San Lucas 6

Jesús khapeenau jua ʉ̃ʉijem ed trigo phierrtarr

(Mt. 12:1-8; Mr. 2:23-28)

1Biek ãb jua ʉ̃ʉijem ed Jesús ich khapeen dʉi trigo phur wejom ee dich wenʉrrajim aajem. Mag dich wetumua i khapeenau trigo chi bichpa thʉrreunaa chi dau juajãagpai sigthʉnaa kho wetmajim aajem. 2Mag kho nʉm oowia chi ajapcha Moiseeu Ẽwandam iek phã pʉatarr ʉʉrkhaajem khʉʉnau amag, —Pãade oobat, jua ʉ̃i nʉm ed aawai bʉ̃ʉrjã phidkhaju khaba nʉmta pãrau jãg trigo phierrnaa kho wenʉrrʉm. ¿Pãrau chan khaugbahab ajim anʉm, jãgpai phierr nʉmjã nem pom eeu nʉm dʉi ãba sim?

3Magbaawai jũrr Jesuu amag —Mamʉ ¿khani mʉ khapeenau khaigba abar? ajim anʉm. ¿Magan pãrau bʉ̃ʉrjã Ẽwandam iek phã sim gaai thʉ̃ʉrwai ooba aajeeb, Davidau ich dʉi wenʉrrarr khʉʉn dʉimua amach jãsoo aphobaadeewai Ẽwandam atheem pan khotarr? 4Pãrau khaphʉ nʉm, jãga irua Ẽwandamag jeeujem deg dubwia Ẽwandam atheem pan nasãd gaai phe sĩerr aujĩ. Mag pan parhoobam khʉʉnau khoju khaba, ãba phadeupaita khoju aai sĩejim. Mag khaphʉ sĩerrta irua khowia ĩchab ich dʉi wenʉrrarr khʉʉnagjã deejimgui ajim anʉm. Mamʉ mag khotarr paarjã Ẽwandamau am chig abajim. ¿Magtarr pãrau khaugbata nʉ? ajim anʉm amag, ich Jesuu.

5Maimua mag jaau dichwia ichdeupai, —Mʉʉn Ẽwandam Iewaa Emkhooirau. Muruata thumaam khʉʉnag khan nemta wauju aai nʉ a jaauju aai chirʉmgui ajim anʉm, jua ʉ̃ʉijem ed awiajã.

Woun ãb jua jʉser khitarr

(Mt. 12:9-14; Mr. 3:1-6)

6Maimua biek ãb agjo jua ʉ̃ʉijem ed ich Jesús judionaan biirdʉajem deg dubwia Ẽwandam iek jaau sĩejim aajem. Maig ĩchab sĩejim aajem woun ãb, juachaar garm juadam sĩi jua jʉser khitʉm. 7Maagwai judionaan chi machnaan dʉimua chi ajapcha Moiseeu Ẽwandam iek phã pʉatarr ʉʉrkhaajem khʉʉnau Jesuug dau thõba thʉnaajim anʉm, eeu irua jua ʉ̃ʉijem edjã igba õor jua pʉrwia monaaubaawai magʉm gaaimua ichigcha õor dakhĩir “Pua chan jua ʉ̃ʉijem edjã bʉ̃ʉrjã ʉʉrkhabata sim” a iekhaag. 8Mamʉ ichdeu khaphʉ sĩejim anaabá, amau mag khĩirju nʉm. Mag gaaimua chi woundam jua jʉser khitʉmʉg, —Dayag pidú, mau õor jãrrcha dʉnʉʉubaiche ajim anʉm.

Magbaawai chadcha beewia õor jãrrcha dʉnʉʉuchejim aajem. 9Mag dʉnʉʉubaicheewai Jesuu magjim anʉm:

—¿Pãrau oowai khan nemta maadeu wauju aai nʉ jua ʉ̃ʉijem ed? ¿Õordam dʉi ajapha aju, wa õor khaibag wauju? ¿Õor peerdʉ auju, wa õor thõoju? ¿Khani ʉucha sĩ? ajim anʉm amag.

10Mamʉ mag jeeunaa õor thumaam khʉʉn khĩir eerpa phʉʉrdʉdʉkham ich iek ʉkhaba abaawai jũrr chi jua jʉser khitʉmʉgta, —Dayag jua ʉabá ajim anʉm.

