San Marcos 5

Jesuu woun ãb dosãt beneu baarjerr ben chugpaatarr

(Mt. 8:28-34; Lc. 8:26-39)

1Mag khodjorroo awia Gadara durr phẽeubaimajierram aajem, ich ag thʉrrdo eepai thoom igar. 2Mag phẽeubaimawia Jesús bote eemua waaidʉwia durrpabaadem ee, i khĩirphee woun ãb dosãt beneu bar simta durr ujã aarmua i aig khaphig beejim aajem. 3Mag woun sĩi ujã ee õor aukheerjem jẽbdegpai sĩejeejim anaabá. Mag sim chan par õrau pʉr aunaa cadenau jʉ̃ sĩsiukhamjã pod jʉ̃ wai naaba aajeejim anʉm. 4Mag juapa theeg sĩewaita biek khapan parii õrau cadenau bʉ jʉ̃naa juapa jʉ̃ sĩsiukhamjã, sĩi warag chi cadenta thʉrreu pʉpʉa aajeejim anʉm, ni ãbmuajã pod pʉr wai sĩeba. 5Mag simʉn edaram magwe sĩi pabʉ eeta nʉrranaa ujã ʉ̃rʉm magwe nʉrraajeejim anaabá. Mag nʉrrʉmʉn sĩi parhooba ähäagmamua mokdau juajã gar aunaa ichdeupaita ich phãrmaajeejim anʉm. 6Mamʉ mag nʉrrʉmua warpwe Jesús oo athaawai sĩi warag i simʉgta khaphig beewia i khĩirphee phõbkhabaichejim anʉm. 7Mag phõbkhachenaa thet wiiu anaa irig, —¡Jesús, cha Ẽwandam ʉ̃gthaa phuu nʉm Iewaa! ¿Khantheeta pua mʉ mʉg khaibag waubaichema? ajim anʉm.

8Chi wounau ich garmua Jesuug mag iekhatarran, maan Jesuu ya ag nawe chi mepeer mag woun mor ee simʉg chawag oberpi jaautarr aawaita irua mag iekhajim anaabá. 9Magbaa Jesuu irig, —¿Pʉ khan a thʉ̃ʉrjẽwi? ajim anʉm.

Magbaa chi wounau, —Mʉʉn “Mepeen Phobor” a thʉ̃ʉrjemgui ajim aajem, maar nem khapan sĩerrjee aawai.

10Ich mag wounau irig o bʉ̃rʉʉ aadep aajeejim anʉm, maigmua warp chi mepeen jʉrkhʉʉipʉim ugua. 11Maig dakha durr bʉkhʉrr khũsnaan khapan phathau jʉr kho wenʉrrarr aawai 12chi mepeenau, —Magan ar chum khũsnaan khapan thʉnʉm aar maar pʉiwi jũrr jãkhʉʉn khũsnaan eeta marag dubpi jaaubá ajierram anʉm Jesuug.

13Magbaa chadcha Jesuu mag chi woun mor eem mepeenag obeerpi jaauwi, jũrr mag khũsnaan khapan dos miljo narr eeta dubpi jaaubaawai, chadcha makhʉʉn eeta dubphobaadejim anaabá. Mag mepeen khaigbam pom khũsnaan ee dubphobaadeewai sĩi parhooba khaphig phobaadewi ithurmʉg ʉ̃rmua thʉrrdo ee dʉrbagkha sĩi do ee jogaa khechdubjim aajem.

