San Lucas 5

Ãwarr pooma pʉrtarr

(Mt. 4:18-22; Mr. 1:16-20)

1Biek ãb Jesús thʉrrdo Genesaret anʉm igaau sim aig õor pooma podpachewia thet phẽeudʉ i phʉʉr thuur warrmajierram aajem, Ẽwandam iek ũrm khõchgau. 2Mag nʉm ee ichdeu bote numí mos gaai barhʉidʉ nʉm oo athajim anʉm. Ag ee chi morkhʉʉn chukhu naajim anʉm, do ʉreuthurwia do igaau amach red ʉ narr aawai. 3Magbaawai chi bote dau ãb Simón den arr aawai irig jeeuwia, ag ee waaidʉwia, ichigpai bʉchkhun dojãrragaa ich warrpijim aajem. Magnaan chadau jupwia mammua õor khapan thʉnʉmʉg Ẽwandam iek jaaubaadejim aajem.

4Maimua mag iekha obaadeewai chi Simonag, —Dojãrr webapʉi, maimua chi red dubpʉinaa deeu ʉreu oobat ajim anʉm.

5Magbaawai Simonau jũrr magjim anʉm:

—Aay, edaar maach daúa bʉ̃ʉrjã khãiba parii ʉreu eedʉtkhamaamjã bʉ̃ʉrjã marau pʉr aubajim. Mamʉ pʉ iek aawai deeu mua chach oojuke ajim anʉm.

6Maimua chadcha mag dubpʉiwia jiir oowai ãwarr pooma thʉnʉmua chi red dau thʉrrdʉmaa ajim anaabá. 7Magbaawai amach khapeen deeum bote ee narr khʉʉnag jua thõthõi khaphobaadejim anʉm, amach juag oon beemkhĩir. Mag chadcha warm khʉʉn beewia jiir athaawai bote numwe ipiir aujierram anaabá. Mag, bote numí narr ãba peer joothũpjierram aajem. 8-9Mag Jesús ipierraa arr gaaimuapai ãwarr pom pʉr atham oobaawai Pedro dʉi jap ãbam ee narr khʉʉnaupa, “¿Mʉʉn khanim wounta ag na mʉg ooba aajemta ãwarr pom mʉg pʉr aupibarma?” a khĩirju nʉisijim anʉm. Ich mag bʉrre Simón Pedroou Jesús bʉkhʉrr phõbkha thʉnaaimawia irig, —Señor, oob mʉ dʉi ãba nʉrram. Mʉʉn atcha pekau pooma chirʉm pʉ mʉ dʉi nʉrraag ajim anʉm.

10Maagwai Pedro khapeen ãbakhai bote ee narr khʉʉnaujã ĩchab amach khapeenau khĩirju narrjo khĩirju nʉisijim anaabá. Mag bote ee naajim aajem Zebedeo chaain, Santiago Juan dʉi. Mamʉ Jesuu chi Simonag, —Simón, oob khĩirjum ajim anʉm. Warr pʉch sĩi do ʉa gaaipai chitarrjo, ĩsmua atagan pʉʉn jũrr mʉ iekta õrag jaau gaaipaita chirsijugui ajim anʉm.

11Maimua do igaau paaukhachewia warag i dʉi mam iek ereubaadejim anaabá, amach nem thum pʉawia.

Jesuu woun ãb kokobé beneu sĩerr monaautarr

(Mt. 8:1-4; Mr. 1:40-45)

12Maimua biek ãb Jesús deeum phobor ee sim aig woun ãb kokobé beneu sĩi phĩe kha dodos sim barchejim aajem. Mag wounau oo athaawai jẽkhʉt phõbkhanaa, jẽb gaai dagau dʉrnaa, chaigpamamua irig, —Señor, pua khõs chirʉm khai, mʉg phĩedau warre mʉ gaaimua chugpaabapʉi aichejim anʉm.

13Magbaawai Jesuu i gaai pʉrnaa, —Mua pʉ monaaum khõsi chirʉm; monaau chirsí magan ajim anʉm.

Magbarm bʉrre chi phĩe kha dodos chirarr monaau sĩsiewai mor ajappha sĩsijim anaabá. 14Mag ya monaau sĩsiewai, Jesuu irig magjim anʉm:

—Pʉch mʉgbarm oob chikhamnag jawam. Magju khãyau nacha Jerusalén mawia Aai i jeeujem degam phadeg pʉch mor oopibaimá. Maimua Moiseeu iek phãtarr gaai jaau simjo pʉch monaaubarm paar nemchaain ofrendakha deebá ajim anʉm, pʉch mʉg monaau sĩsim õrag khap amkhĩir.

15Ich Jesús mag gaaimua sĩi warag õor ee thʉ̃rphoo sĩsijim anaabá. Maagwaita warag õor pom biirdʉdʉ aajeejim anʉm i iek ũraag, maimua ĩchab amach monaaupʉi mamkhĩirjã agjo. 16Mamʉ magʉm ãba, Jesús chawag maajeejim aajem, ich appai õor chukag chʉʉi Ẽwandamag jewaag.