Mag chadcha i ipierr jua ʉabaawai warre jua monakkha sĩsijim anaabá. 11Mamʉ amach dakhĩir magbaawai i dʉi khĩir machag aphobaadem iekhau warag oberdʉtkhawia, —Keena, maadeu jãgata akhiin jãg Jesús thõopʉikham anaajim anʉm, amach appai.

Jesuu ich dʉi ogdʉba wenʉrramkhĩir doce jʉr autarr

(Mt. 10:1-4; Mr. 3:13-19)

12Mag Jesuu jua ʉ̃ʉijem edam magwe õrag jaau nʉrrʉm ed gaai durrsĩ gaai waaidʉjim aajem, Ẽwandamag jewaag. Mam eddurr pom ich mag Ẽwandamag jeeu eejim aajem. 13Maimua ãspabaadeewai ich dʉi wenʉrraajerr khʉʉn ich aig thʉ̃rkha auwia mag khapanag eem doce khĩet jʉr aujim aajem. Makhʉʉnta i chognaan i iek jaaujem khʉʉnkha thʉ̃rjim anaabá, apostolnaan. 14Mʉkhʉʉn irua jʉr autarr khʉʉn thʉ̃rʉu:

Simón, (ichpai Jesuu Pedro a thʉ̃rjim);

Andrés, (chi Simón eeum);

Santiago, (ichpai ĩchab Jacobo a thʉ̃r sĩejim);

Juan, (chi Santiago eeum);

Felipe,

Bartolomé,

15Mateo, (ichpai Leví a thʉ̃r sĩejim);

Tomás,

Santiago, (chi Alfeo iewaa; ichpai agjo Jacobo a thʉ̃r sĩejim);

Simón, (Celotenaan ee sĩerr);

16Judas, (ichpai Tadeo anaa Lebeo a thʉ̃ʉrjerr, deeum agjo Santiago aajerr eeum); maimua

Judas Iscariote, (ich maguata ewag pawi chi thethem khʉʉnag Jesús pʉr deeju ajima i thõomkhĩir).

Jesuu õor pom thʉnʉmʉg Ẽwandam iek jaautarr

(Mt. 4:23-25)

17Maimua ich Jesús dʉi durrsĩe narr khʉʉnpa thum ãba ʉʉrba beewia pheeuregdam ee naaichejim aajem. Maig agjo ich dʉi wenʉrraajerr khʉʉn khapan biirdʉ thʉnʉm ee, ĩchab deeum durram khʉʉnpa õor pom thʉnaajim anaabá: Judea durrmua beetarr khʉʉn, Jerusalenmua beetarr khʉʉn, maimua phũas igaau phobor Tiro anʉm dakha naajerr khʉʉn dʉi Sidón perasom khʉʉnpa thʉnaajim aajem. Ãaur khʉʉn i iek ũrm khõchgau, maagwai tagam khʉʉn sĩi amach monaaupʉi mamkhĩirta mag beewi naajim aajem. 18Mag chadcha ben khaigbam khĩirpierr õor mor ee sĩsid arrjã thum jʉr werppʉinaa monaaupʉimajim anaabá. 19Mag oowia thumaam khʉʉnau i gaai pʉrm iigjeejim anʉm, amach monaaumkhĩir, amachdeu oowai sĩi i gaai pʉr nʉmuapaijã Ẽwandam jua theeg ich gaai wai simuata benegjã ich jua jʉmpiba monaaupʉpʉikham oowia.

Chijã khʉʉnta onee aju aai nʉ

(Mt. 5:1-12)

20Mag õor mor masim khʉʉnpa thʉnarr thum monaaukhapʉiwia ich dʉi ogdʉba wenʉrraajerr khʉʉnagta eerpanaa magjim anʉm, ich Jesuupai:

