San Mateo 10

Jesuu ich dʉi ogdʉba wenʉrramkhĩir doce jʉr autarr

(Mr. 3:13-19; Lc. 6:12-16)

1Biek ãb Jesuu maach ich khapeen doce ich dʉicha ogdʉba wenʉrraju khʉʉn ich aig thʉ̃rkha auwi maachta mepeen khãaijã jua theeg ʉ̃rcha apijim, ben õor mor ee sĩsidʉmjã maach jua jʉmpiba jʉr werpnaa, aaunaanjã amach khamor machagpierr monaaunaa, sĩi pa mamachdogjã monaaumamkhĩir.

2Mag maach ich iek jaaumkhĩir ichdeucha doce jʉr autarr khʉʉn mʉkhʉʉn ajim:

Simón, (ichpai Pedro a thʉ̃ʉrjem);

Andrés, chi Simón eeum;

Santiago, jooi Zebedeo iewaa, (ichpai ĩchab Jacobo aajem);

Juan, agjo jooi Zebedeo iewaa, Santiago eeum;

3Felipe,

Bartolomé,

Tomás,

Mateo, gobierno debpaar jeeumie arr, (ajapcharan mʉchma, mʉchpai ĩchab Leví aajem);

Santiago, jooi Alfeo iewaa, (ichpai ĩchab Jacobo aajem);

Tadeo, ichpai ĩchab Lebeo a thʉ̃ʉrjem;

4Simón, celotenaan ee sĩerr; maimua

Judas Iscariote.

Maagwai maadeu khaphʉ chirarr akhiin, iin mag Judas Iscarioteeuta thethem khʉʉnag Jesús pʉr deeju ajima, i thõomkhĩir.

Mag doce ichdeu jʉr auwi pʉitarr khʉʉn

(Mr. 6:7-13; Lc. 9:1-6)

5Makhʉʉn doce ich Jesuucha jʉr autarr khʉʉnta ichdeucha pʉijim. Pari mag maar pʉyaagpamua marag, judionaan khabam khʉʉn ee chan wetpiba, ni Samaria durram phobor eejã wetpiba jaaujim.

6—Magju khãai maach judionaan ee Ẽwandam iek ʉkhabagau oveja pap chukhu okhoo wenʉrrʉmjo thʉnʉm khʉʉn eeta ereubaadet ajim. 7Mag wenʉrrʉmua amag, “Ẽwandamta thumaam khʉʉn Porkhaimʉʉ sim; pãar peerdʉju khai, irigta ʉdʉraa pãach Porkhapibat” a jaaupetat ajim marag. 8Magnaa aaunaanjã monaaunaa, kokobé beneu sĩsidʉmjã monaaunaa, õor chi meemjã deeu phiriu aunaa, õor mor eem benjã jẽu werppetat. Pãrag magamkhĩir mua mʉch juapá sĩi parta dee chirʉm aawai pãachdeu õor dʉi mag nʉm paarjã oob jeeumiet ajim marag.

