San Marcos 6

Nazaret phobor eem khʉʉnau Jesús isegtarr

(Mt. 13:53-58; Lc. 4:16-30)

1Mag chaai chi meem arrta deeu phiriu auwia, Jesús ich bãautarr durr phobor Nazaret anʉmʉg petajim anʉm. Mag i petam dʉi i khapeenjã i dʉi wetjim aajem. 2Mag mawi barimawia, ya jua ʉ̃ʉijem ed pabaadee, maar meeun Ẽwandam iek jaaujem deg mawi Ẽwandam iek jaaubaadejim aajem. Mag irua jaaumam ũrwia aig õor pom thʉnarr khʉʉnau jʉ̃gderraa nʉm iekhau amach wir aigpai jejeeukhamua mag naajim anʉm:

—¿Magʉm iek ichdeu jamta khaugjimta mag iek pom jaaumáma? ¿Jãga jãg õor monaau nʉrrʉ́ma? anaajim anʉm. 3Keena, pãrau oowai, ¿ich mʉg woun kalpinter khabá anaajim anʉm, María iewaa? I eeugpeenauwai, Santiago, José, Judas maimua Simón. I ʉ̃phʉʉin khabahab ĩchab ar mʉig ich mʉg phobor ee naajem khʉʉn; maagwai ichjã maadeu khaphʉ nʉm, ich mʉiguim aawai.

4Pari magbaa Jesuu amag magjim anʉm:

—Chadcha deeum durram khʉʉnaun mʉg Ẽwandam iek jaau wenʉrrʉm khʉʉnag eenaa am dʉi ajapha aba aajeeb. Pari mag sim jũrr dich bãautarr durrpai chan am kha khõchkhabanaa amach khodnaanau ni amach dʉi ãbam deg joobaajem khʉʉnaujã am kha isee aajemgui ajim anʉm amach khĩircha.

5Mag warag maig chan Jesuu õor mor masi narr khʉʉn thum jua pʉrbajim aajem, amachdeu mag irua jaau sim ʉkhaba arr gaaimua. Daudam khapan khaba ichdeu jua pʉrtarr khʉʉnpai monaaupʉijim aajem. 6Mag ichdeu Ẽwandam iek jaau khitʉm ʉkhaba nʉm oowi ich Jesúpata warag thumaa khĩirjuwi okhĩirjuu aadejim anaabá.

Magbaawai ichta warag mawi jũrr aigmua phobordam dakha sĩsidʉm ee Ẽwandam iek jaau nʉrraajeejim aajem.

Jesuu ich khapeen doce Ẽwandam iek jawamkhĩir pʉitarr

7Mag nʉrrʉmua Jesuu biek ãb ich khapeen doce ich dʉi ogdʉba wenʉrraajerr khʉʉn ãbam aig thʉ̃rphe auwi nunumdo pʉyaagpajim aajem. Mag pʉyaagpamua ĩchab ich juapa theegjã amag deemajim anʉm, mag juapaau õor mor eem dosãt ben khaigbampa ich denjo jʉr werpmamkhĩir. 8Magwia ĩchab khʉd ee khomaagjã bʉ̃ʉrjã amag nem inag arrpiba, ni talegdijom, thachjom, ni phatkhonjã arrpibajim aajem. Ãba arrpitarran bordondampaita arrju aai nʉm ajim anʉm. 9Ich agjo zapatjã amachdeu jũa narrdampai arrpiwi khajũajã amach mor gayam dʉipaita wetju aai nʉm a jaaujim aajem, deeum theg jũjũa aagjã arrba.

10Mag jaauwi ĩchab, —Pãach wenʉrrʉmpierr pãachig di jaaubarm degpai kheeupaawai khãibat ajim anaabá, pãach maigmua chawag wet nʉm ora. 11Degolp khãijã õrau amach deg pãach dubpiba abaawai, wa pãachdeu amachig Ẽwandam iek jaau nʉm khãijã ũrba abaawai, warre amach dakhĩirwe pãach bʉ gayam jẽb ʉʉrphe ʉʉrphenaa pãachta ereubaadet ajim anʉm. Pãrau magmʉn magbarmuapai amag, “Pãach jãg Ẽwandam iek ũrba abarm gaaimua ich dʉita khĩir khaphʉ abat” anʉmʉugui ajim anʉm.

12Amachig magbaawai chadcha ereubaadewia phoborpierr õrag Ẽwandam iek jaaumamua, “Pãach pekau pooma nʉm ãsie ewag khĩirjuwia Ẽwandamagta chugpaapi jeeubat” aajeejim anʉm. 13Mag jaau wenʉrrʉmua ĩchab dosãt beneu baarjerr khʉʉn mor eem ben khaigbampa jʉr werpnaa, pabʉ olivo anʉm khaúa õor khamor masim khʉʉnjã kha phurnaa, Ẽwandamag jeeubaa õor pom monaaupʉi maajeejim aajem.