—Pãar mʉg mʉ iek ũrm khõchgau dau aphʉʉ wenʉrrʉm khʉʉnta onee abat, mʉg atag pãachta Ẽwandam dʉi ãba jooba wenʉrraju aawai. 21Onee abat ajim anʉm, pãar ar Ẽwandamau waupim khõsim nem wawaagta jãsoomjo nʉm khʉʉn. Jãgtarr jũrr mʉg atag pãar bʉ̃ʉrjã augcheba wenʉrrajugui ajim anʉm. Onee abat, pãar mʉ gaaimua dauhi paraa durraajem khʉʉn; mʉg atag pãar okhĩirjug khaugba wenʉrrajugui ajim anʉm. 22Onee abat ajim anʉm, mʉch chi Emkhooi Iewaa iek ʉkha nʉm gaaimua pãach chikhamnau kha ukhurnaa amach aigmua khãijã warag di chaaur pãach jʉʉrwai. Onee abat, chikhamnau pãach wau iekhamamua khãijã, “Jãg woun chan õor ajapham khabam” a iekhaawai. 23Õrau pãach dʉi mag nʉm jaar oob okhĩirjuu amiet ajim anʉm. Mag khãyau warag onee abat ajim anaabá; pãar mag nʉm jũrran ʉ̃gtharin pãar athee nem ajapham poomata thʉnʉm. Ĩs mʉg pãar mʉ gaaimua dau aphʉʉ wau nʉmjo wenʉrraajeejim warrgarwejã, Ẽwandam i jaaujerr khʉʉn. Mamʉ ĩs ʉ̃gthar Ẽwandam dʉi ya am onee nʉmgui a iekhamajim anaabá, am wawí nʉmua.

24Mag iekhakhagmamua ichdeupai, —Mamʉ ¡eh apdurr ajim anʉm, õor amach phatkhonta tho iyʉʉ aajem khʉʉn! Am amach phatkhonag ee am khõchgau Ẽwandam igba arr jũrr, amau mʉg atag oomaa ajurau ajim anʉm. 25¡Eh, apdurr ajim anʉm, mʉg jẽb gaai nem thum paraa bʉ̃ʉrjã augcheba aajem khʉʉn! Jãgtarr khʉʉnta jũrr mʉg atag dau aug ee wetju. ¡Eh, apdurr ajim anʉm, ar sĩi onee am khõchgau bʉ̃ʉrjã amach mor ewag khĩirjuwia okhĩirjuupaijã aba aajem khʉʉn! Amachdeu ampierr am khõchgau Ẽwandam igba arr jũrr pod amach ʉ̃gthar oberba aawai, mʉg atag am icharaucha bĩe nʉisijugui ajim anʉm. Maimua ĩchab, 26¡Eh, apdurr ajim anʉm, ar thumaam khʉʉnau pãar eugar, “Jãan chad woun ajapham pamá” a ig iyʉʉ aawai! Warrgarwejã par chadcha Ẽwandam i chaar khabamta jaaujerr khʉʉn eugarjã ich magta iekhaajeejim, pãar jooinau. Õrau mag am eugar õor ajapham aajeejieb mamʉ, maadeu khaphʉ nʉmgui ajim anʉm, am pod Ẽwandam aar oberba arr.

¿Jãga aju aai nʉ dich kha ukhurm khʉʉn dʉi?

(Mt. 5:38-48; 7:12)

27Mag jaaumamua Jesuu magjim aajem ich iek ũr narr khʉʉnag: —Pãach dʉi iekkhõr paraam khʉʉn kha khõsinaa pãach oomapha aajem khʉʉn dʉijã nem ajapham waubat. 28Pãach chikhamnau thõp iekhaawai magʉm iekjã igba, warag am kõit Ẽwandamag jeeubat. Maimua pãach ãaukha iekhabaadem pʉa chʉuu aawaijã, dʉi ãaukha iekhaju khãyau, warag Ẽwandamagta am kõit jeeubat ajim anʉm. 29Chikhamnau khãijã pʉch gaai mas deewai oob i gaai agjo deem. Mag khãyau ʉdʉraa pʉch gaai mas apibá. Wa pʉch camis khãijã ãbmua khechthʉg aum iigwai warag tagam khajũajã ʉdʉraa irig arrpibá ajim anʉm. 30Wa pʉch nem khãijã ãbmua khechthʉg aum iigwai, meeukhaju khãyau, okhooju awiajã ideu warag arrpibá. Õrau pʉchig nem jeeuwai o ajapha magʉm aba deebá. Wa ãbmua khãijã khũchpaim athee pʉch nemdam jeeu arrwai oob, “Jopkhaa mʉ in deebahur” am ajim anʉm. 31Chikhamnau pʉch dʉi khaigba apimapha sim khai, pʉch garmuajã oob i dʉi khaigba am. Õrau pʉch dʉi apim khõsimjota pʉch garmuajã am dʉi abá ajim anʉm amag.

