اعمالٚ رسولأن ۴
۴
پطرس و یوحنا محاکمه شورایٚ یهودٚ جُلُو
۱ پطرس و یوحنا مردومٚ اَمرأ گب زِئن دیبید کی کاهنأن و معبدٚ نگهبانأنٚ فرمانده و صدوقیأن بموییدی. ۲ اوشأنَ هَنٚ وأسی خیلی غیظَ گیفته‌بو کی رسولأن مردومَ تعلیم ده‌ییدی و گفتیدی: چون عیسی جٚه مورده‌یأن زنده بوسته، ایماندارأنم وختی بیمیرید، دوواره به زندگی وأگردیدی. ۳ پس اوشأنَ بیگیفتیدی و چونکی غروب دم بو، تا فردا زندانٚ دورون بدأشتیدی. ۴ ولی خیلی جٚه اوشأن کی رسولأنٚ تعلیمَ بیشنأوسته‌بید، ایمأن بأوردیدی و اوشأنٚ تعداد نزدیک به پنج هیزار نفر فأرسه.
۵ فردا روزٚ رِه، قومٚ رهبرأن و پیله آدمأن و دینٚ علما، اورشلیمٚ میأن جمَ بوستیدی ۶ و حنا، کاهنٚ اعظم و قیافا و یوحنا و اسکندر و تومامٚ کاهنٚ اعظمٚ خانواده دورٚ هم ایسَه‌بید. ۷ وختی اوشأنَ بأوردیدی خوشأنٚ میأن به پا بدأشتیدی، اوشأنٚ جأ وَورسه‌ییدی: «کو نام و کو قودرتٚ اَمرأ اَ مردأکَ کی نتأنستی رأ بشه، شفا بدَه‌ییدی؟»
۸ پطرس روح‌القدسٚ جأ پورَ بوسته، جواب بده: «اَی پیله کسأنٚ قوم و اَی مشایخ، ۹ اگه ایمروز اَمرَ اَ کارٚ خیرٚ وأسی کی اَ مردأکٚ رِه کی شل بو، انجام بدَییمی وأزخوأست کودن دریدی کی اون چوطو شفا پیدا بوکوده، ۱۰ پس همه‌یٚ شومأن و تومامی‌یٚ قومٚ ایسرائیل بدأنید کی عیسی مسیحٚ ناصری نام و قوّتٚ مره اَ مردای شفا فیگیفته و ساق و سالم شیمی چومأنٚ جُلُو به پا ایسَه. شومأن عیسایَ به صلیب فأکشه‌ییدی ولی خودا اونَ جٚه مورده‌یأن ویریزأنه. ۱۱ هوطو کی مزمورٚ دورون بمو:
«‹او سنگی کی شومأن، معمارأن فیشأدیدی، سنگٚ اصلی بوبوسته›#۴:۱۱ مزمور ۱۱۸، آیه ۲۲ ۱۲ و هیکسٚ دیگر ناجی نی‌یه، چونکی آسمانٚ جیر نامٚ دیگری به جز عیسی نام، انسانٚ‌ره وجود نأره کی بتأنه اَمرَ نجات بده.»
۱۳ وختی اوشأن پطرس و یوحنا شجاعتَ بیده‌ییدی و بفهمستیدی کی مردومأنٚ ساده و بی‌سوادی ایسیدی، تعجب بوکودیدی و دأنستیدی کی اوشأن عیسی یارأن بید. ۱۴ ولی چون او مردأکی کی شفا پیدا بوکوده‌بو او دو نفرٚ ورجأ ایسَه‌بو، دِه گبی نأشتیدی کی به ضدٚ اوشأن بزنید. ۱۵ اوشأنَ دستور بدَه‌ییدی کی جٚه مجلسٚ شورا بیرون بیشید و خودشأن، مشورتٚ وأسی بینیشتیدی. ۱۶ همدیگرٚ اَمرأ بوگفتیدی: «اَ دو نفرٚ اَمرأ چی بوکونیم؟ چونکی همه‌یٚ مردومٚ اورشلیم دأنیدی کی ایتأ پیله معجزه اَشأنٚ دسٚ جأ آشکارَ بوسته و اَمأن نتأنیم منکر بیبیم. ۱۷ پس بأیید تا کی مردومأنٚ ویشتری وأخبرَ نوبوستیدی، اوشأنَ وادار بوکونیم دِه هیکسٚ اَمرأ درباره‌یٚ اَ نام گب نزنید.»
۱۸ او وخت اوشأنَ دوخوأدیدی و حوکم بوکودیدی کی دِه هرگز به عیسی نام هیچی نیگید و تعلیمی ندید. ۱۹ ولی پطرس و یوحنا جواب بدَه‌ییدی، بوگفتیدی: «شومأن خودتأن بیگید، آیا دوروسته کی خودایَ بنیم، شیمی جأ ایطاعت بوکونیم؟ ۲۰ چونکی اَمأن نتأنیم اونچی‌یَ کی بیده‌ییم و بیشتأوستیم، به زبان نأوریم.»
