Apocalipsis 18
18
Babilonia pɨpulu wan pailtɨt
1Suasne kwiztane nane mamaz ángel chiyuras kihshtu iztau. Usne katsa ɨninmikakana azi. Usne pãn maltakanain aizta, wan su kai puranapa. 2Tɨnta kwiat kit ka kaizta:
“Katsa Babilonia pɨpulu paltaintɨt.
Mane saliztuzne sua uzarɨt.
Wan kwail izpulkas sua nukkularɨt.
Wan tuntu pɨkumkas chikuyukas ta uzarɨt.
3Wan suras awane pirɨtkana namarɨt,
wan tuntu kwail kiarɨt akwa.
An sukin katsa mikwaruzne akkwan awakasa an kwail kiare.
An sukin painintuzne, kwazpa awa kularɨt, uspa kwazpa ashampakana uzashit akwa.”
4Suasne nane chiyuras paramtumikasha iztau. Nawa kaizish:
“Ap kwalta ka kuruntain. Sun katsa pɨpulukis puzarawa,
an pɨpulukin uztuz kwail kiamtukanain kiamanpa,
an pɨpulukin uztuz naizamtukanain, naizamanpa.
5Uspa akkwan tuntu kwail kiarɨt akwa, Diosne chiyuras uspa kwail kiarɨt aizpa izta.
Diosne uspa kwail kiarɨt aizpa mainmanazi.”
6Suasne usne ángeltuza kaiznara:
“Mane usparuza ilnari. Yawa ilmu mamaz awaruza ilnarakanain kawarain an pɨpulura ilnari.
Uspa kwail kiarɨt akwa, usparuza pa pijikima sun kwail kinari.
Sun pɨpulu mamaztuza naizninara akwa, an pɨpulura uztuza anza naizninnari.
7Uspane uspa chiwazha kiashimtu aizpa kiat kit kwail kwazpa awakanain uzshiara.
Kawarain usparuza naizninnari.
Sun pɨpulu uztuzne ka minñara:
‘Aune an sukin ɨninmumikakana makpas. Aune wan pashimtu aizpa mɨjmakpas.
Aune mizurainkas tayalsachimakpas.’
8Katmizna maza payurain wan ilmu usparuza taiznarɨnazi.
Sun payura iarɨnazi, tayalarɨnazi, yak kiarɨnazi.
An tɨnta Anpat Diosne usparuza mɨmananazi, uspa kwail kiarɨt aizpa piankamanapa.
Suasne usne usparuza impakninnanazi, wan pailnakima.”
9An sukin katsa manta kimtuzne, sun ashampakanain kirɨttuzne, kwail kwazpa awakanain uzararuzne, azarɨnazi. Sun pɨpulura impaktawane, awane ish panaktu izanazi. Sun akwa uspane tayalarɨnazi. 10Sun awaruzne attishtas sun pɨpulura izat kit ishkuarɨnazi, pɨpulukin ilnamɨztu akwa. Uspane ka kaizanazi:
“An katsa Babilonia pɨpulune
kwisha naiztɨnazi.
Akkwan payu chinkima nukkulmanazi.”
11An sukin paininturuzne, an pɨpulu akwa, azat kit kwiananazi, mɨnminkas uspa painim mɨj aizpa paimtuchi akwa. 12Mɨnminkas uspa uru mɨj aizpakas, pial mɨj aizpakas, muin uk mɨj aizpakas, ainki putchã uk mɨj aizpakas, paimtuchime. Putchã pĩn mɨj aizpakas, tɨlchaktakana pĩn mɨj aizpakas, an watsal pĩn mɨj aizpakas, kwanam pĩn mɨj aizpakas, paimtuchime. Watsal tɨ piamkas, katsa sɨnam kihtɨt sulakas, wat tɨkas, paimtuchime. Naztam irukas, mamaz irukas, marmol ukkas, paimtuchime. 13Mɨnminkas canela tɨ ayakas, watsal piam kɨhwilkas, incienso impaktakas, mirra pikas, olivos pikas, vinokas, olivos pihshpikas, chara pippa kɨrɨtkas, chara pippakas, paimtuchime. Mɨnminkas wakarakas, pɨrikukas, caballokas, caballo carrokas, kiwaintuzkas paimtuchime.
14Sun painintuzne an pɨpulura ka kaizarɨnazi: “Nu wan mɨjat aizpakas, nu wan mɨlshimtu aizpakas, wan karɨt. Mizurainkas chiwazha karɨt aizpa saimanazi.” 15An pɨpulukin uspa mɨj aizpa painintɨttuzne kwisha kwazpa kularɨt. Uspane pɨpulura attishtain kun kiarɨnazi. Sun pɨpulura uztuz naizamtuasmin, uspane azat kit tɨnta kwian kit kaizanazi:
16“An katsa pɨpulune kwisha naiztɨnazi.
Usne watsal pĩn kwarɨt ashampakana iztɨt. Tɨlchakta pĩnkanakas, kwanam pĩnkas kwarɨt.
Urukas ainki putchã ukkas, muin watsal iztɨt ukkas kwilkin kwarɨt.
17Akkwan kwazparuz masain wan pailti; wan kakihsharɨt.”
Katsa kanua puijmuruzkas, kanuawara chamtuzkas, kanuara kal kimtuzkas, piwara kal kimtuzkas, pɨpulura attishtain kun kiarɨnazi. 18Pɨpulu impakta ish iztawane, ka kwiannara: “An pɨpulukinkas anza katsa pɨpulu wachi.” 19Kwisha tayalamtu akwa, uspane pul pil uspa kɨzpura paran kit azat kit kaizara:
“An katsa pɨpulune kwisha naizarɨnazi.
Katsa kanua pira mɨjattuzne,
uspa kwazpa akwa, an kwazpa namarɨt.
Uspa kwazpa masain wan kakihsharɨt.
20An pɨpulu kakihshtɨtkas, chiyura uztuzne watsal kultain.
Diosta piantuzkas, Dios manta kittuzkas, Dios pit kainammtuzkas, watsal kularain.
Diosne an pɨpulukin uztuza ilnara,
an pɨpulukin uztuz Diosta piantuza naizninnarɨt akwa.”
21Maza katsa ángelne katsa chara kɨmu uk mut kit katsa pira kiain kit kaizta:
“An katsa Babilonia pɨpulune karɨnazi.
An uk katsa pira kiaintakanain karɨnazi.
Mɨnminkas sun pɨpulura chinkas izamanazi.
22Mɨnminkas an pɨpulu miwara guitarra pianamanazi.
Karaskwil usmuruzkas, iru kwil usmuruzkas,
an pɨpulu miwara mamasa usamanazi.
An pɨpulukin kal kimtuzakas sayamanazi.
Kal wa chi akwa, an pɨpulukin chara kɨmu ukne
mamasa azmanazi.
23Mizurainkas an pɨpulukin impil putta aizamanazi.
Mizurainkas mɨnminkas an pɨpulukin kasara kimanazi.
Painintuz katsa manta kimmikakana namarɨtkas,
an pɨpulune wan karɨnazi.
Uspane wan suras awaruza pɨrail apnarɨt,
nilchi pit paarɨt akwa.
24Diosne an pɨpulu uztuza ilninnanazi,
Dios pit paramtuzakas, Diosta piantuzakas, wan suras uzararuzakas piantanarɨt akwa.”
Currently Selected:
Apocalipsis 18: kwi
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