32Magnaa mag ichdeu parhoobam khʉʉnjo apiba sim igwi, —Pãade khĩirjubat ajim anʉm: Pãrau pãach jãsenem khʉʉnpaita daupii akhiin, ¿maig khan ajaug sĩ? Bʉ̃ʉrjã Ẽwandam iek ʉkhabam khʉʉnaujã amach kha khõsim khʉʉn chan oomap khaba sĩerrjeemgui ajim anʉm. 33Wa pãrau pãach juag oojem khʉʉn juagpaita agjo ookhiin, ¿maigjã khan ajaug sĩ? Mag nʉm aig ʉu khaba sim. Ẽwandam iek ʉkhaba aajem khʉʉnaujã jũrr agdaujo chikham juag oojemgui ajim anʉm. 34Pãrau pãachdeu nem deebarmjo pãachig deejojoo khĩirju nʉm khʉʉnagpaita nem deekhiin, ¿maigjã pãar jãga nʉ? ¿Ich agjo aba aajẽ ajim anʉm, Ẽwandam amach thãar ee chukhu nʉm khʉʉnaujã, deeu agjo amachig nem deemkhĩir? 35Magua muan pãragan, pãach dʉi iekkhõr paraam khʉʉnjã warag kha khõsita abat a chirʉmgui ajim anʉm. Maimua am dʉi o ajapha abat ĩchab, pãach nemdam khũchpaim athee khãijã jeeu arrwai tag deen beebaju khãijãa jãg deebapʉim a iekhaba. Pãrau o ãkhãrag chukhu magmʉn, ʉ̃gtharin pãar athee nem ajapham pooma thʉnʉmgui ajim anʉm. Ĩchab pãar mag wenʉrrʉmʉn magan pãar chadcha Cha Ʉ̃gthaa Phuu Nʉm ag chaainaugui ajim anʉm. Ẽwandamau õrau khĩirjuajemjota khĩirjuajem akhiin, ãba õor ajapham khʉʉnagpaita irua nem deejeekham. Mamʉ i magba thumaam khʉʉn dʉi ajapha khitʉm, õor khaibagjã igba, ni mag ich ajaug khitʉm paarjã õrau ichig ʉu ajim abajujã khĩirjuba. Magua pãraujã agjota aju aai nʉmgui ajim anʉm, pãach khapeen khaibagjã igba. 36Maachin thumaam khʉʉn dau aug khaug paraata anʉm, ar jãg maach Aai ʉ̃gthar simuajã agjo maach thumaam khʉʉn dau aug khaaugjẽpirau.

¿Jãga aju aai nʉ chikham ĩgkhaju khãyau?

(Mt. 7:1-5)

37’Oob chikham ĩgkham khõchgaupai chan chikham pekau phemiet, eeu Ẽwandamau pãach chach nʉm ed magʉm iek igdukham pãach dʉi. Oob “Jãg wounan chad khaibag ee pʉiju aai sim” amiet, eeu pãach iek gaaimuapai Ẽwandamau pãachta khaibag ee pʉidukham. Chikhamnau pãach dʉi khaigba aawai sĩi warag ich mag khĩir akhoobapʉit, tag magʉm iekjã igba. Pãrau pãach khapeen dʉi magmʉn, magan Ẽwandamaujã pãar dʉi agjo ajugui ajim anʉm. 38Pãach khapeenag nem ĩgkhaba deemʉn, Ẽwandamaujã pãrag nem ĩgkhaba deeju. Pãrau pãach khapeenag nem deebarm jũrr, irua pãrag ʉ̃r ag khãyau phẽsu ipiirnaa por simii deeju. Mamʉ pãrau pãach khapeenag chachnaata nem dee nʉmʉn, magan Ẽwandamaujã ich agjopai pãrag deejugui ajim anʉm.

