San Juan 9

Jesúsne kasu izsachimikasha kakulnintu

1Mamaz payura miwara ɨmtuasmin, Jesúsne maza ampu izsachi kawirɨtmikasha izta. 2Paiña kammuruzne mɨnpazha kwail kirɨt minñat kit mɨmaara:

—Kamtam. ¿Chikishma an ampu izsachi? ¿Papihshkas akkuhshkas kwail kirɨtwailki? ¿Usmin kwail kirɨtki?

3Jesúsne sɨnkanara:

—Us izsachikas, paiña kwail kirɨt akwa, kasu tɨlkwil kirɨtchi. Papishtuzkas kwail kiarachi. Usne izsachi kawira, awa Dios kal kimtu aizpa izanapa. 4An payu asmin aune kal kipuspas. Tɨl pakane, aune kal kisachimakpas. Sunkana pailta payukima nane ap Taittawa kal kitpaish, us paiña kal kinpa, nawa ɨnintɨt akwa. 5An sukin tuasmin, nane impilkanain ish, apas awa uspa kaijchukin minñamtu aizpa kai piankamanapa.

6Sun kiztawane, Jesúsne pilta ilpi ɨtkulat kit ilpikasa pitchin pilkasa sain kit kasu ɨsalparain izsachimikasha nɨra. 7Kwiztane ussa kaizta:

—Mane ɨt kit Siloé kwazi piwailta kittas. (Awa pitne Siloé “ɨninta” mun.)

Suasne an ampune ɨt kit matsɨhta kit kit paiña yalta iztu kailta. 8Suasne makin uztuzkas ñamin kasu izsachi pial paikwatmikasha iztaruzkas kaizara:

—¿An ampune pial paikwan uzatmikaki?

9Mɨnpazha kaizara:

—Watcha. Us i.

Mamaztuzne kaizara:

—Us chi. Uskanain iztɨt i.

An ampune kaizta:

—Watcha. Nane an pial paikumtuatmika ish.

10Suasne ussa mɨmaara:

—¿Mizama mane izshinas?

11Usne sɨnkanara:

—Maza ampune, Jesús munmikane, pil sat kit ɨsalpara kasura pil nɨt kit kaizta: “Siloé kwazi piwailta ɨt kit kittash.” Ɨrau. Na kitpane, izshinarau.

12Suasne ussa mɨmaara:

—¿Sun ampune mɨntama tui?

Usne kaiznara:

—Pianchish.

Fariseo awane izsachimikasha, wat parɨtmikasha, mɨmaara

13Suasne uspane izsachimikasha, wat parɨtmikasha, Fariseo awa purakin mɨlaara. 14Jesúsne kwaizkulmu payura ilpikasa pil sat kit izsachimikasha wat paninta. 15Suasne Fariseo awane mamasa an ampura ¿Mizama mane kasu izshinai? mɨmaara. Usne kaiznara:

—Usne pil kasu ɨsalpara nɨish. Nane kasu kittau. Mane iztus.

16Suasne mɨnpazha Fariseo awaruztas kaizara:

—Sun kirɨtmikane Diostas asachi. Usne kwaizkulmu payu nɨjchiwal kimtu.

Mamaztuzne kaizara:

—Kwail kirɨtmika kane, ¿Mizama akwan wat kal kishinai?

Sun kizara aizpa akwa, uspane usparuzpain paimpa naiyara. 17Mamasa kasu izsachimikasha mɨmaara:

—¿Nune chi kiztu kasu izkulnintamikawa?

Usne kaiznara:

—Usne Dios pit kainammmika i.

18Judío awa ɨninturuzne sun ampu kasu izsachira nɨjkulshiarachi, paiña kasu iztu akwa. Suasne uspane kasu izsachimika wat parɨtpa papihshtakas akkuhshtakas akuat kit 19mɨmaara:

—¿Anne u painkulki? ¿Us kasu izsachi kawirɨt kizamtuki? ¿Mizama mane iztui?

