San Lucas 9

Jesuu doce ich dʉi ogdʉba wenʉrraajerr khʉʉn pʉitarr

(Mt. 10:5-15; Mr. 6:7-13)

1Maimua Jesuu ich khapeen doce ich dʉi ogdʉba wenʉrraajerr khʉʉn ãbam aig thʉ̃rkhanaa agdaujo juapá deemajim aajem, ich denjo õor mor eem mepeen jʉrkhʉʉinaa mor masim khʉʉnjã monaau wenʉrraju ayaa amkhĩir. 2Mag pʉyaagpamua amag magjim anʉm:

—Mua pãar pʉi chirʉm, õrag “Ẽwandamta thumaam khʉʉn Porkhaimʉʉ sim” a jaaumkhĩir, maimua ĩchab amag “Pãar peerdʉju khai irigta ʉdʉraa pãach Porkhapibat” a jaau wenʉrramkhĩir. Mag wenʉrrʉmua ĩchab khamor machagjã thum pãrau monaau wenʉrrajugui a jaaujim aajem.

3Maimua ĩchab amag, —Pãach jua kharr ereubaadet, bʉ̃ʉrjã nem inag arrba: bordón chukhu, talegdijã chukhu, ni thach ni phatkhonjã oob arrmiet; ich jãg ereubaadet ajim anʉm, khajũa theg jũajujã chukhu. 4Maimua pãach wenʉrrʉmpierr pãachig di jaaubarm degpai kheeupaawai khãibat ajim anʉm, pãach maigmua wet nʉm ora. 5Mamʉ phobor ee ni ãbmuajã pãach amach deg dubpiba ni pãach iekjã ũrba abaawai warre amach dakhĩirwe pãach bʉ gaaim jẽb ʉʉrphe ʉʉrphenaa pãachta ereubaadet ajim anʉm. Pãrau magmʉn magbarmuapai amag “Pãachdeu jãg Ẽwandam iek ũrba abarm gaaimua ich dʉita khĩir khap abat” anʉmʉugui ajim anʉm.

6Mag, chadcha Jesuu amachig mag jaaubaawai ereubaadewia phobordampierr jãga Ẽwandamau maach peerdʉajẽ a jaau wenʉrrʉm dʉi ĩchab durrpierr aaunaanpa monaau wenʉrrajim aajem.

Erodeeu Jesús nem wau nʉrrʉm ũrtarr

(Mt. 14:1-12; Mr. 6:14-29)

7Rey Erodes anʉmua ũrbaadejim aajem nem thum Jesuu wau nʉrrʉm. Mag ichdeu ũrbaadeewai khakhaisamjo aadejim anaabá, jũrram khʉʉnau “Juan chi õor por choomieta iiu phiidʉwia nʉrraichem” a jaauchechekham ũrwia.

8Mag nʉm dʉi irua ũurwai ãaur khʉʉnau jũrr, “Elías warrgar Ẽwandam i jaaujerrta oberchewia jãg nʉrrʉm aajem” a jaau nʉm dʉi agjo bigaaum khʉʉnau jũrr, “Elías khabam khai jãan chadcha jooingar Ẽwandam iek jaaujerrta deeu phiidʉwia jãg nʉrrʉm” a jaauche naajim anʉm. 9Mag bĩi wejom ũrwia chi Erodeeu ich odegpai, “Keen, magaag Juanan mua o thʉappʉipitarrau. Magan, ¿khai ajuma õrau mag bĩi thʉnʉm?” aajeejim anʉm. Mamʉ parhooba mag jaau thʉnʉm gaaimua ichdeuchata i dʉi oom khõchag sĩejim anaabá.

Jesuu õor cinco mil jãhogtarr

(Mt. 14:13-21; Mr. 6:30-44; Jn. 6:1-14)

10Mag doce ich Jesuucha pʉitarr khʉʉn wenʉrrʉʉ awia bardʉtkhacheeu amachdeu nem wau wenʉrrarr thum irig ĩgkhachejierram aajem. Magbaawai chi Jesuu chawag am phe arrjim aajem, phobor Betsaida anʉm igaau õor chukag ee. 11Mamʉ õrau mag i petam khaugpʉitarr aawai i ẽudee pochag wetjim anʉm. Mag wetwia ich aar bardʉtkhabaimaawai Jesuu amag, —Ʉu pãar beejimgui awia, warag amag, Ẽwandamta thumaam khʉʉn Porkhaimʉʉ simgui ajim anʉm. Pãar peerdʉju khai, irigta ʉdʉraa pãach Porkhapibat a jaaumajim aajem.