9Mag jajawagmamua, —Oob agʉmua nem perkhoog awi phatkhon khãijã arrmiet. 10Ni khʉd jãrr thach khoogjã oob phiejãb arrmiet ajim. Khajũajã pãach mor gaaim appai arrwi zapatjã pãachdeu jũa nʉm appaita athaadet. Bordonjã chukhu ich jãg ereubaadet ajim. Mua pãrag mag chirʉmʉn, pãachdeu am dʉi wajapha nʉm khʉʉn õraupai agjo pãrau nem igbarmjã khap naaju aawaita bʉ̃ʉrjã nem arrpiba chirʉmgui ajim. 11Phobor ee pãach dubimaawai, wa sĩi didam khapan khabam aig khãijã pãach barimaawai, khap aag nacha jeeu oobat, khai di aigta pãach jẽerimaju aai nʉ a khap aag. Mag pãach jẽerbaimam degpai naawia ereubaadet a jaaumajim, sĩi parhoob dipierr khãi wenʉrraba. 12Mag pãach jẽerimaju di aig barimaawaijã wajapha saludaabat ajim chi di khʉʉn dʉi. 13Chadcha amau mag pãar amach aig jẽerpimʉn, pãach Ẽwandam dʉi khõinaa wenʉrrʉmjo amachjã i dʉi khõinaa naaju. Magbam chan amachta warag Ẽwandam dʉi khõinaa ajujã khaugba nʉisiju. 14Maagwai pãach amach aig barpiba ni sĩi pãach iekpaijã ũrmapha abaawai mag di aigmua wa mag phobor eemua khãijã ereubaadet ajim. Mamʉ mag wetaagpamuajã warre amach dakhĩirwe pãach bʉ gaaim jẽb ʉʉrphe ʉʉrphenaa amag, “Pãachdeu jãg ũrba abarm gaaimua Ẽwandam dʉita khĩir khap abat” a iekhawia ereubaadet ajim. 15Mʉ cha iekha chirʉm iekhau, mag amau pãar igba, ni pãar iekjã ũrmapha abarm jũrran warrgar Ẽwandamau Sodomapien dʉi maimua Gomorrapien dʉi atarr khãaijã am gaai athuuchata burrju a jaaumajim ich Jesuu maachigcha.

Mag ichdeu pʉitarr khʉʉn phithurg wauju jaautarr

16Mag maar pʉyaagpamua ĩchab marag magjim: —Mua chadcha pãar pʉi chirʉm, pari mʉ iek ũrbat ajim: Pãran sĩi oveja chaaindam khum nem thʉnʉm ee pʉakhʉʉibapʉimjota abarm, õor khaibagkham eeta wenʉrraju aawai. Magua, mʉch imeerba muan pãragan, khĩirjug khaug ichkhumjota abat a chirʉm. Mag naab mamʉ ĩchab khĩir machag chukhu duburdamjo abat ajim. 17Khĩir khaphʉ wenʉrrathʉ̃. Pãran õrau pʉr arrwi Ẽwandam iek jaaujem degam chi thethemnaanag deebaimap aju. Magbaa amau pãar wʉjã wʉmaju. 18Mʉ gaaimua pãar khaibag waumkhĩir, õrau pãar gobernadornaan aarjã arrnaa reinaan aarjã aharr aju. Pari mag chi thethemnaan aar pãach arrwai, ʉu pãrau amag ũrmkhĩir mʉ jaaunaa sĩi judionaan khabam khʉʉnagjã mʉ jaaujurau. 19Pari mag chi thethemnaanag pãach pʉr deewaijã oob pãach kõit pãachdeupai iekhaju khĩirjuwia ag nawe, “¿Mʉ khan ata iekhajuwa?” a khĩirjumiet ajim, ya pãar iekhaagpaawai ich Ẽwandamauta ichdeu khap pãrag iekhapiju aawai. 20Mua pãrag mag chirʉmʉn, pãar Aai ʉ̃gthar sim ag Akharauta pãrag iekhamkhĩir khĩirjug deeju aawaita mag chirʉmgui ajim.

21’Mag jaran wir aig khod ãbam khʉʉnjã chi ʉkhaba sim garmua ʉu mʉ iek ʉkha kherʉm thethemnaanag jaaupʉimajugui ajim, ich khodpai wir aig thõomkhĩir. Amach dennaanjã agjo mʉ gaaimua thõomkhĩir thethemnaanag jaaupʉimaawai chi dennaanaujã ich agjo aju amach chaain dʉi wir aig. 22Mʉ gaaimua thumaam khʉʉnau pãar oomappha aju, pari õrau pãach dʉi mag nʉmjã magʉm iek igba warag Ẽwandam dʉita ubʉnaa ich gaai magʉm dichpi athamʉn, ʉu peerdʉwi ʉ̃gtharcha oberjugui ajim. 23Pãach nʉm phobor ee pãach thet pʉrbaichee jũrr deeum phoborog ereupetat. Mag wenʉrrʉmua mʉg Israel durr phobor khapan nʉnʉidʉm ee dʉrju jʉr wenʉrrawiajã, pãrau phobor thum phʉʉrpʉiju nawe mʉch chi Emkhooi Iewaa deeu pãar ee chiraichejugui ajim, magbarm aigmua Ẽwandamta õor thãar ee chi Porkhaju aai sim khap apieg.