20Papihshkas akkuhshkas sɨnkanara:

—Aune au painkul i pianwas. Usne kasu izsachi kawirɨt. 21Mane miza iztu pianchiwas. Mɨnma ussa kasu izkulninta pianchiwas. Ussa mɨmarain. Ɨlapa wai. Usmin uruza kainashina.

22Papihshkas akkuhshkas sun kizpailta, Judío ɨninturuza ishkwantu akwa. Uspane usparuzpain nɨjkulara, Jesús Dios narɨtmika i kizmuruza Dios kammu yalkis ukkat kit puzninnana. 23Katmizna paiña papihshkas akkuhshkas sun kizpailta: “Ussa mɨmarain. Ɨlapa wai.”

24Suasne Judío awane mamasa an ñamin kasu izsachimikasha akwaat kit kaizara:

—Dios iztakin watcha kaizti. Aune an ampu kwail kimmika i pianmakpas.

25Usne sɨnkanara:

—Us kwail kirɨtne, pianchiish. Nain sun pianish. Nane kasu izsachiarau. Mane iztus.

26Mamasa mɨmaara:

—¿Nua chima kizi? ¿Mizama kizi, up kasu izkulninna?

27Sɨnkanara:

—Uruza kaiznarau me. Une mɨamtuchi. ¿Chishma sunmin mamasa mɨashimtuwas? ¿Ukas ussa kanpashiamuskiwas?

28Suasne ussa kwail kizat kit kaizara:

—Nune sun ampura kanpam kit us kaiztu aizpa mɨmtu. Aune Moisésta kanpam kit us kaiztu aizpa mɨmtumakpas. 29Aune Dios Moisésta parara aizpa pianmakpas. Anne mɨntas at pianchimakpas.

30Usne sɨnkanara:

—U sun kaizamtu akwa, nane iztasparu. ¿Une sun ampu mɨntas amtu pianchimakkiwas? Usne nawa kasu izkulninta. 31Watcha i. Diosne kwail kimtuza mɨmtuchi. Usne Diosta wakpuj waintuzainkas Dios ɨninta aizpa kimturuzainkas mɨnamtu. 32Au su sarasmin, mɨnminkas sunpa mɨarachi. Mizurainkas mɨnminkas kasu izsachi kawirɨtmikasha izkulnintachi. 33Sun ampu Diostas atchine, chinkas kisachi.

34Uspane sɨnkaara:

—Kawirasmin, nune kwail kira. ¿Nune aumɨza kamtashimtukish?

Uspane ussa Dios kammu yaltas ukkat kit puzninara.

Mɨnpazha kasu izsachimikakana tu

35Awa kasu izsachimikasha kammu yalkis ukkat kit ɨninara. Jesús sunpa piankamtawane, usne ussa sait kit wanmal kit mɨmara:

—¿Nune chiyuras Ampura nɨjkultukish?

36Ampune sɨnkat kit kaizta:

—Anpat. ¿Mɨnmas? Mɨnma i kaizcha, na ussa nɨjkulnapa.

37Jesúsne ussa kaizta:

—Nune ussa iztɨt me. Nain ish. Nane nukasa paramtus.

38Suasne ampu Jesústa wakpuj waintuasmin, kaizta:

—Anpat. Nane nu Dios narɨtmika i nɨjkultus.

39Suasne Jesúsne kaizmɨzta:

—Nane an sukin arau, awa uspa kwail piankamanapa, Dios usparuza watsat mɨlnanapa, kwail kiamanpa. “Diosta pianmakpas” minturuzne Diospa watsat mɨlmumikasha kwayanazi.

40Suasne sun mɨarawane, mɨnpazha Fariseo awaruztas us panatkin ussa mɨmaara:

—Aune watcha Diosta pianmakpas, kizara.

41Jesúsne sɨnkanara:

—U Diosta pianchine, u kwail kiarɨt aizpa pianchi. U Diosta pianmakpas kizamtukas, une kwail kiarɨt aizpa nukkultu.

Currently Selected:

San Juan 9: kwi

Highlight

Copy