14Mag oobaawai ajap jãphierrwi chi thʉa narr khʉʉn parhooba khaphig phobaadejierram anʉm, õrag jawaan. Mag wetwi phobor eejã jaauwi maimua phobor igaau di ãhãbdo nʉnʉidʉm eem khʉʉnagjã thumwe jaaumajierram aajem. Amachig mag jaaumaawai ag bʉrre õrau aar oon weetjeejim anʉm. 15Mag wetwia Jesús aar barimawia ooimaawai, chi woun mag dosãt dʉi sĩerr khajũa wajapha jũawia maach khĩir ich mʉg jup oo sim ooimajierram anaabá, sĩi magʉm ben khaigbam pom mor ee chukhu sĩerrjo, monakha. Mag oowai õor dauderraa naajim anʉm. 16Mamʉ mag amach daúacha Jesuu mag woun ben chugpaapʉiwia chi khũsnaanjã lokiewi do ee jogaa khechtarr orr khʉʉnau jũrr deeum khʉʉnag nem ĩgkhamajierram aajem. 17Chi ag perás joobaajerr khʉʉnau mag ũrbaawai Jesuug jajaau aajeejim anʉm, amach durrmua chawag mamkhĩir. 18Mag ich jʉrbaadeewai, deeu maag awi, ich beetarr boteeg mawi ag ee waaidʉbaadejim aajem. Mag i mam oobaa mag chi dosãt ben wai sĩerrau ich arrmkhĩir irig jeeujim anaabá. 19Pari Jesuu ich dʉi arrbajim aajem. Sĩi irig warag, —Pʉch diig mawia pʉch khodnaanag jaaubamí ajim anʉm, jãga Ẽwandamau ʉu pʉ dau ee aug khaugwia pʉ monaaubar. 20Jesuu ichig magbaawai chadcha i ipierr mawia Decápolis durr phobor nʉnʉidʉm ee õrag jaaumajim anʉm, Jesuu i dau aug khaugwi ʉu i ben chugpaatarr. Mag jaaumam ũrwi thumaam khʉʉnta jʉ̃gderraa naajim aajem.

Jairo kha maimua ʉʉi ãbmua Jesús khajũa gaaipai pʉrtarr

(Mt. 9:18-26; Lc. 8:40-56)

21Mag chadcha Jesús deeu Gadaramua dʉrbawia, thoom igar nacha ich sĩerr aar barbaimaawai, õor pom i bigaau phʉʉrbaadejim anʉm. Magbaawai pod durragjã maba, ich aigpai do igaau sĩsijim aajem. 22Mag õor pom phẽphẽeukham ee, woun ãb Jairo a thʉ̃r sim i aig beejim aajem. Mag jooi judionaan Ẽwandam iek jaaujem deg chi pornaan thʉnʉm eem ajim aajem. Mag beewia, Jesús bʉkhʉrr phõbkhachewia, 23chaigpamamua, —Mʉ khaan parba jã eemuapai kherʉmta oo pʉajim, mʉ di aar marraugui ajim anʉm. Mua khaphʉ chirʉm, puata mʉ kha jua pʉrmʉn ʉu i peerdʉ aujugui ajim anʉm ich Jairoou.

24Mag Jairoou ich di aar eeurrbaicheewai Jesús chadcha i dʉi majim aajem. Mag i mam dʉi ĩchab õor pom i ẽudee phẽeudʉ wetmajim anaabá. 25Mag õor khapan pos wetum ee ʉʉi ãb sĩejim aajem, doce años sĩi phõmieu bar sim. 26Mag khitʉmʉn wajap ʉʉi dau aug waaujeejim anʉm, doctornaanag ich monaaupiju ẽkha nʉmjã podba aawai. Parii benhe gaai ich phatkhondam wai kherarr thum gastaapʉitarrjã bʉ̃ʉrjã monaauba, waragta eeg pamaa ajim anaabá. 27Ich mag ʉʉyau ũr athajim anʉm, Jesuu õor mor masim khʉʉn monaau nʉrrʉm. Ichdeu mag ũrbaawai i aar õor pos thʉnʉm ee thet phẽeudʉ mawia eugarmua meraa i khajũa gaaipai sĩi pʉrimajim anaabá. 28Irua mag meraa pʉrimatarran, ich odegpai, “Sĩi mua i khajũadam gaai pʉrbarmuapai mʉ monaau ʉisiju” a khĩirjuwiata mag pʉrimajim anaabá. 29Mag chadcha irua Jesús khajũa gaai pʉrbarm bʉrre chi phõmie mag thʉnarrjã warre thʉbabaadee warre ich mag monaau sĩsijim anʉm. Magbaa ʉʉyau ĩchab warre ich kha jʉʉubaademjã khaug athajim anaabá. 30Mamʉ ĩchab mag ich gaai pʉrbaichem bʉrre Jesuu khaug athajim anʉm, Ẽwandam juapá ich gaai simua ʉʉi ãb monaaubapʉim. Magbaa Jesuu mag õor pos thʉnʉmʉg eerpanaa, —¿Khaíuta mʉ khajũa gaai pʉrbaichema? ajim anʉm.