۲۱ هَنٚ وأسی او دو نفرَ بعدٚ تهدید کودنٚ زیاد ولَ کودیدی، چونکی اوشأنٚ موجازات کودنٚ رِه رأهی نیأفتیدی، چره کی تومامٚ مردوم، او شفا وأستی کی انجام بوبوسته‌بو، خودایَ شکر کودیدی. ۲۲ او مردای کی معجزه اَمرأ شفا پیدا بوکوده‌بو، ویشتر جٚه چهل سال دأشتی.
ایماندارأنٚ دوعا
۲۳ وختی پطرس و یوحنا آزادَ بوستیدی، بقیه‌یٚ ایماندارأنٚ ورجأ بوشوییدی و جٚه هرچی کی قومٚ پیله کاهنأن و پیله آدمأن بوگفته‌بید اوشأنَ وأخبر بوکودیدی. ۲۴ وختی اوشأن بیشتأوستیدی کی چی پیش بمو، همه‌تأن همدیگرٚ اَمرأ خوشأنٚ دسأنَ به خودا درگاه بوجور ببردیدی، بوگفتیدی: «اَی خوداوندی کی بر تومامی‌یٚ کارأن حاکمی، اَی خالقٚ آسمان و زیمین و دریا و هرچی کی اوشأنٚ دورون وجود دأره، ۲۵ تو خودت روح‌القدسٚ اَمرأ به زبانٚ اَمی پئر، داوود کی تی خادم بو بوگفتی:
«‹چره غیریهودیأن شورش کونیدی
و مردومأنٚ دونیا بیخودی نقشه کشیدی؟
۲۶ پادشایأنٚ دونیا و حکمرانأن همدیگرٚ مره همدست بیدی
و لشکرکشی کونیدی به ضدٚ خوداوند و اونٚ زأی مسیح.›#۴:۲۶ مزمور ۲، آیه ۱ و ۲
۲۷ «به راستی کی هَه شهرٚ میأن، هیرودیسٚ پادشا و پنتیوس پیلاطسٚ حاکم، غیریهودیأن و قومٚ ایسرائیلٚ اَمرأ به ضدٚ تی خادمٚ موقدّس، عیسی کی اونَ مسح بوکودی، همدسَ بوستیدی ۲۸ تا هر چی‌یَ کی تی دس و تی اراده مقرّر بوکوده‌بو، بر قرار ببه. ۲۹ هسأ اَی خوداوند، اوشأنٚ زورگویی‌یَ بیدین و تی خادمأنَ شهامت فَدن تا تی کلامَ شجاعتٚ اَمرأ مردومَ بیگید، ۳۰ و تی دسَ درازَ کون و تی قودرتٚ شفابخشَ اَمرَ فَدن تا به نامٚ تی خادمٚ موقدّس، عیسایٚ مسیح، پیله‌دأنه معجزه‌یأن و کارأنٚ عجیب انجام بدیم.»
۳۱ وختی اوشأن دوعا بوکودیدی، جایی کی اوشأن دورٚ هم جمَ بوسته‌بید به لرزه دکفته و همه‌تأن روح‌القدسٚ جأ پورَ بوستیدی و شجاعتٚ اَمرأ جٚه خودا کلام مردومٚ رِه گب زه‌ییدی.
ایماندارأنٚ یک دیلی و صمیمیتٚ همدیگرٚ اَمرأ
۳۲ تومامی‌یٚ ایماندارأن همدیگرٚ مره یک دیل و یک جان بید و هیچکی نوگفتی من صاب مال و منالم بلکی هرچی کی دأشتیدی همدیگرٚ اَمرأ شریک بید. ۳۳ رسولأن قوّتٚ زیادی اَمرأ شهادت دَییدی کی خوداوندْ عیسی مسیح جٚه دنیایٚ مورده‌یأن ویریزه و خودایم اوشأنَ فیض و برکتٚ فراوانی فدَیی. ۳۴ هیچ کدامٚ اوشأن موحتاجٚ مال و منال نیبید، چره کی هرچی ملک و املاک دأشتیدی فروختیدی هو پولٚ فروشَ اَوردیدی، ۳۵ رسولأنٚ پا جیر فوکودیدی کی بسته به هر کسٚ نیاز، اوشأنٚ میأن تقسیم ببه. ۳۶ یوسفم کی جٚه قبیله‌یٚ لاوی و قبرسٚ شین بو و رسولأن اونَ برنابا، ینی «تشویق کننده» نام بنَه‌بید، ۳۷ باغی‌یَ کی دأشتی بوفروخته و پولَ بأورده، رسولأنٚ پا جیر فوکوده.
Currently Selected:
اعمالٚ رسولأن ۴: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