Mag jaaumamua ĩchab mor masim khʉʉnpa monaaupʉimajim aajem. 12Mag õor monaaupʉpʉikham ee, warag edau kheuju gar pabaadeewai chi doce ich dʉi ogdʉba wenʉrraajerr khʉʉnau i aig beewia irig, —Mʉig maach õor chukag eeta nʉpí, phobor ee wa di dakha nʉnʉidʉm ee khãijã amag wetpi jaaubá ajierram anʉm, magʉm aar thachdam khowia khãimkhĩir.

13Mamʉ magbaawai Jesuu jũrr amag, —Am pʉiju khãyau, pãachdeuta amag thach deebat ajim anaabá.

Magbaawai jũrr amachdeu magjierram anʉm irig:

—Maar khoju chukhu nʉm amag deeg; ãba pandamta cinco wai nʉm dʉi ãwarrdamta dau numpai wai nʉm. ¿Jãga õor pom mʉg thʉnʉm marau jãhogbarju? ¿Wa phobor eeta marau khoju per awaan wetjuwa? ajierram anʉm.

14Mag õor pom thʉnʉm ee emkhooin appai cinco miljo naajim aajem. Magbaa Jesuu amag, —Õrag jaaubat ajim anʉm, ãbam aigpai poso de cincuenta en cincuenta khĩkhĩratdo jupkhamamkhĩir.

15Mag chadcha i ipierraa õrag jaaubaawai thum ich mag poso phʉʉr ohood aphobaadejim aajem. 16Magbaawai ich Jesuu mag pan cinco narr chi ãwarrdam numpai narr dʉi ãba phe auwia, ʉ̃gthaag eerpanaa, Ẽwandamag ʉu ajim anaa, thorreuwia, ich khapeenag ʉapʉimajim aajem, jũrr õrag jigmamkhĩir. 17Mag jigmamua thumaam khʉʉn biwaauwia imie phobaadeewai chi pan ãwarr dʉi sobtarrau thʉbʉt doce ipiirkha aujim aajem.

Pedroou jaauwai Jesuun warrgarwe ich Ẽwandamau pʉiju aajerrau a jaautarr

(Mt. 16:13-19; Mr. 8:27-29)

18Khãai ãb Jesús ich dʉi doce ogdʉba wenʉrraajerr khʉʉn dʉi õor chukag ee mawia Ẽwandamag jeeu sĩejim aajem. Mag jeeu dichwia amag, —Õrau mʉ igwia iyʉʉ nʉm ũurwai, ¿am iek mʉ khai aajẽ? ¿Pãrau ũrba aajẽ? a jeeujim anʉm.

19Magbaawai amachdeu magjierram aajem:

—Am iek pʉ Juan chi õor por choomie aajem; deeum khʉʉnau jaauwai, pʉʉta Elías aajem, warrgar Ẽwandam i jaaujerr; maagwai pogkha jaauwai pʉ sĩi warrgar agjo Ẽwandam i jaaumie arrta deeu iiu phiidʉwia nʉrraichemjã a jaaujem am den ajierram aajem jũrr irig.

20Ichig magbaawai, jũrr amachigcha, —¿Ma pãachdeujãma, pãrau khĩirjuawai mʉ khai agá? a jeeujim anʉm.

Magbaa Pedroou irig, —Pʉʉn Cristoou, ar warrgarwe ich Ẽwandamaucha õor peerdʉ aumkhĩir pʉiju jaaujerr ajim anʉm irig.

21Pedroou ichig magbaawai, —Chadcha pua ag eyaa jaaubapʉimke ajim anʉm, mamʉ oob bʉ̃ʉrjã chikhamnag jaaum ajim anʉm.