Jesuu woun ãb khapá jʉser khitʉm monaautarr

(Mt. 9:1-8; Mr. 2:1-12)

17Biek ãb Jesuu Ẽwandam iek jaau sim aig fariseonaan dʉi Ẽwandam iek athee chi machnaanpa ohood thʉnaajim. Makhʉʉn phobordam nʉnʉidʉmpierrmua beetarr khʉʉn ajim aajem: Galilea durrmua beetarr khʉʉn, Judea durrmua beetarr khʉʉn, maimua ĩchab Jerusalenpienpa dʉi naajim aajem. Maagwai Ẽwandam juapa theeg i gaai sĩejim anʉm, õor monawaag.

18Mag nʉmta õrau woun ãb khapá jʉser khitʉmta pa bʉʉrkham gaai waiduraa ajierram aajem, Jesús sim aar wai dubwia i khĩirphee werba sĩwaag, monaaupʉimkhĩir. 19Mamʉ dubju ẽkha nʉm õor pom thʉnʉm khurau pod dubba abaawai, diheu ʉ̃r waaidʉtkha phobaadewia, nem wäg waunaa, chi pa bʉʉrkham gaai jʉ̃gadau jʉ̃khanaa, chi aaunaanpa eeg jiir burrpʉijierram aajem, õor jãrr Jesús iekha oo sim khĩirpheecha. 20Mag ich aig wai burrbaichem oobaawai, irua chi wounaan o akhaar ãba iruata amach aaunaan monaaupʉiju khĩirju nʉm khaphʉ sĩerr aawai, chi khapá jʉser khitʉmʉgta, —Pʉ pekau thum ya chugpaa sĩsimgui ajim anʉm.

21Mag ũrwia fariseonaan dʉi Ẽwandam iek athee chi machnaanpa aig narr khʉʉnau amach odegpai, “¿Chijãg wounta Ẽwandam na mag iekha sĩma? ¿Khaíu mʉig pekau chugpaaju aai sĩ? Ẽwandamau khabam chan pekau chugpaa auba aajem” anaajim anʉm.

22Mamʉ Jesuu amau mag khĩirju nʉm khaphʉ sĩerr aawai amag magjim anʉm:

—¿Khantheeta pãar jãg thãar khaigba khĩirju sĩsid aajẽma? 23¿Wa mag pekau chugpaabarmjã dau daau ooba naawai pãrau khĩirjuawai chadcha phithurg chukhu thumaam khʉʉnau mag iekhaju aai nʉm a nʉwa? Chadcha thumaam khʉʉnau mag iekhaju aaima. Mamʉ mua irig “Phiidʉwi dʉrdʉr abá” akhiin, õrau amach daúacha ooju, i monaau sĩsi wa monaauba khãijã ich mag sĩsim. Magua pãrau mʉ denjo chan cha mua jawaagpamjo abajugui ajim anʉm. 24Mamʉ mʉch chi Emkhooi Iewaata chadcha Ẽwandamau juapá deetarrau mʉg jẽb gaai pekau chugpaagjã jua theeg chirʉm a khap amkhĩir, pãrag oopikhimgui ajim anʉm.

Maimua chadcha chi khapá jʉser khitʉmʉgta, —Phiidʉbá. Pʉch put juurwia, pʉch diig petá ajim anʉm.

25Magbarm bʉrre thumaam khʉʉn dakhĩir phiidʉbaadewia, ich waibeetarr pa bʉʉrkham dʉi putpa phe auwia, ich diig petajim anaabá. Mag mamua, “Ĩsin chadau Ẽwandam purua mʉ ʉu abarm” a ijẽjẽbag majim anʉm, onegau.

26Mag chi woun phiidʉbaadem oowia aig narr khʉʉn thum dauderraa nʉm iekhau, “Jãan ich iiuta jãgbarm” anaa ĩchab, “Ĩs Ẽwandamauta maadeu mʉg ooju khĩirjuba narrjã oopibarm” anaajim aajem, amach ap pawiajã.

Jesuu Leví ich dʉi arrtarr

(Mt. 9:9-13; Mr. 2:13-17)

27Maigmua oberwia igbaadeeu ooimajim aajem, woun ãb Leví a thʉ̃r sim. Mag woun õrau debpaar phagaan beejem aig mes gaai päar sĩejim aajem, gobiernoog õrau debpaar paraa nʉm jeeu nʉm phidagta phidkha sĩerr aawai. Magʉgjã Jesuu, —Mʉ dʉi marrau ajim anʉm.

28Magbaawai chadcha Leviiu phiidʉwia ich phidagjã khaugba, i dʉi petajim anaabá. 29Maimua ich di aar barwia phiejãb pom waupijim anʉm, Jesús khopieg. Mag nʉm dʉi ĩchab ich khapeen thʉ̃rkhʉʉijim aajem, ich aig thach khoon beemkhĩir. Magbaawai debpaar jeeujem khʉʉn khapan wedurum dʉi parhoobam khʉʉnpa beewia ãba thach kho naajim aajem, Jesús dʉi.