31Magbaawai jũrr ich khapeenaupai irig, —¿Jãga mag khaíuta mʉ gaai pʉrbaiche aju? Pua oobahab, õor khapan pʉch aig phẽphẽeukham. Mag nʉmʉ mag “Khaíuta mʉ gaai pʉrbaiche” a sĩeb ajim anʉm irig.

32Mamʉ mag jeeu buburrkhamjã ni ãbmuajã ichig jaauba aawai ich bigaau õor nʉm khʉʉnagta oophʉʉrdʉdʉ aajeejim anʉm, mag ich khajũa gaai pʉrchetarr ookhaawai. 33Mamʉ mag meraa i gaai pʉrtarrta ich khaug athaawai jãphierr nʉm iekhau sĩi kha duui Jesús aig beewia i khĩirphee kanieu phõbkhabaichejim anaabá. Magwi chadcha meerba jaaujim anʉm, mag ichdeu i khajũa gaai pʉrtarr. 34Mag ichig meerba jaaubaawai Jesuu irig, —Mua pʉch monaauju khaphʉ mʉ gaai pʉrchetarr gaaimua, ʉu pʉ monaauwi peerdʉjã peerdʉ ʉisimgui ajim anʉm. Ya pʉ monakha ʉisiewai pʉch diig maju aai ʉmgui ajim anʉm irig.

35Jesús agtha mag iekha dʉnʉm ee, mag judionaan Ẽwandam iek jaaujem degam chi por Jairo anʉm di aarmua õor beewi irig, —Kake, ya aaunaanaujã pod ãwatba abarm; ideu Maestro sĩubá ajierram anʉm irig. Ya par maach aar i mabajup ajierram anʉm.

36Pari Jesuu amau mag jaaubaichemjã asekasba, chi Jairoogta, —Oob khĩirjum; sĩi mag khãai warag pʉch chaai oo wai chitaju khĩirjugta wai chirsí ajim anʉm irig.

37Maimua ya warag Jairo dʉi i di aar mam arr aawai ich mam dʉi õor khapan arrbajim aajem. Ãba ich dʉi arrtarr khʉʉnan Pedro dʉi Santiago ajim aajem, maimua Juan; makhʉʉn thãrjuppai arrjim aajem ich dʉi. 38Mag wetwia di aar barimawia ooimaawai Jairo deg sĩi bĩep sereu thʉnʉm dʉi õor phogdʉ thʉnʉmjo thʉnʉm ee jũrram khʉʉnau ʉapeperkhamta ũrimajierram aajem. 39Magbaa ich Jesuu ierr mag am sereu thʉnʉm aar dubwia amag, —¿Khantheeta mag atcha sereu thʉnʉ́ma? ajim anʉm. Oob bĩemiet. Chaai meeba sĩi khãi kherʉm khabahab ajim anʉm amag.

40Mamʉ Jesuu mag chaai meeba sĩita khãi sim abaawai aig narr khʉʉnau warag i wau iekha naajim anaabá. Mamʉ ich gaai iukha nʉmjã am iek asekasba, warag thumaam khʉʉnag dawag oberpi jaauwi, chi binaandam dennaan maimua ich khapeen thãrjup ich dʉi phe arrtarr khʉʉnpaita ich dʉi ierrag dubpijim aajem. 41Mag chi binaandam aar dubwi, i juadam gaai pʉr aunaa irig, —Talita, kum ajim anʉm. (Mag sim aiguin maach meúan, “Ʉʉikhaardam, phiidʉbaad” a simʉu.)

42Magbarm bʉrre chadcha phiidʉwia õor dakhĩir monakha dʉr nʉnʉʉu khabaadejim anaabá. Mag oobaawai chi dennaan maimua ich Jesús khapeenpa warre dauderraa nʉisijim anʉm. Ich mag chi daupeerdam Jesuu phiriu autarr, doce años sĩejim aajem. 43Mag phiriu auwi chi chaairag thachdam deepi jaaujim anʉm, khomkhĩir. Mamʉ mag daupeerdam ichdeu phiriu autarr chan bʉ̃ʉrjã aig narr khʉʉnag jaaupibajim aajem.

Currently Selected:

San Marcos 5: noaA

Highlight

Copy