Warm khʉʉnagjã jaaupibajim aajem. 22Maimua magjim anʉm:

—Mʉch chi Emkhooi Iewaa chadcha dau aphʉʉ aju aai chirʉm. Mʉ dau ãaukha isegwia Jerusalenpie jooin chi thethem khʉʉnau phadnaan chi porkha nʉm khʉʉnaupa Moisés iek jawaag chi machnaan dʉimua mʉ thõomkhĩir pʉr deeju. Mamʉ mag amau mʉ thõowiajã khãai thãrjupam ee phiidʉwia deeu mʉ iiu chirsijugui ajim anʉm.

23Maimua thumaam khʉʉnag eerpa eerpanaa, —Chadcha pãrau mʉ iek pãach thãraucha ʉkha nʉm khai, magan mua nem waupi jaau chirʉm appaita waubat ajim anʉm, “Mʉchdeuta khap chirʉm mʉchdeu nem wauju” a iekhaba. Mʉ gaaimua chikhamnau pãach dau aphʉʉ thõoju khĩirjuwia khãijã magʉm igba, waragta ʉkhanaat. 24Ar chi mʉg jẽb gaai mʉ gaaimua bʉ̃ʉrjã phithurg aumapha wenʉrrʉm khʉʉn chan meem edjã ʉ̃gthar oberbamgui ajim anʉm. Magarrau ar chi mua nem jaau chirʉm waum khõchgauta amach nemjã khĩirjuba sĩi warag mʉ gaaimuata dau aphʉʉ anʉm khʉʉnan chadau ʉ̃gtharcha oberjugui ajim anʉm. 25Pãrau oowai, ¿khan ajaug sĩ ajim anʉm, woun ãbmua mʉg durr thum ichdeupai jʉ̃a wai sĩsim, mamʉ mag sim meebaadee khĩmie durr petam; irua ich durr thum ich dʉi arrju aai sĩ? Pod arrbamgui ajim anʉm. 26Ãb khãijã mʉ gaaimua wa mʉ iek jaauju khãijã õor dakhĩir chigaa amʉn, mag mʉch chi Emkhooi Iewaajã thumaam khʉʉn Porkhanaa mʉch Aai dʉi ʉ̃gthar i chognaan thʉnʉm khʉʉnpa mʉg durr chachaan beem edjã muajã ĩchab ich khĩircha eerpanaa chigaa warag, “Mua, bʉ̃ʉrjã pʉ khaugba chitʉm” ajugui ajim 27Cha mʉ iekha chirʉm iekhau ãaur khʉʉn cha mʉ iek ũr nʉm khʉʉn chan mʉchta thumaam khʉʉn Porkha beeju edamjo aadem oobam aigjã meebajugui ajim aajem Jesuu ich khapeenag.

Jesús sĩi bʉ̃ʉmjo aaderr

(Mt. 17:1-8; Mr. 9:2-8)

28Mag ich khapeen ãaur khʉʉnag amach daúa ich oopiju jaautarr khur seman ãbjo nʉm ee, durrsĩ gaai Ẽwandamag jewaan mamua ich dʉi phe arrjim aajem Pedro, Santiago maimua Juan. 29Mag mam wetwi ich Ayag jeeu simta, degolp sĩi bʉ̃ʉmjo aadejim anaabá, ich mor gaai khajũa jũa sĩerrpa. Maagwai chi khajũa chará sĩi phuumjo aadejim anʉm, ich bäpgau. 30I magbaadem ee wounaan numí i bigaau dʉnʉʉutkhachewia i dʉi iyʉʉ naajim aajem. Mag i dʉi iyʉʉ narr khʉʉn, jooingar Moisés khararr ajim aajem Ẽwandam i jaaumie Elías khararr dʉi. 31Mag am iyʉʉ dʉnʉnʉidʉ aichem dʉi ĩchab pagthʉm daujo phʉr jẽer athamua mag ãsdaau narrta sĩi warag arar am wʉʉ wai sĩsijim anaabá. Am iyʉʉ narran, ich Ẽwandamaucha warrgarwe ich i jaaumienag jaautarrjo, Jerusalén phobor ee õrau i thõojuuta ig iyʉʉ naajim aajem. 32Mamʉ maagwai Pedro ich khapeen numí amach ãba wenʉrrarr khʉʉn dʉi sĩi daphokgau pod dau ẽebajujo thʉnʉmuata oo naajim anaabá, mag Jesús Moisés dʉi Elíapa iyʉʉ dʉnʉnʉidʉ nʉm. Maagwai ich Jesuun agtha sĩi bʉ̃ʉmjo thʉnʉm dʉi i khajũa chará phuumjota thʉnaajim anʉm, ich bäpgau. 33Mag ãba dʉnʉnʉidʉ naawia chi warm khʉʉn i aigmua wetaag ẽkha nʉm ee, Pedroou irig, —Maestro, ʉu chi agamjo nem ajaug maar mʉig nʉm, ¿jãgwia maadeu rãichdi thãrjup eu aubá? ajim anʉm, ãb pʉ athee, ãb Moisés athee maimua ãb Elías athee.