Rey Erodeeu Jesuuta Juan õor por choomie khararrpii sĩerr

(Mt. 14:1-12; Lc. 9:7-9)

14Jesuu mag õor mor masim khʉʉn pom monaau nʉrrʉm gaaimua sĩi õor ee thʉ̃rphoo sĩejim aajem. Mag nʉm ee Rey Erodeeu ũr athajim anʉm, irua nem wau nʉrrʉm. Mag ichdeu ũr athaawai Jesuuta Juanpii awi, “Maan Juan õor por choomie khararrta deeu iiu phiidʉwia mag nʉrrʉm; maguata mag õor mor masim khʉʉnpa monaau nʉrrabahab” aajeejim anʉm. 15Mamʉ irua mag sim ee bigaaum khʉʉnau, “Jã warr jooingar Ẽwandam i jaaumie Elías aajerr khabahab” aajeejim anʉm, Jesús igwia. Mamʉ jũrr magbaawai ãaur khʉʉnau, “Jã sĩi warr jooingar Ẽwandam i jaaujerr khʉʉnjo Ẽwandam iek jaaujem khabahab” aajeejim anaabá. 16Jũrram khʉʉnau mamagkham ũrbaawai chi rey Erodeeu, “Mʉrʉg chan ma chan deeum khabam. Mua khĩirjuawain maan Juan chi õor por choomieu, ar mua i o thʉappʉipitarr. Ichta deeu iiuwia mag nʉrrabahab” aajeejim anʉm.

17-18Irua mag sĩerran mʉg ajim aajem: Maata ich Erodeeu ich naam Felipe ʉʉi Erodías anʉmta khecheu auwi ag dʉi sĩejim anaabá. Mag itheeta Juanau chi reíg, “Pua pod pʉch naam jua eem ʉʉi khecheu auwi pʉch ʉʉikha auju khaba simgui” ajim anʉm. Mamʉ sĩi ichig magbaawai warag Juan pʉr aupi jaauwi, cárcel deg phãar sĩupinaa, cadenau jʉ̃ sĩupijim anaabá. 19Mamʉ mag nʉm ee chi Erodes ʉʉi Erodías anʉmuan Juanau mag iekhatarr gaaimua thõopimjã khõsi thʉnaajim anaabá. Pari mag nʉmta pod thõoba aajeejim anʉm, mag chi jayau thõomkhĩir jaaubam aawai. 20Mag nʉm dʉi chi rey Erodeeujã Juan okho aajeejim anaabá, irua oowai Juanau chadcha Ẽwandam dau na nem agcha waunaa ãba i iekpai jaaujerr aawai. Maguata Juanau ichigcha ikhʉaba iekhamamjã magʉmjã igba, warag ũrm khõsi i iek ũrnaa sĩi ich odegpai, “¿Jãgata akhiina?” aajeejim anʉm.

21Mag nʉm ee Erodeeu ich año cumplii nʉm ed phiejãb pom waupijim aajem, phiesta khaag. Magwi chi thethemnaan ich garcharam khʉʉn dʉi, comandantenaan maimua Galileapien agjo chi thierrnaanpa ãba thʉ̃rkhʉʉipʉijim aajem, ich aig thach khoon beemkhĩir. Magbarm eeta ĩchab Erodiaaujã Juan khaibag wauju dawaa phithurg chukkhu oo athajim anaabá. 22Mag am thach kho nʉmta, chi Erodías kha beewia õor dakhĩir jemkhabaichejim anʉm. Mag jemkhabarm chi reíu ich dʉi ãba thach kho narr khʉʉn dʉimua khõigjierram aajem. Mag wajapha jemkhabarm oobaawaita chi reíu ich bãaurrag, —Pʉchdeu nem khõsim mʉrʉg jeeubá, mua pʉrʉg deeju pʉchdeu nem igbarm ajim anʉm.

23Mamʉ mag ichig nem jeeupipikhamjã chi dauperau bʉ̃ʉrjã jeeuba aawai ichdeuta deeu pʉaba irig, —Chadcha mʉch imeerba parhoobam nem pʉchdeu khõsim mʉrʉg jeeubarm mua pʉrʉg deebajupa. Pua mʉg durr mʉchdeu jʉ̃a chirʉm eem jãrrcha khãijã mʉrʉg jeeukhiinjã, ichiita mua deeb khaba pʉrʉg deejugui ajim anʉm.

24Chi rey Erodeeu pʉaba ichig mag jeeupipikhamjã jeeuju khaugba aawai ich ãd aar mawi jũrr ich ãdagta jaauwimajim anaabá, ichig khĩirjugdam deemkhĩir. Magbaa chi ãdau ich khaag, —Pʉchig Juan porta thʉapnaa thep ee deepi jaaujuma ajim anʉm.