30Mamʉ magbaawai chi ajapcha Moiseeu Ẽwandam iek phã pʉatarr ʉʉrkhaajem khʉʉnau Ẽwandam iek athee chi machnaan dʉimua Jesús khapeenagta, —¿Khan jãgwiata pãar jãg gobierno debpaar jeeujem khʉʉn dʉi pekau pom sĩsidʉm khʉʉnpa ãba thach kho nʉma? a jeeujierram anʉm.

31Magbaawai Jesuu magjim anʉm amag:

—Kha monakha nʉm khʉʉnau chan doctor igba aajem; ãba mor masi nʉm khʉʉnauta doctor iigjem. 32Mʉ chan bʉ̃ʉrjã pekau chukhu ajappha khitheem aajem khʉʉn jʉraanjã beeba, mʉʉn õor pekau pooma khitheem khʉʉn peerdʉ awaanta beejimgui ajim anʉm, khĩirjug iiur aumkhĩir. Maguata mag am pekau pom nʉmjã igba, am dʉi mʉ thach kho chirabahab ajim anʉm, amjã Ẽwandam denkha awaag.

¿Khanthee thach khoba sʉrkhaju aai nʉ?

(Mt. 9:14-17; Mr. 2:18-22)

33Maigmua Jesús ich khapeen dʉi ober phobaadem ee, õor beewia Jesuug magchejierram anʉm:

—¿Khan jãgwia Juan dʉi wenʉrraajem khʉʉnau thach kho nʉmjã ʉ̃iba sʉrkhanaata Ẽwandamag jeeujem daar, pʉ khapeenau sʉrkhaba aajẽ? Chi ajapcha Moiseeu Ẽwandam iek phã pʉatarr ʉʉrkhaajem khʉʉn igar nʉm khʉʉnaujã agjo sʉrkhaajem, mamʉ pʉ khapeenau chan ajap magba aajerram. ¿Jã khan jãgwiauma? a jeeujierram aajem irig.

34Magbaawai ichdeu amag magjim anʉm:

—¿Pãrau oowai chi jua pʉr sim woun onee ich ʉʉi dʉi thach kho nʉmich, irua õor thʉ̃rtarr khʉʉn sʉrkha nʉm awia sĩi okhĩirjuu ohoodo naajẽ bʉ̃ʉrjã thach khoba? 35Magba aajem. Ich agjota nʉmgui ajim anʉm mʉ khapeenjã. Am magjuun mʉ am jaaijo am dʉi chitʉm pʉr atham ed gayan chadau am amach khĩrauta sʉrkhawia, ĩchab thachjã khoba nʉisip aju, gaai machgau. Mamʉ mʉʉgwaiwe chan am sʉrkhaju khaba nʉmgui ajim anʉm, agtha mʉ am dʉi chiraawai.

36Maimua ichdeupai magjim aajem:

—Pãach khajũa jẽbaadeewai, ¿pãrau oowai khaíu dich khajũa iiur gaaim jẽnaa jũrr chi jooi gaai khaajẽ? Maadeu magkhiin dich khajũa ajaphamta ãrpʉiju. Maimua mag phẽebarmjã khĩir ãba khaba daau phẽe wejom thumaam khʉʉnau ooju. Ich agjota sim ĩchab mʉg iek iiur mua jaau chirʉmjã. Chi mʉ iek ʉkha simua chan mʉg iek iiur mua jaau chitʉmjã ʉkhanaa pod amach jooin ijã agjo ʉʉrkhaju khaba simgui ajim anʉm. 37Mʉg mʉ iek ʉkha nʉmʉn maadeu vino nemheu iiur ee pʉajemjota sim. Pãrau khaphʉ nʉmgui ajim anʉm, vino õrr nemheu jooi ya chi pʉajem ee pod pʉju khaba sim. Mag pʉkhiin chi vino õrr achpabaadeewai, chi nemheu jooiraa sĩewai ãwatba jẽgdʉbaadee, chi vinojã ãrbaadem dʉi chi nemheujã ya tag serbiiba sĩsiju. 38Maguata vino õrran agjo nemheu iiur eeta pʉajem; maagwai chi nemheujã jẽgdʉba, chi vinojã ãrbamgui ajim anʉm ich Jesuu. 39Mag iekhakhagmamua, Pãrau khaphʉ nʉmgui ajim anʉm, chi vino ach doo khaug nʉm khʉʉnag am dopho thʉnʉm aig chi õrr deeimakhiin, amau “Ʉ̃hʉ̃, maraun chi achta ig nʉm, jãata marag ajapcha sim” aju. Ich agjota pãrau mʉ iek ũrmapha, warag pãach iita pʉaba wenʉrram khõsi nʉmgui ajim anʉm.

Currently Selected:

San Lucas 5: noaA

Highlight

Copy