24’Mag pãach dau aphʉʉ aju anʉm ũurwaijã oob jʉ̃gderraa amiet ajim. Pãrau khaphʉ nʉmgui ajim, eeu nem khaug simua chan ich maestro khãai atcha nem khaug khaba, ni sĩi chikham chogkha simjã ich patrón khãai ʉ̃rpai khaba sĩejem. 25Magua, ãb khãijã chadcha ich maestroou jaau simjota nʉrrʉm khai, magan chi maestro dʉi aajemjo aju i dʉijã. Jãga chi patrón jooi dau ãaukha nʉm ee chi chognaanta daupii abarju. Maguama, mʉch pãar Porkha chirʉmʉg õrau mʉʉn mepeen por Beelzebú dʉita chirʉm a iekhaajeewai pãrag chará amau athuucha khaigba iekhajugui a jaaumajim maachigcha.

Khaita okho aju aai nʉ

(Lc. 12:2-7)

26’Mʉg jẽb gaai maach wounaan ãba thʉnʉm khʉʉn oob ogkhamiet, pãach thõoju khĩirjuwia. Amaun mʉig eegar amachdeu pãar dʉi mag khaigbanaa parhooba khãijã iekhabarmjã sĩi ich mag khĩir okhoojupii aju. Mamʉ magtarr iekhan mʉg atag paawai Ẽwandamau deeu eeupemjo eudʉ auwia thumaam khʉʉnag ũrpijugui ajim. 27Mag pãar dau aphʉʉ ajujã chadcha ĩs mua meraamjota jaau chirʉm, maach appai. Mamʉ pãach peerdʉajem iek pãachig jaaujem chan ikhʉa jaauba, thetta jaaupetat ajim, thumaam khʉʉnag ũrmkhĩir, mag chi ũr nʉm khʉʉnau pãach dʉi khaigba ajujã khĩirjuba. 28Amau pãar chi ʉ̃rʉmʉn chadcha thõoju awiajã thõoju; pari pãar akhaar chan pod thõo aubam. Magʉm khʉʉn oob ogkhamiet ajim. Magarrau ogkhaju awiajã pãach chi ʉ̃rʉmjã thõowia pãach akhaarjã khĩmie durr ich mag sĩerramkhĩir barpʉyaagjã jua theeg simʉn chadau, chadcha okho abat ajim, Ẽwandam igwi.

29’Pãrau khaphʉ nʉm, nemchaaindam par erraam gaai per aaujem. Pari mag baleebamjo khithee ab mamʉ, maach Aai ʉ̃gthar chiraajemua thõpibam aig chan ãbjã thõba aajemgui ajim. 30Magʉm pãar chará nemchaain khãaijã ʉ̃rcha balee naawai pãarta irua wajapcha thʉa wai sĩejem. Ichdeun pãar porbʉ khapanagjã khapphʉ wai sĩejem. 31Magua, oob atcha pãach khĩirjumiet; pãarta nemchaain khãaijã ʉ̃rcha balee naabahab ajim.

Meerba Jesús den amʉn ichdeujã amjã i deneu aju

(Lc. 12:8-9)

32’Ãb khãijã mʉ igar sĩewai õor dakhĩirjã meerba mʉ iek ʉkhaajem a jaau sim wounan, muajã ĩchab mʉch Aai ʉ̃gthar sim dakhĩir, “Jãan chadcha mʉ garmʉu” ajugui ajim. 33Mamʉ jũrr ãbmua khãijã õor dakhĩir mʉ igwi “Mʉ chan i igarm khabam” a sim wounan, muajã ĩchab mʉch Aai ʉ̃gthar sim dakhĩir, “Jã chan mʉ den khabam, mua i khaugba chitʉm” a iekhaju ajim.

