباد.»
۱۹ وختی فرعونٚ اسبأن، ارابه‌یأن و اسب سوارأن بوشوییدی دریا دورون، خوداوند آبَ وأگردأنه اوشأنٚ سر ولی بنی‌ایسرائیل دریا دورون خوشکٚ زیمینٚ سر دوأرستید. ۲۰ بأزین مریم، هارونٚ خأخور کی نبیّه بو، خو دفَ بدسَ گیفته و تومامٚ زنأکأن دف بدس، رقص کونان اونٚ دونبألسر بیرون بمویید. ۲۱ مریم اوشأنٚ رِه اَطویی سرود بخوأنده:
«خوداوندٚ رِه سرود بخوأنید،
چونکی خو جلالٚ اَمرأ پیروزَ بوسته؛
اسبَ، اسب سوارٚ اَمرأ
دوکوده دریا دورون.»
خوداوند تلخٚ آبَ شیرینَ کونه
۲۲ بأزین موسی بنی‌ایسرائیلَ دریایٚ سورخٚ جأ ردَ کوده تا فأرسه‌ییدی بیابانٚ «شور». اوشأن سه روز بیابانٚ میأن رأ بوشویید بدونٚ اَنکی آب بیأفید. ۲۳ فأرسه‌ییدی «مارَه» ولی اویه آب تلخ بو و نتأنستیدی اونَ بوخورید. هَنٚ وأسی او مکانَ «مارَه»#۱۵:۲۳ «مارَه» ینی «تلخ» نام بنَه‌ییدی. ۲۴ پس بنی‌ایسرائیل موسی جُلُو شکایت بوکودیدی و بوگفتیدی: «جٚه کویه آب بأوریم بوخوریم؟» ۲۵ موسی خودا دوخوأنی بوکوده و خوداوند موسایَ ایتأ تیکه چوب نیشأن بدَه. موسی او چوبَ اوسأده تأودَه آبٚ دورون و آب شیرینَ بوسته.
اویه خوداوند ایتأ فریضه و حوکم اوشأنَ فدَه و اَطویی اوشأنَ ایمتحان بوکوده ۲۶ و بوگفته: «اگه هر چی من، ینی یهوه، تی خودا، بفرمأیم خُب گوش بوکونی و اونچی کی دوروست دأنم، بجا بأوری و اگه می حوکمأنَ بیشنَوی و می فریضه‌یأنَ حفظ بوکونی، منم هیچ کدامٚ او بلایأنَ کی مصریأنٚ سر بأوردم تی سر نأورم، چونکی من خوداوند ایسم، کی ترَ شفا دهه». ۲۷ بأزین اوشأن فأرسه‌ییدی «ایلیم»، کی اویه دوازده‌تأ چشمه‌یٚ آب و هفتادتأ خرما دار وجود دأشتی، هویه آبٚ کنار خیمه بزه‌ییدی.
Currently Selected:
خروج ۱۵: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