39Mag ejemplodam khĩir pogkhe jaaumamua, —Pãade khĩirjubat ajim anʉm. Woun ãb dau khaugba simua ich khapeer agjo dau khĩsu khitʉm jua gaai pʉr arrkhiin, ãb bʉheu subaadeeu ¿amach numwe burrbaju khai? ajim anʉm. 40¿Pãrau oowai eeu woun nem khaug simua ichig jaau sim khãyau atcha nem khaug sĩejẽ? Ichig nem jaaumam thum khaugbapäaiwain chadau ich maestro denjo nem khaug sĩsiejemgui ajim anʉm. 41Pʉch dau ee pasur pom sim joothʉ thʉnʉm nacha noi aubam aig, ¿jãga pua pʉch khapeer dau eem pasurdam bʉ̃rʉʉ khitʉm noi awaag agá? Maachin nacha dich khĩirjunaata iekha nʉmgui ajim anʉm. 42Wa magbam khai, ¿jãga ãbmua ich khaperag “Daai kake, mua pʉ dau eem pasurdam noi aukhim” aju, mamʉ ich dau eejã ag khãyau nem pom sim joothʉ thʉnʉm noi auba simta? Sĩi chikham jaaum khõchgaupai chan dich wir aig khĩirjubanaa pod mag iekhaju khaba nʉmgui ajim anʉm. Khĩirjug chukdam, nacha dich dau eem pasurta noi auba aajeeb, wajapha oog; maimuan chadau jũrr dich khapeer dau eemjã agjo noipʉi nʉm. Magua dichta nacha khĩirjuba aajeeb chikham jawaag. Dichjã agjo chirʉm chan pod dich khapeen jaauju khabamgui ajim anʉm.

Jãga õor o ajaug khaphʉ aajẽ

(Mt. 7:17-20; 12:34-35)

43Mag jajawagmamua, —Maach jaauju khʉʉn chukhu awiajã maachin dich iekha nʉm gaaimuata õrag dich khap apiejemgui ajim anʉm, õor wäjäauná wa õor khaigbam khʉʉná. Pãrau khaphʉ nʉmgui ajim anʉm, nemjõ ãkhãraa cheejem igwia, “Jãg nemjõon chad ajapha khitabma” aba aajem; maagwai jũrr nemjõ ajapham igwiajã, “Jãg nemjõon chi ãkhãrau” aba aajem. 44¿Pãrau oowai pahach gaai nemjõ khũwaa che sim oojẽ? Kũpud denjã miel wie nʉm ooba aajem. 45Ich agjota nʉm ĩchab maach wounaanjã. Õor khĩirjug ajapham khʉʉnau nem ajapham nemta iekha nʉm, amau nem ajaphata wauju khĩirju naawai; mamʉ o ãkhãraam khʉʉnaun iekhaawaijã nem khaigbamta iekha nʉm, am odi sĩi nem khaigbamta wauju khĩirju sĩsid aawai. Magta õraun maach iyʉʉ nʉm ũr nʉm gaaipai warre khaphʉ aajem, khanim woun agá: woun ajapham wa woun khaigbam.

Õor numí di eutarr

(Mt. 7:24-27)

46’Pãrau mua nem jaau chirʉm ipierraa khaba nʉmta, ¿khanthee mʉ igwia sĩi par iiupai “Pʉʉta maar Porou” aajẽ? 47-48Mua pãrag jaaukhimgui ajim anʉm. Ar chi mʉ aig beewia mʉ iek ũrnaa mua nem jaau chirʉm ipierraa nem waaujem khʉʉnan, biek ãb woun di ewaag jẽbdi khorkha sĩi awia durrkhudau ee ierr ich dibʉ jukhanaa di eutarr wounjota nʉmgui ajim anʉm. Ya mag aaipa dʉnʉisim ee, dohãd pom beewia ag gaai do uu thʉnarrjã chʉyeupʉiba ich mag sĩsijim anaabá, dibʉ ierr jukha sĩerr aawai. 49Mamʉ ar chi mʉ iek ũrtarrta bʉ̃ʉrjã ag ipierraa khaba nʉm khʉʉnan, jũrr agjo woun ãb sĩi khomariipai dibʉ jukhanaa di eutarrjota nʉmgui ajim anʉm. Mag khomariipai eu sĩerr aawai aaipa dʉnʉisim ee, ĩchab noseg pom che thʉnʉʉ arr khur dohãd pom pierrwai, do uu thʉnʉʉ awia sĩi do badag ʉʉrsirpʉijim anaabá. Mag, nem thumaa okhoojimgui ajim anʉm.

Currently Selected:

San Lucas 6: noaA

Highlight

Copy