Apocalipsis 19

1Kwiztane nane akkwan awa chiyura tɨnta paramtu mɨnarau. Ka kaizara:

“Au Diosne kwisha wari.

Usne aumɨza kwail sɨnam sammika i.

Us an tɨnta akwa, usne wanta ɨninnashinai.

2Usne wan awaruza wat mɨmanamtu, uspa kwail piankamanapa. Mamaztuza ilnamtukas, us kimtu aizpa watcha i.

Usne an Babilonia pɨpulura uztuza naizninnara.

Uspane kwail ashampakana uzat kit wan awaruza kwail uznapa kamtanara.

Mane Diosne usparuza naizninnarɨt, Diosta kiwaintaruza piantanarɨt akwa.”

3Sun akkwan awane mamasa kaizara:

“Au Diosne kwisha wari.

An pɨpulu impakta ishne pailta payukima nunazi.”

4Suasne veinticuatro ɨlaparuzkas, ampara uztuzkas, Dios uzkin palsumat kit wakpuj wainñat kit kaizara:

“Watcha Diosne kwisha wari,” kizara.

5Mazane Dios uztukin ka kaizta:

“Wan Dios kiwaintuzkas, ussa ishkumtuzkas, katsaruzkas, ainkiruzkas,

‘Dios kwisha wari’ kaizarain.”

Pɨrikuwa kasara kim pishta

6Suasne nane akkwan awa paramtukanainkas, akkwan pi taizta aztukanainkas, akkwan ippa aztukanainkas, mɨrau. Ka kaizara:

“Diosne kwisha wari.

Au Anpat Diosne ɨninnat kit us tɨnta akwa

us kishimtu aizpa kinazi.

7Us akwa, watsal kulmɨzpai. ‘Diosne kwisha wari’ kiztuasmin,

watsal kulmɨzpai,

Pɨrikuwa kasarakim pishta taizta akwa.

Pɨrikuwa ashampane usmin sɨnam parɨt uskasa ɨn.

8Sun ashampane sɨnam putchã pĩn naztam iztɨt sap kit kwara.

Diosta piantuzne, wat kin uzturuzne, putchã pĩnkanain kwaanazi.”

9Ángelne nawa kaizish: “Sunkana pari, ‘Pɨrikuwa kasara kim pishtara akwattuzne watsal kulanazi.’ ” Ma pitchin kaizta: “Na kaiztu aizpa Dios watcha pit i.”

10Suasne nane ángelpa mittɨkin taiz kit wakpuj wainshirau. Usne nawa kaizish: “Sunkana kimun. Nakas Diospa kiwainmika ish. Nukas, nu aimpihshtuzkas, Diospa kiwainmuruz mai. U Dios pit kainanamturuzne paiña kiwaintuz mai. Diostain wakpuj waintawamakpas,” ka kizta.

Putchã caballora anuzmumika

11Suasne mamaza iztau. Chiyura ayukta iztuasmin, nane putchã caballora iztau. Caballora anuzmumikane Dios kaizta aizpa mɨra. Watchain kaiz kit mamaztuza nil ɨninnara. Usparuzkasa waya kinarakas, usne wat kirɨt. 12Paiña kasune ĩnkanain naztam aizta. Akkwan tɨt watsal iptɨt kɨzpukin kwarɨt. Paiña mun kɨnijkin parɨt aizpa usmin pianazi. 13Usne aimpi pustɨt pĩn kwara. Paiña munne “Dios pit” munazi. 14Chiyuras waya kimturuzne ussa kanpaat kit putchã caballoruza anuzara. Uspane kwisha watsal putchã pĩn kwaara. 15Maza kwiz mashtine paiña pittas puzta, an sura uztuza piantananapa. Usne irukasa an sura uzturuza tɨnta ɨninnanazi. An tɨnta Diosne, wan kishimtumikane, awaruza mittɨ kulnanazi, ilnanazi, Dios usparuza aliz kulnarɨt akwa. Kawarain usparuza naizninnanazi. 16Paiña kwakshamtakas, paiña pantalóntakas ka parɨt:

sun katsa mikwane wan ɨnintuza ɨninnamtu.

usmin wantuza manta kinamtu.

17Suasne maza ángel pãn ɨsalta kuntɨt iztau. Usne wan katsa wam chiyu kwashtara pɨlturuza tɨnta kwian kit ka kaiznara: “Arain. Diospa katsa pishtara wanmaktain, us kwintu aizpa kuanapa. 18Usne katsa mikwaruzpa ñakas, ainki mikwaruzpa ñakas, tɨnta awaruzpa ñakas, caballowa ñakas, caballora anuztuzpa ñakas, anpat mɨjchiruzpa ñakas, anpat mɨjtuzpa ñakas, pashpawa ñakas, ɨlapawa ñakas kwinnanazi, kuanapa,” kiznara.

19Suasne nane sun aliz kalparakas, an sukin katsa mikwaruruzakas, uspa suldaruruzakas, iznarau. Uspane wanmakkara, cabollora anuztamikakasa waya kianapa, paiña suldaruruzkasa waya kianapa. 20Waya kiarawane, mɨnpazhane aliz kalparakas, pɨrail kaizmumikashakas, pizat kit kantɨt. An pɨrail kaizmumikane aliz kalpa iztakin masas iztasparɨt kal kirɨt. Paiña kal kirɨt akwa, usne aliz kalpawa izmu marca parɨttuza pɨrail kaiznarɨt, aliz kalpakana sarɨtta wakpuj wainñapa. Uztuasmin, sun aliz kalpakas sun pɨrail kaizmumikakas pizat ĩn asufre aiztukin kiakpɨntɨt azi. 21Caballora anuztumikane paiña pittas mashtikasa anparuza piantanara. Katsa pɨkum chiyu kwashta pɨlturuzne uspa ña tuknakima kuara.

Currently Selected:

Apocalipsis 19: kwi

Highlight

Copy