خروج ۱۳

۱۳

ارشدٚ پسرأنٚ تقدیم کودن

۱ خوداوند موسایَ بفرمأسته: ۲ «تومامٚ ارشدٚ زأکأنَ، وأستی مِره تقدیم بوکونی. اوّلی زأکی کی جٚه هر رحمی، ایسرائیلٚ دورون بدونیا اَیه، چی اینسأن، چی چارپا، می‌شینه.» ۳ بأزین موسی مردومَ بوگفته: «اَ روزَ عزیز بدأرید، روزی کی مصرٚ جأ بیرون بمویید ینی هو سرزیمینی کی اونٚ دورون غولام بید. چره کی خوداوند خو پور قوّتٚ دسٚ اَمرأ شمرَ مصرٚ جأ بیرون بأورده. هیچی‌یَ تورشٚ خمیرٚ اَمرأ نوخورید.» ۴ ایمروز، ینی اَ ماهٚ «اَبیبٚ»#۴‏:۱۳ اوّلی ماهٚ سال. بابٚ ۱۲ آیه ۲ هم نیگاه بوکونید کی بعداً اَ ماهٚ نام بوبوسته «نیسان». دورون، مصرٚ جأ بیرون شیدی. ۵ بأزین خوداوند ترَ بره سرزیمینٚ کنعانیأن، حیتّیأن، اَموریأن، حِویأن و یِبوسیأن ینی سرزیمینی کی شیمی اجدادٚ رِه قسم بوخورده‌بو ترَ فده، هو سرزیمینی کی اونٚ دورون شیر و عسل جاری ایسه. بأزین اَ ماهٚ دورون، وأستی اَ مراسمَ به جا بأوری: ۶ هفت روز نانی کی تورشٚ خمیر نأره بوخور و هفتمی روز خوداوندٚ رِه ایتأ عید به. ۷ او هفت روزٚ دورون نانی کی تورشٚ خمیر نأره بوخور. تی ورجأ و تی دور و ور نیشأنه‌یی جٚه تورشٚ خمیر پیدا نبه. ۸ او روز تی زأکَ بوگو: ‹اَ مراسم اَ کارٚ وأسی ایسه کی خوداوند او وختی کی مصرٚ جأ بیرون بموم مِره انجام بدَه.› ۹ اَن ایتأ نیشأنه مأنستن تی دسٚ سر و ایتأ یادگاری تی پیشانی سر به، کی ترَ یاد ببه خوداوندٚ شریعت وأستی تی لبٚ رو بمأنه. چره کی خوداوند خو پور قوّتٚ دسٚ اَمرأ ترَ مصرٚ جأ بیرون بأورده. ۱۰ اَ حوکمَ وأستی هر سال هَه موقع انجام بدی.

۱۱ «بأزین کی خوداوند هوطو کی تو و تی اجدادٚ رِه قسم بوخورده‌بو، ترَ بره کنعانیأنٚ سرزیمینٚ دورون و او سرزیمینَ ترَ فده، ۱۲ وأستی اوّلی زأکی جٚه هر رحمَ تقدیمٚ خوداوند بوکونی. جٚه تی چارپایأنم تومامٚ اوّلی نرٚ زأکأن خوداوندٚ شین ایسه. ۱۳ اولاغٚ اوّلی زأکٚ عوض، ایتأ بره فده، ولی اگه فندی، کورّه اولاغٚ گردنَ بشکن. جٚه شیمی پسرأن، هر ارشدٚ پسرٚ وأسی، فدیه فدید#۱۳‏:۱۳ اَ جمله دورون «فدیه» پولی بو کی فدَه‌ییدی کاهنَ کی اوشأنٚ ارشدٚ پسر زنده بمأنه (اعداد بابٚ ۱۸ آیه ۱۶). . ۱۴ اگه فردا تی زأی ترَ وَورسه: ‹اَ کارأنٚ معنی چیسه؟› بوگو: ‹خوداوند خو پور قوّتٚ دسٚ مره، اَمرَ مصرٚ جأ بیرون بأورده، هو سرزیمین کی اونٚ دورون غولام بیم. ۱۵ وختی کی فرعون خو سرسختی اَمرأ، اَمرَ آزادَ نوکودی، خوداوند مصرٚ تومامٚ اوّلی زأکأنَ، جٚه اینسأن و چارپا، بوکوشته. هَنٚ وأسی‌یه کی می حیوانأنٚ اوّلی نرٚ زأکی‌یَ کی هر رحمٚ جأ بدونیا اَیه خوداوندٚ رِه قوربانی کونم و تومامٚ می ارشدٚ پسرأنٚ رِه فدیه فدم.› ۱۶ اَ کار ایتأ نیشأنه مأنستن تی دسٚ سر و ایتأ علامت تی پیشانی سر به، جٚه اَنکی خوداوند خو پور قوّتٚ دسٚ مره، اَمرَ مصرٚ جأ بیرون بأورده.»

خودا بنی‌ایسرائیلٚ وأسی دریا میأن رأ وأکونه

۱۷ وختی فرعون بنی‌ایسرائیلَ آزادَ کوده، خودا اوشأنَ جٚه رأیی کی فلسطینیأنٚ سرزیمینٚ جأ دوأرستی، هیدایت نوکوده، با اَنکی نزدیکتر بو. چره کی خودا بوگفته: «نوکونه کی قوم جنگَ بیدینید، پشیمانَ بید و وأگردید بیشید مصر.» ۱۸ هَنٚ وأسی خودا بنی‌ایسرائیلَ جٚه رأیٚ بیابان، دریایٚ سورخٚ طرف هیدایت بوکوده. بنی‌ایسرائیل مصرٚ جأ بیرون بوشویید جوری کی جنگٚ رِه آماده بید. ۱۹ موسی، یوسفٚ استخوانأنَ اوسأده، چونکی یوسف بنی‌ایسرائیلَ قسم بدَه‌بو و بوگفته‌بو: «یقین بدأنید خوداوند شمرَ یاری کونه و او وخت می استخوانأنَ شیمی اَمرأ جٚه اَیه ببرید.» ۲۰ پس اوشأن «سُکّوتٚ» جأ کوچ بوکودید، «ایتامٚ» دورون، بیابانٚ کنار خیمه بزه‌ییدی. ۲۱ خوداوند، روزٚ دورون ایتأ سوتونٚ ابرٚ میأن اوشأنٚ جُلُو حرکت کودی کی رأیَ اوشأنَ نیشأن بده و شبٚ دورون ایتأ سوتونٚ آتشٚ میأن کی اوشأنَ روشنایی ببخشه. اَطویی تأنستید شب و روز رأ بیشید. ۲۲ او سوتونٚ ابر روزٚ دورون و او سوتونٚ آتش شبٚ دورون، قومٚ چومأنٚ جُلُو دورَ نوبوستیدی.

Currently Selected:

خروج ۱۳: گیلکی (رشتی)

Highlight

Copy