Mamʉ mag sim chan Pedroou ich iekha simjã khaugba simta mag iekha dʉnaajim anʉm. 34Mamʉ mag i iekha dʉnʉm ee, jʉʉnthumie baug beewia am joodʉ athaicheewai jãphierr phobaadejim anaabá, ag ee ierr paaukhabaadem oowia. 35Mag jʉʉnthumie ee am ierr paaukhabaadeewai ag eemua woun iekjo, “Chamʉʉta mʉ Iewaa, mʉchdeu jãsehne wai chitʉmʉu, õor peerdʉ aumkhĩir mʉchdeu jʉr autarr. Irua jaau simta ipierraa abat” a iekhabarm ũrjierram anʉm.

36Maimua chi woun iekjo sĩerr khĩubaadem dʉi ĩchab chi jʉʉnthumiejã chukkhu aadem ee oowai Jesús ich appai oo dʉnaajim anʉm. Mamʉ amachdeu mag ootarrjã ag ed gaai chan bʉ̃ʉrjã deeum khʉʉnag jaauba, sĩi khĩuu nʉisijierram anaabá, nem dau chig ooba arrjo.

Jesuu chaai mor eem mepeer jẽupʉitarr

(Mt. 17:14-21; Mr. 9:14-29)

37Ag noram ãspaau mam durrsĩ gaai naawi deeu ich khapeen dʉi jer paaukhabaadem ee, am khĩirphee õor pooma wedurajim aajem. 38Mag khapan pos wedurum eemua woun ãb i aig beewia irig magchejim anʉm:

—Maestro, mʉ chaaidam thõthõrrso khitʉm pʉ aig aibeejim. ¿Pua mʉ dau aug khaugwia i monaaupʉibaju khai? Mʉ chan tag chaaijã chukhu ãba mʉgdam appaita wai chirʉmgui ajim anʉm. 39Mʉg kherʉm ich beneu barbaadeewain nem theegta baarjem. Di bäbäjä khabaademua ähäikham dʉi sĩi isaphunjã bau aadeejem. Mag di bäbäjäkham pʉamjã igba thʉnʉʉ awia bar dichdimaawain gaai machgau sĩita kha aupihba aadeejemgui ajim anʉm. 40Chi mepeer obeerpʉimkhĩir pʉ dʉi ogdʉba wenʉrraajem khʉʉnag mua jaautarrjã amau podbajierramgui aichejim anaabá.

41Magbaawai Jesuu thumaam khʉʉnag eerpanaa, —Pãran chadcha pãach thãar khaibag gaaimuata pãrau chan jãg chaai Ẽwandamau monaaupʉijujã khĩirjuba nʉmgui ajim anʉm. ¿Pãrau jãg Ẽwandam jua theeg simjã khaugbamjo nʉm sĩi ich jãgta mua ãwat chitaju aai chirʉ́ pãrau oowai? ¿Khan atchata pãrau mʉ pãach dʉi chitapim ig nʉma ajim anʉm, ajapcha ʉkhaag? Magnaa jũrr chi ayagta, Mʉ aig pʉch chaai aipidú ajim anʉm.

42Mag chadcha chi ayau aidurum ee, chi chaai ich beneu theega barbaademua warre jẽkhʉt barwerppʉijim anʉm. Magbaawai Jesuu chi mepeer mag chi chaai mor ee simʉg meeurraunaa obeerpi jaaubaawai warre oberbaadejim anaabá. Mag chaai monaaupʉiwia chi ayag, —Ar kherʉm pʉ chaai ajim anʉm.