25Ich ãdau ichig mag jaaubarm bʉrre deeu ich bãaurr jooi aar mawia irig, —Rey ajim anʉm, muan nauwe pʉrʉg Juan õor por choomie porta thʉapwia mʉchig thep ee deepim khõsi ʉmgui ajim anaabá.

26Mamʉ ich bãaurrau mag ichig Juan porta jeeubaawai chi rey warre okhĩirjuu aadejim anʉm. Pari mag ich bãaurrau ichdeu nem khõsim thumwe jeeuwiajã õor dakhĩir ich imeerba deeju a iekhatarr aawai mag ãsie deebamjã abajim aajem. 27Magbaa ag bʉrre ich soldaaun ãb pʉijim anʉm, Juan o thʉapnaa ich aig chi por appai aibeemkhĩir. 28Magbaawai chi soldaaunau chadcha Juan cárcel deg sim aar mawia, i o thʉappʉinaa, chi por appai thep ee chi dauperag deechejim anaabá. Mag ichig deebaicheewai jũrr ich ãdag deejim anʉm. 29Mag Juan cárcel deg pʉr wai narr o thʉapbapʉim a ũrbaawai i khapeenau chi mordam cárcel degmua arrwia aukherthurjierram aajem.

Jesuu õor cinco mil jãhogtarr

(Mt. 14:13-21; Lc. 9:10-17; Jn. 6:1-14)

30Magtarr khur Jesús khapeen mag ichdeu pʉitarr khʉʉn deeu i aig barchejierram aajem. Mag beewia deeu ãbam aig naaicheewai amachdeu õrag Ẽwandam iek jaaujerr dʉi õor monaaumarrpa thum irig jaauchejierram aajem. 31Mamʉ mag jũrram khʉʉn phẽphẽeukham gaaimua thachdam khoogpaijã bʉ̃ʉrjã jua par khaba narr aawai mag am nem ĩgkha opinaa jũrr ich Jesuu amag, —Õor chukag ee maach appai jua ʉ̃yaan wettarrau ajim anʉm.

32Magwia chadcha amach appai aig botedam sĩerr ee ereubaadejim aajem, õor chukag aar. 33Pari mag am wetum õor khapankham khʉʉnau oopʉijierram aajem. Amachdeu mag oobapäaiwai, i barjujã khaphʉ narr aawai, jũrr khʉd ee khaphig phobaadewi, amachta i barju nawe bardʉtkhaimawia i nʉ naaimajim aajem. 34Maimua barimawia ooimaawai chadcha õor pooma pos thʉnaajim anʉm, i nawe. Õor pom mag wejom Jesuu oowai i dau ee aphʉʉ durrajim anʉm, sĩi nemchaain papjã chukhu wenʉrrʉmjo narr aawai. Ichdeu mag oobaawai amag Ẽwandam iek jaau wai sĩi ajim aajem. 35Mag jaau simua ya kheeuraa aadeewai i khapeenau irig, —Ya edau kheumamgui ajim anʉm. Mag nʉmta maach chan thach khojujã chukhu nʉm. 36Maach dʉi mʉig õor pom thʉnʉm khʉʉnag wetpi jaaubá ajim anʉm, õordam di dakhapaim aar wa magbam khai phobor dakham aar khãijã amach khoog thach per awaan wetamkhĩir.

37Ichig magbaawai jũrr ich Jesuu amachigta, —Am pʉiju khãyau pãachdeuta amag thach deejurauma ajim anʉm.

Magbaa chi khapeenau jũrr irig, —¿Magan õor pom mʉg wejom thum thach khopiegan doscientos denariota pan gaaipai aupi sĩeb? ajierram anʉm.

38Magbaa Jesuu amag, —¿Pãrau pandam kharr wai nʉwi? ajim anʉm. Chukhu nʉm khai, õrag jeeu oobat, khaíu phiejãb waibeejĩ ich khoog khãijã, maimua mʉrʉg jaaubat ajim anʉm.