Chi chaairaujã ich dennaan igar khaba aju jaautarr

(Lc. 12:51-53; 14:26-27)

34’Oob pãrau, mʉʉn sĩi mʉg durr gaai õor khõinaa bibigagjã chukhu apiegta beejim amiet. Mʉ chan pãar khõinaa apieg khaba, warag iek phithurg apiegjota beejimgui ajim ich Jesuu. 35Mʉ mʉig mʉg durr gaai beetarran, mʉch iek gaaimua chaain chi emkhooinjã amach aai dʉi khaigba, chi ʉʉinaujã amach ãd dʉi khaigba maimua chi ãignaanjã amach phaauhũan dʉi khaigba jũrr chikham ichaaur aadephʉm gaaimua iek phithurg apiegta beejimgui ajim. 36Wajapcharan deeum khʉʉnjã khaba, dich wir aiguim khʉʉnpaita kha ukhur thʉnaajugui ajim, iwiir ãbmua mʉ iek ʉkhamapha aadephʉm gaaimua.

37’Ãbmua khãijã ʉ̃rcha ich aaita mʉ khãai khõsi wa ich ãd khãijã mʉ khãaijã ʉ̃rcha khõsi sim chan magan mag woun chan mʉ den aju khaba simgui ajim. Wa magba mʉʉta ʉ̃rcha khõsi aju khãai, ich iewaa wa ich kha khãijã ʉ̃rcha khõsi wai sim wounjã mʉ den aju khaba simgui ajim ĩchab. 38Chi mʉ dʉi nʉrram khõsi simuan warre ich phithurg au nʉrrajujã khaphʉ aju aai sim, mʉ gaaimua chikhamnau ich thõoju khaphʉ awiajã ich mag mʉ bʉ ogdʉba nʉrraju aawai. Mag ãwatbaju chan parta ideu khõs mʉ dʉi sim a iekhajugui ajim. 39Ar mʉ gaaimua bʉ̃ʉrjã phithurg aumapha sim chan meem edjã ʉ̃gthar oberbam. Mamʉ ar mua nem jaau chirʉm waum khõchgau wa mʉ gaaimua khãijã dau aphʉʉ abarmʉn chadau ʉ̃gtharcha oberjugui a jaaujim maachigcha.

Regalo deeju

(Mr. 9:41)

40Mag iekhakhagmamua marag, —Pãar mʉ iek jaau wenʉrrʉm aig, õrau ʉuta pãar amach aig baarpinaa pãar iek ũr nʉmʉn magan mʉpata ĩchab ʉdʉʉr amach aig barpi nʉmgui ajim, muata pãar pʉi chiraawai. Mag amau mʉjã amach aig barpi nʉm aig, ich chi mʉ pʉitarr Jooipata barpi nʉmgui ajim, mʉchjã ichdeuta pʉitarr aawai. 41Ẽwandamau ich iek jaaumkhĩir jʉr auwi pʉitarrta ʉu amach aig au nʉm khʉʉn dʉin, mag ichdeu pʉi sim dʉi ajapha abarmjo aju am dʉijã; maimua sĩi woun wajapham khãijã agjo amach aig aumʉn, i dʉi ajapha arrjo ajugui ajim ĩchab am dʉijã. 42Maimua ãbmua khãijã mʉg mʉ iek ʉkhawi mʉ iek jaau durrum khʉʉn amach aig barimaawai nemdam bʉ̃rʉʉm khãijã deem khõsi deemʉn, magtarr paar agjo ĩchab Ẽwandamau irig nem wajapham deeb khaba deejugui a jaaumajim.

Currently Selected:

San Mateo 10: noaA

Highlight

Copy