43Mag Jesuu chaai monaaubarm oowia thum aig narr khʉʉn dauderraa nʉisiwia Ẽwandamagta, “Ẽwandam, pʉchta chadcha mepeen khãyaujã chi jua thierriu. Mepeenau chan pod pʉ dʉi barbam” ajierram aajem.

Pʉaba Jesuu chikhamnau ich thõoju jaautarr

(Mt. 17:22-23; Mr. 9:30-32)

Tagam khʉʉn mag dauderraa thʉnʉm ee, Jesuu ich khapeenag magjim aajem:

44—Ajapha mʉ iekhaagpam ũrwia khĩir eyaa wai nʉisit. Mʉigmua pomcha khaba nʉm ee, mʉg mʉch chi Emkhooi Iewaa mʉg chirʉmʉn chi thierrnaanag pʉr deejugui ajim anʉm.

45Mamʉ chi khapeenau Jesuu amachig mag iekhabarmjã warre khaphʉ aju nem khaba arr aawai pod khaugbajierram anaabá. Mag amachdeu pod khaugba abaawai irig jeeujojoo naawi warag inagau jeeuba, ich magpai nʉisijim aajem.

Chijãata ʉ̃rʉʉcha aju aai sĩ a jaautarr

(Mt. 18:1-5; Mr. 9:33-37)

46Maimua wetwia amach appai aphobaadeewai, “Keena, magan mʉg nʉm aig, ¿chijãata ʉ̃rʉʉcha sim khai?” a iyʉʉ aphobaadejim aajem.

47Mamʉ Jesuu am khĩirjug khaphʉnaa am thãarjã khaphʉ sĩerr aawai, mag iyʉʉ nʉm ũrbaa chaaidam jiir auwia ich bigaau dʉnʉʉupi khernaa amag magjim aajem:

48—Mʉg chaai agtha ich juau paba aawai serbiiba khitʉmjo õor thʉnʉm thum mua khõsi chitʉm. Pãrau mʉ denjo mʉg khitheem ãb khãijã jãsenkhawia pãach di aig aumʉn, magan pãrau mʉchchata mag khĩir jãsenkhabarmjo abarmgui ajim anʉm. Mag pãrau ʉdʉraa pãach aig mʉ baarpi nʉm aiguin magan pãrau mʉ Aaijã khõsi nʉm anʉm, ichdeuta mʉ pʉitarr aawai. Mua pãrag jaaukhimgui ajim anʉm: Ar amachdeupai khĩirjuawai thumaam khʉʉn khãyaujã chaai bʉ̃rʉʉmdamjo serbiiba nʉm a khĩirju nʉm khʉʉnta warm khʉʉn khãyaujã ʉ̃rʉʉcha nʉmgui ajim anʉm chadcha, Ẽwandam dau na.

Maach ichaaur khaba simʉn maach igar sĩewaiu a jaautarr

(Mr. 9:38-40)

49Magbaawai Juanau Jesuug, —Maestro, marau woun ãb oojimgui ajim anʉm. Mag wounau iekhamamua pʉ thʉ̃r thʉ̃rnaa õor mor eem meperag obeerpi jaaubaawai chadcha obeerpʉi maajeejim. Mamʉ maarjo pʉ dʉi nʉrraba aajemuata mag sĩewai marau irig tag õor mor eem mepeen jʉrkhʉʉipiba jaaujimgui ajim anʉm.

50Magbaa Jesuu magjim anʉm irig:

—¿Khanthee pãrau ideu õor jua pʉrpiba irig magjierrá? Maadeu nem wau nʉm oowia maach ichaaur aba warag maach juapierr oo sim khai, magan maan dʉi maach igar sĩewaiugui ajim anʉm.