Magbaawai chadcha wetwi, õrag jeeu ohoogmamua ãbmua pandam cinco maimua ãwarrdam numí wai sim oobaawai, deeu i aig beewia, ich mag irig jaauchejim aajem. 39Magbaa ich Jesuu õor khapan mag thʉnarr khʉʉnag phũak ʉ̃r khapanaa phʉʉr ohoodo juppi jaaujim aajem. 40Amachig mag juppi jaaubaawai chadcha warphaa poso phʉʉr nʉnʉid, phʉʉr nʉnʉid, ohood aphobaadejim anʉm, amach khĩkhĩratdo pogkha chi khapanag cincuenta, maagwai pogkha cien; õor pom mag thʉnarr thumaa ich mag ohood thʉnʉisijim aajem. 41Magbaawai Jesuu mag pan cinco narr dʉi mag ãwarr dau numí narrpa phe auwia, ʉ̃gthaag eerpanaa, Ẽwandamag ʉu ajim anaa chi pan thorreunaa, jũrr ich khapeenag ʉapʉimajim aajem, tagam khʉʉnag jigmamkhĩir. Ich agjo chi ãwarrjã agdaujo thumaam khʉʉnag jigpʉijim aajem. 42Magdamaupai maig õor thʉnarr khʉʉn thum biwaauwia imie phobaadejim anaabá. 43Mag imie phobaadeewai chi pan ãwarr dʉi sobtarrau thʉbʉt doce ipiirkha aujim aajem. 44Mag chi thach khotarr khʉʉn khapanag emkhooin appai cinco mil naajim aajem, ʉʉinjã beerba chaainjã beerba.

Jesús dojã ʉ̃r nʉrrarr

(Mt. 14:22-27; Jn. 6:16-21)

45Mag thach kho aaipawia Jesuu ich khapeenag, —Pãar mʉ na thoom igar Betsaidaag dʉrbagkhabaadet ajim anʉm, maimua jam phobor eeta mʉ nʉbaimat. Mʉʉn nau mʉg õor ereu thʉnʉm thum oopʉiwiata majugui ajim anʉm.

46Maimua chadcha mag õor wetum khʉʉn thum oopʉiwiata durrsĩ gaai petajim aajem, Ẽwandamag jewaan. 47Mag ich khapeen bote ee ich na pʉitarr aawai, ya kheubaadeewai, dojãrr wetmajim aajem. Maagwai Jesús ich appai thʉbawi agtha durrsĩ gaai Ẽwandamag jeeu sĩejim anaabá. 48Mammua Jesuu oowai i khapeen amach juadamau okhar ẽkha wetmajim anʉm, khĩir garmua phũ theeg we thʉnʉm ee. Mag amach juadamau ẽkha wetum oobaawai ãspajuag am ẽkha auwimajim aajem, sĩi dojã ʉ̃rpai mamua. Pari mag am ẽkha autarrjã sĩi khajapha am aig dichaagpamjoo sĩejim anʉm. 49Mamʉ mag sĩi dojã ʉ̃rta nʉrrʉm oo athaawai akhaarpii awia jãphierr nʉm iekhau ähäa khaphobaadejim anaabá. 50Ma chan mag ãbpaimuajã ooba, amach thumaam khʉʉnauta oo narr aawai, amach thumta jãphierr naajim aajem. Pari mag sereubaadem bʉrre ich Jesús garmua amag, —Keena, oob jãphierrmiet; mʉ khabahab ajim anʉm.

51Magnaa am bote ee waaidʉbaadee chi phũjã warre thumbamamua thumbabaadejim aajem. Mag oobaawai i khapeen warre dauderraa nʉisijim anʉm, 52ag noram Jesuu amach dakhĩir pan ãwarr dʉi khapanjã khaba narraupai õor pom thʉnarr thach khopitarrjã khĩir ee paba. Jesuu ich juapá oopi sim khaphʉ aju aai nʉmta warag magʉmjã khĩirjuba sĩita jãphierr naajim anaabá.

Jesuu Genesaret durr õor mor masim khʉʉn khapan monaaupʉitarr

(Mt. 14:34-36)

53Maimua warag ãba ereubaadewi thoom igar deeum durr Genesaret anʉm phẽeubagkhabaimaawai warre amach wettarr bote jʉ̃ sĩujim aajem. 54Mag jʉ̃ sĩuwia ya am durr paaukhabaadeewai aig õor narr khʉʉnau warre Jesús khaug athajierram anʉm. 55Amachdeu mag i khaugphobaadeewai, amach dakham khʉʉnag i barbaichem khap amkhĩir, jũrr jaau nʉrrjee aphobaadejim anʉm. Amachdeu mag ũrphobaadeewai phoborpierr aaunaanpanau amach aaunaan pa bʉʉrkham gaaipa i sim aig aibeemajim aajem.

56Jesús nʉrrʉmpierr phobor ee didam khapan khaba nʉnʉidʉm ee maimua sĩi durr didam ãhãbdo nʉnʉidʉm eem magwe i na kaaijã ee amach aaunaan aubeenaa irig, —Maar aaunaanag pʉch khajũahidam gaaipai khãijã pʉrpibá aajeejim anʉm, monaaumkhĩir.

Mag chadcha thum i khajũa gaai pʉrmam khʉʉnan warre monaaukha maajeejim aajem, mag sĩi pʉrbarmuapai.

Currently Selected:

San Marcos 6: noaA

Highlight

Copy