Jesuu ich khapeen numiim khʉʉnag meeurrau sĩutarr

51Ya Jesús deeu ʉ̃gthar ich Aai aar maimʉʉ aadeewai warag thãar phĩiuwia ogkhaba Jerusalenag petajim aajem. 52Mamʉ ich na di jʉrwia nem khĩir khaugamkhĩir, ich khapeen eem õor jʉr auwia pʉijim aajem. Magbaa makhʉʉnau ereuwia Samaria durr phobordam pom khaba khitʉm ee i na di jʉrimajierram aajem. 53Mamʉ chi Samariapienau Jesús sĩi Jerusalenagta mam a ũrbaawai i athee chan di chukhum ajierram anaabá. 54Magbaawai deeu beewia mag irig deebaju abarm jaauchejierram aajem. Mag ũrbaawaita jũrr Santiagoou Juan dʉimua, —Señor, ¿pua oowai mag pʉrʉg di deebam anʉm jũrr marau Ẽwandamag jeeuju aai nʉ ajim anʉm, Elías khararrau jeeubaawai atarrjo am phobor pábaademua uurdʉ khechpʉimkhĩir? Marag jaaubá ajim anʉm Jesuug.

55Magbaawai Jesuu amag phʉʉrba oonaa magjim anʉm:

—¿Khaíu pãrag jaauwai magta aju aai nʉm ajĩ, õrau dich kha isee aawai? [Chi mag iekhaajem khʉʉnan bʉ̃ʉrjã Ẽwandam iek ũrba aajem khʉʉnta mag iekhaajemgui ajim anʉm. 56Mʉch chi Emkhooi Iewaan mʉg jẽb gaai õor peerdʉ awaanta beejim. Mʉ mag mʉch garmua warag õor amach pekau ee durrum peerdʉ aubanaa sĩi opʉyaanjã beebajimgui ajim anʉm.]

Mag warre am kach dʉʉ iekhapʉiwia deeum phobordamag ereubaadejim aajem.

Jesús dʉi wenʉrram ig narr khʉʉn

(Mt. 8:19-22)

57Mag ereubaadewia agtha barba wenʉrrʉm ee, ãbmua Jesuug, —Señor, mʉʉn pʉ mampierr pʉ dʉi ich jãg chitajugui ajim anʉm.

58Magbaawai jũrr ich Jesuu irig, —Pʉchdeu mag mʉ dʉi chitam khõsi chirʉm khai, marrau magan ajim anʉm. Mamʉ pʉrʉg jaaukhimgui ajim anʉm: mʉ khãyau pabʉ eem nemchaain amach khãaijem jẽbdi paraam; nem ichpanjã kheeupaawai amach khãaijem khãidu wai sĩsidʉm. Mamʉ mʉch chi Emkhooi Iewaa chan mʉg chitʉm aig kheubaadeewai khãyaag ajapha werba chiraju didamjã chukhu chitʉmgui ajim anʉm. Pʉjã mʉjo magta chitam khõsi chirʉm khai, marrau magan ajim anʉm.

59Maimua ãbakhaíg jũrr ich garmuata —Marrau mʉ dʉi abaawai, jũrr magua, —Señor, magan ideu nacha mʉ mʉch aai aar mawia i dʉi chirʉʉ apibá. Mʉg atag mʉch juadamaucha jooi aukher pʉabajeen chadau mua pʉ ogdʉba chitajugui ajim anʉm.

60Magbaawai Jesuu irig, —Magju khãai warre mʉ dʉita marrau ajim anʉm. Ideu ar amach Ẽwandam iek ʉkhamaaugau chi thõmjo nʉm khʉʉnag amach binaan beppibá. Mamʉ pʉ mag khãyau warag õrag jaaubamí ajim anʉm: “Ya Ẽwandam thumaam khʉʉn Porkhacheeg beeimʉʉ sim. Pãar peerdʉm khõsi nʉm khai, ichta ʉdʉraa pãach Porkhapibat” a jaaupet ajim anʉm.

61Magbaawai deeum aig sĩerrau ĩchab irig magjim anʉm:

—Señor, mʉjã pʉ dʉi ogdʉba chitaju ĩchab. Mamʉ ideu nacha mʉch di aar mapibá ajim anʉm, mʉch di aig durrum khʉʉnag “ayoo keena” apʉyaan.

62Magbaa Jesuu magjim anʉm:

—Chi mʉ dʉi nʉrrʉm woun chan ag na ichdeu parhooba nem waaujerrjã agtha khĩirju nʉrraju aai khaba sim. Irua magju khĩirju chirʉm chan, pod Ẽwandam athee nem ajapha waubamgui ajim anʉm.

Currently Selected:

San Lucas 9: noaA

Highlight

Copy